Bangi bena Kidishitu bakwete kufubisha teknoloji a kano kabidi bwa kwisambanga na bifuko byabo na bangi ba Temwe ba Yehowa. Eyendo’shi mwina Kidishitu munyingye, atentekyeshaa dino elango adyamba’shi: “Muntu mudimukye, su baamono bubi, eekumbaa; anka bapatakane taabeebimonaa bu kintu, ngi kyabafwambukilaa.”​—Nki. 27:12.

Twi na muloo mwanda Yehowa akumina kwitukalwila. Byabya, t’atwibungaa pamune na bantu abatwesha kwiabula, bantu batushibwe mu kakongye sunga abakwatshishena malongyesha e bubi. (Lom. 16:17; 1 Kod. 5:11; 2 Yo. 10, 11) Bangi abatwelaa mu bisangilo mbalombene kwikala na mwikelo wi bubi. (2 Tim. 2:20, 21) Nsaa y’atusangula ba kuuku, abitungu tutentekyeshe uno mwanda. Bino bi kwikala bukopo bwa’shi tusangule ba kuuku be buwa su atwiukena nabo penda ku mesaje.

Bi na muulo ukata bwatudya kwikala badimukye nsaa y’atusangula ba kuuku be buwa, bikishekishe su twi mu kisaka kikata kya kwitumishena mesaje. Bangi bena Kidishitu mbapete bipeta bi bubi pa kutwela mu kisaka kikata kya kwitumishena mesaje. Kadi mukwetu mulume sunga mukashi mulombene kudimuka naminyi su e mu kisaka ki bantu nkama sunga binunu? Abikala bukopo bodya kuuka muntu oso kalolo na, su mmunyingye mu kikudi. Mukanda wa Misambo 26:4 awamba’shi: “Ntankyebâ kushâla na basha madimi, sunga nkutambuka na bantu balamalama.” Bino abilesha’shi, mbikilekile buwa kutumina muntu mesaje nka yawa ouku.

Sunga ekala mu kisaka kipela, abitungu’shi mwina Kidishitu atalule nsaa y’akisha mu kwitumishena mesaje, na ingi myanda y’abesambila kwi bantu be mwanka. T’abitungu’shi twikale atwalula ku mesaje oso sunga byekala’shi, aakwila mwanda kinyi sunga kwitwata nsaa bungi kinyi. Mpoolo badi mulungule Timote bwadya kudimukila bantu ‘basha kubalakana na kutwela mu myanda ishi îbatale.’ (1 Tim. 5:13, EEM) Lelo uno, mbibofule bwa kwibikita ku Internete.

Mwina Kidishitu munyingye mu kikudi, ta mukumbene kwalula mesaje abakwete kwipula mungi mwina Kidishitu sunga kupalakasha myanda yaye, yabashi bakumbene kuuka kwi mungi muntu. (Mis. 15:3; Nki. 20:19) Na ta mulombene kupalakasha sunga kutemesha mwanda wash’ashinkamisha’shi ngwa binyibinyi. (Ef. 4:25) Tukwete kupeta malongyesha e buwa aatukila mu Bible na ma rapore atudi balombene kukulupila ku bukwashi bwa site etu a jw.org na mu miisambo ya ku mweshi ya mu Televizion a JW.

Bangi ba Temwe ba Yehowa abafundaa mesaje bwa kuudisha bintu, kuula, kukita piblisite na kukimba bantu ba kwata ku mudimo. Ino nyi mmyanda ya busunga, ta myanda ya teokrasi nya. Bena Kidishitu bashi na “kifulo kya mmono” t’abafubaa na kipwano kyabo na benabo bwabadya kukimba makuta.​—Eb. 13:5, EEM.

Twi kwamba naminyi pabitale kwitumishena mesaje bwa kukongola makuta a kukwasha bakwetu bapete masaku? Eyendo’shi, atuleshaa kifulo kyetu p’atwikwashena na kwinyingishena. (Shak. 2:15, 16) Anka, kukimba kwibikita pa kwitumishena mesaje mu kisaka, akukutshishwa biro bya filiale sunga kakongye mushindo wa kukwasha bano bakwetu. (1 Tim. 5:3, 4, 9, 10, 16) Na muntu su ngumune ta mulombene kukumina kutakula bangi bwabadya kupwandjikisha’shi, mbamusangule mu mushindo kampanda bwadya kukwasha mikooko y’Efile Mukulu.

Lukalo lwetu ndwa kukita kyakya akitumbisha Efile Mukulu. (1 Kod. 10:31) Byabya, nsaa ywata kitshibilo kya kufubisha application akutumina bantu mesaje sunga ungi mushindo wa teknoloji, talula masaku alombene kutuuka na wekale mudimukye.