AKristu amweni anoseenzesa zvigadzirhwa zve magetsi kuti arumbwe ecicedza ne mhuri uye ne Apupuri amweni. Zvezvirokwazvo mu Kristu akakura pakunamata unodikana kurumbwa ecirangarira zano rinoti: “Munhu wakangwara unoona ngozi ofindara, asi asina uzii anorumbwa ecienda ozosongana ne dambudziko.”—Zvie. 27:12.

Isusu tinozwisisa kuti Djehovha anotidziirira. Atitambi ne anhu anoita kuti pagare no ma grupu, akadzingwa uye no aya anofundisa manyepo. (Aro. 16:17; 1Ako. 5:11; 2Ju. 10, 11) Amweni ari mukati me ungano, anorarama asikatondowedzi mitemo iri mu Bhaibheri. (2Ti. 2:20, 21) Patinopsvaka shamwari, tinodikana kutanga tazvirangarira. Izvi zvingasama kuita nyore nge kuseenzesa aprikativho ye ma mesaji.

Zvakanaka kunyasa kusanangura shamwari dzakanaka kana tecida kuita magrupu akakura teciseenzesa mesaji. Ma Kristu amweni akapindawo mu magrupu akakura, uye zvakaabarira ngozi. Asi hama ne hanzvadzi angagara kudini akangwaririra kana pakamutswa grupu rine anhu akawandisa? Zvaizoshupha kuziya unhu wawo uye migarire ye ku mwiya ye munhu umwe na umwe wawo. Pisarema 26:4 inoti: “Andishamwaridzani no anhu anonyepa, uye ndinotambira kure no aya anoiga zvaari.” Izvi zviri kuda kureya kuti, atidikani kuseenzesa ma aprikativho e mesaji kuti titumire aya atinoziya here?

Kunyazi mu grupu risikazi kukura, mu Kristu unodikana kuona nguwa yaanopedza ecitumirana ma mesaji uye zvinyi zvinonyanya kurekethwa mu grupu irona. Atidikani kuzwa kuti tinodikana kudaira ma mesaji, pasinei nekuti iri kubhuya nge zvei uye kuti icatitorera nguwa yakareba kudini. Pauro wakangwadza Timoti kuti anhu aizogara “anyamapsveda uye aizopindira mu nda dze amweni.” (1Ti. 5:13) Mazuwa ano, zvingakwanisa kuitika zviro zvakaita hingana izvi peciseenzeswa ma aprikativho e ma mesaji.

Mu Kristu wakakura pakunamata aazoiti kana kuzwa masoko ekutonga amweni kana kuti masoko akaigika e Apupuri amweni. (Pis. 15:3; Zvie. 20:19) Uye iyena ucaita zviri zvese kuti asazwe masoko ekunyepa kana kuti asiripi e zvirokwazvo. (Aef. 4:25) Tinotambira masoko e zvirokwazvo peciseenzeswa saite yedu ye jw.org uye urongwa we pa mwedzi we JW Broadcasting^®, patinogumira zvekurhya zve ku mwiya uye masoko mapsva akagondeka.

Apupuri amweni anoseenzesa ma aprikativo e mesaji kuti atengese, atenge uye abararise masoko e zviro zvaanotengesa kana kuti apase mabasa anhu amweni. Izvi zvinocokuita ne zvekutengeserana haiwa pakunamata Djehovha. AKristu anoda kugara kure no “kudisisa mare” anoita zviri zvese kuti asaseenzese ukama waanawo se hama no hanzvadzi kuti aite zvekutengeserana.—Ahe. 13:5.

Zvakadini kuseenzesa ma aprikativho e ma mesaji kuti tikumbire mare hama kuti tibetsere hama dzinonga dzawirhwa ne njodzi? Kajinji kakhona, tinopangidza cido cekuda kubetsera uye kubambisa umwe na umwe wedu. (Tg. 2:15, 16) Asi, kuita izvi teciseenzesa grupu rakakura re ma mesaji, zvezvirokwazvo zvingapingaidza urongwa wakanaka unenge weciizwa nge firiari kana nge ungano. (1Ti. 5:3, 4, 9, 10, 16) Zvezvirokwazvo akuna umwe na umwe wedu anodikana kuita kuti anhu arangarire kuti takapaswa ubaba wekuriritira mabira a Mwari.

Isusu tino cido cokupa mbiri ne rukudzo kuna Djehovha Mwari. (1Ako. 10:31) Hino, kana tikasanangura kuseenzesa ma aprikativho e mesaji kana zvigadzirhwa zvimweni zve magetsi, tinodikana kuzviita ne kungwarira, uye tecizia ngozi ingazouya.