Lamanye emaKhristu asebentisa tintfo tebuchwephesha kuze achumane nemindeni yawo kanye nebazalwane bawo. Kodvwa umKhristu lovutsiwe utawuhlale akhumbula leseluleko lesitsi: “Umuntfu lohlakaniphile utsi nakabona ingoti abaleke, kodvwa lote lwati ucondza ngco kuyo, bese ubhekana nemiphumela lebuhlungu.”—Taga 27:12.

Siyati kutsi Jehova ufuna kusivikela. Ngako asitihlanganisi nebantfu lababangela kwehlukana, labayekelisiwe kuba boFakazi nobe labakhutsata imibono lengasiyo. (Rom. 16:17; 1 Khor. 5:11; 2 Joh. 10, 11) Labanye labaya emihlanganweni yelibandla kungenteka abayigcini imitsetfo leseBhayibhelini. (2 Thim. 2:20, 21) Kufanele sikukhumbule loko nasikhetsa bangani. Kodvwa kungaba lukhuni kukhetsa kahle bangani nangabe sikhuluma nabo sisebentisa ema-application ekutfumelelana imilayeto.

Kubaluleke kakhulu kubakhetsa kahle bangani nangabe sisegruphini lenebantfu labanyenti. Lamanye emaKhristu angene emagruphini lamakhulu, futsi loko kube nemiphumela lemibi. Yini umzalwane nobe dzadze langayenta kuze acaphelisise nangabe asegruphini lenemakhulu nobe tinkhulungwane tebantfu? Kutawuba lukhuni kubati kahle bonkhe, nekutsi banekukholwa lokucinile yini. Tihlabelelo 26:4 titsi: “Angitihlanganisi nebantfu labanemanga, ngiyababalekela nebantfu labafihla loko labangiko.” Loku kukhombisa kutsi kukuhlakanipha kutfumelelana imilayeto nebantfu lobatiko.

Nanobe legruphu inebantfu labambalwa, umKhristu kufanele anake kutsi singanani sikhatsi labasicitsa batfumelelana imilayeto nekutsi bantfu labakulegruphu bakhuluma ngani. Akukafaneli sicabange kutsi kufanele siphendvule yonkhe imilayeto ngisho nobe ikhuluma ngani nobe kutsatsa sikhatsi lesingakanani. Pawula wecwayisa Thimothi ngebantfu ‘labahlebako nalabatifaka etindzabeni tebantfu.’ (1 Thim. 5:13) Nalamuhla kungenteka loko nasisebentisa tebuchwephesha.

UmKhristu lovutsiwe angeke akhulume ngabi ngalakholwa nabo nobe alalele nangabe labanye bakhuluma kabi, futsi angeke akhulume tindzaba letiyimfihlo talakholwa nabo. (Hla. 15:3; Taga 20:19) Angeke futsi akhulume nobe alalele indzaba langaciniseki ngayo. (Ef. 4:25) Sinetindzaba letinyenti letisekelwe eBhayibhelini nemibiko lesingayetsemba letfolakala ku-jw.org naseMsakatweni we-JW njalo ngenyanga.

Labanye boFakazi batfumela imilayeto ngetebuchwephesha kuze batsengise, batsenge, bakhangise ngetintfo labatitsengisako nobe bacashe labanye. Leto tindzaba temabhizinisi, futsi atihlangani nekukhonta Jehova. EmaKhristu ‘langayitsandzi imali’ ayakubalekela kwakha imali ngebazalwane bawo.—Heb. 13:5.

Kufanele yini sisebentise ema-application ekutfumelelana imilayeto kuze sicele imali letawusita bazalwane labadzingile nobe labehlelwe tehlakalo temvelo? Siyabatsandza bazalwane betfu futsi sinendzaba nabo ngako sifuna kubasita nabadzingile futsi sibakhutsate. (Jak. 2:15, 16) Kodvwa kwetama kwenta loko sisebentisa emagruphu lamakhulu kungenta kutsi kube matima ngelihhovisi leligatja nobe ngelibandla kutsi libasite. (1 Thim. 5:3, 4, 9, 10, 16) Kute kitsi lofuna kutsi bantfu bacabange kutsi sikhetsiwe kuze sinakekele bazalwane.

Sifuna kwenta lokutawuletsa ludvumo kuNkulunkulu. (1 Khor. 10:31) Ngako nawuncuma kusebentisa ema-application ekutfumelelana imilayeto, nobe letinye tintfo tebuchwephesha, cabanga ngetingoti letingahle tibe khona futsi wente ngekuhlakanipha.