Nuu xpinni Cristu riquiiñeʼ tecnología para guiniʼné familia stiʼ ne xcaadxi Testigu. Stale hermanu rinanda conseju riʼ: «Binni nuu xpiaaniʼ rucaachilú ora guʼyaʼ maʼ zeeda xiixa guendanagana ni zuniná laa; peru ca ni nahuati la? qué rireecueʼcaʼ ne racanacaʼ» (Prov. 27:12).

Nánnanu rapa Jehová laanu, nga runi qué ruyúbinu guidxaaganu binni ni rutinde, ca ni nuu expulsadu o ni rusiidiʼ cosa ni cadi jneza (Rom. 16:17; 1 Cor. 5:11; 2 Juan 10, 11). Nuu caadxi de ca binni ni rié reunión qué rinándacaʼ ni rusiidiʼ Biblia (2 Tim. 2:20, 21). Cadi nagana cuinu tu guidxaaganu ora ridúʼyanu ti binni, peru maʼ gadxé ni ora riquiiñenu ti aplicación para gunibiaʼnu tuuxa.

Pa caníʼ íquenu chuʼnu lu ti grupu naroʼbaʼ ra ruseendacabe mensaje, guiníʼ íquenu tu guiráʼ chichuu lu grupu riʼ. Nuu hermanu huayuu lu ca grupu riʼ ne huazaacacaʼ cosa ni huaxiéʼ galán. ¿Ximodo gápanu cuidadu pa nuunu lu ti grupu ra nuu stale binni yaʼ? Nagana nga gunibiaʼnu laacabe ne gánnanu pa dxandíʼ nabánicabe modo ná Dios. Salmo 26:4 ná: «Qué ribieniáʼ ca hombre ni rusiguii; ne qué ridxaagaʼ ca ni rucaachiʼ tu laa». Ni jma jneza gúninu nga guinínenu binni si ni runibiaʼnu.

Pa nuunu lu ti grupu nahuiiniʼ, laaca naquiiñeʼ gápanu cuidadu pabiáʼ tiempu riquiiñenu para guséʼndanu mensaje ne xidé rininu. Cadi naquiiñeʼ peʼ guicábinu guiráʼ mensaje gueeda ra nuunu intiica tema caníʼcabe o neca guindaa conversación ca. Gudxi apóstol Pablo Timoteo gapa cuidadu de ca binni ni riníʼ chisme ne ca ni riuu «lu xpida binni» (1 Tim. 5:13). Tiempu riʼ laaca ngaca zándaca guizaaca lu Internet.

Ca xpinni Cristu ni nuu xpiaaniʼ, qué riuucaʼ lu ca grupu riʼ para guni criticarcaʼ xcaadxi o guiniʼcaʼ xiixa información confidencial (Sal. 15:3; Prov. 20:19). Qué rucaadiágacaʼ ne qué rucheechecaʼ noticia ni qué gánnacaʼ pa dxandíʼ (Efes. 4:25). Lu sitiu jw.org ne lu programa JW Broadcasting^® ni riree cada beeu ricaanu guendaró espiritual ne noticia ni zanda guni crenu.

Nuu Testigu riquiiñeʼ ca aplicación ra ruseendacabe mensaje para gutoo, siʼ, guni anunciar xiixa producto o guyubi dxiiñaʼ. Ca grupu riʼ jma para gutoo si tuuxa lúcani, nga runi cadi naquiiñeʼ ugúʼchanu ni né adoración rudiʼnu Jehová. Ca xpinni Cristu ni cadi nadxii bueltu qué riuuláʼdxicaʼ iquiiñecaʼ ca hermanu sticaʼ para si cueecaʼ xiixa de laacabe (Heb. 13:5).

¿Ñee zanda iquiiñenu ca aplicación riʼ para guinábanu bueltu para tuuxa hermanu ni caquiiñeʼ ni o para xiixa labor de socorro la? Cumu nadxiinu ca hermanu la? racaláʼdxiluʼ cuʼnu gana ne gacanenu laacaʼ (Sant. 2:15, 16). Peru pa guinábanu bueltu para gacanenu ca hermanu ca lu ti grupu naroʼbaʼ ra ruseendacabe mensaje, zándaca cucueezanu dxiiñaʼ jma galán ni runi sucursal o ca ancianu de congregación (1 Tim. 5:3, 4, 9, 10, 16). Nánnanu qué racalaʼdxiʼ nin ti xpinni Cristu gunibiáʼcabe laa casi ni nuu encargadu para gapa ca hermanu.

Racaláʼdxinu gusisácanu Dios lu guiráʼ ni gúninu (1 Cor. 10:31). Nga runi, ante guiníʼ íquenu pa zaquiiñenu xiixa aplicación ra ruseendacabe mensaje o xcaadxi tecnología, guiníʼ íquenu xi peligru nuu luni ne gácanu binni nuu xpiaaniʼ.