A maKristu yo kari ma tirisa tekinolojiya kasi ku bhula ni maxaka ni maKristu-kuloni. Kanilezvi, a maKristu ma buvhileko ma tirisa tekinolojiya leyo na ma nga rivali a wusungukati legi gaku: ‘A munhu a tlharihileko wa wona mhango a fihlala, kanilezvi a zvipumbu zviya mahlweni zvi ya xaniseka.’ — Mav. 27:12.

Ha zvi tiva ku Jehovha i lava ku hi vhikela. Hikwalaho, a hi hlakani ni lava va vangako kuhambana, ni vo susiwa, ni lava va gondzisako zvilo zvi nga zwananiko ni lisine. (Rom. 16:17; 1 Kor. 5:11; 2 Joh. 10, 11) A vokari va nga bandleni ga Jehovha zva koteka ku na va nga hi na mahanyela ma dzundzekako. (2 Tim. 2:20, 21) A cikhati hi chatako vanghana, a hi yi rivali a mhaka leyo. Hambulezvo, a ku hlawula vanghana va nene lomu ka tigrupo ta ku rumelana timesaji zva tshuka zvi karata.

Zva lisima nguvhu a ku hi hlawula khwatsi a vanghana va hina lomu ka grupo ya hombe ya ku rumelana timesaji. A maKristu yo kari ma nga nghena ka grupo ya hombe a zvi va fambelangi khwatsi. Makunu a makabye a nga ti wonelisa kuyini loku lomu ka grupo leyo ku hi ni vanhu vo tala nguvhu? A lisine hi ku a ku na ndlela ya ku va tiva khwatsi vontlhe lomu ka grupo ni wumoya gabye. A Lisimu 26:4, li wula lezvi: ‘A ndzi tshami ni vanhu vo hemba wunwa, hambu ni ku hlengela ni vaxengeteli.’ Lezvo zvi komba ku i chukwana nguvhu a ku rumelana timesaji ni lava u va tivako khwatsi.

Hambu ka grupo yi nga ni vanhu va vatsongwani, a muKristu i fanele ku hlola khwatsi a cikhati leci a ci mbhetako ni lezvi a vanhu va kona va bhulako hi zvona. Hi nga zvi wonisi ku hi fanele ku tshama hi hlamula timesaji tontlhe, na hi nga cheli kota hi lezvi zvi bhuliwako ni cikhati hi ci mbhetako. Pawule i byelile Timote lezvaku a ti wonela vanhu va ‘dekele, ni vo nghenela zva vambe.’ (1 Tim. 5:13) Hinawu nyamutlha hi nga ti wonela vanhu va tshamela lego lomu ka grupo ya ku rumelana timesaji.

A muKristu wo buvha a nga wulawuli kubiha hi van’wani ne a nga ingiseli loku a van’wani va maha lezvo ne a nga bhoxi zvihundla zva maKristu-kuloni. (Lis. 15:3; Mav. 20:19) A muKristu wo buvha kambe i wa nga ta hundzisa ne ku ingisela mahungu yo biha ni yo hundzeleta zvilo, kutani yo kala a nga zvi tivi khwatsi ku lisine ke. (Efe. 4:25) Lomu ka saite jw.org, ni ka tivhidhio ta JW Broadcasting^® ta hweti ni hweti, hi kuma mahungu yo tala nguvhu yo tsumbeka ma hi tiyisako hi tlhelo ga moya.

A maKristu yo kari ma tirisa tiprograma leto ta ku rumelana timesaji kasi ku maha mabhindzu, ku xava, ku kombisa zvilo va xavisako, kutani ku thola vatiri. Lezvo zvi hambene kule nguvhu ni ku khozela Jehovha. Hikwalaho, a muKristu a nga laviko kuva ni mahanyela “ya ku randza mali,” a nga tshuki a londzowota vamakabye kasi ku vhuvhumisa bhindzu gakwe. — Mah. 13:5.

Ahati ku zama ku kuma mali ya ku vhuna vamakabye va nga wusiwaneni kutani va nga welwa hi khombo ga ntumbuluko ke, hi nga maha lezvo hi ku tirisa tiprograma leto? Lisine ku ha va randza vamakabye va hina niku ha khatala hi vona kambe; hi cigelo leco hi tolovelako ku va vhuna, ku va seketela ni ku va tiyisa. (Jak. 2:15, 16) Hambulezvo, a ku lava civhuno lomu ka grupo ya ku rumelana timesaji zvi nga colopeta a ntiro wa wu nene lowu a Bheteli kutani bandla gi wu mahako kasi ku khatalela vamakabye va lavako ku vhuniwa. (1 Tim. 5:3, 4, 9, 10, 16) A cin’wani hi ku a hi lavi ku wonisiwa ku khwatsi hi hlawulilwe hi Nungungulu hi ndlela yo hlawuleka kasi ku khatalela tiyivhu takwe.

Leci hi ci lavako, ku maha lezvi zvi to mu nyika wudzundzo Nungungulu. (1 Kor. 10:31) Hikwalaho, loku u lava ku maha ciboho ca ku tirisa kutani ku nga tirisi a programa yo kari ya ku rumelana timesaji, ranga hi ku zama ku tiva makhombo ma nga kona, u tlhela u ti wonela.