Akristu anango asaphatisira tecnologia toera kucedza na acibale awo peno na abale na alongo anango. Mwakukhonda penula, Nkristu wakukola mwauzimu asafunika kukumbuka uphungu uyu wa Bhibhlya: ‘Nyakucenjera angaona pyakugoswa asabisala, mbwenye dzemwa anaenda kapibulukira, mbaona nyatwa.’—Mis. 27:12.

Ife tisadziwa kuti Yahova asafuna kutitsidzikiza. Natenepa, nee tisafunika kucita uxamwali na anthu anacitisa anthu kugawana, akubuluswa mu mpingo peno ale analonga pipfundziso pyauthambi. (Aroma 16:17; 1 Akor. 5:11; 2 Juwau 10, 11) Anango anasonkhana na ife mu mpingo panango nee asabvera mitemo ya Bhibhlya. (2 Tim. 2:20, 21) Natenepa, tisafunika kukumbuka pyenepi pakusankhula axamwali. Mbwenye pinakhala pyakunentsa kusankhula axamwali adidi khala tisacedza nawo mukuphatisira maaplikativo a mphangwa.

Khala tisafuna kucita khundu mu nsoka wa anthu azinji anaphatisira aplikativo toera kutumiza na kutambira mphangwa tisafunika kucita mphole-mphole. Akristu anango athimbana na nyatwa thangwi yakucita khundu m’misoka ineyi. Mphapo m’bale peno mulongo anakwanisa tani kucita mphole-mphole khala mu nsoka unoyu musagumanika anthu akupiringana 100 peno akupiringana 1.000? Pinakhala pyakunentsa toera kudziwa mwadidi makhaliro auzimu a anthu onsene anagumanika mu nsoka unoyu. Lemba ya Masalmo 26:4 isalonga: ‘Ine nee ndisacita uxamwali na anthu analonga uthambi, pontho ndisacalira anthu aupfakafaka.’ Pyenepi pisapangiza kuti ndi pyadidi kuphatisira maaplikativo anewa basi ene toera kucedza na anthu anadziwa ife.

Ngakhale mu nsoka unoyu musagumanika anthu akucepa, Nkristu asafunika kucita mphole-mphole thangwi ya ndzidzi unaphatisira iye na anthu anacedza na iye. Ife nee tisafunika kutawira mphangwa zonsene zinatumizwa mu nsoka unoyu, mwakukhonda tsalakana ntundu wa mphangwa peno ndzidzi unafuna phatisira ife toera kutawira mphangwa zenezi. Paulu acenjeza Timoti thangwi ya anthu akuti ‘asapitira pinthu pyakuti nee ndi pyawo.’ (1 Tim. 5:13) Lero, anthu anakwanisa kupitira pinthu pyakuti nee ndi pyawo mukuphatisira maaplikativo akutumiza mphangwa.

Nkristu wakukola mwauzimu nee asafunika kutumiza na kubvesera mphangwa zinalonga mwakuipa atumiki anango a Yahova peno zacibisobiso. (Masal. 15:3; Mis. 20:19) Pontho iye nee asafunika kutumiza mphangwa zakuti nee ndi zandimomwene. (Aef. 4:25) Ife tiri na mphangwa zizinji zakunyindirika zakubuluswa m’Bhibhlya zakuti zisagumanika mu websaiti yathu ya jw.org na m’maprogramu a JW Broadcasting^®.

Akristu anango asaphatisira maaplikativo akutumiza mphangwa toera kugulisa na kugula pinthu, peno toera kupitisa anango basa. Pyenepi ndi pinthu pya malonda, pontho nee pisacita khundu yakulambira Yahova. Akristu “akukhonda kufuna kakamwe kobiri” asacalira kuphatisira abale na alongo awo toera kuwina kobiri.—Aheb. 13:5.

Kodi ife tisafunika kuphatisira maaplikativo akutumiza mphangwa toera kuphemba kobiri toera kuphedza abale na alongo adagwerwa na cidengwa? Ife tisafuna abale na alongo athu, pontho kazinji kene tisaphedza na kuwangisa ale anathimbana na nyatwa. (Tiya. 2:15, 16) Mbwenye tingacita pyenepi mukuphatisira maaplikativo akutumiza na akutambira mphangwa tinadzudzumisa masasanyiro adacita Bheteli peno akulu a mpingo toera kuphedza abale na alongo anewa. (1 Tim. 5:3, 4, 9, 10, 16) Mwandimomwene, nee m’bodzi wa ife asafunika kucitisa anthu kunyerezera kuti ndife akupambulika peno tisafuna kutsalakana tekhene abale na alongo athu.

Ife tisafunika kucita pinthu pinapasa mbiri Mulungu. (1 Akor. 10:31) Natenepa, tingaphatisira maaplikativo akutumiza na akutambira mphangwa tisafunika kucita mphole-mphole toera kucalira ngozwi zakucita pyenepi.