Bakasininkizia bange bali babombia teknolojia ya leenu eevi baye batwaliliile kulanziana ni bantu ba mu lupua lwabo ao Bakasininkizia nabo. Inzi, Mukristu akosele kimupasi ali kuya walangulukile ozu musoko: “Muntu akengeele ali wamona buavia ni kufiama, inzi kipuba ali watwalilila kuya ku ntaanzi ni kupata maavia.”​—Tus Maf. 27:12.

Tumanine nangue Yehova atonene kutukingilila. Pakaako, te twizi kwampana ni balia bali baleeta bupusano, batengua, ao balia bali baleeta masambilizio a bufi. (Bar. 16:17; 1 Bakor. 5:11; 2 Yoan. 10, 11) Bange balupua ni bankazi ao bantu bange mu kilonghaano batuli twapisia nabo musita, kunti baya baienzia mu nzila isipalile. (2 Tim. 2:20, 21) Tuli twaikala twalangulukile kaako kantu musita utuli twasaakula babibuza betu. Inzi, kunti kyakola kusaakula babibuza baweeme kupitila aplikasio ili yakwasia kutuma ni kupokelela mpunda.

Kine tukebele kwiunga ni kikundi kikata kili kyatuminana mpunda, tupalile kutontonkania twapoozeko maano palua bantu bali mu kekio kikundi. Bange Bakristu baaiungile ni bikundi bikata, baapatilue na bintu bibiipile. Lupua ao nkazi kunti wakengela siani kine ali mu kikundi kilimo ma mia ao ma elufu a bantu? Kunti kyaya kyakolele kumana buino bantu bonse bali mu kikundi kabili kine bali ni kiketekelo ao abe. Lileembo lya Malumbo 26:4 lili lyalanda eevi: “Nsiizi kwikala pamo ni bantu ba bufi, kabili ndi natiina baalia bali baifiika vibali.” Kekio kyalangila nangue ni mulangue kakiine kuleembelasie bantu batumanine buino.

Anzia kine kikundi kilimo bantu baniini, Mukristu apalile kutoosia musita wakue kabili ni kelia kili mukulandua na bantu bali mu kekio kikundi. Te tupalile kwiunvua nangue tupalile kwasuka ku kila mpunda, anzia kine ilandiile ki ao papita kale musita waleepele ntangu ileembue. Paulo wamusokele Timoteo palua bantu bali ‘baambana ni kuya bali ni kanvwanvwa mu kulanda bintu bisipalile.’ (1 Tim. 5:13) Ni leenu kunti kyakitika kukita evio kupitila biombo bya kielekronike.

Kasininkizia akosele kimupasi taviinda kutunga ao kutuilizia mpunda ya lwambo ao mpunda ya Bakasininkizia nakue isipalile kumanako bange. (Malum. 15:3; Tus Maf. 20:19) Kabili ali watiina kutuilizia kila lyasi lya kukisia ao lisimanikile buino kine ni lya kisinka (Baef. 4:25) Kakiine, mu kitente kya Enternete kya jw.org ni mu ntantiko ya kila muezi ya JW Télédiffusion, tuli twapatamo byakulia bingi bya kimupasi ni bulondolozi bwa leenu.

bange Bakasininkizia bali babombia mpunda ya kielektronike eevi kusisia, kusita ni kubuila bantu palua bintu bya busulu ni kupeela bantu miilo. Bebio bintu, tupalile kubipusania ni bintu bya kiteokrasi. Pakaako, Mukristu asitonene ‘kuvindua na lwinso lwa nfalanga’ taviinda kubombia balupua eevi apatilemo nfalanga.​—Baeb. 13:5.

Eba, tupalile kubombia ma aplikasio ali akwasia kutuma ni kupokelela mpunda juu ya kubalombela nfalanga balupua bakabiile kukwasiiwa ao balia bali mukwema juu ya maka a kyalo ali ainoona? Lyonse tuli twaemenana mu ntono kupitila kukwasiana ni kukoseleziana. (Yak. 2:15, 16) Inzi, kukita evio kupitila bikundi bya kutuminana ni kupokelela mpunda, kuli kulengia musambo ni bakote ba mu kilonghaano bakolelue saana kukwasia balupua. (1 Tim. 5:3, 4, 9, 10, 16) Kabili, kakiine te kuli muntu ali kutona kulengia bantu batontonkanie nangue wene i asaakwilue eevi akwasie balupua betu.

Tutonene kukita kelia kili kumuletela Leeza bulumba. (1 Bakor. 10:31) Pakaako, musita utuli mukubombia aplikasio ili yakwasia kutuma ni kupokelela mpunda ao teknolojia inge, tupalile kumana maavia ali asaangua mu kubombia bebio bintu, ni kuya twakengeele.