Pirang katau tau Kristen měpẹ̌pakẹ teknologi modern gunang mẹ̌bawěke dingangu keluarga lai anạu sěmbaụ. Tantu, tau Kristen matělang su rohani sarung mẹ̌tahěndung tatanata ini: ”Taumata matahuěna sarung mẹ̌kěmbuni mạeng makasilo bahaya, katewe taumata tawẹ apa pengalaman turusẹ̌ maju kụ makaěbạ tětal᷊e.”​—Amsal 27:12.

I kitẹ masingkạ Yehuwa mapulu měndiagạ si kitẹ. Hakị u ene, i kitẹ tawe mědal᷊ahapị dingangu taumata makakoạ anạu sěmbaụ mẹ̌sitori, taumata seng nisěbang bọu sidang, arau taumata měnẹ̌něntiro těntiro nẹ̌sal᷊a. (Rm. 16:17; 1 Kor. 5:11; 2 Yoh. 10, 11) Bọu ene lai, piạ taumata su sidang ěndịu tawe tụtuhụ manga atorang su Alkitapẹ̌. (2 Tim. 2:20, 21) Su tempong měmile hapị, pẹ̌tahěndung ini. Katewe, ěndịu tawe gampang gunang maingatẹ̌ měmile hapị bọu aplikasi pesan singkat.

Limembong pakaingatẹ̌ lai su tempong mědal᷊ahapị su grup pesan kụ anggotane limembong mal᷊awọ. Pirang katau tau Kristen nẹ̌gabung su grup gěguwạ kerene nakaěbạ tětal᷊ẹ̌ dal᷊akị. Kerea tadeạu anạu sěmbaụ botonge maingatẹ̌ mạeng piạ grup anggotane hasụe arau hiwune? Tawe masuẹ̌ su akal᷊ẹ̌ makasingkạ i sai sěběnarẹ̌e i sire dingangu kerea kerohanian i sire kěbị su grup ene. Mazmur 26:4 naul᷊ị, ”Iạ tawe mědal᷊ahapị dingangu taumata maakal᷊ẹ̌, kụ iạ mẹ̌těngkarau bọu taumata měmẹ̌muni watangenge.” Nal᷊ahẹ, sěbạe matahuěna mạeng kětạeng měndingọ pesan su taumata seng nikěnalẹ̌ i kitẹ.

Maning kětạeng grup kadodọ, sěngkatau Kristen harusẹ̌ maingatẹ̌ pira kal᷊awọe tempo mapakẹ dingangu apa sarung bisaraěng. I kitẹ tawe mẹ̌pěndang harusẹ̌ měmal᷊isẹ̌ pesan, tawẹ soale apa bẹ̌bisarang arau pira kal᷊awọe tempo. Paulus něgělị laingatẹ̌ soal u taumata sarung ”puluang mẹ̌sampuhẹ̌ dingangu lumaụ urusangu taumata wal᷊inẹ”. (1 Tim. 5:13) Orasẹ̌ ini, ene botonge mariadi bọu aplikasi pesan singkat.

Tawẹ apa tau Kristen matělang su rohani měmorotesẹ̌ arau měnarimạ porotesẹ̌, arau lai měmahiạ informasi rahasia soal u anạu sěmbaụ. (Mz. 15:3; Amsal 20:19) Kụ i kitẹ harusẹ̌ maingatẹ̌ su habarẹ̌ makạlaherang arau habarẹ̌ tawe tantu kahěngang. (Ef. 4:25) I kitẹ piạ lawọ habarẹ̌ mapaelẹ̌ dasare bọu Alkitapẹ̌, kụ habarẹ̌ botonge kapěngimangeng su jw.org dingangu bọu acara sabang wul᷊ang JW Broadcasting^®.

Pirang katau Sahiding Yehuwa měpẹ̌pakẹ aplikasi pesan singkat gunang mẹ̌bal᷊ụ, měměli, dingangu menawarkan barang arau jasa, arau mědeạ taumata gunang měhal᷊ẹ̌. Ene kai urusang bisnisẹ̌ kụ tawẹ apa sěmpụe dingangu ibadah si Yehuwa. Tau Kristen apang madiri ”kuměndagẹ̌ doitẹ̌” tawe měpakẹ persaudaraan Kristen gunang urusangu bisnisẹ̌.​—Ibr. 13:5.

Kerea mạeng měpakẹ aplikasi pesan singkat gunang měngomol᷊ẹ̌ doitẹ̌ gunang anạu sěmbaụ apang masusah arau nikahinongu bencana? I kitẹ masau měnodẹ kakěndagẹ̌ su tempong mẹ̌tul᷊ung dingangu měnoghasẹ̌ sěmbaụ su wal᷊inẹ. (Yak. 2:15, 16) Katewe, mạeng měnal᷊ukạ měpakẹ grup pesan limembong gěguwạ, ene ěndịu makasaghe pengaturan nikoạu kantor cabang su tampạ ene arau bọu sidang. (1 Tim. 5:3, 4, 9, 10, 16) Kụ tantu i kitẹ tawe mẹ̌pikirẹ̌ i kitẹ piạ tugasẹ̌ istimewa gunang manga dombang Mawu.

I kitẹ mapulu měkoạ hal᷊ẹ̌ makawantugẹ̌ Mawu. (1 Kor. 10:31) Hakị u ene, su tempong i kitẹ měmutusẹ̌ měpakẹ aplikasi pesan singkat arau teknologi wal᷊inẹ, pẹ̌tiněna apa manga bahayane, kụ tatapẹ̌ pakaingatẹ̌.