Ŵakhristu ŵanyake ŵakugwiliskira ntchito vinthu vya tekinoloje kuti ŵayowoyeskanenge na mbumba zawo kweniso Ŵakhristu ŵanyawo. Ndipouli, Mkhristu wakukhwima wakwenera kukumbuka ulongozgi wakuti: “Munthu wakuchenjera wakuwona ulwani na kubisama, kweni muzeleza wakujendera bweka ndipo wakupwetekeka.”—Zinth. 27:12.

Tikumanya kuti Yehova wakukhumba kutivikilira. Ntheura, tikuchezga yayi na ŵanthu awo ŵakwambiska kugaŵikana, ŵakusezgeka, panji awo ŵakukhozgera fundo zautesi. (Rom. 16:17; 1 Kor. 5:11; 2 Yoh. 10, 11) Ŵanyake nangauli ŵakuwungana na mpingo, kweni ŵakupulikira yayi malango gha mu Baibolo. (2 Tim. 2:20, 21) Ntheura para tikusankha ŵabwezi tikwenera kukumbuka fundo iyi. Kweni chingaŵa chakusuzga kusankha makora ŵabwezi usange mbanthu ŵakuti tikuchezga nawo kwizira waka pa mapulogiramu ghakutumizgirana mameseji.

Apo pangakhumbikwaso kuŵa maso chomene pakusankha ŵabwezi ŵakwenelera, mpha ma gulu ghakuchezgerapo gha pa Intaneti agho pakuŵa ŵanthu ŵanandi. Ŵakhristu ŵanyake ŵali kujoyina magulu ghanthena agha, kweni vinthu vili kuŵamalira makora yayi. Kasi mubali panji mudumbu wangachita wuli vinthu mwamahara para wali pa gulu ilo pali ŵanthu ŵanandi? Chingaŵa chakusuzga kuŵamanya makora ŵanthu wose kweniso kumanya umo wose ŵakuchitira mwauzimu. Ghanaghanirani ivyo wakayowoya uyo wakalemba Salimo 26:4. Iyo wakati: “Nkhukhala chara pamoza na ŵanthu ŵapusikizgi. Ndipo nkhugega awo ŵakujibisa umo ŵaliri.” Ivi vikulongora kuti ni mahara chomene kutumizgira meseji ŵanthu awo tikuŵamanya pera.

Nanga pangaŵa pagulu lakuti pali ŵanthu ŵachoko, Mkhristu wakwenera kuŵa maso na nyengo iyo wakumalira pa kutumizgirana mameseji na ŵanthu ŵa pagulu ilo kweniso kupulikizga ivyo ŵanthu ŵakudumbiskana. Tileke kujipulika kuti tikwenera kuzgora meseji yiliyose panji nkhani yiliyose iyo yilipo nanga nkhani iyo yingatora nyengo yitali. Paulosi wakachenjezga Timote za ŵanthu awo “ŵakusesa na kunjilirapo nkhani zaŵene.” (1 Tim. 5:13) Ivi vingachitikaso mazuŵa ghano kwizira pa foni panji pa kompyuta.

Mkhristu wakukhwima mwauzimu, wakuzgorako yayi panji kupulikizga nkhani zachisisi panji zakunena Ŵakhristu ŵanyake. (Sal. 15:3; Zinth. 20:19) Kweniso wakusazgirako yayi nkhani kujumpha umo yanguŵira panji kuyowoya nkhani yambura ukaboni. (Efe. 4:25) Tili na nkhani zinandi zakufuma mu Baibolo na malipoti agho tingaghagomezga pa webusayiti yithu ya jw.org kweniso kwizira pa pulogiramu ya JW Broadcasting^®.

Ŵakaboni ŵanyake wakugwiliskira ntchito magulu ghakuchezgerapo kuti ŵaguliske, kugura na kusaska katundu, kweniso kupenja ŵanthu awo ŵakukhumba ntchito. Ivi ni vya bizinesi ndipo vikukhwaskana na Kusopa Yehova yayi. Ŵakhristu awo ŵakukhumba kuti umoyo wawo uŵe “wambura kutemwa ndalama” ŵakugega kugwiliskira ntchito ŵabali kuti ŵasangirepo ndalama.—Heb. 13:5.

Wuli pa nkhani ya kugwiliskira ntchito nthowa zakulemberana mameseji izi kupempha ndalama kuti tovwire ŵabali awo ŵakusoŵerwa panji awo masoka gha chilengiwa ghaŵawira? Tikuŵatemwa chomene ŵabali ŵithu ndipo kanandi tikukhumba kovwira awo ŵakukhumbikwira wovwiri na kuŵakhozga. (Yak. 2:15, 16) Kweni kuchita nthena kwizira pa magulu agha ghakuchezgerapo gha pa Intaneti vingapangiska kuti chiŵe chakusuzga kuti ofesi ya munthavi panji mpingo wovwirepo mwandondomeko. (1 Tim. 5:3, 4, 9, 10, 16) Ndipo tikwenera yayi kupangiska ŵanthu kughanaghana kuti ise ndise tili kusankhika mwapadera kuti tovwirenge mberere za Chiuta.

Ndise ŵakukhumbisiska kuchita vinthu ivyo vingapeleka uchindami kwa Chiuta. (1 Kor. 10:31) Ntheura usange tikusankha nthowa ya kutumizgirana mameseji panji yinyake, tighanaghanirengeso kofya kwake, ndipo tikwenera kuŵa maso.