1. Weh wi ku seh bowt wi yong bradaz?

YONG bradaz, unu ku du wahn lat fi help owt unu bradaz ahn sistaz. Lata unu schrang ahn ful a enerji. (Prov. 20:29) Yu mait luk faawod tu di taim wen yu ku bee wahn ministeeryal servant. Bot yu mait feel laik ada peepl tink yu tu yong er noh ga inof ekspeeryens fi tek aan eni impoatant asainment. Eevn doa yu mait bee yong, yu stil ga tingz weh yu ku du rait now fi mek peepl eena di kangrigayshan chros ahn rispek yu.

2. Weh wi wahn kansida eena dis aatikl?

² Eena dis aatikl, wi wahn diskos King Dayvid egzampl. Wi wahn aalso si weh lesn wi ku laan fahn tingz weh mi hapm tu King Aysa ahn King Jehoshafat. Wi wahn diskos weh prablemz dehnya chree man mi haftu deel wid, how dehn mi solv dehndeh prablemz, ahn weh yong bradaz ku laan fahn fi dehn egzampl.

3. Wat da wan way how yong peepl ku help oalda bradaz ahn sistaz eena di kangrigayshan?

³ Wen Dayvid mi yong, hihn mi laan skilz weh ada peepl mi apreeshiayt. Ih klyaa dat hihn da-mi wahn spirichwal persn, an ih mi werk haad fi bee wahn gud myoozishan. Hihn mi aybl fi yooz da skil fi help Saal, di king weh Gaad mi apoint. (1 Sam. 16:16, 23) If yoo da wahn yong brada, yu ga wahn skil weh yu ku yooz fi help adaz eena di kangrigayshan? Fi shoar lata unu ga skilz weh ku help di kangrigayshan. Fi egzampl, unu mait noatis dat som a di oalda  bradaz ahn sistaz apreeshiayt eni help weh unu ku gi dehn fi mek di bes yoos a dehn tablet an ada ilekchranik divais fi persnal stodi ahn di meetin dehn. Unu ku help dehnya bradaz ahn sistaz bikaaz unu noa how fi yooz dehnya divais.

4. If yong bradaz waahn kapi Dayvid egzampl, weh kwalitiz dehn haftu gat? (Koment pahn di picha pahn di kova.)

⁴ Peepl mi noa Dayvid az wahn rispansabl yong man weh dehn kuda mi chros. Fi egzampl, wen hihn mi yong, ih mi werk haad fi tek kayr a ih pa sheep. Dat da-mi wahn daynjaros asainment. Dis da weh Dayvid mi tel King Saal: “Mi laad, Ai da wahn shepad fi mi pa sheep, ahn wan taim wahn laiyan mi kohn ahn kehr wahn sheep fahn di feel. Ahn wahn nada taim wahn byaa mi kohn ahn du di saym ting. Bot Ah gaan an Ah kech dehn ahn tek di sheep rait owta dehn mowt. Wen dehn mi chrai atak mi, Ah grab dehn fahn dehn hyaa ahn kil dehn.” (1 Sam. 17:34, 35) Dayvid mi noa dat hihn mi haftu tek kayr a di sheep. Hihn mi brayv, an ih mi fait fi protek dehn. Yong bradaz ku bee laik Dayvid if dehn werk haad fi du eni asainment weh dehn get.

5. Akaadn tu Psalm 25:14, wat da di moas impoatant ting weh yong bradaz ku du?

⁵ Fahn Dayvid mi yong, hihn mi geh fi bee kloas frenz wid Jehoava. Ih mi moa impoatant tu Dayvid fi ga da kloas frenship wid Jehoava dan fi ga korij er fi ga skil di play myoozik. Jehoava da neva jos Dayvid Gaad, bot hihn da-mi ih kloas Fren tu. (Reed Psalm 25:14.) * Yong bradaz, di moas impoatant ting unu ku du da schrentn unu rilayshanship wid unu hevnli Faada. If unu du dat, unu mait en op di geh eevn moa privilij eena di kangrigayshan.

6. Weh som peepl mi tink bowt Dayvid?

⁶ Wan prablem weh Dayvid mi ga da-mi dat som peepl mi tink dat hihn tu yong ahn dat ih neva rispansabl. Fi egzampl, wen Dayvid mi valantyaa fi fait gens Golaiyat, King Saal mi chrai diskorij ahn, an tel ahn: “Yu da onli wahn lee bwai.” (1 Sam. 17:31-33) An erliya, Dayvid oan breda mi seh dat hihn neva rispansabl. (1 Sam. 17:26-30) Bot Jehoava neva tink da way deh. Hihn neva tink dat Dayvid mi  tu yong er dat ih neva rispansabl, kaaz hihn mi noa Dayvid gud. Ahn Dayvid mi aybl fi kil Golaiyat bikaaz ih mi chros eena ih Fren, Jehoava.—1 Sam. 17:45, 48-51.

7. Weh yu ku laan fahn weh mi hapm tu Dayvid?

⁷ Weh yu ku laan fahn weh mi hapm tu Dayvid? Wi laan dat wi haftu bee payshent. Ih mait tek taim fi peepl weh mi noa yu az wahn lee pikni fi staat si yu az wahn yong man. Bot yu ku bee shoar dat Jehoava si moa dan how yu luk pahn di owtsaid. Hihn noa da hoo yoo pahn di eensaid ahn hihn noa weh yu ku du. (1 Sam. 16:7) Soh schrentn yu rilayshanship wid Gaad. How Dayvid mi du dat? Hihn mi luk pahn di tingz weh Jehoava mek ahn tink bowt weh dehn tingz teech hihn bowt di Kriyayta. (Ps. 8:3, 4; 139:14; Roam. 1:20) Sohnting els weh yu ku du da pray an aks Jehoava fi gi yu di schrent weh yu need. Fi egzampl, eni a yu klaasmayt eva mek fon a yu bikaaz yu da wan a Jehoava Witnisiz? If dat hapm tu yoo, pray tu Jehoava an aks ahn fi help yu deel wid da chalenj. Ahn fala di gud advais weh yu fain eena fi hihn Werd an eena wi poblikayshan ahn veedyo dehn weh bays pahn fi hihn Werd. Eech taim yu si how Jehoava help yu deel wid wahn chalenj, yu fayt wahn groa bikaaz yu wahn noa dat if hihn mi help yu wid da chalenj, den hihn wahn help yu di neks taim yu fays wahn chalenj tu. Pahn tap a dat, di moa adaz si dat yu pen pahn Jehoava, di moa dehn wahn chros yu.

8-9. Weh mi help Dayvid fi bee payshent ahn wayt til di taim kohn fi mek hihn bee king, ahn weh yong bradaz ku laan fahn fi hihn egzampl?

⁸ Mek wi luk pahn wahn nada prablem weh Dayvid mi haftu deel wid. Afta hihn mi geh anointid fi bee di neks king, Dayvid mi haftu wayt wahn lang taim bifoa hihn kuda mi staat tu rool az king a Jooda. (1 Sam. 16:13; 2 Sam. 2:3, 4) Weh mi help hihn fi bee payshent wen ih mi haftu wayt aal da wail? Insteda geh diskorij, Dayvid mi foakos pahn weh hihn kuda mi du. Fi egzampl, wail hihn mi-di haid fahn King Saal eena Filisteen teritori, Dayvid mi yooz da taim fi fait gens Izrel enimi dehn, ahn dat mi protek Jooda boada.—1 Sam. 27:1-12.

⁹ Weh yong bradaz ku laan fahn Dayvid egzampl? Du weh yu kud fi serv yu bradaz. Tink bowt weh mi hapm tu wahn brada weh naym Ricardo. * Fahn hihn ton teenayja hihn mi waahn bee wahn regyula painyaa, bot di eldaz tel ahn dat ih neva redi. Insteda giv op er geh beks, Ricardo spen moa taim eena di minischri. Hihn seh: “Wen Ah luk bak, Ah ku si dat dat mi gud fi mi bikaaz Ah mi need fi mek proagres, an Ah kuda mi yooz da taim fi du dat. Ah pripyaa gud fi aala mi ritern vizit dehn an Ah mek shoar Ah noh mis non. Ah mi eevn staat kandok mi fers Baibl stodi. Az Ah preech moa ahn moa, Ah neva feel soh nervos nohmoh.” Now Ricardo da wahn gud regyula painyaa ahn wahn ministeeryal servant.

10. Weh Dayvid mi du wahn taim bifoa ih mek wahn impoatant disizhan?

¹⁰ Tink bowt sohnting els weh mi hapm tu Dayvid. Joorin di taim wen hihn an ih soalja dehn mi-di haid fahn Saal, dehn mi lef dehn famili dehn hoam fi gaahn fait wahn waar. Wail dehn mi-di fait da waar, sohn enimi mi kohn ahn rayd dehn hoam ahn kyapcha dehn famili dehn. Dayvid kuda mi tink dat wid aala fi hihn ekspeeryens az wahn soalja hihn kuda mi kom op wid wahn gud plan fi sayv dehn famili dehn ahn bring dehn hoam. Bot insted,  Dayvid mi aks Jehoava fi gaidans. Wid di help a wahn prees weh naym Abaiyataar, Dayvid mi aks Jehoava: “Ah shuda chays afta dehn man weh mi atak ahn rayd di siti?” Jehoava mi tel Dayvid fi goh hed ahn du dat, ahn dat ih mi wahn sayv dehn famili dehn ahn bring dehn hoam. (1 Sam. 30:7-10) Weh dat teech yu?

11. Weh yu ku du bifoa yu mek disizhanz?

¹¹ Aks fi advais bifoa yu mek disizhanz. Taak tu yu payrents. Yu ku geh gud advais fahn di eldaz eena di kangrigayshan tu. Jehoava chros dehnya apointid bradaz, ahn yoo ku chros dehn tu. Jehoava si dehn az “gifs” tu di kangrigayshan. (Ifee. 4:8) Yu wahn mek gud disizhanz if yu kapi fi dehn faytful egzampl an if yu lisn tu di waiz sojeshanz weh dehn gi yu. Now mek wi taak bowt weh wi ku laan fahn King Aysa.

12. Weh kwalitiz Aysa mi gat wen ih mi fers staat rool az king?

¹² Wen King Aysa da-mi wahn yong man, hihn mi hombl ahn brayv. Fi egzampl, afta ih pa, Abaija, mi ded, hihn mi staat tu rool ahn geh rid a aala di aidol dehn eena di konchri. Hihn mi aalso “tel di peepl a Jooda fi saach fi Jehoava di Gaad a dehn ansesta dehn ahn fi obay evriting weh deh eena di Laa.” (2 Chron. 14:1-7) Ahn wen Zeera di Eetiyopyan mi invayd Jooda wid 1,000,000 soalja, Aysa mi shoa wizdom an aks Jehoava fi help. Hihn mi seh: “Oa Jehoava, ih noh mata tu yoo if di peepl weh yu help schrang er week. Oa Jehoava wi Gaad, help wi, kaaz wi chros eena yoo.” Da byootiful pryaa shoa wi dat Aysa mi ga schrang fayt dat Jehoava kuda mi sayv hihn an ih peepl. Aysa mi chros ih hevnli Faada, ahn “Jehoava mi kanka di Eetiyopyan dehn.”—2 Chron. 14:8-12.

13. Weh mi hapm tu Aysa laytaraan, ahn wai?

¹³ Da fait gens 1,000,000 soalja da-mi wahn fraitnin sichuwayshan fi Aysa, bot wid Jehoava help hihn mi aybl fi deel wid it. Di sad ting, doh, da dat wen wahn nada sichuwayshan mi kom op, weh neva az seeryos, Aysa neva luk tu Jehoava fi help. Wen King Bayasha a Izrel mi chretn ahn, Aysa mi gaahn tu di king a Siriya fi help. Dat neva gaahn gud far ahn non ataal! Jehoava mi sen di prafit Hanaynai fi tel Aysa: “Bikaaz yu mi pen pahn di king a  Siriya ahn yu neva pen pahn Jehoava yu Gaad, di aami a di king a Siriya eskayp owta yu han.” In fak, afta dat, Aysa mi aalwayz deh da waar. (2 Chron. 16:7, 9; 1 Ki. 15:32) Wat da di lesn?

14. How yoo ku pen pahn Jehoava, an akaadn tu 1 Timoti 4:12, weh wahn hapm if yu du dat?

¹⁴ Stay hombl an aalwayz pen pahn Jehoava. Wen yu mi geh baptaiz, yu mi shoa lata fayt ahn chros eena Jehoava. Ahn Jehoava mi hapi fi welkom yu intu fi hihn famili. Di impoatant ting now da dat yu noh stap pen pahn Jehoava. Yu mait feel laik ih eezi fi pen pahn Jehoava wen yu haftu mek veri impoatant disizhanz, bot weh yu wahn du di res a di taim? Ih veri impoatant dat yu chros Jehoava wen yu mek eni disizhan, inkloodin disizhanz bowt weh kaina entataynment yu wahn chooz, weh kaina jab yu wahn get, ahn weh kaina goalz yu wahn set eena yu laif! Noh pen pahn yu oan wizdom. Insteda dat, luk fi Baibl prinsiplz weh ku help yu eena yu sichuwayshan, ahn den fala dehn. (Prov. 3:5, 6) If yu du dat, yu wahn mek Jehoava hapi ahn di bradaz ahn sistaz eena di kangrigayshan wahn rispek yu.—Reed 1 Timoti 4:12.

15. Akaadn tu 2 Chronicles 18:1-3; 19:2, weh mistayk King Jehoshafat mi mek?

¹⁵ Af koars, non a wi noh perfek, soh sohntaim wi wahn mek mistayk. Bot noh mek dat stap yu fahn du evriting weh yu kud eena Jehoava servis. Kansida di egzampl a King Jehoshafat. Hihn mi ga lata gud kwalitiz. Wen hihn da-mi wahn yong man, “hihn mi saach fi di Gaad a ih Faada an obay fi hihn komanment.” Hihn mi aalso sen sohn prins fi chravl aal chroo di siti dehn a Jooda fi teech di peepl bowt Jehoava. (2 Chron. 17:4, 7) Bot eevn doa Jehoshafat mi waahn bee wahn faytful man, sohntaim hihn mi stil mek bad disizhanz. Sayka wan a fi hihn bad disizhan, wan a Jehoava prafit mi haftu giv ahn sohn seeryos kongsl. (Reed 2 Chronicles 18:1-3; *  19:2.) * Weh lesn wi ku laan fahn fi hihn egzampl?

16. Weh yu ku laan fahn Rajeev ekspeeryens?

¹⁶ If sohnbadi gi yu gud kongsl, aksep it ahn fala dehn advais. Wahn lata yong peepl fain it haad fi mek Jehoava servis bee di moas impoatant ting eena dehn laif. Yoo mait feel da saym way, bot noh mek dat diskorij yu. Tink bowt weh mi hapm tu wahn yong brada weh naym Rajeev. Dis da weh hihn seh bowt how ih mi feel wen ih da-mi wahn teenayja: “Sohntaim, Ah neva noa weh Ah waahn du wid mi laif. Laik lata ada yong peepl, Ah mi moa inchrestid eena spoats ahn fon dan eena di meetin dehn er feel servis.” Weh mi help Rajeev? Wahn kain elda mi giv ahn sohn kongsl. Rajeev seh: “Hihn mi help mi fi si how Ah ku yooz di prinsipl da 1 Timoti 4:8.” Rajeev mi hombl an ih mi aksep di kongsl. Ih mi fala di advais weh di elda giv ahn, an tink bowt weh ih waahn du wid ih laif. Hihn seh: “Ah mi disaid fi put spirichwal tingz fers eena mi laif.” Weh hapm sayka dat? Rajeev seh: “Wahn fyoo yaaz afta da brada gi mi da kongsl, Ah mi kwalifai fi bee wahn ministeeryal servant.”

17. How di oalda bradaz ahn sistaz eena di kangrigayshan feel bowt di yong bradaz weh serv Jehoava?

¹⁷ Di oalda bradaz ahn sistaz eena di kangrigayshan reeli apreeshiayt unu yong bradaz weh serv Jehoava “shoalda tu shoalda” lang wid dehn! (Zeph. 3:9) Dehn lov unu wilin spirit ahn how unu werk haad fi du eni asainment weh unu get. Dehn prowd a unu!—1 Jan 2:14.

18. Akaadn tu Proverbs 27:11, how Jehoava feel bowt di yong bradaz weh serv hihn?

¹⁸ Yong bradaz, neva ferget dat Jehoava lov unu ahn chros unu. Hihn mi prafesai dat joorin di laas dayz, hihn mi wahn ga wahn aami a yong peepl weh wuda bee wilin fi serv ahn. (Ps. 110:1-3) Hihn noa dat yu lov ahn, an dat yu waahn du yu bes fi serv ahn. Soh bee payshent wid adaz, ahn bee payshent wid yuself. Wen yu mek mistayk, aksep di chraynin ahn disiplin weh yu get bikaaz ih kohn fahn Jehoava. (Heeb. 12:6) Werk haad pahn eni asainment weh yu get. Ahn moa impoatant dan eniting els, wateva yu du, du it eena wahn way weh wahn mek yu hevnli Faada bee prowd a yu.—Reed Proverbs 27:11. *