Dziṅwe Ṱhanzi dzi shumisa zwishumiswa zwa thekinolodzhi zwa musalauno u itela u amba na miṱa yavho kana na dziṅwe Ṱhanzi. Fhedzi Mukriste a re na vhushaka havhuḓi na Yehova u ḓo dzula a tshi humbula nyeletshedzo i re Bivhilini ine ya ri: “O ṱalifhaho u vhona khombo a khuda, fhedzi a si na tshenzhelo u fhirela phanḓa a wela khomboni.”—Mir. 27:12.

Ri a zwi pfesesa uri Yehova u ṱoḓa u ri tsireledza. Nga zwenezwo, a ri ḓikonanyi na vhathu vhane vha fhandekanya tshivhidzo, vho bviswaho tshivhidzoni kana vhane vha funza pfunzo i sa tshimbidzani na ya Yehova. (Vharoma 16:17; 1 Vhakor. 5:11; 2 Yoh. 10, 11) Vhaṅwe tshivhidzoni a vha ḓifari nga nḓila i tshimbidzanaho na milayo i re Bivhilini. (2 Tim. 2:20, 21) Zwo leluwa u humbula zwenezwo musi ri tshi khetha khonani tshivhidzoni. Fhedzi zwi a konḓa u vhona uri khonani dzavhuḓi ndi dzifhio musi ri tshi khou shumisa app dza u rumelana milaedza.

Ndi zwa ndeme uri ni ṱhogomele nḓila ine na shumisa ngayo app dza u rumelana milaedza, zwihuluhulu arali ni tshi khou rumelana milaedza na tshigwada tshi re na vhathu vhanzhi. Vhaṅwe Vhakriste zwo vha kela maṱari nge vha dzhena kha zwigwada zwi re na vhathu vhanzhi. Mukriste a nga vha hani na vhulondi arali e kha tshigwada tshi re na vhathu vhanzhi? A zwi konadzei uri ni ḓivhe muṅwe na muṅwe wavho na u ḓivha uri vhushaka havho na Yehova ho khwaṱha lungafhani. Phisalema 26:4 i ri: “A thi konani na vhathu vha re na vhufhura, ndi iledza vhane vha dzumba zwine vha vha zwone.” Zwenezwi zwi sumbedza uri ndi vhuṱali u rumelana milaedza na vhathu vhane na vha ḓivha fhedzi.

Naho tshenetsho tshigwada tshine Mukriste a khou rumelana natsho milaedza tshi tshiṱuku, u tea u ṱhogomela uri u fhedza tshifhinga tshingafhani a tshi khou rumelana navho milaedza, na zwine vhenevho vhathu vha amba nga hazwo. A ri kombetshedzei u fhindula yeneyo milaedza hu sa londwi uri i khou amba nga ha mini kana zwi dzhia tshifhinga tshingafhani. Paulo o tsivhudza Timotheo nga ha vhathu vhane vha vha na ‘zwitshele na vhane vha ḓidzhenisa kha mafhungo a vhaṅwe.’ (1 Tim. 5:13) Zwi a leluwa u wela kha tshenetsho tshikwekwe ṋamusi musi ri tshi shumisa zwishumiswa zwa thekinolodzhi.

Ṱhanzi i re na vhushaka havhuḓi na Yehova a i nga ḓo amba kana u thetshelesa mafhungo a si avhuḓi nga ha iṅwe Ṱhanzi. A i nga dovhi ya amba kana u thetshelesa mafhungo a tshiphiri a dziṅwe Ṱhanzi. (Ps. 15:3; Mir. 20:19) Nahone a i nga thetshelesi kana ya fhirisa mafhungo ane zwa tou vhonala uri o shelwa muṋo kana mafhungo a si na vhuṱanzi. (Vhaef. 4:25) Hu na mafhungo manzhi o thewaho Bivhilini na mivhigo zwine ra nga zwi fhulufhela kha website yashu ya jw.org na kha JW Broadcasting^® ya ṅwedzi muṅwe na muṅwe.

Dziṅwe Ṱhanzi dzi shumisa app dza u rumelana milaedza u itela u renga, u rengisa na u kunguwedza zwithu kana u fha vhaṅwe mishumo. Zwenezwo ndi zwithu zwa mabindu nahone a zwi tshimbidzani na u gwadamela Yehova. Vhakriste vhane vha si ‘ṱoḓe u funa tshelede,’ a vha shumisi luvhi vhushaka vhune vha vha naho na vhahavho u itela u wana tshelede.—Vhahev. 13:5.

Naa ri tea u shumisa app dza u rumelana milaedza u itela u humbela tshelede ya u thusa vhahashu vhane vha shaya kana vho welwaho nga khombo? Vhahashu ri a vha funa nahone ri na ndavha na zwine zwa khou itea khavho, nga zwenezwo, kanzhi ri a ṱoḓa u vha thusa na u vha ṱuṱuwedza. (Yak. 2:15, 16) Fhedzi arali ra lingedza u ita zwenezwo ri tshi shumisa tshigwada tshi re na vhathu vhanzhi tshi re kha app ya u rumelana milaedza, zwi nga ita uri zwi konḓele ofisi ya davhi na tshivhidzo u vha thusa. (1 Tim. 5:3, 4, 9, 10, 16) A ri ṱoḓi vhathu vha tshi humbula uri riṋe ri na ndugelo yo khetheaho ya u ṱhogomela vhahashu.

Ri ṱoḓa u ita zwithu zwine zwa ḓo rendisa Mudzimu. (1 Vhakor. 10:31) Nga zwenezwo, arali na ita phetho ya u shumisa app dza u rumelana milaedza kana zwiṅwe zwishumiswa zwa thekinolodzhi, ni ṱhogomele khombo dzine dza nga vha hone nahone ni vhe na vhulondi.