Huaquin huauqui panicunaca familiacunaman, amigocunaman mensajecunata cachangapaj, cayangapajmi chꞌican chꞌican aplicacioncunata utilizancuna. Pero caicunata utilizashpapish cuidadotami charina can. Proverbios 27:12-pica: “Alli yuyaiyuj runaca, ima llaqui japina cajpica anchurinmi. Ashtahuanpish yachai illajcunaca, quiquin chaquihuan llaquipi yaicunllami” ninmi.

Jehová Diosca ñucanchijtami cuidasha nin. Chaimantami congregacionmanta llujchishcacunahuan, panda yachachijcunahuan tandanacuchunca mana munan (Romanos 16:17; 1 Corintios 5:11; 2 Juan 10, 11). Maijancunaca tandanacuicunaman rishpapish Biblia yachachishcacunataca mana cazuncunachu (2 Timoteo 2:20, 21). Chaimantami paicunahuanca mana amigarina canchij. Pero maipica mensajecunata cachashpaca picunahuan parlacushcataca mana alli yachanchijchu. Chaimi cuidarina canchij.

Maipica mensajecunata cachangapajca 100 o 1000 yalli gentecunahuanmi shuj grupota rurancuna. Cashna jatun grupocunapi cashcamantami maijan huauqui panicunaca llaquipi urmashcacuna. Cai jatun grupopica picuna cashcata, Diostapish alli sirvijcuna cashcataca mana yachai tucushunchu. Salmo 26:4-pica: “Mishqui shimi jayaj shungucunahuanca, mana tiyarircanichu. Ñahui ricuillapi alli tucushca purijcunapajmanca mana yaicushcanichu” ninmi. Chaimantami ñucanchij rijsishcacunallahuan mensajeta cachashpa parlana canchij.

Uchilla grupocunapipish mensajecunata cachashpa ama yallitaj tiempota pasangapajmi cuidarina canchij. Chai grupopi ima temamanta parlajpipish mana tucuita ricushpa cutichinachu canchij. Maijancunaca chai grupopica shujtajcunamantami mana allita nincuna. Paicunapaj causaipipishmi satirincuna. Pabloca Timoteomanca cashna laya gentecunamanta cuidarichunmi mandarca (1 Timoteo 5:13).

Sinchi feta charij huauqui panicunaca shujtajcunamantaca ima mana allicunataca mana nincunachu. Shujtajcuna pimanta mana alli nijpipish mana uyancunachu. Imata mana parlana cajpica shujtajcunamanca mana parlancunachu (Salmo 15:3; Proverbios 20:19). Shinallataj panda noticiacunatapish mana uyancunachu. Ima noticiacunata mana alli yachashpaca shujtajcunamanca mana huillancunachu (Efesios 4:25). Ashtahuanpish paicunaca jw.org paginapi, JW Broadcasting^® programacunapi llujchishca noticiacunata, yachachishcacunallatami ricuncuna.

Huaquin huauqui panicunaca imata cꞌatungapaj, imata randingapaj o trabajota ima shina charingapajmi mensajecunata cachancuna. Pero caicunaca Diosta sirvinahuanca mana imata ricunata charinchu. Shinapish Diosta alli sirvijcunaca cullquita charina raicullaca shujtaj huauqui panicunataca cullquitaca mana llujchincunachu (Hebreos 13:5).

Cutin huauqui panicuna imapi ayudachun minishtishcata yachashpaca paicunata cꞌuyashcamantami cullquihuan, ima minishtirishcacunahuan ayudanchij (Santiago 2:15, 16). Pero ¿paicunata ayudangapajca shuj jatun grupota rurashpachu shujtaj huauqui panicunata cullquita mañana canchij? Mana. Chaita rurashpaca sucursalta pushaj huauquicuna, congregacionta pushaj huauquicuna, shujtaj huauqui panicunata ayudachunmi jarcashun (1 Timoteo 5:3, 4, 9, 10, 16). Ñucanchijlla shujtajcunata ayudaj cashcata shinaca mana ricuchinachu canchij.

Tucuipi imata ruracushpapish Jehová Diostami jatunyachisha ninchij (1 Corintios 10:31). Chaimantami llaquicunapi ama urmangapajca celularpi o computadorapi mensajecunata cachacushpaca cuidarina canchij.