Arquanti fradei i dopera la internet par comunicarse cola fameia e con altri fradei. Ma tuti noantri ghemo de ricordarse del consìlio dela Bìblia: “La persona che la ga sabedoria la vede el perìcolo e la va in serca de protession, ma el bauco el va avanti e dopo el sofre.” — Pro. 27:12.

Noantri savemo che Geovà el vol tender de noantri. Par quela che el ne domanda par no esser amighi de quei che i intriga la pace dela congregassion, de quei che no i ze pi nostri fradei, o che i insegna robe sbaliade. (Rom. 16:17; 1 Cor. 5:11; 2 Gio. 10, 11) Ghemo anca de star atenti con quei che i va ale riunion, ma no i fà quel che Geovà el dise. (2 Tim. 2:20, 21) Quando ndemo scòlier un amigo, ghemo de ricordarse de tute queste robe. Ma sarà fadiga scòlier i amighi se li cognossemo sol par meso dela internet.

Arquanti i fà grupi nela internet con tante persone par parlarse. Ma ghemo de star atenti parché in tanti de questi grupi ga sucedesto robe rugne. Nte un grupo che ghen’è tante persone, no ghen’è come cognosser ben a tuti e saver se tuti i ze pròpio amighi de Geovà. Sarà che una persona che la fà parte de un grupo cossita la ze drio mostrar sabedoria? El Salmo 26:4 dise: “No resto insieme de quei che i ze busieri, e gnanca de quei che no i mostra quel che i ze.” Questo testo el mostra che l’è meio noantri doperar la internet par parlar cole persone che belche cognossemo.

Anca quando un grupo nela internet el ga poche persone, ghemo de domandarse: Queste persone le ze drio parlar sora che? Quanto tempo mi guasto par leder tuto quel che lore le scrive? Le persone le pol parlar de tante robe, ma no te ocore mia risponder tute le volte. Paolo el ga dito par Timòteo restar atento cole persone che le parlea massa e che le parlea dei altri. (1 Tim. 5:13) Ma, ghemo de star atenti parché questo pol suceder anca quando semo drio parlar cole persone par meso dela internet.

Un fradel che el ga sabedoria no’l ndarà parlar mal de nantro fradel e gnanca de robe che no i ze tuti che i pol saver. Gnanca ndarà scoltar se qualchedun el parla sora queste robe. (Sal. 15:3; Pro. 20:19) Gnanca el ndarà parlar de quel che no l’è sicuro o che l’è de pi de quel che ga pròpio sucedesto. (Efe. 4:25) Se noantri volemo leder e scoltar notìssie sora quel che sucede coi servi de Geovà, noantri ghemo el JW Broadcasting^® e el site jw.org.

Arquanti fradei i dopera la internet par parlar dei laori che i fà, de quel che i vende e par darghe oportunità de laoro ai altri fradei. Tuti noantri savemo che i servi de Geovà no i ga de amar ai soldi. Alora, no ndaremo mai doperar i nostri fradei par guadagnar soldi, parché savemo che la adorassion a Geovà la ze una roba e i soldi la ze nantra. — Ebr. 13:5.

Sarà che l’è sbalià domandar soldi par giutar i fradei che i ga infrontà una desgràssia? Sicuro che amemo i nostri fradei e volemo giutarli, ma se femo grupi nela internet par far questo, podemo intrigar quel che la organisassion e la congregassion le ze drio far. (Tiago 2:15, 16; 1 Tim. 5:3, 4, 9, 10, 16) E no volemo mia far quel che la organisassion no la ga domandà a noantri.

Volemo far quel che ghe dà onor a Geovà. (1 Cor. 10:31) Alora, quando ndemo doperar la internet par parlar con altre persone, ghemo de pensar nei perìcoli e star atenti.