E jujun cristianos kkikoj ri teléfono o computadora rech kechʼaw kukʼ ri kifamiliares o nikʼaj chi Testigos. Qastzij che ri e qachalal che ko ri kikojonik kkinimaj wajun pixabʼ riʼ: «Ri utz kchomanik kril ri sayowem kel kʼu na chuwach; ri man utz ta kchomanik kutaqej ri ubʼe kqajbʼex kʼu rumal ri winaqchiʼ» (Prov. 27:12).

Qetaʼm che ri Jehová kraj kojuchajij. Rumal laʼ keqachilaj ta winaq che kkijach wachaj, e esam bʼi pa ri congregación o kkikʼut molom taq tzij (Rom. 16:17; 1 Cor. 5:11; 2 Juan 10, 11). Weneʼ e kʼo jujun ri e kʼo pa ri congregación kkinimaj ta ri ktaqan wi ri Biblia (2 Tim. 2:20, 21). Kʼax ta más kichaʼik ri e qachiʼl are chiʼ qas kqil kiwach, are kʼu je ta kkʼulmatajik are chiʼ kqakoj aplicaciones re mensajes.

We kqaj kojok pa jujun grupo re mensajes, chqachomaj jas kiwach winaq keqachilaj. E jujun qachalal kinimom kibʼ pa taq ri grupos riʼ y kʼo kʼax kiriqom. ¿Jas kqabʼan che uchajixik qibʼ we pa ri grupo re mensajes e kʼo kʼiʼalaj winaq? Kojkun ta riʼ kqetaʼmaj e jachinoq y jas kibʼanom pa ri kikojonik. Salmo 26:4 kubʼij: «Mawi jumul xeʼenwachilaj ri bʼanal taq tzij, mawi xinwukʼaj ta wibʼ kukʼ ri kebʼ kiwach». Wariʼ kukʼutu che are más utz xaq xiw keqachilaj winaq che qas qetaʼm kiwach.

Xuqujeʼ pa ri alaj taq grupos, rajawaxik kqil ri tiempo kqakoj che utaqik bʼi mensajes y kqachajij qibʼ chuwach ri jastaq che ktzijox chupam. Rajawaxik taj kqatzalij bʼi uwach ronojel ri mensajes che ktaq loq apastaneʼ ri jastaq ktzijoxik y paneʼ kqʼatiʼ ta ri mensajes che kkitaq ri e nikʼaj chik. Ri Pablo xubʼij che ri Timoteo che rajawaxik kuchajij ribʼ chkiwach ri e winaq che «e yakal taq tzijtal [o ajaltzijol], kkinim kibʼ pa ronojel» (1 Tim. 5:13). Kimik xuqujeʼ kkʼulmataj wariʼ pa Internet.

Ri cristianos che ko ri kikojonik kkinim ta kibʼ kukʼ winaq che keyoqʼonik o kkibʼij jastaq che yaʼtal taj ketaʼmaxik (Sal. 15:3; Prov. 20:19). Kkitatabʼej taj o kkesaj ta ubʼixik jastaq che qas ta etaʼmatalik we qastzij (Efes. 4:25). Pa ri qakʼolbʼal jw.org y pa JW Broadcasting^® re ronojel taq ikʼ kyaʼ kʼi qawa pa ri qakojonik y chilaʼ kqetaʼmaj wi ri qas kkʼulmataj pa nikʼaj chi tinamit.

E jujun Testigos kkikoj ri aplicaciones rech kkibʼan kikʼayij, kkiloqʼ jastaq o rech kkitzujuj kichak e nikʼaj chik. Wariʼ xa jastaq re ri chak o ri kʼayij, rajawaxik kqayujaʼj ta rukʼ ri qaqʼijilanik che ri Dios. Ri cristianos che are ta kkiloqʼoqʼej ri pwaq kekikoj ta ri e qachalal rech kkichʼak kirajil chkij (Heb. 13:5).

Y, ¿la utz kkoj ri aplicaciones riʼ che umolik pwaq rech ketoʼ ri e qachalal che kʼo kajwataj chke y re ri labores de socorro? Rumal che keqaloqʼoqʼej ri e qachalal, amaqʼel kqaj kqaya kichuqʼabʼ y keqatoʼ rukʼ ri kajwataj chke (Sant. 2:15, 16). Are kʼu, we kqataʼ tobʼanik pa jun nimalaj grupo re mensajes, weneʼ xa tajin kqatoqij ri chak che kkibʼan ri e qachalal re ri sucursal o ri e kʼamal bʼe re ri congregación, e areʼ are más utz kkibʼan che ubʼanik (1 Tim. 5:3, 4, 9, 10, 16). Y qastzij riʼ che kʼo ta nijun cristiano kubʼano che jetaneʼ are kojom che kichajixik ri e nikʼaj chi qachalal.

Kqaj che ronojel ri kqabʼano kuya uqʼij ri Dios (1 Cor. 10:31). Rumal laʼ, are chiʼ kqachaʼ ukojik jun aplicación re mensajes o jun chi jastaq, chqakojoʼ utz chomanik y chojchoman chrij ri kʼax che kukʼam loq.