1. Ki nou kapav dir lor nou bann zenn frer?

ZENN frer, to kapav fer boukou pou to bann frer ek ser. Bann zenn frer zot for ek zot ena boukou lenerzi. (Prov. 20:29) Zot bien itil dan lasanble. Kitfwa zot anvi osi servi kouma asistan ministeryel. Selman, kitfwa zot ena linpresion ki lezot panse ki zot tro zenn ouswa ki zot pena ase lexperyans pou zot gagn bann pli gran responsabilite. Me mem si to zenn, ena bann kitsoz ki to kapav fer pou ki lezot dan lasanble respekte twa ek fer twa konfians.

2. Ki nou pou examine dan sa lartik-la?

² Dan sa lartik-la, nou pou examinn lexanp Lerwa David. Nou pou get osi lexanp Aza ek Zozafat, de lerwa Zida. Nou pou get bann difikilte ki sa trwa zom-la ti gagne, kouma zot ti sirmont sa bann difikilte-la, ek seki bann zenn frer kapav aprann ar zot lexanp.

3. Donn enn lexanp kouma bann zenn kapav ed lezot dan lasanble.

³ Kan li ti zenn, David ti devlop bann kapasite ki ti bien itil. Li ti enn kikenn ki spiritiel, li ti enn bon mizisien, ek li ti mem zwe lamizik pou ed Sail, lerwa ki Bondie ti etabli. (1 Sam. 16:16, 23) Zenn frer, eski to ena bann kapasite ki to kapav servi pou ed lezot dan lasanble? Boukou parmi zot ena bann kapasite. Par exanp, kitfwa to konpran bien bann laparey elektronik. Eski to kapav ed bann frer ek ser aze pou servi pli bien zot bann laparey elektronik? Bann frer ek ser aze bien rekonesan kan bann zenn frer ed zot pou servi zot bann laparey elektronik pou zot letid personel ek pou renion.

4. Parey kouma David, ki kalite bann zenn frer bizin devlope? (Get zimaz lor kouvertir.)

 ⁴ David ti enn kikenn ki ti responsab ek ki ti kapav fer konfians. Par exanp, kan li ti zenn, li ti travay bien dir pou okip troupo so papa. Ek parfwa, sa travay-la ti kapav bien danzere. David ti explik Lerwa Sail: “To serviter ti vinn enn gardien mouton pou so papa; enn zour, enn lion ti pran enn mouton ti ale; enn lot kout enn lours ti fer mem zafer. Mo’nn galoup deryer zot, ek mo’nn touy zot, mo ti ras bann mouton-la dan zot lagel.” (1 Sam. 17:34, 35) David ti kone ki li ti bizin okip bien bann mouton so papa ek avek kouraz li ti mem lager pou protez zot. Bann zenn frer kapav imit lexanp David kan zot okip bien ninport ki responsabilite zot gagne.

5. Dapre Psom 25:14, ki kitsoz pli inportan bann zenn frer bizin fer?

⁵ Depi so zenes, David ti ena enn bon lamitie avek Zeova. So lamitie avek Zeova ti pli inportan ki so kouraz ouswa bann talan mizisien ki li ti ena. Pou David, Zeova pa ti zis so Bondie, Li ti osi so bon Kamarad bien pros. (Lir Psom 25:14.) Zenn frer, kitsoz pli inportan ki to bizin fer se ranforsi to lamitie avek to Papa ki dan lesiel. Kan to fer sa, to pou kapav gagn plis responsabilite dan lasanble.

6. Ki lopinion sertin dimounn ti ena lor David?

⁶ Sertin dimounn ti panse ki David ti tro zenn ek ki li ti enn kikenn ki pa ti responsab. Par exanp, kan David ti propoz limem pou al lager kont Goliat, Lerwa Sail ti esey dekouraz li ek ti dir li: “To zis enn garson.” (1 Sam. 17:31-33) Inpe avan, David so prop frer ti dir ki David pa ti enn kikenn ki responsab. (1 Sam. 17:26-30) Selman, Zeova pa ti panse ki David pa ti enn kikenn ki responsab ouswa ki li ti tro zenn. Zeova ti konn David bien. David ti kont lor so Kamarad, Zeova, ek li ti gagn laviktwar lor Goliat.​—1 Sam. 17:45, 48-51.

7. Ki leson bann zenn frer kapav aprann ar lexanp David?

⁷ Zenn frer, ki to kapav aprann ar seki ti ariv David? Lexanp David montre twa ki to bizin ena pasians. Parfwa, sa pran letan pou ki enn kikenn ki konn twa depi tipti realize ki to’nn vinn enn zenn  adilt. Selman, to kapav sir ki Zeova Li pa trouv zis to laparans. Li konn twa bien ek Li konn to bann kapasite. (1 Sam. 16:7) Alor, fer to lamitie avek Zeova vinn pli for. Se seki David ti fer kan li ti obzerv ek medit lor bann kitsoz ki Zeova inn kree. Sa ti ansegn li boukou kitsoz lor so Kreater. (Ps. 8:3, 4; 139:14; Rom. 1:20) Enn lot kitsoz ki to kapav fer se priye Zeova ek demann Li lafors ki to bizin. Par exanp, eski to bann kamarad lekol boufonn twa parski to enn Temwin Zeova? Si sa arive, priye Zeova ek Li pou ed twa pou andire. Aplik osi bann konsey pratik ki ena dan Labib, dan nou bann piblikasion, ek nou bann video. Sak fwa ki to trouve kouma Zeova ed twa pou andir to bann difikilte, to pou ena plis konfians an Li. Anplis, kan lezot pou trouve ki to kont lor Zeova, zot pou fer twa konfians.

8-9. Avan ki David koumans regne kouma lerwa, ki kitsoz ti ed li pou ena pasians, ek ki leson bann zenn frer kapav aprann ar so lexanp?

⁸ Anou get enn lot difikilte ki David ti gagne. Apre ki Zeova ti swazir li pou vinn lerwa, David ti bizin atann plizir lane avan ki li koumans regne kouma lerwa Zida. (1 Sam. 16:13; 2 Sam. 2:3, 4) Pandan sa letan-la, ki kitsoz ti ed David pou ena pasians? Olie ki li ti dekouraze, David ti servi sa letan-la pou res konsantre lor seki li ti kapav fer. Par exanp, pandan ki li ti pe viv kouma enn fizitif dan teritwar bann Filistin, David ti lager kont bann lennmi Izrael. Kan li ti fer sa, li ti pe protez bann frontier teritwar Zida.​—1 Sam. 27:1-12.

⁹ Zenn frer, ki to kapav aprann ar lexanp David? Fer tou seki to kapav pou ed to bann frer ek ser. Anou get lexanp enn frer ki apel Ricardo. * Kan li ti zenn, Ricardo ti anvi vinn pionie permanan. Me bann ansien ti dir li ki li pa ti ankor pre. Olie ki li dekouraze ouswa ankoler, Ricardo ti fer plis dan predikasion. Li dir: “Kan mo ti reflesi lor seki ti arive, mo ti realize ki mo ti vremem bizin fer bann progre. Lerla, kan mo ti al prese, mo ti fer mo maximum pou re-al get bann dimounn ki ti interese ek mo ti prepar sak vizit ki mo ti fer. Mo ti mem koumans mo premie letid Labib. Avek letan, mo ti gagn plis lexperyans ek plis konfians an momem.” Azordi, Ricardo pe servi kouma pionie permanan ek asistan ministeryel.

10. Ki kitsoz David ti fer avan ki li ti pran enn desizion bien inportan?

¹⁰ Anou get enn lot kitsoz ki ti ariv David. Kan David ti al kasiet dan teritwar bann Filistin akoz Lerwa Sail, David ek so bann zom ti kit lavil kot zot ti pe reste pou al lager. Dan sa moman-la, bann lennmi ti al dan lavil-la, ti detrir zot bann lakaz, ek ti amenn zot fami kouma prizonie. David ti enn bon solda, alor li ti kapav panse ki li ti ena ase lexperyans pou etabli enn plan pou al sov zot fami. Me olie sa, David ti rod direksion Zeova. Avek led enn pret ki apel Abiatar, David ti demann Zeova: “Eski mo bizin al deryer sa group bandi la?” Lerla, Zeova ti dir David ki li ti kapav ale ek ki li ti pou reisi sov zot fami. (1 Sam. 30:7-10) Ki leson nou kapav aprann ar sa zistwar-la?

11. Ki kitsoz to bizin fer avan ki to pran enn desizion?

¹¹ Avan ki to pran enn desizion, rod  konsey ar lezot. Rod led ar to bann paran. To kapav osi rod led avek bann ansien ki ena lexperyans. Zeova fer sa bann frer-la konfians, ek twa osi to kapav fer zot konfians. Zeova konsider zot kouma bann “don” pou bann lasanble. (Efe. 4:8) Kan to imit zot lafwa ek ekout zot bann konsey ki ranpli ar sazes, to pou reisi pran bann bon desizion. Asterla, anou gete seki nou kapav aprann ar lexanp Lerwa Aza.

12. Ki bann kalite Lerwa Aza ti ena kan li ti koumans regne?

¹² Kan li ti zenn, Lerwa Aza ti ena limilite ek kouraz. Par exanp, apre lamor so papa, Aza ti vinn lerwa, ek li ti tir tou bann zidol ki ti ena dan pei. Li ti osi ankouraz bann abitan Zida pou “rod Zeova, Bondie zot bann anset ek pou obeir Lalwa ek bann komannman.” (2 Kro. 14:1-7) Inpe apre, Zera, enn Etiopien, ti vinn atak Zida avek enn milyon solda. Avek sazes, Aza ti rod led Zeova ek li ti dir: “A Zeova, sa pa inportan pou twa ki bann dimounn ki to sape zot for ouswa feb. A Zeova nou Bondie, ed nou, parski nou kont lor twa.” Sa bann parol-la montre ki Aza ti sir ki Zeova ti kapav sov li ek So pep. Aza ti ena konfians an Zeova, ek “Zeova ti gagn viktwar lor bann Etiopien.”​—2 Kro. 14:8-12.

13. Ki ti ariv Aza plitar, ek kifer?

¹³ Sey mazinn enn larme avek enn milyon solda! Sa ti kapav paret enn gran difikilte, me parski Aza ti kont lor Zeova, li ti gagn laviktwar. Selman, kan plitar Aza ti gagn enn pli tipti difikilte, li pa ti kont lor Zeova. Kan Baasha, lerwa Izrael, ti menas Aza, Aza ti rod led ar lerwa Siri. Sa ti enn move desizion! Zeova ti servi profet Anani pou dir Aza: “Parski to finn kont lor lerwa Siri ek to pa finn kont lor Zeova to Bondie, larme lerwa Siri finn sap dan to lame.” Depi sa lepok-la, Aza zame pa ti konn lape. (2 Kro. 16:7, 9; 1 Ler. 15:32) Ki leson nou aprann ar sa zistwar-la?

14. Kouma to kapav kont lor Zeova, ek dapre 1 Timote 4:12, ki pou arive si to fer sa?

¹⁴ Kontign ena limilite ek kontign kont lor Zeova. Kan to ti pran batem, to ti  montre ki to ti ena lafwa ek konfians an Zeova. Anplis, Zeova ti bien kontan pou akeyir twa dan so fami. Asterla, to bizin kontign kont lor Zeova. Kan to ena pou pran bann desizion ki inportan, li paret fasil pou kont lor Zeova. Me eski to pou kontign kont lor Zeova dan bann tipti desizion osi? Li bien inportan ki to kontign fer Zeova konfians dan tou bann desizion ki to pran, mem si sa konsern to bann divertisman, to travay, ouswa to bann lobzektif. Pa kont lor to prop sazes. Okontrer, dan ninport ki sitiasion, rod bann prinsip Labib ki pou ed twa pou pran bann bon desizion, ek swiv sa bann prinsip-la. (Prov. 3:5, 6) Si to fer sa, Zeova pou bien kontan, ek bann frer ek ser to lasanble pou respekte twa.​—Lir 1 Timote 4:12.

15. Dapre 2 Kronik 18:1-3; 19:2, ki bann erer Lerwa Zozafat ti fer?

¹⁵ Biensir, parey kouma tou dimounn, twa osi to inparfe, ek to pou fer bann erer. Selman, fode pa ki sa anpes twa fer to maximum pou servi Zeova. Anou get lexanp Lerwa Zozafat. Li ti ena boukou zoli kalite. Kan li ti zenn, “li ti rod Bondie so papa ek li ti swiv So bann komannman.” Anplis, li ti avoy bann prins dan bann lavil Zida pou ansegn lepep bann lalwa Zeova. (2 Kro. 17:4, 7) Me kanmem sa, parfwa Zozafat ti pran bann move desizion. Enn fwa, li ti mem gagn bann konsey avek enn reprezantan Zeova. (Lir 2 Kronik 18:1-3; * 19:2. *) Ki leson nou kapav aprann ar lexanp Zozafat?

16. Ki nou kapav aprann ar lexanp Rajeev?

¹⁶ Aksepte ek swiv bann konsey ki to gagne. Parey kouma boukou zenn, kitfwa to trouv sa difisil pou fer servis  Zeova vinn enn priorite dan to lavi. Me fode pa to dekouraze! Anou get lexanp enn frer ki apel Rajeev. Li rapel lepok kot li ti zenn ek li dir: “Pandan plizir lane, mo pa ti kone ki mo ti anvi fer ar mo lavi. Parey kouma boukou zenn, mo ti plis kontan spor ek lamizman ki al renion ek predikasion.” Ki kitsoz ti ed Rajeev? Enn ansien ti donn li bann bon konsey. Rajeev dir: “Li ti ed mwa pou reflesi lor prinsip ki trouv dan 1 Timote 4:8.” Avek limilite, Rajeev ti aksepte sa konsey-la ek li ti reflesi lor so bann priorite. Li dir: “Mo ti desid pou fer bann kitsoz spiritiel vinn mo priorite.” Ki rezilta Rajeev ti gagne? Rajeev dir: “De-trwa lane apre ki mo ti gagn sa konsey-la, mo ti ranpli bann kondision pou vinn asistan ministeryel.”

17. Kouma bann Kretien aze konsider bann zenn frer ki servi Zeova?

¹⁷ Bann Kretien aze bien kontan bann zenn frer ki servi Zeova “kot-a-kot” avek zot! (Sof. 3:9) Zot kontan kan bann zenn frer fer zot maximum pou servi Zeova. Zenn frer, to ena boukou valer pou zot.​—1 Zan 2:14.

18. Dapre Proverb 27:11, ki Zeova resanti pou bann zenn frer ki servi Li?

¹⁸ Zenn frer, fode zame to bliye ki Zeova kontan twa ek ki Li fer twa konfians. Zeova ti predir ki dan bann dernie zour, ti pou ena enn larme zenn frer ki ti pou port zot volonter pou servi Li. (Ps. 110:1-3, NW) Li kone ki to kontan Li, ek ki to anvi fer to maximum pou servi Li. Alor, ena pasians anver lezot, ek ena pasians anver tomem. Kan to fer bann erer, aksepte disiplinn ek formasion ki to gagne, ek fer koumadir se Zeova ki pe donn twa sa. (Ebre 12:6) Okip bien ninport ki responsabilite to gagne dan lasanble. Me pli inportan, dan tou seki to fer, fer leker to Papa, Zeova kontan.​—Lir Proverb 27:11. *