E taangaanga ana tetai au Kerititiano i te apinga ou no te karangaranga ki to ratou kopu tangata e te au taeake irinaki. Kia akamaara te au Kerititiano i teia akoanga: “E akara mamao ua te tangata karape i te kino, e kua pipini iora: te aere ua atura te kite kore, e mate atura.”—Mase. 27:12.

Kua mārama tatou e ka inangaro a Iehova i te paruru ia tatou. No reira, kare tatou e kapiti atu ki te aronga tei akatupu i te ke, tei akaateaia, e tei apii i te au manako tarevake. (Roma 16:17; 1 Kori. 5:11; 2 Ioa. 10, 11) E ko tetai pae i roto i te putuputuanga, kare ratou e aru ana i te au apiianga Pipiria. (2 Timo. 2:20, 21) Me iki i to tatou au oa, kia akamaara tatou i teia. Kare i te mea mama kia iki i te pirianga meitaki na roto i tetai porokaramu tuku karere.

E iki meitaki i toou au oa me ka tuku karere koe ki tetai pupu tangata. Kua tuku karere ana tetai au Kerititiano ki tetai pupu tangata e kua tupu te kino. Akapeea tetai taeake me kore tuaine me vai matakite i te tuku karere ki tetai pupu tangata e anere me kore e tauatini tuma te maata? Kare e rauka ia koe i te kite koai tikai ratou e to ratou turanga pae vaerua. Karanga a Salamo 26:4: “Kare au i noo i roto i te au tangata tarevakaua, kare oki i kapiti i roto i te aronga pikikaa.” Akaari maira teia e e mea puapinga kia tuku karere ki te aronga ua taau i kite.

Noatu e ka tuku karere koe ki tetai pupu meangiti ua, ka akara matatio te Kerititiano i tona taime e tana ka uriuri. Eiaa e manako e ka anoanoia kia pau vivikiia ta ratou karere e kia akapou i te taime ki te reira. Akamatakite a Paulo ia Timoteo no runga i te aronga ‘apai tuatua e te akara matariki i ta tetai ke ra akonoanga.’ (1 Timo. 5:13) I teia tuatau, ka rauka ua i te rave i teia na roto i te au apinga electronic.

Kare tetai Kerititiano e akaapa e te akakite i te au tuatua muna no runga i tetai taeake. (Sala. 15:3; Mase. 20:19) Kare katoa aia e akarongo ki te au tua maani ua e te au nuti papu kore. (Ephe. 4:25) Ka orongaia mai te au ripoti irinakiia e te au kai pae vaerua na roto i te jw.org e te JW Broadcasting^® i te au marama ravarai.

E taangaanga ana tetai Au Kite i te au apinga tuku karere no te okooko, te akaariari apinga e te oronga i tetai ngai angaanga moni. E au apinga teia no te kimi puapinga, kare no te akamorianga. Ka patoi te au Kerititiano “noinoi kore i te apinga” i te taangaanga i to tatou au taeake no te kimi puapinga.—Ebe. 13:5.

Ka taangaanga ainei tatou i te au porokaramu tuku karere no te pati moni ei tauturu i te au taeake tei rokoia e te tumatetenga? Ka akaari tatou i te inangaro i te tauturu e te akamaroiroi i tetai e tetai. (Iako. 2:15, 16) Inara, ka tamanamanata te reira i te au akanoonooanga a te opati Betela e te putuputuanga. (1 Timo. 5:3, 4, 9, 10, 16) Pera katoa, kare tatou e inangaro i te au taeake kia manako e kua orongaia tetai angaanga takake kia tatou no te tauturu i te au taeake.

Ka inangaro tatou i te akakakā i te Atua. (1 Kori. 10:31) No reira, me iki tatou i te taangaanga i tetai apinga tuku karere e te au apinga electronic, e akamanako i te kino ka tupu e kia matakite tatou.