Nesave phralja hem phenja koristinena i moderno tehnologija te šaj te oven ko kontakt pumare familijaja ili javere Svedokoncar. Ama, džikote koristinena adaja tehnologija, o zrela hristijanja isi len ki godi akava sovet: „O gogjaver manuš dikhela i opasnost hem cidela pe, a o neiskusno džala ponadari hem trpinela o posledice“ (Izr. 27:12).

Amen ceninaja adava so o Jehova mangela te zaštitinel amen. Adaleske, na družinaja amen okolencar so kerena podelbe, soj tane isklučime, hem so širinena hovavne sikljojba (Rim. 16:17; 1. Kor. 5:11; 2. Jov. 10, 11). Nesave soj tane delo taro sobranie šaj na ponašinena pe ko česno način (2. Tim. 2:20, 21). Akava isi amen ki godi keda birinaja amare amalen. Ama, nane lokho te birine šukar društvo ako komunicirinea lencar samo preku porake.

Valjani šukar te birina amare amalen posebno keda siem ko bare grupe pišibaske. Nesave hristijanja sine vklučime ko bare grupe pišibaske, hem adava angja negativna posledice. Sar šaj jekh phral ili phen te pazinel ako ki jekh grupa tane vklučime šel ili milje džene? Nane šansa te džane sarinen tari adaja grupa, koj tane ola hem savi tani lengiri duhovno sostojba. Ko Psalm 26:4 pišinela: „Na družinava man e manušencar so hovavena, hem na džava ko okola so garavena save tane“. Akava sikavela kaj but pomudro tano te dopišine tut samo okolencar so lično džanea len.

Čak ki jekh potikni grupa, jekh hristijani valjani te pazinel kobor vreme trošinela pišibaske hem bašo so kerena lafi ki grupa. Na valjani te osetina amen dolžna te odgovorina ki sekoja poraka bizi razlika bašo so kerela pe lafi ili kobor vreme ka lel amendar. Ko plo prvo pismo dži ko Timotej, o Pavle pišingja kaj isi poedincija so ogovorinena hem mešinena pe ko javerengere bukja (1. Tim. 5:13). Avdive da, adava šaj te kerel pe preku elektronska uredija.

Jekh zrelo hristijani nane te vakerel ili te šunel kritike ili doverliva informacie bašo javera phralja (Ps. 15:3; Izr. 20:19). Isto agjaar, ov izbeginela te širinel ili te šunel bilo savi informacija so zvučinela vozbudlivo ili so nane potvrdimi (Ef. 4:25). Amen dobinaja točna informacie hem izveštaija so temelinena pe ki Biblija tari amari internet-stranica jw.org hem taro amare masekoskere emisie ko JW Broadcasting^®.

Nesave Svedokija koristinena o elektronska porake te bikinen, te kinen, hem te reklamirinen nesave produktija ili te nudinen buti. Akala bukja tane biznis, hem valjani te oven odvojme taro obožavibe. O hristijanja so nane len „mangipe sprema o pare“ nikogaš nane te iskoristinen e phralen te zarabotinen lendar pare (Evr. 13:5).

Dali šaj preku porake te rodel pe te kheda pare e phralenge so isi len nesavi potreba ili doživingje nesavi katastrofa? Amen mangaja amare phralen hem interesinaja amen lenge, adaleske pomožinaja len hem ohrabrinaja len (Jak. 2:15, 16). Ama, ako ko asavko način khedaja pare e phralenge tegani e podružnicake hem e starešinenge ko sobranie ka ovel popharo te pomožinen lenge (1. Tim. 5:3, 4, 9, 10, 16). Sigurno nikoj amendar na mangela te istakninel pe kaj ov pomožingja e phralenge ko jekh posebno način.

Amen mangaja te kera „sa baši e Devleske slava“ (1. Kor. 10:31). Adaleske keda koristinaja aplikacie bašo pišibe porake ili nesavi javer tehnologija, te razmislina bašo opasnostija hem te ova pretpazliva.