Abale ni alongo ŵane akusakamulichisya masengo yipangiso yamakono pakusaka kukunguluka ni ŵamwiŵasa mwawo kapena Aklistu achimjawo. Nambope Mklistu jwamkomangale pakutenda yeleyi akusakumbuchila maloŵe aga, “Mundu jwakalamuka akusati mkuchiwona chakogoyamo akusajuŵa, nambo jwakuloŵela akusagamba kupelenganya ni akusasimana ni yipwetesi ni kuligamba.”—Mis. 27:12.

Tukumanyilila kuti Yehofa akusasaka kutuchenjela. Myoyo nganituŵa tukungulwiche ni ŵandu ŵakusatandikasya yindu yagaŵikangana, ŵatyosedwe nambosoni ŵakusajiganya yindu yakulemwecheka. (Alo. 16:17; 1 Akoli. 5:11; 2 Yoh. 10, 11) Ŵandu ŵane ŵatukusasonganaga nawo ngakusakola ndamo syambone. (2 Tim. 2:20, 21) Myoyo patukusagula ŵandu ŵakunguluka nawo tukusosekwa tukumbuchileje yeleyo. Kusagula achimjetu ŵambone mpaka kuŵe kwakusawusya pakamulichisya masengo litala lya kulembelana mameseji.

Kusagula achimjetu mpaka kuŵe kwakusawusya naga tupanganyisye gulu jekulungwa mnope jakutumichisyana mameseji. Abale ni alongo ŵane ŵaŵajinjile m’magulu gaŵandu ŵajinji gakutumichisyana mameseji ŵasimene ni yakusawusya. Ana m’bale kapena mlongo mpaka aŵe jwakusamala chamtuli mu magulu ga ŵandu ŵajinji mnope mpela gelega? Mpaka yiŵe yakusawusya kwamanyilila chenene ŵandu ŵakusakunguluka nawowo, soni naga ali paunasi ŵambone ni Yehofa. Lilemba lya Salimo 26:4 likusati, “Ngangutama nawo pampepe ŵandu ŵaunami, kapena kulongana nawo ŵa ulamba.” Ana yeleyi, ngayikutulimbikasya kuti tukusosekwa kutumichisyana mameseji ni ŵandu ŵatukwamanyilila chenene?

Atamose pa kagulu kakutumichisyana mameseji ka ŵandu ŵamnono, Mklistu akusosekwa kulola ulewu wa ndaŵi soni chakulinga chakutamila pakagulupo. Tukusosekwa kuganichisyaga ya ndaŵi jatukumalila nambosoni ŵandu ŵatukunguluka nawo mmalo mwagamba kuganisya kuti bola tukutumichisyana mameseji. Paulo ŵamsalile Timoteyo kuti akusosekwa kusamala ni ŵandu ‘wakusatenda miseche soni kwinjilila ya ŵane.’ (1 Tim. 5:13) Masiku aganosoni ŵandu mpaka atende yeleyi pakutumichisyana mameseji.

Mklistu jwamkomangale nganawa apikanile kapena kutendela umboni ya ngani syawunami kapena kupelechela mawumboni pa yindu yine yakwamba abale ni alongo. (Sal. 15:3; Mis. 20:19) Jwalakwe akusaŵambalasoni kupikanila ngani syagamba kupeka nambosoni syanganisikola maumboni kuti sili sisyesyene. (Aef. 4:25) Nambo m’weji tukusapochela chakulya chausimu soni ngani sine kupitila pa webusayiti jetu ja jw.org kapena pa pologalamu ja mwesi ni mwesi ja JW Broadcasting.

Abale ni alongo ŵane akusakamulichisya masengo guluji pakusaka kwesya malonda soni kupata ŵamasengo. Jelejitu jigambile kuŵa bisinesi ngayikamulana ni kulambila Mlungu. Mklistu jwangakusasaka kuŵika mtima ŵakwe pa mbiya, jwangakamulichisya masengo abale ni alongo pakusaka kupata mbiya.—Aheb. 13:5.

Ana tukusosekwa tukamulichisyeje masengo magulu gakutumichisyana mameseji pakuŵenda mbiya syakwakamuchisya abale ni alongo ŵasimene ni ngosi syachilengedwe? Yisyene kuti tukusanonyelaga abale ni alongo ŵetu, mwamti tukusasakaga kwakamuchisya soni kwalimbikasya. (Yak. 2:15, 16) Nambope kutenda yeleyi kupitila pamagulu gekulungwa gakutumichisyana mameseji mpaka kutendekasye kuti Ofesi ja Nyambi soni mipingo jilepele kwakamuchisya chenene ŵandu ŵakusosechela chikamuchisyo. (1 Tim. 5:3, 4, 9, 10, 16) Kusala yisyene ngatukusosekwa kwatendekasya abale ni alongo kuganisya kuti m’wejo tusagulidwe kuti twasamalileje ŵandu ŵa Mlungu m’litala line lyakwe.

Chakulinga chetu chiŵeje kutenda yindu yampaka yimchimbichisye Mlungu. (1 Akoli. 10:31) Myoyo patukuganichisya kutanda kamulichisya masengo matala gakutumichisyana mameseji tukusosekwa kumanyilila kogoya kwakwe soni tuŵeje ŵakusamala.