Wakiqninchikqa internetnintakamam ayllunchikkunawan utaq iñiqmasinchikkunawan rimanchik, ichaqa yuyaywanmi servichikunanchik. Diospa nisqantam yuyarinanchik, paymi nin: ‘Yachayniyuq runaqa sasachakuyta qawaspam asurikun, mana yuyayniyuqmi ichaqa sasachakuyman yaykuspa ñakarin’, nispa (Prov. 27:12).

Jehova Diosqa imatapas niwanchik allinninchikpaqmi, chaymi payqa niwanchik llaqtanmanta rakikuruqkunawan, mana kasukuy munaqkunawan hinaspa pantay yachachiqkunawan mana hukllawakunanchikpaq (Rom. 16:17; 1 Cor. 5:11; 2 Juan 10, 11). Wakinkuqa ichapas ñuqanchikwan huñunakuspankupas Diospa kamachikuyninkunataqa mana kasukunkuchu (2 Tim. 2:20, 21). Chayna kasqankutaqa manam yachachwanchu internetnintakamalla qillqanakuspaqa.

Chaymi internetnintakama achkawan qillqanakuyta munaspaqa sumaqta yachananchik pikunawan qillqanakunanchikta. Wakin iñiqmasinchikkunam cuentata qukururqaku achka-achkawan qillqanakuyqa wakinpi mana allin kasqanta. Qillqanakusqanchikpi pachaknintin utaq waranqantin kaptinqa manam sumaqtaqa yachayta atichwanchu pikuna kasqankutapas nitaq Dios serviyninkupi imayna kasqankutapas. Bibliapim nin: “Llulla rimaq runakunawanqa manam kawsakullarqanichu. Iskay uya runakunawanqa manam kuskanchakurqanichu”, nispa (Sal. 26:4). Chayraykum mana riqsisqanchikkunawan qillqanakuyqa mana allinchu.

Asllawan qillqanakuspanchikpas, ¿hayka tiempotaq hinaspa imakunamantataq qillqanakunchik? Manam lliw qillqamusqankumantachu ñuqanchikpas qillqananchik manaña tukuyta rimaptinkupas. Pablom Timoteota nirqa ‘cuento qipi kayqa hinaspa hukkunapa vidanman chapukuyqa’ mana allin kasqanta (1 Tim. 5:13). Internetnintakama mana yuyaywan qillqanakuspaqa chaymanmi chayaruchwan.

Yuyayniyuq kaspaqa manam iñiqmasinchikkunamantaqa mana allinkunataqa rimasunchu, nitaqmi uyariyllapas-uyarisunchu. Manataqmi mana willana kaqkunamantaqa willakachakusunchu (Sal. 15:3; Prov. 20:19). Imamantapas mana sumaqta yachaspaqa manam hukkunamanqa qillqasunchu, nitaqmi paykuna chaymanta qillqamuwaptinchikqa ñawinchasunchu (Efes. 4:25). Internetpim jw.org niqpi hinaspa sapa killa lluqsimuq videonchikkunapi tarichwan bibliamanta achka yachachikuykunata chaynataq iñiqmasinchikkunamanta willakuykunatapas.

Wakin iñiqmasinchikkunam achkawan qillqanakuspanku internetnintakama imatapas rantikunku, rantinku utaq llamkaqkunata maskanku. Chaykunaqa Dios serviyninchikmanta sapaqpim kanan. Bibliapa nisqanman hinam ñuqanchikqa ‘mana qullqilla maskaymanqa qukurunanchikchu’, chaymi iñiqmasinchikkunataqa mana hikutananchikchu imatapas rantiwananchikpaqqa (Heb. 13:5).

Chaymantapas, iñiqmasinchikkunata kuyasqanchikraykum yanapayta munanchik (Sant. 2:15, 16). Ichaqa, ¿allinchu kanman internetnintakama qillqanakuspa sasachakuypi tarikuq iñiqmasinchikkunata yanapanapaq hukkunata qullqi mañayqa? Manam allinchu. Sasachakuypi tarikuq iñiqmasinchikkunata yanapanankupaqqa kachkanku betel wasipi iñiqmasinchikkunam hinaspa iñiqkunapi punta apaqkunam. Paykunapa ruwayninkutaqa manamá sasachayta munanchikchu (1 Tim. 5:3, 4, 9, 10, 16). Manataqmi munanchikchu iñiqmasinchikkunata yanapasqanchikrayku chaypaq akllasqa kasqanchikta piensanankutaqa.

Imata ruwaspanchikpas taytanchik Jehova Dios hatunchasqa kanantam munanchik (1 Cor. 10:31). Chaynaqa, yachaywanyá internettaqa servichikusun.