Mambe Makristo ma ngu thumisa teknolojiya ya matshigwanaya gasi gu bhula ni valongo ni vambe vandriyathu, ganiolu, Mukristo a vidzidwego a yede gu landrisa wusingalagadzi wu gu khuwo: “Muthu nya mapimo a ngu wona mhango na yi ngari hwindzo a sihala, aholu gipumbu gya gu yi thonona gi ya mana gutshaniseka.” — Mav. 27:12

Hi ngu dziti gu khethu Jehovha a gu vbweta gu hi vhikeya. Khu kharato, kha hi na nga bhula ni vathu va wusago guhambana, va dusidwego libandlani mwendro va hevbudzago silo nya malipha. (Rom. 16:17; 1 Kor. 5:11; 2 Joh. 10, 11) Vambe va hongolago mitshanganoni si nga gira na va si landrisi milayo ya Jehovha. (2 Thim. 2:20, 21) Nigu si nga hi garadzeya gu hatha gwadi dzipari dzathu ha gu bhula nadzo khu gu thumisa dziaplikativhu nya gu rumeye ni gu hakha dzimesaji basi.

Si na ni lisima ngudzu gu hi dzi woneya avba nya gu trokari dzimesaji, abari gu tsawa wakona wukhongolo. Vambe va bede ga mitsawa nya nga eyi, ganiolu, mihandro yakona kha ya tsakisa. Ga tsawa wu gu na ni vathu nya vangi ngudzu kha si kodzegi gu vati gwadi vatshavbo ni guti giemo gyawe khu liphuvboni. Ganiolu ndriyathu a nga dzi woneya kharini abari gu ga tsawa wowo gu na ni vathu nya vangi? Libhuku la Ndzimo 26:4 lari khilo: “Kha nyi khali dangamwedo ni sidambane, kha nyi gimbili ndzila mweyo ni vakanganyisi.” Ndrimana yeyi ya gu yeyedza gu khiyo wugengeyi gu trokari dzimesaji ni vathu hi vatigo gwadi basi.

Ambari abari gu tsawa wowo wudugwana, Mukristo yede gu dzi wudzisa gu khuye: Ginani va bhulago khigyo omu nya tsawa wowu? Tepo muni nyi vbedzago na nyi gu trokari dzimesaji? Dzimesaji dzodzo dzi nga ganeya khu silo nya singi, ganiolu kha wu gurumedzegi gu hlamula dzatshavbo. Pawulo gengedzide Thimoti gu khuye vathu va di hadzi “ganelela mapepetela.” (1 Thim. 5:13) Muhuno isoso si ngu kodzega khu gu thumisa dziaplikativhu nyo rumeye ni gu hakha dzimesaji.

Mukristo a vidzidwego kha na nga ganeya guvivba mwendro gu bhula khu misihalo ya ndriyaye. (Ndzi. 15:3; Mav. 20:19) Nigu a na potsa gu ganeleya khu mahungu a si tiyisegigo gu khuye lisine. (Efes. 4:25) Hi na ni mahungu nya mangi ma seketedwago omu nya Bhibhiliya ni mibiko hi nga yi tumbago omu nya sayiti yathu jw.org ni omu nya milongoloko nya JW Broadcasting^® yi duswago ngima ni ngima.

Vambe vandriyathu va ngu thumisa dziaplikativhu nyo rumeye ni gu hakha dzimesaji gasi gu gira dzinogosi ni gu ninga thumo vandriyathu. Ganiolu, isoso kha si gimbileyani ni wukhozeyi wa Jehovha. Mukristo a si vbwetigo “gu fumwa khu makolo nya dzitsapawu” gima kha na nga zama gu lukrari khavba ga vandriyathu. — Hebh. 13:5.

Ina gyomo gigaradzo avba nyo thumise dziaplikativhu dzedzi gasi gu lomba dzitsapawu dzi na phasago vandriyathu va hamugago mwendro va thegedwego khu dzimhango nya tumbunugo? Hi ngu haladza vandriyathu nigu ha gu vbweta gu va phasa tepo va vbwetago giphaso. (Jak. 2:15, 16) Ganiolu, gu zama gu gira isoso khu gu thumisa dziaplikativhu dzedzi si na tsolopeteya Bheteli mwendro libandla gu va ninga giphaso va gi vbwetago. (1 Thim. 5:3, 4, 9, 10, 16) Nigu khu lisine, kha hi vbweti gu gira vathu va pimisa gu khavo ethu hi emisidwe gasi gu phasa vandriyathu.

Ethu ha gu vbweta gu gira silo si na ningago wuzundzu Jehovha. (1 Kor. 10:31) Khu kharato, na hi si gu hungi gu khethu hi na thumisa dziaplikativhu nyo rumeye ni gu hakha dzimesaji mwendro dzimbe dziteknolojiya, hi yede gu dundrugeya khu dzimhango dzakona hi bwe hi dzi woneya.