Amarida Kiristtaaneti bantta soo asaaranne bantta mala Kiristtaanetuura ubbatoo gayttanawu zammaana miishshata goˈettoosona. SHin, kayma Kiristtaanee kaallidi deˈiya zoriyaa hassayees: “Cincca asi metoi yiyo wode be7idi qosettees; shin akeekai paccido asi sitti gi biidi, metuwan gelees; yaatidi guyyeppe wai ana gees.”—Lee. 27:12.

Yihooway nuna naaganawu koyiyoogaa nuuni akeekoos. Hegaa gishshawu, nu giddon shaahotettay deˈanaadan oottiyaageetuura, bohettidaageetuura woy worddobaa aassiyaageetuura nuuni laggetokko. (Roo. 16:17; 1 Qor. 5:11; 2 Yoh. 10, 11) Gubaaˈiyaara issippe shiiqiya issoti issoti Geeshsha Maxaafan deˈiya higgetussi azazettennaageeta gidana danddayoosona. (2 Xim. 2:20, 21) Nuuni laggeta dooriyo wode hagaa qoppana koshshees. SHin kiitaa kiittiyo aplikeshiniyaa goˈettidi nuuni nu laggetuura gayttikko, laggeta dooriyo wode naagettiyoogee metiyaaba gidana danddayees.

Issi citan deˈiya daro asawu kiitaa kiittiyo wode, tumu laggeta dooriyoogaa xeelliyaagan naagettiyoogee keehi koshshiyaaba. Daro asay deˈiyo citan walahettida amarida Kiristtaaneti qohettidosona. Issi citan xeetan woy shaˈan qoodettiyaageeti deˈikko, nuuni waani naagettana danddayiyoo? He citan deˈiya ubbaa oonatettaanne eti ayyaanaaban deˈiyo hanotaa erana danddayettenna. Mazamure 26:4 xaafidaagee giidobaa akeeka: “Taani cimmiya asatuura issippe uttikke; lo77o milatiya iitatu maabaran gelikke.” Hegee nuuni eriyo asa xallawu kiitaa kiittiyoogee keehi loˈˈo gidiyoogaa bessees.

Guutta asay deˈiyo citawu kiitaa kiittiyo wodekka, issi Kiristtaanee ay keena wodiyaa wurssiyaakko, qassi he citan deˈiya asay ay haasayiyaakko yuushshi qoppana koshshees. Eti xaafidobay ayba gidikkonne woy hegee ay keena wodiyaa ekkikkonne, nuuni he kiitaa zaarana bessees giidi qoppana koshshenna. PHawuloosi ‘zigiriyaanne asa yohon coo geliya’ asatuppe naagettanaadan Ximootiyoosassi yootiis. (1 Xim. 5:13) Ha wodiyan asay elektiroonike miishshatun hegaa malabaa oottana danddayees.

Issi kayma Kiristtaanee ba mala Kiristtaaneta borenna woy hegaa malabaa aybanne siyenna woykko etabaa xuurabaa yootenna. (Maz. 15:3; Lee. 20:19) Qassi I odettiya iitabaa woy tumakkonne erettibeennabaa yootenna woy siyenna. (Efi. 4:25) Nu jw.org websaytiyaaninne JW Brodkasting^® prograamiyan aginan aginan kiyiyaabatun minttettiya Geeshsha Maxaafaa qofaynne nuuni ammanettana danddayiyo tuma gidida daro odoti deˈoosona.

Amarida Kiristtaaneti issibaa bayzzanawu, shammanawunne giigissidobaa erissanawu woy asaa oosuwaa qaxaranawu kiitaa kiittanawu elektiroonike miishshaa goˈettoosona. Hegee zalˈˈe gidiyo gishshawu Yihoowawu goynniyo goynuwaara gayttana koshshenna. ‘Miishsha siiqoppe banttana naaganawu’ koyiya Kiristtaaneti miishshaa demmanawu bantta ishantta goˈettanawu mule malokkona.—Ibr. 13:5.

Maadoy koshshiyo ishanttussi woy daafaban qohettidaageetussi miishshaa oychchanawu elektiroonike miishshaa kiitaa kiittanawu goˈettana koshshii? Nuuni maadoy koshshiyoogeeta darotoo maaddiyoogaaninne minttettiyoogan nu ishantta siiqiyoogaa bessoos. (Yaaq. 2:15, 16) SHin, daro asay deˈiyo citaa baggaara hegaadan oottanawu maliyoogee macara biiroy woy gubaaˈee eta maaddanawu keehi metootanaadan oottana danddayees. (1 Xim. 5:3, 4, 9, 10, 16) Qassi nuuni Xoossaa dorssaa heemmanawu nuussi dumma aawatettay deˈiyaabadan harati qoppanaadan oottanawu nuuppe ooninne koyennaagee qoncce.

Nuuni Xoossaa bonchchissiyaabaa oottanawu koyoos. (1 Qor. 10:31) Hegaa gishshawu, nuuni kiitaa kiittiyo aplikeshiniyaa woy hara zammaana miishshaa goˈettanawu kuuyiyo wode, hegee gattana danddayiyo qohuwaa qoppoosinne naagettoos.