Namunhla wa siku vakriste van’wana va tizrisa teknolojiya akuva va bula ni swizro swa ndangu ni vakristekulozri. Kambe vakriste lava wupfiki va dzrimuka xilayu lexi liki: ‘A mhunu wa ku yanakanya a vona khombo; kutani a tifihla; kambe va ku mphunta va ya mahlweni, va biwa.’​—Pr 27:12.

Ha swi twisisa leswaku Yehovha a djula ku hi sizrelela. Xileswo, a hi swi djuli ku titlhanganisa ni vhanu lava vangaka ku yavana, lava susiwiki bandleni, kumbe lava buyisaka tindondzro leti hoxekiki. (Ro 16:17; 1Ko 5:11; 2Yh 10, 11) Van’wana lava hi hlangamelaka navu a bandleni a va hanyi hi ku landzra milawu ya Bibele. (2Tm 2:20, 21) Xileswo, loko hi hlawula vanghanu, hi ni leswo a miyanakanywini. Xileswo, swi nga ha kazrata ku hlawula vanghanu lavanene ka maaplikativhu ya ku zrumela mamensaji.

Ku hlawula vanghanu i swa lisima swinene ngopfungopfu ka mintlawa leyikulu ya ku zrumela mamensaji. Vakriste van’wanyana va tinhingenise ka mintlawa leyikulu, kutani leswo swi tise mihandzru ya ku biha. Xana mukriste a nga swi kotisa kuyini ku tivonela ka ntlawa lowu nga ni madzanadzana kumbe magidigidi ya vhanu? A hi nge swi koti ku tiva wumhunu bya kakunene ni wumoya bya mun’wana ni mun’wana ka ntlawa wa ku talisa xileswo. Amapsalma 26:4 yi li: ‘A ndzri tsrhami na vhanu va ku hemba, a ndzri yendzrelani na vakanganyisi.’ Ndzrimana leyi yi swi beka livaleni leswaku hi fanela ku zrumela mamensaji ntsena ka vhanu lava hi va tivaka.

Nambi ka ntlawa lowutsrongo wa ku zrumela mamensaji, mukriste a fanela ku tivonela ka nkama lowu a wu hetaka na a zrumela mamensaji ni leswaku i yini leswi vhanu va kone va bulaka ha swone ka ntlawa wolowo. Kutani ke, a hi fanelanga hi titwa na hi sindzriseka ku hlamula mamensaji, swi nge na mhaka leswaku ma khanela hi yini kumbe ma ta hi tekela nkama wa ku gama kwini. Pawulo a byele Timotewu leswaku a a fanela ku tivonela ka vhanu lava nga ni ‘lidzrimi ni tsrolo’. (1Tm 5:13) Ni namunhla, swa ha koteka ku yentxa leswo hi ku tizrisa maaplikativhu ya ku zrumela mamensaji.

Mukriste lwa wupfiki a nga buli kumbe ku yingiseta mhaka ya ku solasola kumbe leyi nga xihundla mayelanu ni vakriste vambeni. (Ps 15:3; Pr 20:19) Nakone a tingawula mamensaji lama tsraliwiki hi nkongometo wa ku hlamalisa vhanu vambeni kumbe ya madzrimi. (Ef 4:25) Hi yamukela swakuda swa moya ni dzrungula dzra swoswinyana ledzri dumbekaka ka pajina dzrezru dzra jw.org ni ka nongonoko wa hweti ni hweti wa Wuhaxi bya JW.

Vakriste vambeni va tizrisa maaplikativhu ya ku zrumela mamensaji akuva va xava, ku xavisa ni kuva va hamba mapublisidadi ya mintxhumu leyi va yi xavisaka kumbe ku nyika van’wana ntizro. Leyo i mintizro ya mabindzru, nakone a yi fambisani ni wugandzreli bya Yehovha. Vakriste a va fanelanga ku fumiwa hi lizrandzru dzra mali. A hi fanelanga hi dzringisa ku hamba mali hi ku tizrisa vamakwezru.​—Hb 13:5.

Xana hi fanela ku tizrisa maaplikativhu ya ku zrumela mamensaji akuva hi kombela mali ya ku pfuna vamakwezru lava pfumalaka kumbe lava weliwiki hi timhangu? Ha va zrandzra vamakwezru nakone ha zron’weka ha vone. Xileswo, hi ntolovelo hi va nyika mpfunu lowu va wu vilelaka ni ku va tiyisa. (Yk 2:15, 16) Kambe loko mhunu o dzringisa ku yentxa leswo hi ku tizrisa mintlawa yikulu ya ku zrumelana mamensaji, a nga ha yentxa leswaku swi kazrata kuva a bandla ni kumbe Zrwavi dzri pfuna vamakwezru volavo. (1Tm 5:3, 4, 9, 10, 16) Handle ka ku ganaganeka, a hi swi djuli leswaku van’wana va pimisa leswaku hi yaveliwe ntizro wa ku pfuna vamakwezru volavo.

A ku navela kwezru i ku yentxa hinkwaswu leswaku hi dzrumisa Xikwembu Nkulukumba. (1Ko 10:31) Xileswo, loko hi boha ku tizrisa maaplikativhu ya ku zrumela mamensaji kumbe switizrisiwa swimbeni swa teknolojiya, hi fanela ku tivonela ka makhombo lawa ma nga ha vaka kone ni ku ma tingawula.