1. Tanggung jawab aha do na boi dapot ni akka dongan bawa na poso di huria?

HAMU akka dongan bawa na poso, godang do tugas di huria na boi diulahon hamu ala gogo dope hamu. (Poda 20:29) Jadi godang do na boi diulahon hamu lao mangurupi akka dongan di huria. Boi do hamu mandapot tugas gabe parhobas. Alai olo do ra merasa hamu dang tolap dope mandapot tugas i, ala paposohu dope hamu. Sasittongna nang pe poso dope, adong do na boi diulahon hamu asa direspek akka dongan jala dihaporseai hamu mandalatton tanggung jawab di huria.

2. Aha do na lao taulas di artikel on?

² Di artikel on taida ma na masa di ngolu ni Raja Daud. Dung i taulas ma muse na masa tu dua raja ni Juda, i ma Raja Asa dohot Raja Jehosapat. Taulas ma akka tantangan na diadopi tolu raja on, jala na boi diparsiajari akka donganta bawa na poso sian nasida.

3. Aha do na boi diulahon hamu lao mangurupi akka donganta naung matua?

³ Tikki poso dope si Daud, togu do parale-aleonna tu Jahowa. Diparsiajari ibana do muse keterampilan na boi mangurupi na asing. Marsiajar do ibana asa malo mamakke alat musik jala dipakke do keterampilanna i mangurupi Raja Saul, raja na dipillit ni Debata. (1 Sam. 16:16, 23) Adong do keterampilanmuna  na boi dipakke hamu mangurupi akka dongan di huria? Pasti adong. Misalna boi do diurupi hamu akka donganta na matua mamakke tablet dohot perangkat elektronik ni nasida, asa boi dipakke marsiajar pribadi manang tikki marpungu. Molo dipakke hamu keterampilanmuna i lao mangurupi, pasti godang do manfaatna tu akka dongan na matua.

4. Aha do na boi ditiru akka na poso sian si Daud? (Ida gambar sampul.)

⁴ Halak na martanggung jawab do si Daud. Nang pe poso dope, alai ringgas do ibana mangurus dohot manjaga biru-biru ni bapakna. Sabotulna tugas na berbahaya do i. Sian dia taboto? Ala hea do dipaboa ibana tu Raja Saul, “Ale tuan, au do na marmahan akka biru-biru ni bapakku. Hea do ro singa mambuat sada biru-biru i. Jala hea do ro beruang mambuat sada biru-biru i. Pittor hulele ma i, hupamate, jala hupalua ma biru-biru i sian babana.” (1 Sam. 17:34, 35) Ala tanggung jawab ni si Daud do manjaga biru-biru i, ikkon barani do ibana mangalo binatang buas na naeng mangallang biru-biru i. Hamu akka na poso, tiru hamu ma si Daud. Ringgas ma hamu mangulahon tugas na dilean tu hamu.

5. Sesuai tu Psalmen 25:14, aha do seharusna na uppenting di ngolumuna?

⁵ Akrab do hubungan ni si Daud tu Jahowa nang pe poso dope ibana. Uppenting do hubunganna i sian habaranionna dohot keterampilanna na marmusik i. Dang holan Debatana dibahen ibana Jahowa, alai gabe dongan akrabna. (Jaha Psalmen 25:14.) Hamu pe akka dongan bawa na poso, bahen hamu ma Jahowa i gabe dongan akrabmuna. Molo dibahen hamu songon i, boi ma hamu mandapot tugas tambahan di huria.

6. Songon dia do pandangan ni halak tu si Daud?

⁶ Ala poso dope si Daud, adong do halak marpikkir dang boi dope ibana martanggung jawab mangulahon tugasna. Misalna tikki didok si Daud naeng pamateonna si Goliat, didok Raja Saul ma tu ibana, “Poso dope ho.” (1 Sam. 17:31-33) Gari abangna sandiri pe didok do ibana marmeam-meam mangulahon tugasna. (1 Sam. 17:26-30) Alai dang songon i pandangan ni Jahowa tu si Daud. Takkas do ditanda Jahowa halak na songon dia si Daud. Ala dipangido si Daud do gogo sian Jahowa, boi ma dipamate ibana si Goliat.​—1 Sam. 17:45, 48-51.

7. Aha do na boi diparsiajari hamu sian pengalaman ni si Daud?

 ⁷ Aha do na boi diparsiajari hamu sian pengalaman ni si Daud on? Porlu do hamu sabar. Adong do ra akka dongan na mananda hamu sian na gelleng sai manganggap hamu dakdanak dope. Jadi porlu do tikki asa boi disadari nasida nungnga lam dewasa be hamu. Pos ma rohamuna ditanda Jahowa do hamu. Diboto Ibana do aha na boi diulahon hamu, ala dang songon jolma cara ni Jahowa mangida hamu. (1 Sam. 16:7) Berupaya ma hamu torus akrab tu Jahowa, songon si Daud. Akrab do ibana tu Jahowa ala jotjot mamparrohahon akka toppaan. Gabe lam takkas ma ditanda si Daud Jahowa sian akka toppaan i. (Ps. 8:3, 4; 139:14; Rom 1:20) Asing ni i, boi do muse lam akrab hamu tu Jahowa molo diida hamu dialusi Jahowa tangiangmuna. Misalna, tikki direhei di sikkola ala Saksi Jahowa hamu, martangiang ma hamu asa diurupi Jahowa. Dung i ihutton ma akka petunjuk sian Bibel dohot akka saran na adong di publikasi dohot di videotta. Molo diida hamu diurupi Jahowa hamu tikki adong tantangan, gabe lam pos ma rohamuna tu Ibana. Asing ni i, molo diida akka dongan diandalhon hamu Jahowa gabe porsea ma nasida na boi do hamu martanggung jawab.

8-9. Aha do na mambahen si Daud sabar nang pe leleng ibana paimahon asa boi mamaretta gabe raja? Jala aha do na boi diparsiajari hamu sian i?

⁸ Adong dope situasi na sulit na ikkon dihadapi si Daud. Nang pe naung dilantik ibana gabe raja, ikkon dipaima dope martaon-taon asa boi gabe raja ni Juda. (1 Sam. 16:13; 2 Sam. 2:3, 4) Alai boasa boi ibana sabar nang pe ikkon leleng paimahon? Ala fokus ibana mangulahon tugas na boi diulahon ibana jala dang menyerah. Misalna tikki buronan ibana jala melarikan diri tu Palistim, dipakke si Daud do kesempatan i lao manaluhon musu ni halak Israel. Sasittongna na manjaga parbatasan ni huta ni halak Juda do ibana disi.​—1 Sam. 27:1-12.

⁹ Aha do na boi diparsiajari akka donganta bawa na poso sian pengalaman ni si Daud i? Sai lului ma cara asa boi mangurupi akka dongan. Parrohahon ma jo pengalaman ni donganta si Rikardo. * Mulai marumur sappulu taon, nungnga marcita-cita ibana gabe perintis biasa. Alai didok sintua, dang boi dope ibana gabe perintis. Nang pe songon i dang menyerah ibana. Gariada dipakke ibana do kesempatan i asa lam malo marbarita. Didok ibana, “Dung hupikkiri saonari, memang hurang malo dope au najolo i marbarita, jala godang dope na ikkon hupadenggan. Molo adong na berminat, hupastihon ma hukunjungi i, jala sebelum lao tusi hubaen ma persiapan. Ujungna gabe adong ma studikku. Lam jotjot au marbarita na uli, lam percaya diri ma au.” Saonari nungnga gabe perintis biasa be si Rikardo jala gabe parhobas di huria.

10. Sebelum mambahen keputusan na penting, aha do na diulahon si Daud?

¹⁰ Adong dope parsiajaran na asing sian pengalaman ni si Daud. Tikki gabe buronan si Daud, hea do ibana dohot akka tentarana ikkon maninggalhon keluarga nasida lao marporang. Tikki di pardalanan lao marporang, ro ma pangarampok mamboan istri dohot gelleng nasida jala dibuat do arta nasida. Ala tentara na jago do ibana jala berpengalaman, sasittongna boi do ibana pittor lao menyelamatton istri dohot gelleng nasida i. Alai dang songon i dibahen si Daud, jolo dilului ibana do petunjuk sian Jahowa. Dipangido ibana ma tu Malim Abiatar asa diboan epod. Dung i disukkun si Daud ma Jahowa,  “Ikkon leleokku do akka pangarampok i?” Disuru Jahowa ma ibana mangalele pangarampok i, jala dipapos ma rohana pasti berhasil do ibana. (1 Sam. 30:7-10) Aha ma parsiajaranna tu hamu?

11. Aha do na porlu diulahon hamu sebelum mambahen keputusan?

¹¹ Denggan do jolo dipangido hamu saran sebelum mambahen keputusan. Jalo ma saran sian natua-tuamuna manang sian akka sintua na berpengalaman. Porsea do Jahowa tu akka sintua i, jadi hamuna pe boi do porsea tu nasida, alana ‘silehon-lehon’ sian Jahowa do nasida tu akka huria. (Eps. 4:8) Molo ditiru hamu haporseaon ni nasida, jala ditangihon hamu akka saran ni nasida, boi ma hamu mambahen keputusan na denggan. Saonari, marsiajar ma hita muse sian Raja Asa.

12. Aha do na dibahen Raja Asa tikki baru mamaretta ibana?

¹² Tikki poso Raja Asa, halak na serep roha jala barani do ibana. Misalna dung gabe raja ibana manggattihon bapakna si Abia, dihancurhon ibana ma akka patung berhala na di Juda. “Asing ni i, disuru ibana do halak Juda mangalului Jahowa Debata ni akka ompu ni nasida. Jala disuru ibana do nasida mangulahon Patik dohot paretta ni Debata.” (2 Kron. 14:1-7) Jala tikki ro si Jara halak Etiopia dohot sajuta tentarana mangalo Juda, martangiang do si Asa mangido bisuk sian Jahowa asa boi monang. Didok ibana ma, “Ale Jahowa, dang maol di Ho mangurupi na gogo manang na so margogo. Urupi ma hami ale Jahowa Debatanami, ai Ho do na hupangasahon hami.” Sian hata ni si Asa on, tarida ma pos situtu do rohana na sanggup do Jahowa paluahon ibana dohot rakyatna. Ala porsea do ibana tu Bapakna na di surgo i, “ditaluhon Jahowa ma halak Etiopia”.​—2 Kron. 14:8-12.

13. Torus do diandalhon si Asa Jahowa?

¹³ Coba ma bayangkon hamu songon dia perasaan ni Raja Asa tikki ro sajuta tentara mangalo ibana. Pasti mabiar do ibana ate. Alai boi do monang si Asa ala Jahowa do diandalhon ibana. Hape tikki ro si Baesa raja ni Israel na jahat, dang Jahowa be na diandalhon ibana. Gariada tu raja ni Siria do ibana mangido bantuan. Alani keputusanna i, gabe susa do ibana dohot rakyatna. Alani i, disuru Jahowa ma Panurirang Hanani mandok tu si Asa  songon on, “Sasittongna boi hian do ditaluhon ho tentara ni Siria, hape gabe dipalua ho do nasida. Ai gabe raja ni Siria do na dipangasahon ho, dang Jahowa Debatam.” Alani i, gabe susa do si Asa, gabe torus do ibana marporang. (2 Kron. 16:7, 9; 1 Raj. 15:32) Aha ma na boi diparsiajari hamu sian i?

14. Sian dia do tarida na diandalhon hamu Jahowa? Sesuai tu 1 Timoteus 4:12, aha do hasilna molo diandalhon hamu Jahowa?

¹⁴ Torus ma serep rohamuna jala andalhon ma Jahowa. Sasittongna tikki tardidi hamu, nungnga dipatudu hamu na balga haporseaonmuna tu Jahowa. Las do roha ni Jahowa ala nungnga gabe bagian ni keluargana hamu. Nang pe songon i, ikkon torus do hamu mangandalhon Jahowa. Biasana tikki mambahen keputusan na balga pengaruhna, pittor tapangido do bisuk sian Jahowa. Alai boha na so pola balga pengaruhna? Balga manang dang pengaruh ni sada keputusan, ikkon jolo tajalo do petunjuk sian Jahowa. Termasuk ma i tikki mamillit hiburan, parkarejoan, manang tikki mambahen cita-cita. Unang ma andalhon pikkiranmuna sandiri. Alai lului ma prinsip ni Bibel na cocok tu situasimuna jala ulahon ma i. (Poda 3:5, 6) Molo diulahon hamu i, gabe las ma roha ni Jahowa mangida hamu. Jala gabe direspek akka dongan di huria ma hamu.​—Jaha 1 Timoteus 4:12.

15. Sesuai tu 2 Kronika 18:1-3; 19:2, aha do keputusan na sala na dibahen Raja Jehosapat?

¹⁵ Jolma na so sempurna do hita sude. Sipata olo do hita mambahen hasalaan. Alai unang ma gabe mabiar hita mangulahon tugas sian Jahowa. Marsiajar ma jo hita sian pengalaman ni Raja Jehosapat. Godang do na denggan diulahon ibana. Tikki poso dope ibana, disomba ibana do Jahowa “Debata ni bapakna. Diulahon ibana do paretta ni Debata”. Asing ni i, disuru ibana do akka pejabatna lao tu akka kota na di Juda mangajarhon patik dohot paretta ni Jahowa tu rakyatna. (2 Kron. 17:4, 7) Alai nang pe songon i, hea do dibahen ibana keputusan na sala. Alani i, disuru Jahowa ma panurirangna mamissang si Jehosapat. (Jaha 2 Kronika 18:1-3; 19:2.) Aha do na boi diparsiajari hamu sian pengalamanna i?

16. Aha do na boi diparsiajari hamu sian pengalaman ni si Radit?

¹⁶ Molo dipasingot hamu, tangihon ma i jala ulahon. Ala poso dope hamu, olo do ra maol  manottuhon dia na uppenting. Alai unang ma menyerah hamu. Taida ma jo pengalaman ni donganta si Radit. Didok ibana, “Tikki remaja au, dang huboto dope aha na uppenting di ngolukku. Songon akka donganku, lomo ni rohakku marolahraga dohot marmeami ma nian. Jala dang pola lomo rohakku lao tu parpunguan dohot marbarita.” Aha do na mambahen ibana muba? Ala adong sintua na burju pasingotton ibana. Didok si Radit muse, “Diurupi donganta sintua ma au mangattusi prinsip di 1 Timoteus 4:8.” Serep do roha ni si Radit manjalo nasehatna i. Jala gabe dipikkiri ibana ma aha na uppenting di ngoluna. Didok ibana ma, “Ujungna hubahen ma cita-cita rohanikku. Jala i do na uppenting di ngolukku.” Aha do hasilna? Piga-piga taon dukkon i, gabe parhobas ma ibana di huria.

17. Boha do perasaan ni akka dongan na matua mangida hamu?

¹⁷ Holong do roha ni akka dongan na matua tu hamu. Alana, rap “marsada” do hamu dohot nasida manomba Jahowa. (Sep. 3:9) Diargai nasida do semangatmuna tikki mandalatton tugasmuna. Massai las do roha ni nasida mangida hamu.​—1 Joh. 2:14.

18. Sesuai tu Poda 27:11, songon dia do perasaan ni Jahowa tu hamu?

¹⁸ Hamu akka dongan bawa na poso, ingot ma, dihaholongi jala dihaporseai Jahowa do hamu. Ai nungnga didok Jahowa hian, akka na poso do tentarana na rade marhobas tu Ibana. (Ps. 110:1-3) Diboto Jahowa do na holong rohamuna tu Ibana. Diida Jahowa do upayamuna mangalehon na undenggan tu Ibana. Alani i, sabar ma hamu tu akka dongan na asing, jala unang paksahon dirimuna ikkon sempurna. Unang ma haccit rohamuna molo dipasingot. Rade ma hamu dilatik. Ingot ma pelatihan sian Jahowa do i. (Heb. 12:6) Ringgas ma hamu mandalatton tugas manang aha pe na dilean tu hamu. Jala na uppenting, bahen ma Jahowa bangga tu hamu.​—Jaha Poda 27:11.