Vakreste van’wana va tirhisa ti-app ta manguva lawa leswaku va burisana ni maxaka ni Vakrestekulobye. Kambe, Vakreste lava wupfeke va yingisa xitsundzuxo lexi nge: “Munhu wo tlhariha u vona khombo kutani a tumbela, kambe la nga riki na ntokoto u ya emahlweni a famba kutani a langutana ni vuyelo bya swiendlo swakwe.”—Swiv. 27:12.

Ha swi tiva leswaku Yehovha u lava ku hi sirhelela. Hikwalaho, a hi tihlanganisi ni vanhu lava vangaka ku avana, lava susiweke kumbe lava hlohlotelaka tidyondzo ta mavunwa. (Rhom. 16:17; 1 Kor. 5:11; 2 Yoh. 10, 11) Van’wana lava taka etinhlengeletanweni ta vandlha swi nga endleka va nga tikhomanga kahle. (2 Tim. 2:20, 21) Swi ta va swinene ku tsundzuka mhaka leyi loko hi hlawula vanghana. Kambe a swi olovi ku hlawula vanghana lavanene loko hi vulavurisana ni vanhu hi ku tirhisa ti-app.

I swa nkoka ku hlawula vanghana, ngopfungopfu loko swi ta eka mitlawa leyi nga ni vanhu vo tala eka ti-app. Vakreste van’wana va tihoxe ekhombyeni hi ku joyina mitlawa leyi nga ni vanhu vo tala. Makwerhu a nga byi tirhisa njhani vuxiyaxiya loko ntlawa lowu a nga eka wona wu ri ni vanhu vo tala swinene? Eka ntlawa lowu nga ni vanhu vo tala, a swi olovi ku tiva vumunhu bya vona hinkwavo ni vuxaka lebyi va nga na byona ni Xikwembu. Pisalema 26:4 yi ri: “A ndzi tshami ni vanhu lava kanganyisaka, naswona ndzi papalata vanhu lava fihlaka leswi va nga swona.” Tsalwa leri ri swi veka erivaleni leswaku eka ti-app, hi fanele hi endla vunghana ni vanhu lava hi va tivaka kahle.

Hambiloko ntlawa lowu Mukreste a nga eka wona eka app wu nga ri na vanhu vo tala, u fanele a xalamukela nkarhi lowu a wu hetaka ni timhaka leti ku buriwaka hatona. Hi nga titwi hi boheka ku katseka eka bulo rin’wana ni rin’wana leri va vaka na rona kumbe ku heta nkarhi lowu va wu hetaka eka app. Pawulo u tsundzuxe Timotiya leswaku a ku ta va ni vanhu lava a va ta “hleva ni ku nghenelela etimhakeni ta van’wana.” (1 Tim. 5:13) Namuntlha, swa olova ku hleva ni ku nghenelela etimhakeni ta van’wana eka ti-app.

Mukreste loyi a wupfeke a nge katseki eka ku hleva kumbe ku vulavula hi timhaka leti nga xihundla ta Vakrestekulobye. (Ps. 15:3; Swiv. 20:19) Nakambe u ta papalata ku vulavula hi timhaka leti cheriweke munyu kumbe leti a nga riki na vuxokoxoko bya tona. (Efe. 4:25) Rungula leri nga hi pfunaka hi tiyisa vuxaka bya hina na Yehovha ni swiviko leswi tshembekaka hi swi kuma eka website ya hina ya jw.org ni le ka Vuhaxi Bya JW.

Timbhoni tin’wana ti tirhisa ti-app to burisana eka tona hi xikongomelo xo xavisa, ku xava ni ku navetisa swilo leswi ti swi xavisaka kumbe ku thola van’wana. Leti i timhaka ta mabindzu, a ti fambisani nikatsongo ni ku gandzela Yehovha. Vakreste lava nga ‘rhandziki mali’ a va va yengi vamakwavo leswaku va xava swilo swa vona.—Hev. 13:5.

Xana swi fanerile leswaku hi tirhisa ti-app to rhumelana marungula hi xikongomelo xo hlengeleta mali yo pfuna kumbe xo phalala vamakwerhu lava weriweke hi timhangu? Hakanyingi ha pfunana ni ku seketelana hi mikarhi ya mangava. (Yak. 2:15, 16) Kambe loko hi tirhisa ti-app hi xikongomelo xo hlengeleta mali yo pfuna vamakwerhu, hi ta va hi tlula leswi hi dyondzisiwaka swona hi nhlangano. (1 Tim. 5:3, 4, 9, 10, 16) A hi lavi vanhu va ehleketa leswaku hi nyikiwe vutihlamuleri byo hlawuleka byo khathalela tinyimpfu ta Xikwembu.

Hi lava ku endla swilo leswi nga ta yisa ku dzuneka eka Xikwembu. (1 Kor. 10:31) Hikwalaho, loko u lava ku tirhisa ti-app to rhumelana marungula kumbe endlelo rin’wana ra thekinoloji, ehleketa hi makhombo lama nga va ka kona kutani u ma xalamukela.