Akhristu anyaki agwiriskiya ntchitu vipangizu va mazuŵa nganu kuti akambiskanengi ndi ŵanthu a mu banja lawu kweniso Akaboni anyawu. Kweni Mkhristu wakukhwima mwauzimu, wakhumbika kukumbuka ulongozgi uwu wakuti: “Munthu wakuchenje wawona soka ndipu wabisama, kweni munthu wambula kuziŵa vinandi walutiriya ndipu wakumana ndi masuzgu.”—Nthanthi 27:12.

Tiwonga kuti Yehova watitivikiliya. Kweni ticheza cha ndi ŵanthu akusezgeka, wo achitiska kuti ŵanthu agawukani pamwenga wo achiska visambizu vaboza. (Aro. 16:17; 1 Akori. 5:11; 2 Yoha. 10, 11) Abali anyaki pamwenga ŵanthu anyaki wo awungana mu mpingu, angaŵa kuti alondo cha marangu nga mu Bayibolu. (2 Timo. 2:20, 21) Asani tisankha mabwezi, titenere kukumbuka venivi. Kweni kungaŵa kwakusuzga kusankha umampha mabwezi asani tigwiriskiya ntchitu nthowa zakutumiziyana mameseji.

Asani tikhumba kusere pa gulu lakutumiziyana ndi kulonde mameseji lo le ndi ŵanthu anandi, tikhumbika kuŵanaŵaniyapu mwakuphwere ŵanthu wo tichezengi nawu. Akhristu anyaki asere mu magulu ngo nge ndi ŵanthu anandi ndipu venivi vichitiska masuzgu. Kumbi mubali pamwenga mzichi wangachita wuli kuti wachitengi vinthu mwakuphwere asani gulu lo walimu le ndi ŵanthu mahandiredi pamwenga masauzandi? Vingachitika cha kuti waŵaziŵi umampha wosi wo ŵe mugulu lo kweniso kuti waziŵi mo ubwezi wawu ndi Yehova uliri. Lemba la Salimo 26:4 likamba kuti: “Ini ndicheza cha ndi ŵanthu aryarya, kweniso ndikhwecha ŵanthu wo abisa mijalidu yawu.” Venivi vilongo kuti ndi zeru kutumiziya mameseji ŵanthu ŵija wo titiŵaziŵa umampha.

Chinanga kuti Mkhristu wangaŵa kuti gulu lo walimu le ndi ŵanthu amanavi, iyu wakhumbika kuwona so nyengu yo wamaliya pakucheza nawu kweniso nkhani zo akambiskana. Tikhumbika cha kuja ndi maŵanaŵanu ngakukhumba kumuka meseji yeyosi mwambula kutole kanthu nkhani yo akambiskana kweniso nyengu yo angamaliyapu. Paulo wangutcheŵeska Timote vakukwaskana ndi ŵanthu wo ‘akamba va anyawu ŵeneku kulivi kweniso wo aselere pa nkhani zaŵeni zo zitiŵakwaska cha.’ (1 Timote 5:13) Mazuŵa nganu, ŵanthu angachita so venivi kuziya pa vipangizu va mazuŵa nganu.

Mkhristu wakukhwima mwauzimu, wangakamba cha pamwenga kuvwisiya ndemanga ziheni kweniso vinthu vachisisi vakukwaskana ndi akhristu anyaki. (Salimo 15:3; Nthanthi 20:19) Kweniso iyu wakhwecha kukamba pamwenga kuvwisiya nkhani zakugozga pamwenga zo walivi nazu ukaboni. (Aefe. 4:25) Tilonde chakurya chauzimu kweniso malipoti ngakuthembeka pa webusayiti ya jw.org kweniso mu pulogiramu ya mwezi ndi mwezi ya JW Broadcasting^®.

Akaboni anyaki agwiriskiya ntchitu nthowa yakutumiziyana mameseji kuti agulisi, aguli pamwenga kusaska malonda pamwenga ntchitu. Izi ndi nkhani za bizinesi ndipu zikwaskana cha ndi nkhani yakusopa Yehova. Kweni Akhristu wo akhumba cha “kwanja ndalama,” agwiriskiya ntchitu abali ndi azichi cha nge nthowa yakusaniriya ndalama.—Ahe. 13:5.

Kweni kumbi tikhumbika kugwiriskiya ntchitu nthowa zakutumiziyana mameseji kuti tisonkhesi ndalama zakovye abali wo akhumbika chovyu pamwenga ko kwachitika masoka? Titiŵayanja abali ŵidu ndipu kanandi titesesa kuŵawovya kweniso kuŵachiska. (Yako. 2:15, 16) Kweni asani tingachita venivi kuziya mu magulu ngakulungakulu ngakutumiziyana mameseji, vingachitiska kuti kuŵi kwakusuzga kuti ofesi ya nthambi pamwenga ŵara mu mpingu aŵawovyi. (1 Timo. 5:3, 4, 9, 10, 16) Ndipu kukamba uneneska, palivi weyosi waku isi yo wangakhumba kuti ŵanthu aŵanaŵanengi kuti tikusankhika kuti tiwovyi mbereri zaku Chiuta.

Tikhumba kuchita vinthu vo vingapereka unkhankhu kwaku Chiuta. (1 Akori. 10:31) Mwaviyo, asani mugwiriskiya ntchitu nthowa zakutumiziyana mameseji pamwenga vipangizu vinyaki va mazuŵa nganu, muŵanaŵaniyengi masuzgu ngo ngangaŵapu ndipu muchitengi vinthu mwakuphwere.