1. Poukwa nou pé di kè sé jenn frè-la ni onlo valè pou lasanblé-la ?

JENN frè, yo bizwen-zòt adan lasanblé-la. Pawmi zòt, ni onlo ki plen fòs é ki plen énèwji (Pwov. 20:29). Zò pé fè onlo biten pou édé frè é sè a zòt é pétèt kè zò byen anvi vin asistan. Men pawkont, pétèt kè zò ni lenprésyon kè ni sèwten moun an lasanblé-la ki ka konpranndèdi kè zò two jenn oben kè zò pa ni asé èkspéryans pou yo ba-zòt on travay séryé a fè. Menmsi zò jenn, dépi konnyéla, ni onlo biten zò pé fè pou frè é sè a zòt an lasanblé-la fè-zòt konfyans é rèspèkté-zòt.

2. Ka nou ké vwè adan awtik-lasa ?

² Adan awtik-lasa, nou ké ègzaminé ègzanp a wa David. Nou ké vwè osi ka ki rivé 2 wa a Jida : wa Aza é wa Jozafat. Nou ké vwè ki kalté pwoblèm sé 3 wa-lasa jwenn, ka yo fè pou yo té pé sa rézoud-yo é kijan ègzanp a yo pé édé sé jenn frè-la jòdijou.

3. Ka sé jenn frè-la pé fè pou édé frè é sè ki ja ni on bèl laj an lasanblé-la ?

³ Lè David té jennboug, i aprann fè onlo biten ki té vréman itil é ni onlo moun alantou a-y ki té ka aprésyé sa. On biten ki klè sé kè sé té on jennboug ki té bon bon zanmi èvè Jéova é i antréné bon antréné la pou i té aprann jouwé mizik byen. Konm kò a-y té bon adan sa, sé-y ki té ka jouwé mizik ba Sayil, wa-la Bondyé té chwazi la (1 Sam. 16:16, 23). É zòt sé jenn frè-la, ès kò a zòt bon adan on domenn ? É ès zò pé itilizé sa zò sav fè la pou édé frè é sè a zòt an lasanblé-la ? Nou sav kè sé sa onlo adan zòt ka fè. Pa ègzanp, sé frè é sè a lasanblé-la ki ja ni on ti laj ka kontan toubònman lè sé jenn-la ka aprann-yo mannyé tablèt  a yo é òwdinatè a yo pou yo pé sa étidyé é pou yo pé sa suiv réinyon a yo. Si zò konnèt mannyé sé aparèy-lasa, zò ké pé édé onlo frè é sè ki ja ni on bèl laj adan lasanblé a zòt.

4. Menmjan ki David, fò sé jenn frè-la fè éfò pou ni sèwten kalité. Ki kalité ésa ? (gadé imaj-la ki anlè po a jounal-la).

⁴ Adan vi a-y, David montré kè i té on moun ki té séryé an zafè a-y é kè yo té pé fè-y konfyans. Pa ègzanp, lè i té jenngason, i té ka travay rèd pou i té pran swen a mouton a pap’a-y. Travay-lasa pa té fasil pas ou té pé rivé a pèd vi a-w adan sa. Mi sa David ni lokazyon di wa Sayil : « Wa an mwen, aka pap’an mwen, sé mwen ki ka véyé sé mouton-la. On jou, on liyon vin é i pati èvè on mouton an twoupo-la ; ondòt fwa ankò, sé on lous ki vin, é i fè menm biten-la. Alò an kouri dèyè do a yo, an ba-yo bon kou, é an woté sé ti bèt-la an gèl a yo » (1 Sam. 17:34, 35). David té sav kè fò i té pran swen a sé timouton-la, kifè, i pran kouraj a-y a 2 men é i goumé èvè sé bèt sovaj lasa pou i té pé sa pwotéjé timouton a-y. Sé jenn frè-la, David sé on bèl ègzanp pou zòt. Alò, lè yo ka ba-zòt on travay a fè, fò zòt pran sa oséryé.

5. Sèlon Sòm 25:14, ni on biten pou sé jenn frè-la fè é sa vréman enpòwtan. Ki biten ésa ?

⁵ David té jenn men i fè sa ki fo pou i té vin bon bon zanmi èvè Jéova. David té plen kouraj é i té konnèt jouwé mizik byen men pou-y, pa té ni ayen ki té pi enpòwtan ki lanmityé a-y èvè Jéova. Jéova sé té Bondyé a David men sé té bon bon Zanmi a-y osi (li Sòm 25:14). Sé jenn frè-la, prèmyé biten pou zòt chèché a fè sé vin bon bon Zanmi èvè Pap’a zòt ki an syèl-la. Konsa, yo ké pé ba-zòt plis rèsponsabilité adan lasanblé-la.

6. Pou onlo moun, kijan dè tiboug David té yé ?

⁶ Onlo moun té ka konpranndèdi kè yo pa té pé fè David konfyans é kè i té two jenn pou yo té ba-y rèsponsabilité. Pa ègzanp, lè David di kè i k’ay goumé èvè Golyat, wa Sayil éséyé dékourajé-y. Mi sa i di-y : « Ou sé on jenntiboug toujou » (1 Sam. 17:31-33). Kèlkètan avan, on frè a David di-y konsa kè i sé on tiboug an kouyonnad (1 Sam. 17:26-30). Sèlman, Jéova pa té ka pansé kè David té two jenn oben kè i pa té séryé. I  té konnèt David byen. É si David rivé tchouyé Golyat sé pas i té ka konté asi Jéova, zanmi a-y (1 Sam. 17:45, 48-51).

7. Sé jenn frè-la, ka ègzanp a David ka aprann-zòt ?

⁷ Sé jenn frè-la, ka ègzanp a David ka aprann-zòt ? David té ni onlo pasyans é zòt osi, fò zò ni onlo pasyans. Ni onlo moun ki konnèt-zòt dépi lè zò té toupiti é jousalè, yo ka konpranndèdi kè zò toupiti toujou. Men on biten ki sèten sé kè Jéova pa’a rété gadé laj a zòt. I sav kijan dè moun zò yé é ka zò kapab fè (1 Sam. 16:7). Alò, fè tousa zò pé pou vin bon bon zanmi èvè Jéova. Pou David té rivé fè sa, i pran tan gadé sa Jéova kréyé é sa édé-y konprann kijan dè moun Jéova yé (Sòm 8:3, 4 ; 139:14 ; Wom. 1:20). Ondòt biten zò pé fè sé mandé Jéova ba-zòt fòs-la zò bizwen la. Pa ègzanp, ès ni déotwa kanmarad-lékòl a zòt ki ka fè jé èvè zòt pas zò Témwen a Jéova ? Si sé ka a zòt, priyé Jéova pou i édé-zòt andiré sitiyasyon-lasa. Anplisdisa, suiv sé konsèy-la nou ka touvé adan Pawòl a-y é adan sé piblikasyon-la é sé vidéo-la i ka ban-nou la. Pi Jéova ké édé-zòt rézoud pwoblèm a zòt é pi zò ké ni konfyans adan-y. Anplis, lè sélézòt frè é sè-la ké vwè kè zò ka konté asi Jéova, yo ké fè-zòt konfyans.

8-9. Ka ki édé David pran pasyans avan i té vin wa, é ka ègzanp a-y ka aprann sé jenn frè-la ?

⁸ Konnyéla, an-nou vwè ondòt difikilté David jwenn. Jéova té chwazi David pou i té vin wa a Jida men i rété ka atann onpakèt lanné avan i té sizé anlè twòn-la (1 Sam. 16:13 ; 2 Sam. 2:3, 4). Pannan tout tan-lasa, ka ki édé-y pran pasyans ? Olyé i té lésé sitiyasyon-lasa kasé 2 bra a-y, David rété konsantré asi sa i té pé fè. Pa ègzanp, pannan on tan, David té oblijé kaché kò a-y adan téritwa a sé Filisten-la. Men pannan tout tan-lasa, i pwofité pou i té goumé èvè lènmi a Izrayèl. Konsa, i pwotéjé tout alantou a téritwa a Jida (1 Sam. 27:1-12).

⁹ Ka ègzanp a David ka aprann sé jenn frè-la ? Fè tousa zò pé pou édé frè é sè a zòt. An-nou palé dè on frè non a-y sé Ricardo *. Lèwvwè i té ni 10 an apépré, i té anvi vin pyonyé pèwmanan. Men sé ansyen-la di-y kè i po’o paré pou sa. Olyé i té lésé sa dékourajé-y oben rann-li égri, Ricardo désidé préché plis. Mi sa i ka di : « Lè an ka viré réfléchi asi sa, an ka rann-mwen kont kè an té vréman bizwen pwogrésé. An fè tousa an té pé pou viré vwè toutmoun kè mésaj-la té ka entérésé é an té ka préparé chak vizit byen menm. Kifè, an touvé on étid biblik. Pi an té ka préché é pi an té ka santi-mwen alèz an prédikasyon. » Jòdijou, Ricardo asistan é sé on pyonyé pèwmanan ki ka fè on bèl travay an prédikasyon.

10. On jou, David té ni on désizyon enpòwtan a pran. Ka i fè avan ?

¹⁰ An-nou vwè ondòt biten ki rivé David. Lè David té ka kaché kò a-y an téritwa a sé Filisten-la, li é sé sòlda a-y la ay fè lagè é yo lésé madanm a yo é timoun a yo an kaz-la. Pannan yo pa té la, ni dòt lènmi ki fè on désant akaz a yo é yo chapé èvè madanm a yo é timoun a yo. Konm David sé té on sòlda ki té plen èkspéryans, i té’é pé réfléchi limenm a-y pou vwè kijan i ké fè pou i sové sé madanm-la é sé timoun-la. Men a pa sa i fè. I mandé Jéova édé-y. David pasé pa on prèt non a-y sé té Abyata  pou i té mandé Jéova ka pou i fè. Mi sa i di Jéova : « Ès fò an kouri dèyè do a bann-vòlè-lasa ? » Jéova réponn-li : ‘Wi ! Ou pé ay ! Kòchté dèyè do a yo ! Ou ké pongné-yo é zò ké libéré sé prizonyé-la’ (1 Sam. 30:7-10). Ka istwa-lasa ka aprann-nou ?

11. Ka pou zò fè avan zò pran on désizyon ?

¹¹ Avan zò pran on désizyon enpòwtan, mandé on moun on konsèy. Pa ègzanp, zò pé mandé fanmi a zòt ka yo ka pansé. Sé ansyen-la osi pé ba-zòt dé bon ti konsèy pas yo ni onlo èkspéryans. Sé Jéova ki nonmé sé frè-lasa é i ka fè-yo konfyans, alò zòt osi, zò pé fè-yo konfyans. Pou Jéova, sé frè-lasa sé dé « kado » pou lasanblé-la (Éféz. 4:8). Yo ni onlo fwa. Si zò fè ansòt pou ni on fwa kon ta yo é si zò suiv konsèy a yo, zò ké pran bon désizyon. Konnyéla, an-nou vwè ka ègzanp a wa Aza ka aprann-nou.

12. Lè wa Aza koumansé gouvèné, kijan dè boug i té yé ?

¹² Lè wa Aza té jennboug, i té ni onlo imilité é i té plen kouraj. Pa ègzanp, apré mò a pap’a-y Abya, Aza vin wa é i koumansé woté tout sé idòl-la ki té an péyi-la. Anplisdisa, « i mandé tout moun ki té ka rété Jida chèché Jéova Bondyé a zansèt a yo é i mandé-yo rèspèkté Lwa-la é sé komandman-la » (2 Kron. 14:1-7). É lè Zéra Étyopyen-la vin ataké Jida èvè 1 000 000 sòlda, Aza aji èvè onlo sajès piskè i mandé Jéova édé-y. Mi sa i di-y : « O Jéova, ki sé moun-la ou ka édé la fò, ki yo fèb, sa pa ni enpòwtans pou-w. Vin a sèkou an nou, o Jéova Bondyé an nou, pas nou ka fè-w konfyans. » Sé bèl pawòl-la Aza di-la ka montré kè i té sèten kè Jéova té’é sové ki li, ki pèp a-y. Aza té ni konfyans adan Pap’a-y ki an syèl-la é « Jéova fè ansòt pou Aza é Jida gangné sé Étyopyen-la » (2 Kron. 14:8-12).

13. Kèlkètan apré, ka ki rivé Aza, é poukwa ?

¹³ Nou ka tou konprann kè pou ay goumé èvè 1 000 000 sòlda a pa té on ti afè. Men konm Aza té ka konté asi Jéova, i rivé about a yo. Men malérèzman, lè Aza touvé-y douvan on lawmé ki té ni mwens sòlda, i pa konté asi Jéova. Konm Baaza, wa a Izrayèl té bizwen fè lagè èvè-y, i mandé wa a sé Siriyen-la édé-y. Men  désizyon-lasa pa té bon pas sé yenki mové biten sa menné. Jéova voyé pwofèt Anani palé ba-y. Mi sa pwofèt-la di Aza : « Konm ou fè wa a sé Siriyen-la konfyans olyé ou té fè Jéova, Bondyé a-w, konfyans, sé pousa lawmé a wa a sé Siriyen-la chapé anba men a-w » (2 Kron. 16:7, 9 ; 1 Wa 15:32). Ka sa ka aprann-nou ?

14. a) Si on jenn ka fè Jéova konfyans, ka sa ké pousé-y fè ? b) Sèlon 1 Timoté 4:12, si on jenn frè ka fè Jéova konfyans, ka sa ké pòté dè bon ba-y ?

¹⁴ Fò zò toujou aji èvè imilité é fò zò kontinyé konté asi Jéova. Lè zò pran lèbatèm, zò montré Jéova kè zò té ni fwa adan-y é kè zò té ka fè-y konfyans. É Jéova té kontan akéyi-zòt adan fanmi a-y ! Men sa pou zò fè konnyéla sé kontinyé fè Jéova konfyans. Nou ka tou konprann kè lè zò ni on désizyon enpòwtan a pran, zò ka konté asi Jéova men èskè sé sa zò ka fè adan tout domenn a vi a zòt ? Kèlkèswa désizyon zò ni a pran, toujou konté asi Jéova. Sa vréman enpòwtan. Pa ègzanp, fò zò konté asi Jéova lè zò ka chwazi anmizman a zòt, lè zò ka chwazi ki travay zò ké fè é ki òbjèktif zò ké ni. Pa fè fon asi zòtmenm. Men olyé dè sa, chèché déotwa prensip an Bib-la ki ké édé-zòt pran bon désizyon é mété sé prensip-lasa an pratik (Pwov. 3:5, 6). Si zò fè sa, Jéova ké kontan-zòt é sé frè é sè a lasanblé-la ké rèspèkté-zòt (li 1 Timoté 4:12).

15. Dapré sa ki maké an 2 Kronik 18:1-3 é 19:2, ki érè wa Jozafat fè ?

¹⁵ Sé vré, zò enpawfè kon toutmoun, é dè tanzantan zò ké fè érè. Men fò pa sa anpéché-zòt ba Jéova sa zò ni dè méyè. An-nou pran ègzanp a wa Jozafat. I té ni onlo bèl kalité. Lèwvwè i té ni jennboug, « i té ka chèché Bondyé a pap’a-y é i té ka suiv komandman a-y ». Anplisdisa, i voyé déotwa prens adan tout péyi a Jida pou aprann sé moun-la konnèt Jéova (2 Kron. 17:4, 7). Jozafat sé té on boug ki té sensè men magrésa, délè, sa rivé-y pran mové désizyon. Jistèman, apré i té pran on mové désizyon, Jéova voyé on moun rèprann-li (li 2 Kronik 18:1-3 ; 19:2). Ka istwa-lasa ka aprann-zòt ?

16. Sé jenn frè-la, ka ègzanp a Rajeev ka aprann-zòt ?

¹⁶ Lè yo ka ba-zòt on konsèy, aksèpté-y  é mété-y an pratik. Ni onlo jenn frè ki ni dimal a mèt Jéova prèmyé douvan an vi a yo é pétèt kè sé ka a zòt. Men pa lésé sa dékourajé-zòt. An-nou gadé ka ki rivé on jenn frè non a-y sé Rajeev. Lè i ka palé dè jénès a-y, mi sa i ka di : « Délè, lèwvwè an té jennboug, an pa té sav ki sans pou mwen té ba vi an mwen. An té menm biten ki lamajorité a sé jenn-la. An té pisimé fè ispò é anmizé-mwen ki ay an réinyon é an prédikasyon. » Ka ki édé Rajeev ? On ansyen ki té enmé-y onlo ba-y déotwa konsèy. Mi sa Rajeev ka èspliké : « I pran 1 Timoté 4:8 èvè mwen é i fè-mwen réfléchi asi pasaj-lasa. » Rajeev té ni onlo imilité, kifè, i suiv sé konsèy-la yo ba-y la é i réfléchi pou i té vwè ka pou i té mèt prèmyé douvan an vi a-y. Ki rézilta sa bay ? Mi sa Rajeev ka rakonté : « Kèlkè lanné apré yo té ban-mwen konsèy-lasa, an fè tousa ki fo mwen té vin asistan. »

17. Adan lasanblé-la, ka sé granmoun-la ka pansé dè sé jenn frè-la ?

¹⁷ Sé jenn frè-la, fò zò sav kè sé granmoun-la ki an lasanblé-la ka aprésyé-zòt toubònman ! Yo enmé sèvi Jéova ansanm èvè zòt ! (Sof. 3:9). Yo enmé vwè jan zò ka pòté bon mannèv an lasanblé-la ! Yo fyèw dè zòt ! (1 Jan 2:14).

18. Sèlon Pwovèb 27:11, ka Jéova ka rèsanti pou sé jenn frè-la ?

¹⁸ Sé jenn frè-la, pa jen oubliyé kè Jéova ka fè-zòt konfyans. I té ja anonsé kè pannan dènyé jou a sistèm-lasa, té’é ni enpé jennmoun ki té’é sèvi-y dè-tou-kè (Sòm 110:1-3). I sav kè zò enmé-y é kè zò anvi ba-y sa zò ni dè méyè, kifè, fò zò pran pasyans èvè lézòt é fò zò pran pasyans èvè zòtmenm osi. Si zò fè on érè é kè yo ka vin ba-zòt on konsèy, aksèpté-y. Pa jen oubliyé kè sé Jéova ki dèyè do a fòwmasyon-lasa (Ébr. 12:6). Lè yo ba-zòt on travay a fè, pran sa oséryé. É kèlkèswa sa zò ka fè, fè ansòt pou Pap’a zòt ki an syèl-la fyèw dè zòt ! (li Pwovèb 27:11).