Akristo amɔtshi nkambaka la wayi wa ntshulatshula djɛ lɔɔko kɛnɛ, djɛ ndjambaka l’ankfumbo yɛwɔ edjinge la winawɔ Ewakɛ. Koko Okristo wombotshunda lá nyuma, angolama dako djɛnɛ lá wɔɔngɔ: ‘Kanga balo angotangelake mbalaka ko angoyawisake, koko kanga enkesa angokindjɛke ngo ntakamela ko angɛnake ndjolo l’eposelo wɛ nyɛtshi.’​—Woo. 27:12.

Iso ndjewaka ente Yehova nkɔpaka ntolama. Djɛkondeke, topakɔpe nyintasɛ esanga l’anto wilaka djatɔnelo, wanɛ wapokana, kana wanɛ wayakalaka olakanyelo w’ongolo. (Ɔrɔ. 16:17; 1 Kɔ. 5:11; 2 Dj. 10, 11) Nkoka ndjala ko anto amɔtshi wasanghanaká l’otshumano wapalɛmɛyɛ ɛlɛmbɛ wɛ Bible. (2 Ti. 2:20, 21) Winá w’ɔsɔnaso tolongo, iso namaka nkambo djɛsɔ lá wɔɔngɔ. Koko, nsɔna tolongo tɔ wɔlɔ má aplikasiɔ w’otomanelawɔ wa mesajɛ, nkoka ndjala wolo.

Alekɔ djonyi efula ndjala la balo lá kɛnɛ kelendana la ɔsɔnɛlɔ wɔ tolongo pekapeka l’oloyi w’ekekete w’otomelanawɔ wa mesajɛ. Akristo amɔtshi wingelisa l’oloyi w’ekekete w’anto watomelana wa mesajɛ, wawaka eposelo wɛ nyɛtshi. Wopo wɔkɔnge wɔnanyɔ kana nkaana okokande ndjala l’okoso, ntsha oloyi wɔkɔ oyɛwɔnde w’anto nkama kana nunu? Alekɔ wolo efula ndjewa onto onkfumɔ wɔ l’oloyi wɔsɔ wɔlɔ wɔlɔ edjinge ndjewa kana walekɔ la lonyuma lɔ wɔlɔ. Yeembo 26:4 ntepelaka ante: ‘Lemi mpasangaka ɛkɛndɛlɔ isa anto wa lodjimbo, edjinge lemi nkosɔka wanɛ wisaka wopo w’anto w’oyɛwɔ.’ Ape nkambo djɛsɔ nyɛnyɛka ante alekɔ nkambo djɛ balo nkambaka l’aplikasiɔ w’otomanelawɔ wa mesajɛ djɛ nsawolaka ngo l’anto w’ewɛ wɔlɔ wɔlɔ?

Kaanga oyɛsonde l’iloyi yɛ dambi y’otomelanawɔ wa mesajɛ, Okristo ladjɛ ndjala la balo efula lá kɛnɛ kelendana la wopo w’okambande la winá wɛnde djɛ mbala edjinge ntomelana wa mesajɛ. Topalɔmbama nkadjimola lá wa mesajɛ inkfumɔ kaanga olendanawɔ la nkambo djɛkɔnge kana winá emangha w’ɔsawɔ. Poolo ewoyɛka Timɔte djɛ nkosɔ ‘anto wa tomi tomi edjinge wayawingeyɛ l’akambo wankana.’ (1 Ti. 5:13) Lɔɔko kɛnɛ, akoka ndjala wɔdju nangha nkambo djɛ nghɔsɔ má wayi wa ntshulatshula.

Okristo wombotshunda lá nyuma apakoke mpɛyɛ kana ndjekameyɛ nkɔmantɛrɛ yɛ nyɛtshi kana akambo wa toseke walendana la winawɔ Akristo. (Yee. 15:3; Woo. 20:19) Edjinge nde ladjɛ nkosɔ djɛ ndjekameyɛ kana ntshanghanyɛ nsango yɛ ndopalembetela ntsha ilekɔ nsɔsɔlɔ. (Ɛfɛ. 4:25) Iso mbaka nsango efula yɛ wɔlɔ yɛ Bible má sitɛ kɛso kɛ jw.org edjinge nsango inkina y’okokaso ndjɛkɛ oloko yeposaka ngɔndɔ inkfumɔ má nonghanyi kɛso kɛ JW Televiziɔ^®.

Ewakɛ wɛ Yehova ɛmɔtshi nkambaka l’aplikasiɔ w’otomelanawɔ wa mesajɛ djɛ nsomba, nsadjɛ edjinge djɛ nangha piblisite kɛ nkete mɔtshi kana mpɛyana elemo. Ɔsɔ alekɔ wayi walendana l’opoto koko apalekɔ akambo wa teokrasi. Akristo wápakɔpɛ ‘ntshindama má ngandji kɛ nfalanga’ ntonaka nkambo nkfumɔ djekoka ndatshinda djɛ nkamba la wananyɔ wawɔ djɛ mba nfalanga.​—Heb. 13:5.

Oyɛwɔ mo, tokoka nkamba l’aplikasiɔ w’otomelanawɔ wa mesajɛ djɛ ndɔmbɛla wananyɔ walekɔ lá djonyi kana wambopomana la mbalaka yeposa má nkete djetongamisa nfalanga? Iso nkɔpaka wananyɔ waso edjinge ndakiyanyɛka nkambo djɛwɔ edjinge mbala efula iso nkotshɛka wanɛ walekɔ la djonyi dj’okotshɔ edjinge ndakeketshɛka. (Dja. 2:15, 16) Koko mpona djɛ nangha nkambo djɛsɔ, má oloyi w’ekekete w’otomelanawɔ wa mesajɛ, nkoka nkomɛ nkambo djɛsɔ wolo efula le kɔmite kɛ filialɛ kana otshumano djɛ ndakotshɛ. (1 Ti. 5:3, 4, 9, 10, 16) Lako onto wel’anteyi kɛso w’ɔkɔpa nkomɛ anto dj’iwɔ nkanela ambɔ, tɔsɔnamaka lá yopo yetshikitanyi djɛ nkotshɛ ehomba wɛ wananyɔ.

Iso nkɔpaka nangha ngo kɛnɛ kɛpɛyɛ Ndjambe lomo. (1 Kɔ. 10:31) Djɛkondeke winá w’ɔsɛ nkano djelendena l’okambelo wɔ l’aplikasiɔ w’otomelanawɔ wa mesajɛ kana etshulatshula kenkina, shishima mbálaka ikoka mposa edjinge yala la ntɔnɔ.