Unii Martori folosisaren i tehnologia caște den duma penghe familiența sau le phralența. Tha iech creștino maturo va încărela ande goghi o sfato biblico cai avel: „Codova cai silo goghiaver dichel o pericolo hai garavel-pe, tha codola cai nai-le experiența jian mai dur hai duchaven-pe”. (Prov. 27:12)

Jianas că o Iehova camel te lel seama pe amende. Anda codoia, respectisaras so phenel amenghe vo hai ci beșas pașa codola cai anen holi mașcar amende, codola cai sile excluși sau codola cai sicaven buchia greșime. (Rom. 16:17; 1 Cor. 5:11; 2 Ioan 10, 11) Vi unii phrala anda i congregația sau aver manușa cai aven ca le întruniri daștin te phiraven-pe nepachivales. (2 Tim. 2:20, 21) Dacă trebul te avas goghiaver ande fiesavo ghies cana alosaras amenghe amala, cadichi mai but trebul te avas atenți po interneto.

Trebul te alosaras mișto amare amalen vi mai but cana camas te cheras partea anda iech baro grupo. Daisaras te dichas con si amare amala ande iech grupo cai si șăla sau mii manușa? Avelas imposibilo te prinjianas ciaces le sasten sau te jianas dacă si manușa spiritualo. Unii creștini cărde partea anda cadal bare grupuri hai sas-le urmări nasul. Ando Psalmo 26:4 phenel-pe: „Ci beșav le manușența cai athaven hai așiav dur codolendar cai garaven con sile”. Catar hachiaras că trebul te avas goghiaver hai te folosisaras le aplicații de mesagerie caște das duma numai codolența cas prinjianas mișto.

Chiar cana si grupuri mai țâne, iech creștino trebul te avel atento ca soste del-pe duma hai sar folosisarel pesco timpo. Ci trebulas te simțosaras-ame oblighime te das răspunso ca sea-l mesajea, indiferento anda soste si i duma sau chichi timpo lel amendar te scriisaras-les. O Pavel phendea le Timoteiosche ande soste priveal unii manușa ‘cai denas duma anda aver hai hamisarenas-pe andel averenghe buchia’. (1 Tim. 5:13) Vi aghies daisaras te peras ande cadai capcana cana folosisaras le aplicații caște bișealas mesaje.

Nici iech creșino maturo ci va dela duma nasul anda pesche phrala, ci va phenela buchia confidențialo anda cadala hai ci va camela te așunel cadala buchia. (Ps. 15:3; Prov. 20:19) Sa cadea, ci va dela atenția ca le știri de senzație sau ca informații cai nai-le siguro hai nici ci va dela-le mai dur averenghe. (Ef. 4:25) Amaro site-o jw.org hai le emisiuni anda fiesavo șion pa JW Broadcasting^® sile pherde hamos spiritualo hai informații ciace demne pachiamasco.

Chichiva Martori folosisaren le aplicații de mesagerie caște bichinen, te chinen sau te sicaven produsea sau te den buchi averenghe. Tha mașcar cadal activități hai le buchia spiritualo trebul te avel iech deosebirea claro. Anda codoia, le creștini „cai ci iubin le love” ci folosisaren-pe catar lenghe phrala caște cheren love. (Evr. 13:5)

Tha trebulas te folosisaras le aplicații de mesagerie caște mangas love anda le phrala cai nachen prin pharimata sau sile ande iech than cai si iech dezastro? Ame sicavas iubirea caring amare phrala cana ajutisaras-le hai zuriaras-le. (Iac. 2:15, 16) Tha dacă începosaras te mangas love ande iech grupo mai baro po interneto, daisaras te cheras mai phare le măsuri de ajutorare, but mai lașe, line catar i filiala localo sau catar i congregația. (1 Tim. 5:3, 4, 9, 10, 16) Hai, siguro, nici iech anda amende ci camas te sicavas că primisardeam iech numirea specialo caște las seama pi turma le Iehovaschi.

Camas prin sea so cheras te anas gloria le Devlesche. (1 Cor. 10:31) Anda codoia, cana folosisaras iech aplicația caște bișealas mesajea sau aver aplicații po interneto, te gândisaras-ame save si le pericolea hai te las seama.