Ay chaʼoxtul testigoetik yuʼun Jehová te ya stuuntesik te teknolojia yuʼun ya xkʼopojik sok te sfamiliaik o yantikxan Testigoetik. Te ermanoetik te tulan schʼuunel yoʼtanik ya schʼuunik te tojobtesel ini: «Te machʼa pʼij yoʼtan, cʼalal ya yil te bin chopol, ya snacʼ sba ta stojol, pero te machʼa ma stsahtay sba ya sohl xan bahel, ya xcʼax swocol yuʼun» (Prov. 27:12).

Jnaʼojtik te ya skʼan ya skanantayotik te Jehová. Jich yuʼun maba ya jokintik te machʼatik ya xatawanik, te machʼatik lokʼesbilik ta kongregasion o te machʼatik ya yakʼik ta nopel te bintik ma smeleliluke (Rom. 16:17; 1 Cor. 5:11; 2 Juan 10, 11). Ayniwan chaʼoxtul te machʼatik ya xkʼot ta kongregasion maba ya schʼuunik te mantaliletik te ayik ta Biblia (2 Tim. 2:20, 21). Ta melel maba wokol ya kaʼiytik ta stsael te machʼa ya jkʼan ya kamigointik teme ya kiltike, pero te kʼalal jaʼ ya jtuuntestik te aplikasionetik ma jichuk ya xkʼot ta pasel.

Teme ya jkʼan ya x-ochotik ta jun grupo yuʼun mensaje, jnop kaʼiytik teme lek te machʼatik ya kamigointik. Ay ermanoetik te ay ochemik ta jun grupo, pero ay staoj swokolik yuʼun. ¿Bin-utʼil ya xjuʼ ya jtsajtay jbatik te banti ay bayal ta jmil ta tul ants winiketik ta jun grupo yuʼun mensaje? Ta melel ma xjuʼ ya jnaʼtik machʼatik-a sok te bin-utʼil ay te schʼuunel yoʼtanike. Te Salmo 26:4 jich ya yal: «Mayuc la juhcan jba soc jchebal-oʼtanetic, ma ba la joquin te jbahbacʼopetique». Te bin lek ya skʼan ya jpastike, jaʼ te jaʼnax ya jkʼopontik te machʼatik ya jnaʼbeytik sbae.

Manchukme maba mukʼ te grupoe, jaʼnix jich ya skʼan ya jtsajtaytik te jayeb tiempo ya jkʼasestik ta stikunel mensaje sok te bintik ya kalbeytik skʼoplale. Ma skʼan te sujbil ya kaʼiy jbatik ta sujtesel spisil te mensajeetik chikan te bin tema yakik ta yalbeyel skʼoplal o teme ma skom sbaik ta stikunel te mensajeetik. Te Pablo la yalbey te Timoteo te ya skʼan ya stsajtay sba sok te machʼatik «ya schʼic sbahic [sok] ya yalic te bin ma scuentahuc yalel» (1 Tim. 5:13). Ta ora ini jaʼnix jich ya xjuʼ ya xkʼot ta pasel ta Internet.

Te j-abatetik te tulan schʼuunel yoʼtanik maba ya slabanik te yantik o maba ya yalbey yantik te bin ma xjuʼ ta alele (Sal. 15:3; Prov. 20:19). Ma skʼan ya yaʼiyik o ya spukbeyik skʼoplal te bin ma smeleliluk (Efes. 4:25). Jaʼnax ya xjuʼ ya jtatik weʼelil ta swenta skʼop Dios sok lekil notisiaetik ta jw.org sok ta JW Broadcasting^®.

Ay chaʼoxtul Testigoetik ya stuuntesik aplikasionetik yuʼun ya xchonbajik, ya xmanbajik o ya sjapik aʼtelil. Spisil ini jaʼ swenta aʼtelil, jaʼ yuʼun ma skʼan ya jkaptik sok te yichʼel ta mukʼ te Dios. Te ermanoetik te ma jaʼuk ya xbajt ta yoʼtanik «sbicʼsitayel taqʼuin» maba ya stuuntesik te ermanoetik yuʼun ya slokʼesik takʼin-a (Heb. 13:5).

¿Yabal xjuʼ ya jtuuntestik te aplikasionetik yuʼun ya jkʼantik takʼin ta skoltayel te ermanoetik te ya xkʼaxik ta wokol? Te bitʼil kʼux ta koʼtantik te kermanotaktik, ya kakʼbeytik smukʼul yoʼtanik sok ya kakʼbeytik koltayel teme ya xtuun yuʼunik (Sant. 2:15, 16). Pero teme ya jpastik jun mukʼul grupo ta swenta mensaje ta skʼanel koltayel, ayotikniwan ta schʼikel jbatik ta aʼtelil te jaʼ ay ta swenta te sukursal o te ansianoetik ta kongregasion, te jaʼ lekxan te bin ya spasike (1 Tim. 5:3, 4, 9, 10, 16). Melel maʼyuk jtuluk ermano te akʼbil yaʼtel yuʼun ya stukeltay sba ta skoltayel te ermanoetik.

Spisil te bin ya jpastik, jaʼ ya jkʼantik te ya yichʼ albeyel yutsil skʼoplal te Jehová (1 Cor. 10:31). Jich yuʼun te kʼalal ya jtuuntestik jun aplikasion ta swenta mensaje o yantikxan, jnoptik te bintik wokolil ya xjuʼ ya jtatik yuʼun sok akʼa jtsajtay jbatik.