1. Unsay atong ikaingon bahin sa mga batan-ong brader?

MGA batan-ong brader, daghan kaayo mog mahimo. Kasagaran ninyo baskog ug lagsik. (Prov. 20:29) Dako kaayo mog ikatabang sa kongregasyon. Tingali nangandoy mo sa panahon nga itudlo mo ingong ministeryal nga alagad. Pero tingali, gibati ninyo nga ang uban naghunahuna nga bata pa mo ug kulag eksperyensiya maong dili pa puwedeng hatagag importanteng asaynment. Pero bisag batan-on pa mo, naa moy mahimo karon aron mabatonan ang pagsalig ug pagtahod sa mga igsoon sa inyong kongregasyon.

2. Unsay atong hisgotan niining artikuloha?

² Niining artikuloha, atong susihon ang kinabuhi ni Haring David. Susihon sab nato ang pipila ka hitabo sa kinabuhi ni Asa ug Jehosapat—duha ka hari sa Juda. Hisgotan nato ang pipila ka problema nga giatubang niining tulo ka lalaki, kon unsay ilang gibuhat aron masulbad kana, ug kon unsay makat-onan sa mga batan-ong brader gikan sa ilang ehemplo.

3. Unsa ang usa ka paagi nga ang mga batan-on makatabang sa mga tigulang diha sa kongregasyon?

³ Samtang batan-on pa si David, nakakat-on siyag mga kahanas nga gipabilhan sa uban. Klaro nga duna siyay suod nga relasyon kang Jehova, ug naugmad niya ang iyang kahanas ingong musikero ug gigamit ang maong katakos aron tabangan si Saul, ang tinudlong hari sa Diyos. (1 Sam. 16:16, 23)  Kamong mga batan-ong lalaki, duna ba moy kahanas nga magamit ninyo sa pagtabang sa uban diha sa kongregasyon? Daghan kaninyo ang duna niana. Pananglitan, namatikdan tingali ninyo nga maapresyar sa pipila ka tigulang kon tudloan sila kon unsaon paggamit ang ilang mga tablet ug ubang gadyet para sa personal nga pagtuon ug sa mga tigom. Ang inyong kahibalo niini dakog tabang sa maong mga tigulang.

4. Sama kang David, unsang mga hiyas ang kinahanglang ugmaron sa mga batan-ong brader? (Tan-awa ang hulagway sa atubangan sa magasin.)

⁴ Sa iyang adlaw-adlaw nga pagkinabuhi, gipamatud-an ni David nga siya responsable ug kasaligan. Pananglitan, sa batan-on pa siya, naghago siya aron maatiman ang mga karnero sa iyang amahan. Peligroso kadto nga asaynment. Sa ulahi, giingnan ni David si Haring Saul: “Dihang ang imong sulugoon nagbantay sa mga karnero sa iyang amahan, dihay miabot nga leyon, ug sa laing higayon dihay miabot nga oso, ug midagit kinig karnero gikan sa panon. Akong gigukod ug gihampak kini ug giluwas ang karnero gikan sa baba niini.” (1 Sam. 17:34, 35) Gibati ni David nga iyang responsibilidad ang pag-atiman sa mga karnero, ug maisogon siyang nakig-away aron maprotektahan kini. Masundog sa mga batan-ong brader si David pinaagi sa pagkugi diha sa bisan unsang asaynment nga ihatag kanila.

5. Sumala sa Salmo 25:14, unsa ang pinakaimportanteng butang nga mahimo sa mga batan-ong brader?

⁵ Ang batan-ong si David nakaugmad ug suod, personal nga relasyon kang Jehova. Ang maong relasyon mas importante kay sa kaisog ni David o sa iyang kahanas sa pagtugtog ug alpa. Si Jehova dili lang Diyos ni David, kondili iya pong suod nga Higala. (Basaha ang Salmo 25:14.) Mga batan-ong brader, ang pinakaimportanteng butang nga inyong mahimo mao ang pagpalig-on sa inyong relasyon sa inyong langitnong Amahan. Kon inyo nang himoon, mahimong makadawat mog dugang mga pribilehiyo.

6. Unsay gihunahuna sa pipila bahin kang David?

⁶ Ang usa ka problema nga giatubang ni David mao ang negatibong panglantaw sa uban kaniya. Pananglitan, sa dihang miboluntaryo si David sa pagpakig-away kang Goliat, gipugngan siya ni Haring Saul ug giingnan: “Bata pa ka.” (1 Sam. 17:31-33) Una pa niana, si David giakusahan sa kaugalingon niyang igsoon nga iresponsable kuno siya. (1 Sam. 17:26-30)  Pero, si Jehova wala mag-isip kang David nga bata pa kaayo o iresponsable. Nakaila kaayo siya kang David. Ug kay misalig si David sa iyang Higala nga si Jehova alang sa kusog, iyang napatay si Goliat.—1 Sam. 17:45, 48-51.

7. Unsay inyong makat-onan sa usa ka asoy bahin kang David?

⁷ Unsay inyong makat-onan sa eksperyensiya ni David? Atong makat-onan nga kinahanglan tang magmapailobon. Kadtong nakaila ninyo sukad sa bata pa mo nagkinahanglan tingalig panahon una makaamgo nga dili na mo bata. Pero, makaseguro mo nga si Jehova wala lang magtan-aw sa inyong panggawas nga panagway. Nakaila siya kon kinsa mo ug kon unsay kaya ninyong himoon. (1 Sam. 16:7) Palig-ona ang inyong relasyon sa Diyos. Gihimo nâ ni David pinaagi sa pag-obserbar sa mga butang nga gilalang ni Jehova. Gipamalandong niya kon unsay gitudlo niini bahin sa Maglalalang. (Sal. 8:3, 4; 139:14; Roma 1:20) Ang laing butang nga inyong mahimo mao ang pagpangayog kusog kang Jehova. Pananglitan, ang pipila ba sa inyong mga eskolmet nagbugalbugal ninyo tungod kay Saksi ni Jehova mo? Kon mao, pag-ampo kang Jehova nga tabangan mo sa pag-atubang sa maong pagsulay. Ug ipadapat ang praktikal nga tambag sa iyang Pulong ug sa atong binase sa Bibliya nga mga publikasyon ug video. Matag higayon nga makita ninyo kon giunsa mo pagtabang ni Jehova nga maatubang ang usa ka pagsulay, modako ang inyong pagsalig kaniya. Dugang pa, dihang makita sa uban nga misalig mo kang Jehova, inyong mabatonan ang ilang pagsalig.

8-9. Unsay nakatabang kang David sa paghulat nga mapailobon hangtod nga nahimo siyang hari, ug unsay makat-onan sa mga batan-ong brader sa iyang ehemplo?

⁸ Konsideraha ang laing problema nga giatubang ni David. Human siya dihogi ingong hari, si David kinahanglang maghulat ug daghang katuigan una siya magmando ingong hari sa Juda. (1 Sam. 16:13; 2 Sam. 2:3, 4) Nianang panahona, unsay nakatabang niya sa paghulat nga mapailobon? Imbes magpadaog sa kaluya sa buot, si David nagpokus sa kon unsay iyang mahimo. Pananglitan, samtang nagtagotago sa teritoryo sa mga Filistehanon, gipahimuslan ni David ang kahigayonan sa pagpakiggubat sa mga kaaway sa Israel. Sa pagbuhat niana, iyang gipanalipdan ang mga utlanan sa teritoryo sa Juda.—1 Sam. 27:1-12.

⁹ Unsay makat-onan sa mga batan-ong brader sa ehemplo ni David? Pahimusli ang mga kahigayonan nga makaalagad sa inyong mga igsoon. Konsideraha ang eksperyensiya sa brader nga si Ricardo. * Sukad sa iyang pagkabatan-on, gusto na niyang magregular payunir. Pero giingnan siya sa mga ansiyano nga dili pa siya puwedeng magpayunir. Imbes mosurender o masuko, gidugangan pa ni Ricardo ang iyang panahon sa ministeryo. Siya miingon: “Akong naamgohan nga niadtong panahona, naa pa koy kinahanglang pauswagon. Naningkamot ko nga mabalikduaw ang mga interesado nga akong nakaplagan ug mangandam ko para niana. Nakasugod pa gani kog pagtuon sa Bibliya sa unang higayon. Samtang nadugangan ang akong eksperyensiya diha sa ministeryo, mas midako ang akong kompiyansa.” Karon, si Ricardo usa na ka mabungahong regular payunir ug ministeryal nga alagad.

10. Sa usa ka higayon, unsay gihimo ni David sa wala pa siya mohimog importanteng desisyon?

¹⁰ Konsideraha ang laing hitabo sa kinabuhi ni David. Sa panahon nga siya ug ang iyang mga sundalo nagtagotago, gibiyaan nila ang ilang mga pamilya aron makiggubat. Samtang  wala sila didto, gisulong sa mga kaaway ang ilang mga balay ug gibihag ang ilang mga pamilya. Puwede untang maghunahuna si David nga kay banggiitan siya nga manggugubat, seguradong makahimo siyag maayong estratehiya aron maluwas ang mga binihag. Pero, si David nangayog giya kang Jehova. Sa tabang sa saserdoteng si Abiatar, si David nangutana kang Jehova: “Gukdon ba nako kini nga mga bandido?” Giingnan ni Jehova si David nga gukdon sila ug gipasaligan siya nga mabawi niya ang tanan. (1 Sam. 30:7-10) Unsay inyong makat-onan niini nga hitabo?

11. Unsay puwede ninyong buhaton sa dili pa mohimog mga desisyon?

¹¹ Pangayog tambag sa dili pa mohimog mga desisyon. Konsultaha ang inyong ginikanan. Makakuha pod mog maayong tambag pinaagi sa pagpakig-estorya sa eksperyensiyadong mga ansiyano. Si Jehova may pagsalig niining tinudlong mga lalaki, ug makasalig pod mo nila. Giisip sila ni Jehova ingong mga gasa ngadto sa kongregasyon. (Efe. 4:8) Makabenepisyo mo kon inyong sundogon ang ilang pagtuo ug sundon ang ilang maayong mga sugyot. Karon, atong hisgotan kon unsay atong makat-onan kang Haring Asa.

12. Unsay mga hiyas ni Haring Asa dihang nagsugod siya pagmando?

¹² Sa batan-on pa si Haring Asa, siya mapainubsanon ug maisogon. Pananglitan, dihang nahimo siyang hari human sa kamatayon sa iyang amahan nga si Abias, gisugdan niya ang kampanya batok sa idolatriya. Dugang pa, “iyang giingnan ang Juda nga pangitaon si Jehova nga Diyos sa ilang mga katigulangan ug tumanon ang Balaod ug ang kasugoan.” (2 Cron. 14:1-7) Ug sa dihang si Zera nga Etiopianhon misulong sa Juda uban ang 1,000,000 nga sundalo, si Asa nangayog tabang kang Jehova ug miingon: “Oh Jehova, dili nimo igsapayan kon ang imong tabangan daghan ba o huyang. Tabangi mi, Oh Jehova nga among Diyos, kay kami nagasalig kanimo.” Kining nindot nga mga pulong nagpakita kon unsa ka dako ang pagsalig ni Asa sa katakos ni Jehova sa pagluwas kaniya ug sa iyang katawhan. Si Asa misalig sa iyang langitnong Amahan, ug ‘gitabangan siya ni Jehova sa pagpildi sa mga Etiopianhon.’—2 Cron. 14:8-12.

13. Sa ulahi, unsay nahitabo kang Asa, ug ngano?

¹³ Seguradong mouyon mo nga dili gyod lalim nga sulongon mog 1,000,000 nga sundalo.  Pero kay misalig si Asa kang Jehova, nagmalamposon siya. Apan makapasubo, sa dihang mitungha ang mas gamayng problema, si Asa wala mosalig kang Jehova. Sa dihang gihulga siya sa daotang hari sa Israel nga si Baasa, si Asa nangayog tabang sa hari sa Sirya. Ang maong desisyon miresultag kadaot! Pinaagi sa iyang propeta nga si Hanani, giingnan ni Jehova si Asa: “Kay ikaw misalig sa hari sa Sirya ug wala mosalig kang Jehova nga imong Diyos, ang kasundalohan sa hari sa Sirya nakaikyas sa imong kamot.” Gani, sukad niadto, si Asa pirme nang may pagpakiggubat. (2 Cron. 16:7, 9; 1 Hari 15:32) Unsay leksiyon?

14. Unsaon ninyo pagsalig kang Jehova, ug sumala sa 1 Timoteo 4:12, unsay resulta kon inyo nang himoon?

¹⁴ Magmapainubsanon ug salig pirme kang Jehova. Sa dihang nagpabawtismo mo, nagpakita mog dakong pagtuo ug pagsalig kang Jehova. Ug siya nalipay sa pagdawat ninyo ingong membro sa iyang pamilya. Ang kinahanglan ninyong buhaton karon mao ang padayong pagsalig kang Jehova. Tingali sayon rang mosalig kaniya dihang kinahanglan mong mohimog importante kaayong mga desisyon. Pero komosta sa ubang higayon? Importante gyod nga mosalig mo kang Jehova dihang mohimog mga desisyon, pananglitan sa pagpilig kalingawan, sekular nga trabaho, ug mga tumong sa kinabuhi. Ayawg salig sa inyong kaugalingong kaalam. Hinunoa, pangitag mga prinsipyo sa Bibliya nga haom sa inyong kahimtang ug ipadapat kana. (Prov. 3:5, 6) Kon inyo nang himoon, mapalipay ninyo si Jehova ug mabatonan ninyo ang pagtahod sa mga igsoon sa inyong kongregasyon.—Basaha ang 1 Timoteo 4:12.

15. Sumala sa 2 Cronicas 18:1-3; 19:2, unsang mga sayop ang nahimo ni Haring Jehosapat?

¹⁵ Siyempre, sama sa tanan, kamo dili hingpit, ug usahay masayop mo. Pero, dili ni angayng makapugong ninyo sa paghimo sa inyong maarangan diha sa pag-alagad kang Jehova. Tagda ang pananglitan ni Haring Jehosapat. Daghan siyag maayong mga hiyas. Sa batan-on pa si Jehosapat, “siya nangita sa Diyos sa iyang amahan ug nagsubay sa iyang kasugoan.” Dugang pa, siya nagpadalag mga prinsipe ngadto sa tanang siyudad sa Juda aron tudloan ang mga tawo bahin kang Jehova. (2 Cron. 17:4, 7; footnote) Pero bisag sinsero si Jehosapat, siya nakahimog sayop nga  mga desisyon. Ingong resulta sa usa ka sayop nga desisyon, si Jehosapat gibadlong sa usa sa mga representante ni Jehova. (Basaha ang 2 Cronicas 18:1-3; 19:2.) Unsay inyong makat-onan sa maong asoy?

16. Unsay inyong nakat-onan sa eksperyensiya ni Rajeev?

¹⁶ Dawata ug ipadapat ang tambag. Tingali, sama sa daghang batan-on, naglisod pod mo sa pag-una sa pag-alagad kang Jehova. Ayaw mog kaluya. Hunahunaa ang eksperyensiya sa brader nga si Rajeev. Si Rajeev miingon nga niadtong batan-on pa siya, may mga higayon nga maglibog siya kon unsay iyang buhaton sa iyang kinabuhi. Siya miingon: “Sama sa ubang batan-on, mas interesado ko sa sports ug sa paglingawlingaw kay sa pagtambong sa mga tigom o pagsangyaw.” Unsay nakatabang kaniya? Usa ka mabinationg ansiyano ang naghatag niyag tambag. Si Rajeev miingon: “Gitabangan ko niya nga masabtan ang prinsipyo sa 1 Timoteo 4:8.” Mapainubsanong gidawat ni Rajeev ang tambag ug gipamalandong kon unsa gyoy pinakaimportante sa iyang kinabuhi. Siya miingon: “Nakadesisyon ko nga himoong prayoridad ang pag-alagad kang Jehova.” Unsay resulta? “Pipila ka tuig human nako madawat ang maong tambag,” miingon si Rajeev, “mikuwalipikar ko nga mahimong ministeryal nga alagad.”

17. Unsay gibati sa mga edaran kaninyong mga batan-ong lalaki nga nag-alagad kang Jehova?

¹⁷ Giapresyar pag-ayo sa edarang mga igsoon kamong mga batan-ong lalaki nga nag-alagad kang Jehova uban kanila! (Sof. 3:9) Gipabilhan nila ang inyong kadasig ug kalagsik sa paghimo sa mga buluhaton nga gihatag kaninyo. Gimahal gyod mo nila!—1 Juan 2:14.

18. Base sa Proverbio 27:11, unsay pagbati ni Jehova sa mga batan-ong lalaki nga nag-alagad kaniya?

¹⁸ Mga batan-ong brader, ayawg kalimti nga si Jehova nagmahal ug nagsalig kaninyo. Siya nagtagna nga sa kataposang mga adlaw, dunay daghang batan-ong lalaki nga kinabubut-ong magtanyag sa ilang kaugalingon. (Sal. 110:1-3) Siya nahibalo nga kamo nahigugma kaniya ug gustong moalagad kaniya kutob sa inyong maarangan. Busa magmapailobon sa uban, ug magmapailobon sa inyong kaugalingon. Kon masayop mo, dawata ang pagbansay ug disiplina nga ihatag kaninyo, nga mag-isip niini ingong gikan kang Jehova. (Heb. 12:6) Magkugi diha sa bisan unsang asaynment nga ihatag kaninyo. Ug labaw sa tanan, sa bisan unsa nga inyong buhaton, lipaya ang inyong langitnong Amahan.—Basaha ang Proverbio 27:11.