Huaquin huauquipanicunaca Internetta, telefonotaca paicunapa familiacunahuan, shuj huauquipanicunahuanbash parlangapami utilizan. Shinapash ali yuyaita charij huauquipanicunaca caicunata utilizangapaca Bibliapa cai consejotami cazun: “Ali yuyaita charij runaca, ima llaqui japinata ricushpaca anchurinmi. Ashtahuangarin nara yachajushca runacunaca, yangata rishpa llaquichi tucunllami” (Prov. 27:12).

Jehová Dios ñucanchicunata cuidangapaj munashcata yachaimandami problemacunata, fiñanajuicunata alicachij gentecunahuan, expulsashcacunahuan o pandata yachachijcunahuanga ñucanchicunaca na tandanajupanchi (Rom. 16:17; 1 Cor. 5:11; 2 Juan 10, 11). Huaquingunaca tandanajuicunaman rinajushpapashmi Bibliamanda consejocunataca talvez na pactachinajunga (2 Tim. 2:20, 21). Huaquinbica pihuanbash ñavi ñavi tandanajushpami ali amigo cajta, o nali amigo cajtapash yachai ushapanchi. Shinapash telefonopilla o Internetpillaca pi ali amigo o pi nali amigo cajtaca na yachai usharinllu.

Mensajecunata cachangapaj ashtaca ashtaca gentecunahuan rurashca grupocunapimi ashtahuanbachaca cuidadota charina capanchi. Huaquin huauquipanicunaca cashna grupocunapi yaicushpami nali experienciacunata charishca. Shinaca cashna grupocunapica ¿imashinata cuidadota charina capanchi? Cashna grupocunapica pi cajta o espiritualmente imashina cajtapash na ashta ali yachai usharinllu. Salmos 26:4​pica: “Mishqui shimi jayaj shungu runacunahuanga, na tiarircanichu. Ñavi ricuipilla ali tucushcacunahuambash, na tandanajurcanichu” ninmi. Shinaca Bibliapi nishcashnaca rijsishcacunahuanlla chateana o parlanami ashtahuanbachaca ali can.

Mensajecunata cachangapaj shuj uchilla grupota rurashpapashmi mashna tiempota paicunahuan yalinata, imacunamandalla parlanatapash ali ricuna capanchi. Chai grupocunapi mensajecunata cachashpa unaita parlanajujpipash, “tucuicunamanmi escribishpa tigrachina cani” yashpaca na pensanachu capanchi. Apóstol Pabloca Timoteotaca: ‘Imapipash satirishpa parlajcunahuan, napash parlana shimicunata parlashpa purijcunahuanga’ ama tandanajunguichu nircami (1 Tim. 5:13). Cunanbipashmi cashna parlocunamandaca cuidarina capanchi.

Ali yuyaita charij huauquipanicunaca shujcunamanda nalicunata rimajcunahuan, shujcunapa causaipi satirishpa parlajcunahuanga na tandanajunllu (Sal. 15:3; Prov. 20:19). Imata uyashpapash shujcunaman yangata parlanatapash na gushtanllu (Efes. 4:25). Ñucanchicunaca jw.org paginapi, shinallata cada quilla llujshijuj JW Broadcasting^® programapimi Bibliamanda, shuj shuj cosascunamandapash cabalta yachajui ushapanchi.

Huaquin Testigocunaca telefonopi mensajeta cachana, shujcunahuan parlana aplicaciongunataca imatapash jatungapaj, randingapaj, shujcunaman trabajota ofricingapami utilizan. Cai ruraicunaca Jehová Diosta sirvinahuanga imapipash na ricunata charinllu. Jesusta ali catishpa causangapaj munajcunaca ‘charijyangapaj munaimandallaca’ na huauquipanicunamanda aprovecharinllu (Heb. 13:5).

Shinapash llaqui apashca pushtucunapi huauquipanicunata ayudangapaj nishpa culquita mañangapaca ¿cai aplicaciongunata utilizai ushapanchichu? Huauquipanicunataca juyaimandami ima llaquicuna japijpipash paicunata ayudangapaca listo capanchi (Sant. 2:15, 16). Shinapash huauquipanicunata ayudangapaj nishpa cai grupocunata rurashpa culquita mañanaca sucursalmanda huauquicunapa, congregacionmanda huauquicunapa trabajotami ashtahuan jipayachin (1 Tim. 5:3, 4, 9, 10, 16). Huauquipanicunata cuidachunga ñucanchitalla agllashcatashna shujcuna ricuchunga na munapanchichu.

Ñucanchipa tucui rurashcacunahuanmi Jehová Diostaca jatunyachingapaj munapanchi (1 Cor. 10:31). Shinaca ñucanchi telefonopi aplicaciongunata utilizagrijushpaca ali yuyashpa utilizapashunchi.