Чамдык христианнар өг-бүлези база акы-угбалар-биле аралажыр дээш, амгы шагның технологияларын ажыглап турар. Быжыг бүзүрелдиг кижи Библияда: «Угаанныг кижи айыыл көргеш, чашты бээр, а кенен улус олче уткуштур баргаш, кеземче алыр» дээн сөстерни кичээнгейге алыр (У. ч. 27:12).

Иегова бисти камгалаарын күзеп турар деп билир болгаш, «аңгылажыг үндүрүп», чыыштан үндүрткен азы библейжи өөредиглерни хажыдып турар улус-биле аралашпас бис (Рим. 16:17; 1 Кор. 5:11; 2 Ин. 10, 11). Чыышта безин чамдык улус эки үлегерни көргүспейн турар (2 Тим. 2:20, 21). Эш-өөрнү шилип тургаш, ону утпас болзувусса эки. А бир эвес кандыг-бир кижи-биле чүгле мессенджерлер таварыштыр аралажып турар болзувусса, ооң биске эки эш болурун билип аары мырыңай берге.

Ылаңгыя хөй киржикчилерлиг бөлүктерге бижижип тургаш, ооң дугайында сактыры чугула. Чамдык христианнар ындыг бөлүктерге аралажырга, ооң түңнели багай болган. Бөлүктүң киржикчилери чүс ажып, безин муң ажып турар болза, кижи канчап долузу-биле серемчилелдиг бооп болур? Оларны хууда танывас болзувусса, оларның Бурганга бүзүрели быжыг деп канчап билип алыр бис? Ырлар 25:4-те: «Мегелеп чугаалаар улус-биле кады олурбадым, ийи арынныг улус-биле кады чорбас мен» — дээн. Моон алырга, мессенджерлерге аралажып тургаш, чүгле эки таныыр-билир улус-биле чугаалажыр болза эки.

Бөлүктүң киржикчилери эвээш-даа болза, христиан кижи ынаар кайы хире үени чарып база ында чүнүң дугайында чугаалажып турарынче кичээнгейни салыр болза эки. Бөлүкте чоргускан чагаа бүрүзүнге албан харыылаар ужурлуг мен деп бодаваңар. Павел Тимофейге «хоп-чип... дажып, киришпеске киржип» турган улус дугайында бижээн (1 Тим. 5:13). Чамдык улус база мессенджерлерге ынчаар алдынар боор.

Бурган-биле найыралын үнелээр кижи мессенджерлер таварыштыр өске акы-угбаларны шүгүмчүлеп, оларның дугайында чажыт информацияны таратпас база ындыг сообщениелерни номчувас боор (Ыд. ыр. 14:3; У. ч. 20:19). Оон ыңай ол онза солун азы хынаттынмаан медээлерни сонуургап, оларны өскелерже таратпас (Эф. 4:25). JW Broadcasting^®-те база jw.org деп сайтывыста ай санында үнүп турар дыка хөй бүзүрелдиг медээлер болгаш «аъш-чем» чедер болгаш артар.

Чамдык Иегованың Херечилери бир-ле чүүлдү садып алыр азы садыптар дээш, чок болза, барааннарны рекламалап азы ажылды сүмелээр дээш, мессенджерлерни ажыглап турар. Ажыл-агыйны Иеговага чүдүлге-биле холувас болза эки. Ынчангаш Бурганның бараалгакчызы мессенджерлерни садыг-саарылгага ажыглап тургаш, чүрээнге акшага ынакшыл тыптып келбес кылдыр, акы-угбаларны акша ажылдап аар арга кылдыр көрбес ужурлуг (Евр. 13:5).

Акша-көпееги чедишпес азы бойдус халавынга таварышкан акы-угбаларга дузалажыксап турар болзувусса, мессенджерлерни акша чыыр кылдыр ажыглап болур бис бе? Бис кады бүзүрээн акы-угбаларга ынак болгаш, олар дээш сагыш човап, үргүлчү деткиксээр бис (Иак. 2:15, 16). Ынчалза-даа мессенджерлерде хөй санныг бөлүктерден акша чыыр болза, салбырның азы хуралдың удуртукчуларының организастаан ажылынга шаптыктап болур бис (1 Тим. 5:3, 4, 9, 10, 16). Оон аңгыда, бисте Бурганның чонунуң дугайында сагыш човаар тускай эрге бар деп улустуң бодай бээрин күзевес бис.

Чүнү-даа кылып тургаш, «Бурганның алдар-хүндүзү дээш» кылырын күзээр болгай бис (1 Кор. 10:31). Ынчангаш мессенджерлерни ажыглап тургаш, янзы-бүрү айыылдарның дугайында сактып, оваарымчалыг болуулуңар.