Baadhi ya Wakristo wanatumia teknolojia ya kisasa ili kuwasiliana na watu wa familia na Mashahidi wenzao. Bila shaka, Mkristo mkomavu anapotumia teknolojia hiyo atakumbuka shauri hili: “Mtu mwerevu huona hatari na kujificha, lakini wajinga husonga mbele na kupata madhara.”—Met. 27:12.

Tunatambua kwamba Yehova anataka kutulinda. Hivyo, hatushirikiani na watu wanaosababisha migawanyiko, waliotengwa, au wanaoleta mafundisho yaliyopotoka. (Rom. 16:17; 1 Kor. 5:11; 2 Yoh. 10, 11) Huenda baadhi ya watu wanaoshirikiana na kutaniko wanajiendesha kwa njia isiyo ya heshima. (2 Tim. 2:20, 21) Tunakumbuka jambo hilo tunapochagua marafiki. Huenda isiwe rahisi kuchagua marafiki wetu kwa makini ikiwa tunawasiliana nao kupitia programu ya kutuma ujumbe mfupi.

Ni jambo la muhimu hata zaidi kuwa makini kuhusu kuchagua marafiki wazuri inapohusu vikundi vikubwa vya kutumiana ujumbe mfupi. Baadhi ya Wakristo wamejiunga na vikundi hivyo vikubwa na kupata matokeo mabaya. Je, kweli ndugu au dada anaweza kuchagua marafiki kwa makini ikiwa kikundi hicho kina mamia au maelfu ya washiriki? Haiwezekani kujua jinsi watu hao wote walivyo kikweli au kujua hali ya kiroho ya kila mmoja kwenye kikundi hicho. Zaburi 26:4 inasema: “Sishirikiani na watu wadanganyifu, nami huwaepuka wale wanaoficha jinsi walivyo.” Je, hilo halionyeshi kwamba ni jambo la hekima zaidi kuwasiliana tu na watu tunaowajua kibinafsi tunapotumia programu za kutuma ujumbe mfupi?

Hata ikiwa kikundi cha kutumiana ujumbe mfupi ni kidogo, bado Mkristo anahitaji kutathmini muda anaotumia na mambo yanayojadiliwa. Hatupaswi kuhisi kwamba tunahitaji kujibu jumbe fupi za wengine haidhuru ni habari gani inayojadiliwa au muda utakaotumika. Paulo alimwonya Timotheo kuhusu watu ambao walikuwa “wanapiga porojo na kujiingiza katika mambo ya watu wengine.” (1 Tim. 5:13) Leo, inawezekana kufanya hivyo tunapotumia vifaa vya kielektroni.

Hakuna Mkristo yeyote ambaye ni mkomavu atakayezungumzia au kusikiliza habari zilizokusudiwa kumchambua mwamini mwenzake au habari zake za siri. (Zab. 15:3; Met. 20:19) Na pia, hatarudia au kusikiliza habari zenye kushtua au zilizotiwa chumvi, au habari ambazo hazijathibitishwa. (Efe. 4:25) Bila shaka, tunapata chakula kingi cha kiroho na habari zinazotegemeka kupitia tovuti yetu ya jw.org na programu za kila mwezi kwenye JW Broadcasting^®.

Baadhi ya Mashahidi wanatumia programu za kutuma ujumbe mfupi ili kuuza, kununua, na kutangaza bidhaa au ajira. Hayo ni mambo ya kibiashara, si mambo ya kitheokrasi. Wakristo wanaoishi maisha yao “bila upendo wa pesa” wanakataa kushawishiwa kwa vyovyote kuutumia undugu wetu kwa makusudi ya kibiashara.—Ebr. 13:5.

Namna gani kuhusu kutumia programu za kutuma ujumbe mfupi ili kuomba pesa kwa ajili ya waamini wenzetu wenye uhitaji fulani au kwa ajili ya kutoa msaada wakati wa misiba ya asili? Tunawapenda ndugu zetu na tunawahangaikia, hivyo tunawasaidia na kuwatia moyo kwa ukawaida. (Yak. 2:15, 16) Lakini kujaribu kufanya hivyo kupitia vikundi vikubwa vya kutumiana ujumbe mfupi, kihalisi huenda kukavuruga mipango mizuri zaidi inayofanywa kupitia ofisi ya tawi au kutaniko. (1 Tim. 5:3, 4, 9, 10, 16) Na bila shaka hakuna yeyote ambaye angependa kuwafanya watu wafikiri ni kana kwamba amepewa mgawo wa pekee wa kuwatunza kondoo wa Mungu.

Tunatamani kufanya mambo yatakayomletea Mungu utukufu. (1 Kor. 10:31) Hivyo, unapohitaji kufanya uamuzi ikiwa utatumia programu za kutuma ujumbe mfupi au teknolojia nyingine, fikiria hatari zinazohusika, na ujihadhari.