Wakin wawqi panikunaqa, familiankunawan o wakin wawqi panikunawan parlayänampaqmi mensäjikunata mandanakuyan. Peru alli tantiyaqkunaqa, Biblia kënö ninqantam cuentaman churayan: “Käyikuq nunaqa ima mana allipitapis witikunmi. Mana käyikuq nunaqa mana alli kashqanta rikëkarpis manam witikuntsu. Tsënöpam mana allimanpis jeqarkun” (Prov. 27:12).

Jehoväqa cuidamënintsikta munarmi, rakikätsimënintsikta munaqkunawan, congregacionpita qarqushqakunawan y mana rasumpa kaqta yachatsikoqkunawan mana juntakänapaq nimantsik (Rom. 16:17; 1 Cor. 5:11; 2 Juan 10, 11). Itsa congregacionchö kaqkunapis, Bibliapita yachakunqantsiknötsu wakinqa portakuyan (2 Tim. 2:20, 21). Pitapis rikarninqa manam fäcil-llatsu amïguntsik kanampaq akrantsik. Peru mensäjikunata qellqapänakurqa, itsa raslla amïgu tikrarishwan.

Internetpa mëtsikaq qellqapänakuyanqan grüpukunaman yëkuyta pensëkarqa, pï nunakuna kayanqanman pensashun. Wakin wawqi panikunaqa tsënö grüpukunachömi kayashqa, y mana allikunapam pasayashqa. ¿Imanöraq cuidakushwan juk grüpuchö mëtsikaq kayaptinqa? Manachi pikuna kayanqanta y Bibliapita yachakunqantsiknö portakuyanqantaqa musyashwantsu. Bibliachömi, Salmus 26:4 kënö nin: “Ulikuqkunawanqa juntutsu manam kawarqü. Alli tukuqkunawanqa manam juntakurqütsu”. Mas alliqa kanqa, reqinakunqantsikkunallawan parlanqantsikmi.

Y këkanqantsik grüpuchö wallkaqlla kayaptimpis, cuidakunantsikmi ëka tiempu y imapaq qellqapänakur këkanqantsikpita. Manam imapaq ni mëtsika tiempupa qellqapänakuyaptimpis, llapan niyanqantatsu contestanantsik. Apostol Pablum Timoteuta consejarqan, wasa rimaqkunawan y jukpa asuntunkunaman mëtikoqkunawan mana juntakänampaq (1 Tim. 5:13). Kanan witsankunaqa, tsënö nunakunaqa Internetchöpis kanmanmi.

Jehoväwan alli amïgu kaqkunaqa, juk grüpuchö pipaqpis mana allita parlayaptin o jukkuna mana musyayänampaq kaqkunata parlayaptinqa, manam mëtikuyantsu (Sal. 15:3; Prov. 20:19). Manam mantsakätsikoq o rasumpa kanqanta mana musyayanqan noticiakunata wiyayantsu ni willakuyantsu (Efes. 4:25). Noqantsikqa jw.org päginantsikchö y JW Broadcastingchö^® cada killa yarqamoq progrämakunachömi, mëtsika noticiakunata tarintsik y Diospita yachakuntsik.

Wakin wawqi panikunaqa, qellqanakuyänampaq aplicacionkunatam utilizäyan rantikuyänampaq, rantiyänampaq, imata rantikuyanqanta willakuyänampaq o trabajëta munaqkunata ashiyänampaq. Tsënö grüpukunaqa manam Diosta sirwinapaqtsu kayan, sinöqa trabäjupaq y negociukunapaq parlayänampaqmi. Qellëta kuyëta mana munaq wawqi panikunaqa, manam tsë aplicacionkunawan wawqi paninkunapita provechakuyta ashiyantsu (Heb. 13:5).

Y wawqi panintsikkuna imatapis wanayaptin, o ima desgraciapa pasayaptin yanapanapaqqa, ¿allitsuraq kanman qellëta mañakunantsikpaq tsë aplicacionkunata utilizänantsik? Wawqi panintsikkunata kuyarmi, pëkunapaq yarpachakuntsik, y wanayanqan o minishtiyanqankunachö yanapëtam munantsik (Sant. 2:15, 16). Peru mëtsikaq qellqapänakuyanqan grüpuchö tsë asuntupaq parlashqaqa, itsa Betelpita yanapakuyänampaq o creikoqkunata rikaqkuna mas alli yanapakuyänampaqqa, yanapakuykashwantsu (1 Tim. 5:3, 4, 9, 10, 16). Y manachi mëqan wawqi panipis, wakinta yanapanampaq pëta encargayanqantanö rikätsikuyta munanmantsu.

Imata ruranqantsikchöpis, Jehovä alabashqa kanantam munantsik (1 Cor. 10:31). Tsëmi mensäjikunata apatsinakur o juk aplicacionkunata utilizarqa, cuidädu kanantsik.