E faaaogā e nisi Kerisiano polokalame faaonapōnei e fesootaʻi ai ma aiga ma isi Molimau. Ae o se Kerisiano taʻumatuaina e na te manatua le fautuaga lenei: “O lē ua iai le utaga mamao ua iloa atu le mala ma lafi ai; a o lē ua leai se poto masani ua alu atu pea o ia ma malaia ai i āuga leaga.”—Faata. 27:12.

E tatou te iloa e finagalo Ieova e puipuia i tatou. O le māfuaaga lenā e tatou te lē faifaimea faatasi ai ma ē e faatupuina fevaevaeaʻiga, o ē faateʻaina po o i latou e faaauilumaina aʻoaʻoga sesē. (Roma 16:17; 1 Kori. 5:11; 2 Ioa. 10, 11) O nisi i le faapotopotoga atonu e lē o ola e tusa ai ma tapulaa amiotonu a le Tusi Paia. (2 Timo. 2:20, 21) Pe a filifili a tatou uō ia manatua le mea lenei: Atonu e lē faigofie ona filifili ni a tatou uō lelei, pe a faaaogā polokalame e fetalanoaaʻi ai.

Pe a toʻatele ni tagata e fetalanoaaʻi i luga o nei polokalame, e tāua tele le filifili lelei o a tatou uō. O nisi Kerisiano o loo auai i kulupu e fetalanoaaʻi ai tagata e toʻatele, ua aafia i ni iʻuga leaga. E faapefea ona filifili e se uso po o se tuafafine tagata e faauō i ai, pe afai e faitau selau pe faitau afe tagata i lenā kulupu? E lē mafai ona tatou iloa uma po o ai i latou ma pe faapeʻī o latou tulaga faaleagaga. Ua faapea mai le Salamo 26:4: “Ou te leʻi nofo faatasi ma tagata pepelo; Ou te leʻi alu faatasi ma tagata taufaaʻoleʻole.” Ua faaalia i inei le atamai o le faaaogā o nei polokalame e fesootaʻi ai na o i latou e te iloa.

E tusa lava pe toʻalaiti le kulupu o loo auai ai se Kerisiano, ae tatau ona ia iloilo lelei le taimi e alu ai i na talanoaga, ma po o ā foʻi mea e talanoa ai. E lē tali se Kerisiano i feʻau tusitusia uma e na te maua, ona e faaeteete i mea o loo i na feʻau ma le taimi e alu ai. Na lapataʻia e Paulo Timoteo e faatatau i tagata “faitatala ma isuisu fua i mataupu a isi.” (1 Timo. 5:13) I aso nei, e mafai e se tasi ona faitatala ma isuisu fua i mataupu a isi i luga o polokalame e fetalanoaaʻi ai.

E leai se Kerisiano taʻumatuaina e faitio pe faalogo foʻi i ni faitioga, pe taʻu atu ni mataupu e lē faalauaʻiteleina e faatatau i uso talitonu. (Sala. 15:3; Faata. 20:19) E na te ʻalofia foʻi le faatelē o se mataupu, pe taʻu atu foʻi se mataupu e leai ni faamaoniga. (Efe. 4:25) Ua tatou maua le anoanoaʻi o meaʻai faaleagaga ma lipoti maufaatuatuaina i la tatou upega tafailagi i le jw.org, ma polokalame i masina taʻitasi i la tatou TV i le Initaneti.

Ua faaaogā e nisi Molimau polokalame e fetalanoaaʻi ai e faatau mai ai pe faatau atu ai ni oloa, ma faalauiloa ai ni oloa pe ofo atu ai ni avanoa faigaluega. O mea faapisinisi mea na e lē fesootaʻi atu i mea faaleagaga. O Kerisiano e lē “manaʻo tele i tupe,” e latou te teena le faaaogāina o tatou uso e suʻe ai tupe.—Epe. 13:5.

Ae faapefea le faaaogāina o polokalame e fetalanoaaʻi ai, e ao ai tupe mo uso o loo manaʻomia le fesoasoani, po o aafia i mala faalenatura? E tatou te faaalia le alofa ma faalaeiau le tasi i le isi. (Iako. 2:15, 16) Ae o lo tatou taumafai e fesoasoani i uso e faaaogā ai kulupu tetele i polokalame e fetalanoaaʻi ai, atonu la ua tatou faalavelave ai i faatulagaga e sili ona lelei ua faia e ofisa o lālā po o toeaina o faapotopotoga. (1 Timo. 5:3, 4, 9, 10, 16) E mautinoa e leai se isi o i tatou e manaʻo, ia manatu tagata ua filifilia faapitoa o ia e tausia mamoe a le Atua.

E tatou te mananaʻo e faia mea uma lava e faamamaluina ai le Atua. (1 Kori. 10:31) O lea, pe a filifili e faaaogā polokalame e fetalanoaaʻi ai, ia manatua e iai ona lamatiaga ma ia faaeteete.