1. Hano kalimlaan ko kapah a salikaka hani?

KAPAH salikaka, tanektekay ko tireng namo, iraay ko ˈicel, adihayay ko sapadama to kasakopang. (Taneng 20:29) Ira kamo i kasakopang, tada ngaˈayayto. Ciharatengay kiso malo dama sikawdan alatek, kawra itini pinengneng no tao, kaemangayho kiso, awaay ko nalifetan, cato pakadangar to kalimlaan a tayal saan kiso miharateng. Kawra soˈlin kaemangho kiso, ngaˈayayho a midemak to pina a demak, milifok to pasoˈlin ato pikangodo no salikaka.

2. Oniya lalakaw wa milengo to maanan hani?

² Oniya lalakaw wa misamacay milengo to nalifetan no Hongti ci Tafiti, wa minengnengho to mifekaday a demak i tireng no hongti no Yutaya ci Asa aci Yihosafatan. Wa milengo kita o maanan ko malifaay noniya tatoloay a pasangaray, samanay cangra a miremo, ato mamananam no kapah salikaka ko maanan mikitini cangranan?

3. O kapah salikaka ngaˈay samaan padama to matoˈasay salikaka?

³ Kaemangho ci Tafiti mafanaˈay to pina a inaneng, masemeray ko tao. Tangongolay ko kalawidang ningra aci Yihofaan, mafanaˈayho a midatok to onkak. Misaka dademakan ningra ko inaneng no niyah, parihadayay to falocoˈ no minilnilan no Kawas a Hongti ci Sawlo. (1 Samuil 16:16, 23) Kapah salikaka, iraay ko maanan a inaneng iso, ngaˈay padama to salikaka han?  Iraay ko inaneng namo. Mahapinangay iso alatek, o roma matoˈasay salikaka makalimay mafanaˈ misaka dademak to pinpan ato tingnaw i picekiw ato masaˈopo. O sifanaˈ iso tonini wa taˈangay ko sapadama to salikaka.

4. Malecad ci Tafitian, o kapah salikaka papalahad to maanam makapahay a capeling hani? (Nengnengen ko papotalay coka.)

⁴ Itini kalo kaˈorip, ci Tafiti milaheciay to demak, ngaˈayay pasoˈlinen. Tinakoen, kaemangho cingra i pakaenay to siri no wama, misongilaˈay midimokos, kawra adihayay ko malifaay ningra a katalawan. Ikor pasowalan ningra ko Hongti ci Sawlo: “Pakaen ko sikawdan iso to siri no wama, iraay ko layong, iraayho ko tomay, milepelay to siri. Milepelan ako cara, mipatay ciraan, mikitini ngoyos nira milidong to siri.” (1 Samuil 17:34, 35) Miharateng ci Tafiti iraay ko ˈinorong no niyah midipot to siri no wama, mansa timolo miˈodot to ˈaˈadopen. Kapah salikaka ngaˈayay mitodong ci Tafitian, misongilaˈ midemak to patorodan cangranan a kahacecay demak.

5. Mikitini ˈOlic 25:14, o kapah salikaka sasamaan ko demak o kalimlaan hani?

⁵ O kapah a Tafiti palahaday to tangongolay kalawidang ci Yihofaan. Oniya kalawidang ikakaay masakalimlaan to timolo ato inaneng no onkak. Cowa ko Kawas aca ni Tafiti ci Yihofa, o widangho ningra, o tada ngaˈayay a widang. (ˈOsien ko ˈOlic 25:14.) Kapah a salikaka, o sakakaay kalimlaan a hademak namo nohatini i, tongalen ko kalawidang to kakarayan a Wama. Mihaen, wa adihay ko malifokay namo a ˈinorong dademak alatek.

6. O roma tamdaw iraay ko manan masofaway a pinengneng ci Tafitian?

⁶ Masofaway ko pinengneng no roma tamdaw ci Tafitian, o raremoen ningra a pasangaray konini. Tinakoen, tiya talaˈayaw ci Tafiti sapiloodaw ci Koliyatan i, micongedan ni Sawlo cingra, saan: “O wawaho kiso.” (1 Samuil 17:31-33) Na milikafay ko kaka ningra to cowa pilaheci to ˈinorong cingra. (1 Samuil 17:26-30) Kawra, o widang ni Tafiti ci Yihofa, cipinangay ci Tafitian, o cowa katenes cowa pilaheci to ˈinorong cowa kahaen ko pinengneng toniya kapah. Ikor, mitiˈeray ci Tafiti to sadama ni Yihofa, soˈlinay pakalowid ci Koliyatan.—1 Samuil 17:45, 48-51.

7. Mikitini nalifetan ni Tafiti mananam iso ko maanan hani?

⁷ Kapah a salikaka, mikitini nalifetan ni Tafiti mananam iso ko maanan hani? Pairaen  ko mihadidiay. Oya minengnengay to kalomahad iso a tamadaw misaaliay to toki, ngaˈ mahapinang to soˈlinay lomahadayto kiso, cowato ko wawa. Kawra wa rihaday ko falocoˈ iso, cowa ko papotal ko minengnengan ni Yihofa, mafanaˈay to masamanay a tamdaw kiso, mafanaˈayho to inaneng iso. (1 Samuil 16:7) Padotocen mitongal ko kalawidang iso ato Kawas. Samanay ko demak ni Tafiti hani? Mahapinangay ningra ko misangaˈan ni Yihofa a maamaan, hanaca misongilaˈ midotimay, mansa mahapinang ko makapahay capeling no misangaˈay a Tatapangan. (ˈOlic 8:3,  4; 139:14; Loma 1:20) Iraayho ko dademaken iso, cangacangen ci Yihofa pafeli to ˈicel. Tinakoen, malikafay ko cafay iso micudad to Misawacayay Tamdaw ni Yihofa kiso han? Ano mahaenay i, tolonen ci Yihofa, milongoc to sapadama Ningra misiˈayaw toniya demak, saka dademakenho ko sapaini no Fangcalay Cudad, mitepangan cudad ato ika. Ano maˈaraw iso ko pipadama ni Yihofa tisowanan miremo to pasangaray, wa matongal ko pakasoˈlin iso Cingranan. Maˈaraw no tao ko pitadiˈec iso ci Yihofaan wa matongal ko pasoˈlin tisowanan.

8-9. (1) ˈAyaw no malo hongti ci Tafiti i, o maanan ko padamaay cingranan padotoc a mihadidi hani? (2) O kapah a salikaka mikitini ci Tafitian mananam ko maanan hani?

⁸ Nengnengen ko roma misiˈayawan ni Tafiti a pasangaray. Ikor no manilnil cingra malo hongti i, halafinayho a mitala ngaˈ soˈlinay mala hongti no Yutaya. (1 Samuil 16:13; 2 Samuil 2:3, 4) Toniya mihecaan, o maanan ko padamaay cingranan padotoc a mihadidi hani? Misamacayay ci Tafiti midemak to madangaray no niyah a demak, cowa ka pakayni katoled no falocoˈ a sawad saan a midemak. Tinakoen, tiya milaliw ci Tafiti tayra i pala no Filistin a tamdaw i, misaka dademakay toniya tatokian milood to ˈada no Israil tamdaw, mansa madipot ko niyaroˈ no Yutaya.—1 Samuil 27:1-12.

⁹ O kapah a salikaka mikitini ci Tafitian mananam ko maanan hani? Saka dademaken ko toki, matayal saki Yihofaan ato salikaka. Nengnengen ita ko nalifetan ni Likato. * 10 ko mihecaan ningra makalimayto malo miceriday a misakafahay, kawra akaho sanay ko malohemay malitengay itiya. Cowa ka matoled ci Likato, cowa kaketer, tawlikay a mitosil. Sanay ci Likato: “Miharateng nohatini, oya pitala ako, padadotoc a macakat, iraay ko kangaˈayan. Toya tatokian, misaˈicelay kako milisoˈ to maolahay to Fangcalay Cudad a tamdaw, misongilaˈ misaday to lalisoˈen, mahelaay ko saka cecay a pacekiwan. Matongal to ko milifetan a mitosil, matongalay ko pakasoˈlinay falocoˈ.” Nohatini, o idahiay a miceriday misakafahay ci Likato nohatini, o damaho a sikawadan.

10. Kinacecayay, ˈayaw no misaˈosi to kalimlaan demak i, salakatayho midemak ci Tafiti to manan hani?

¹⁰ Haratengen ko roma a nalifetan ni Tafiti. Itini pilaliwan nangra a tatokian, kinacecayay, miliyasay cangra to paro no lomaˈ a dademak. Itini kaawaan nangra i, iraay ko ˈada a milood, miˈafasay to dafong, milepelayho to paro no lomaˈ nangra. Na ngangaˈay ci Tafiti mitiˈer to nalifetan noniyah a milood, oniyah saan a pakayraan milidong to paro no lomaˈ. Kawra cowa pihaen ko demak ningra, micangacangay to sakayat ni Yihofa. Papialaan ningra ko saysi ci Apiyatar to fangcalay fodoy, dotoc mingitangit milicay ci Yihofaan: “O mamilepel kako toya kokong han?” Pasowalan ni Yihofa ci Tafiti, mamilepel cingra to ˈada, hanaca mikiˈok to mamalidong ningra ko paro no lomaˈ. (1 Samuil 30:7-10) Mikitini toniya demak mananam iso ko maanan hani?

11. ˈAyaw no misaˈosi kiso i sasamaan ko demak hani?

 ¹¹ ˈAyaw no misaˈosi i, licayen ko tao. Ngaˈayay masasowal to wama wina iso, ngaˈayho mitengil to sapaini no malohemay malitengay. Pakasoˈlinay ci Yihofa to minilnilan Ningra a salikaka, wa ngaˈay pakasoˈlin kiso cangranan. ‘Malo sapatelongˈ ni Yihofa i kasakopang cangra. (Ifiso 4:8) Todongen iso ko pasoˈlinay falocoˈ nangra, micada to sapalimoˈot nangra, wa ngaˈay ko minaroˈan. Nohatini, nengnengen ita mikitini Hongti ci Asaan mananam ko maanan?

12. Itini satapangan no pikowan ni Asa iraay ko manan makapahay a capeling hani?

¹² Kaemangho ko Hongti ci Asa misapoeneray timoloay. Tinakoen midotoc cingra to wama ci Apiyaan a mala hongti i, palahdaway to samiyay i kitakit no Yutaya, ‘palimoˈotayho to Yutaya tamdaw midoko ci Yihofaan, midofdof to Rikec ato limoˈot Ningra.’ (2 Rayray 14:1-7) Tiya mikerid to 100 efan a sofitay ko Iciyopiya tamdaw ci Cira milood to Yutaya i, citanengay ci Asa, micangacang to sadama ni Yihofa, sanay: ‘Yihofaaw, ano hakowato ko ˈaloman no tamdaw, anca cangoˈot ko ˈicel, wa ngaˈay Kiso a milidong. Yihofaaw Kawas niyam, nanay padamaen kami, samanen mitiˈeray kami Tisowanan.’ Oniya sowal paihkalay, pakasoˈlinay ci Asa iraay ko ˈicel ni Yihofa a milidong cingranan ato finawlan ningra. Mitadiˈecay ci Asa to kakarayan Wama, mansa patadoan ni Yihofa cingra a milowid to Iciyopiya tamdaw.—2 Rayray 14:8-12.

13. Ikor midemakay ci Asa to manan mararaway a saˈosi hani? Oniya demak mikayatay to manan tatiihay a teloc?

¹³ Misiˈayaw to 100 efan a sofitay, katalawanto. Kawra mitadiˈecay ci Asa ci Yihofaan, salikor mapadikay ko ˈada. Kaadayayan i, ikorto misiˈayaw to cowa ka ciˈicel a ˈada, cowa pitiˈer ci Yihofaan. Tiya milood koya tatiihay Hongti no Israil ci Paasa cingranan i, pasayraay i hongti no Siriya misaali to sadama. Oniya mararaway pisaˈosi mikayatay to tatiihay a teloc. Miocoran ni Yihofa ko pairasolay ci Hanani pasowal ci Asaan: ‘Samanen mitiˈeray kiso to hongti no Siriya, cowa pitadiˈec ci Yihofaan, o sofitay no hongti no Siriya wa mikitini kamay iso a milaliw.’ Ikorto, marariday tahalifa ci Asa to lalood. (2 Rayray 16:7, 9; 1 Hongti 15:32) Mikitini mananam ita ko maanan hani?

14. (1) Sasamanan ko demak iso paihkalay to mitadiˈecay ko niyah ci Yihofaan? (2) Mikitini 1 Timoti 4:12, mitadiˈec kiso ci Yihofaan wa ira ko manan ngaˈayay a minaroˈan?

 ¹⁴ Ka padotoc a misapoener, padotoc a mitadiˈec ci Yihofaan. Patafang kiso to tireng micada to paputisem i paihkalay to pakasoˈlinay ko niyah ci Yihofaan, mitadiˈec Cingranan. Mansa mahemek ci Yihofa, pacomod tisowanan i paro no lomaˈ Ningra. O hademak iso nohatini, padadotoc a mitadiˈec Cingranan. Ano misaˈosi kita to kalimlaan a demak i, mitadiˈecay kita ci Yihofaan. Kawra itini kalowa toki i? Soˈlinay, ano o mananto ko misaˈosian iso, mipiliˈ to lawla anca tayal, ato patosokan no kaˈorip, o mamitadiˈec ci Yihofaan, aka mitiˈer to inaneng no niyah, kalimlaan mihaen to demak. Kilimen ko milingatay a safalod no Fangcalay Cudad, tooren koniya sakayat a midemak. (Taneng 3:5, 6) Mihaen, o papakahemek kiso ci Yihofaan, wa milifokho to pikangodo no salikaka.—ˈOsien ko 1 Timoti 4:12.

15. Mikitini 2 Rayray 18:1-3; 19:2, o manan ko mararaway a demak no Hongti ci Yihosafat hani?

¹⁵ Manaokaniw, cowa ko malefotay ko kahacecay tamdaw, mararaway no latekay, kawra ano ngaˈay kiso matayal saki Yihofaan, mamisarocod kiso a midemak. Nengnengen ko tinakoan no Hongti ci Yihosafat, adihayay ko ngaˈayay capeling ningra. Misatapang cingra mikowan i, ‘midokoay to Kawas no wama ningra, midofdofay to limoˈot no Kawas.’ Cowa ka hatira aca, miocorayho cingra to papina ˈaˈideman tayra niyaroˈ no Yutaya pasifanaˈ to finawlan mafanaˈ ci Yihofaan. (2 Rayray 17:4, 7) Kawra, mararaway ko demak ni Yihosafat. Kinacecayay, mararaway ko misaˈosian, mirikecan no pairasolay ni Yihofa cingra. (ˈOsien ko 2 Rayray 18:1-3; 19:2.) Mikitini toniya maˈoningay mananam iso ko maanan hani?

16. Mikitini nalifetan ni Lacifo mananamay iso ko maanan?

¹⁶ Cadaen ko limoˈot, makahi misalof. Malecaday kiso to ˈalomanay kapah, mihapinang to kalimlaan a demak cowa ko madoloay. Aka matoled, nengnengen ko tinakoan no cecay kapah salikaka ci Lacifo. Milomal cingra pakayraan no niyah i 10 ira ko pina ko mihecaan, sanay: “Latekay maolatay kako. Malecad o ˈalomanay kapah, maolahay kako mionto masadak misalama, cowa ka tadamaolah a  masaˈopo ato mitosil.” O maanan ko padamaay ci Lacifoan a mafalic hani? Cecay malohemay malitengay ciharatengay cingranan, painiay cingranan. Sanay ci Lacifo: “Paˈarawan ningra kako to 1 Timoti 4:8, pakalalok takowanan misongilaˈ miharateng to safalod i lalomaˈ.” Misapoeneray ci Lacifo a micada, miliyaw a misimsim o maanan ko kalimlaan i nokaˈorip. Sanay cingra: “Misetekay kako to falocoˈ paisalakat ci Yihofaan i nokaˈorip.” Samanay ko minaroˈan hani? Sanay ci Lacifo: “Ikor no pina miheca, citatodongayto kako malo dama sikawdan.”

17. Samanay ko pinengneng no matoˈasay to midokoay ci Yihofaan a kapah tamdaw?

¹⁷ Kapah a tamdaw, masemeray ko matoˈasay tamowanan, mahemekay kalacafay tamowanan a midoko ci Yihofaan. (Cifaniya 3:9) Matomesay to ˈicel kamo, fanekfekay ko olah, misarocoday a midemak to patorodan tamowanan a demak, maolahay cangra tamowanan. Tada idahiyayto kamo!—1 Yohani 2:14.

18. Mikitini Taneng 27:11, samanay ko pinengneng ni Yihofa to midokoay Cingranan a kapah tamdaw?

¹⁸ Kapah a salikaka, aka mapawan, tada maolahay ci Yihofa tamowanan, pakasoˈlinay tamowanan. Paˈayaway ci Yihofa, itini salikoray romiˈad, wa ˈaloman ko kapah tamdaw misalof to falocoˈ patafang to niyah a matayal saki Cingranan, malecad o ˈalomanay a sofitay. (ˈOlic 110:1-3) Mafanaˈay ci Yihofa maolahay kiso Cingranan, makalimay patafang to sangaˈayay no niyah Cingranan. Mihaenay, ka pihadidi to niyah, ka pihadidiho to tao. Ano mararaw kiso, misapoener a micada to sarikec ato sapalimoˈot, o mikitiniay ci Yihofaan konini han ko pinengneng. (Hipray 12:6) Ano patorod ko cima tisowanan i, sarocoden a midemak. Sakakaay i, ano o mananto ko demak iso, pakahemeken ko kakarayan a Wama, ho pakayni tisowanan a maliko Cingra.—ˈOsien ko Taneng 27:11.