Ashkha cristianosqa, familiaresninchejwan chayri hermanosninchejwan Internetnejta parlarikunchej. Jinapis wiñay tukusqa cristianos kaspaqa, kay yuyaychayta kasukusun: “Yuyayniyojqa sajra kajta rikuspa, pakakun; mana yuyayniyojrí chimpaykullan, chantá ñakʼarin” (Pro. 27:12).

Jehová Diosqa jarkʼayta munawanchej. Chayrayku mana munanchu congregacionta tʼaqanachejkunawan, qharqochikojkunawan chayri pantasqa imasta yachachejkunawan tantakunanchejta (Rom. 16:17; 1 Cor. 5:11; 2 Juan 10, 11). Congregación ukhupipis, wakenqa mana Bibliaj nisqanman jinachu kausakunku. Chayrayku sumajta qhawarikunanchej tiyan, pikunawanchus masichakushasqanchejta (2 Tim. 2:20, 21). Uyapura parlarikuspaqa, amigosninchejta sumajta ajllayta atisunman. Jinapis mensajesnejtaqa mana chayta ruwayta atisunmanchu.

Wakin hermanosqa waj hermanoswan parlarikuyta munaspa, Internetpi jatuchaj gruposta rikhurichinku. Jinapis chayta ruwajkunamanta wakenqa, llakiypi rikhurerqanku. Chayrayku niraj chay gruposman yaykushaspa allinta piensarinanchej tiyan. Chantapis wakin grupospeqa, may chhika hermanos kashanku. Chayrayku mana yachayta atisunmanchu, tukuyninkupunichus testigos kanku manachus chayta. Nillataj yachayta atisunmanchu creeypi sinchʼi sayasqachus manachus kashasqankuta. Salmo 26:4 nin: “Llulla runaswan ni jaykʼaj kawsakorqanichu, nitaj puraj uyaswanqa tantakorqanichu”, nispa. Chayrayku pikunatachus rejsinchej, chaykunallawan Internetnejta mensajeana.

Mana jatuchaj grupospi kaspapis, allinta qhawarikunanchej tiyan mashkha tiempotachus mensajesta apachinakushasqanchejta, imasmantachus parlashasqanchejtapis. Chantapis mana sapa mensajemanpunichu kutichinanchej tiyan. Apóstol Pabloqa Timoteoman qhelqashaspa nerqa, wakenqa “cuento qʼepis” kasqankuta, wajpa kausayninkumantaj satʼikusqankuta (1 Tim. 5:13). Kunanpis Internetpi ashkhas ajinallataj kanku.

Wiñay tukusqa cristianoqa, mana wajkunapaj sajrata parlanchu, nitaj wajkunamanta imatachus yachasqanta wajman willarqonchu. Nillataj wajkuna chay imasta parlajtinku uyarinchu (Sal. 15:3; Pro. 20:19). Chantapis mana tukuy ima willasqankutachu creen, nitaj chay willasqankuta wajkunaman chay rato willarqonchu. Imaraykuchus payqa yachan, wakin willaykunaqa yapasqa kasqanta, wakintaj mana cheqapunichu kasqanta (Efe. 4:25). Noqanchejqa yachanchej, Bibliamanta yachachiykuna, cheqa willaykunapis jw.org nisqapi, Broadcastingpi imalla kasqanta.

Wakin hermanosqa Internetpi gruposta ruwanku: vendenankupaj, rantinankupaj, trabajadoresta maskʼanankupaj, chayri chayman rijchʼakoj imasta ruwanankupaj. Chaytaj mana Jehová Diosta yupaychaypi yanapawanchejchu. Noqanchejqa ‘mana qolqemanta wañurishanchejchu’. Chayrayku mana hermanosninchejmanta valekuspa qolqeta maskʼanchejchu (Heb. 13:5).

Jinapis wakin hermanosqa, mana qolqeta gananankupajchu Internetpi gruposta rikhurichinku. Astawanpis hermanosta munakusqankurayku chayta ruwanku. Paykunaqa pisichikoj hermanosta, chayri llakiypi tarikoj hermanosta yanapariyta, sonqochariyta ima munanku (Sant. 2:15, 16). Jinapis, ¿allinchu kanman chay hermanosta yanapanapaj Internetpi jatuchaj gruposta ruwananchej? Mana. Chayta ruwaspaqa hermanosta yuyachisunman, noqanchejpuni hermanosta yanapanapaj ajllasqa kasqanchejta. Chantapis sucursalmanta hermanospa, ancianospa ruwanankuman satʼikushasunman (1 Tim. 5:3, 4, 9, 10, 16).

Noqanchejqa tukuy imata “Dios jatunchasqa kananpaj” ruwayta munanchej (1 Cor. 10:31). Chayrayku niraj ima mensajetapis Internetnejta apachishaspa, allinta piensarinanchej tiyan chayta ruwananchej allinchus manachus kasqanta.