1. ¿Bautizarishca jovencitocunaca imata ruranatataj munancuna?

JOVENCITOCUNA, cancunaca achca fuerzata charishcamantami congregacionpica achcata ayudai tucunguichij (Proverbios 20:29). De seguro achcacunami siervo ministerial canata munanguichij. Maipica “shujtajcunaca ñucataca huahuata shinami ricuncuna” nishpachari yuyanguichij. Pero jovencuna cashpapish congregacionpi alli pajtachij, responsables cashcatami ricuchi tucunguichij.

2. ¿Cai yachaipica imacunallatataj yachashun?

² Cai yachaipica Davidpaj ejemplomanta, Judá llajtata mandaj Asamanta, mandaj Josafatmantami yachashun. Shinallataj paicunaca llaquicunata charishpapish chai llaquicunahuan ima shina chꞌimbapurashcata, jovencitocunapish caimanta imata yachai tucushcatami ricushun.

3. ¿Jovencitocunaca mayorlla huauqui panicunataca ima shinataj ayudai tucunguichij?

³ Rey Davidca jovenraj cashpaca Jehová Diosta sirvingapaj, shujtajcunata ayudangapajmi esforzarirca. Por ejemplo, paica arpapi tocashpa Dios agllashca rey Saultami cushichishpa ayudaj carca (1 Samuel 16:16, 23). Jovencuna, cancunapishmi congregacionpica huauqui panicunata ayudai tucunguichij. Por ejemplo, mayorlla huauqui panicunaca tabletta, celularta ima shina alli utilizangapajmi yachachichun munancuna.  Jovencitocuna, cancuna chashna ayudashpaca huauqui panicuna tandanacuipaj alli prepararichunmi ayudanguichij.

4. ¿Jovencitocunaca cancunaman mingashcataca ima shinataj pajtachina canguichij? (Página 1-pi tiyaj fotota ricui).

⁴ Davidca huambramantapachami imatapish alli pajtachij carca. Por ejemplo, paipaj yaya ovejacunata cuidachun mandajpica sinchi cajpipish alli cuidangapajmi esforzarirca. Asha tiempo qꞌuipaca Davidca Saulmanca: “Cambajta ruraj ñucaca ñuca yayapaj ovejacunata michijmi carcani. León cashpa, oso cashpa shamushpa chai canlla ovejacunamanta shujta apajpica, catishpa rishpaca, chai animalpaj shimimanta quichujllami cani” nircami (1 Samuel 17:34, 35). Davidca ovejacunata alli cuidashpami responsable cashcata ricuchirca. Jovencitocuna, cancunapish ima mingashcacunata alli pajtachingapajmi esforzarina canguichij.

5. Salmo 25:14-pi nishca shinaca ¿jovencitocuna, cancunaca tucuimanta yallica imatataj rurana canguichij?

⁵ Davidca jovenmantami Jehová Dioshuan alli apanacungapaj esforzarirca. Paipajca arpapi tocanata yallimi Jehová Diospaj alli amigo cana importante carca (Salmo 25:14-ta liyipai). Jovencitocuna, cancunapish tucuimanta yallica Jehová Dioshuan alli apanacungapajmi esforzarina canguichij. Chashnami congregacionpi mingashca huaquin asignacioncunatapish pajtachi tucunguichij.

6. ¿Huaquincunaca Davidmantaca ima panda yuyaicunatataj charijcuna carca?

⁶ Maipica shujtajcunaca Davidmantaca mana alli yuyaicunatami nijcuna carca. Por ejemplo, David, Goliathuan macanacusha nijpica rey Saulca ‘canca huambrarajmi cangui, mana macanacui tucunguichu’ nircami (1 Samuel 17:31-33). Shinallataj paipaj huauquipish ‘ovejacunataca imamantataj shitashpa shamungui’ nishpami sinchita rimarca (1 Samuel 17:26-30). Pero Jehová Diosca Davidtaca imata mana alli pajtachijta shinaca mana ricurcachu. Ashtahuanpish Davidtaca allimi rijsirca. Chaimi Davidca Jehová Diospi confiashcamanta Goliattaca huañuchirca (1 Samuel 17:45, 48-51).

7. ¿Jovencitocunaca Davidpaj experienciamantaca imatataj yachai tucunguichij?

⁷ ¿Jovencunaca Davidmantaca imatataj yachai tucunguichij? Maipica cantaca maijancunaca huahuata shinami tratancuna. Chashna tratajpica David shinami pacienciata  charina cangui. Jehová Diosca can imata rurai tucushcata, imata pajtachi tucushcataca allimi yachan (1 Samuel 16:7). Davidca Yayitu Dios tucui rurashcacunata ricushpa, rurashcacunapi yuyashpami Jehová Dioshuan alli apanacurca. Canpish Jehová Dioshuan alli apanacungapajmi esforzarina cangui (Salmo 8:3, 4; 139:14; Romanos 1:20). Shinallataj escuelapi compañerocuna can testigo de Jehová cashcamanta burlarijpica Jehová Diostami ayudachun mañana cangui. Ashtahuancarin Bibliata, publicacioncunata liyishpa, videocunata ricushpami ima yachachishcacunataca cambaj causaipi pajtachina cangui. Jehová Dios canta ayudajta ricushpaca paipajmanmi ashtahuan cꞌuchuyangui. Shujtajcunapish Jehová Diospi can confiajpica paicunapish canpimi ashtahuan confiangacuna.

8, 9. a) ¿Davidca mandai callaringacamaca imamantataj pacienciahuan shuyarca? b) ¿Jovencitocunaca Davidpaj ejemplomantaca imatataj yachai tucunguichij?

⁸ Davidta rey cachun Jehová Dios agllashca cajpipish paica achca huatacunatami mandangapajca shuyana carca (1 Samuel 16:13; 2 Samuel 2:3, 4). ¿Pacienciahuan shuyangapajca imatataj rurarca? Paica desanimarinapaj randica Yayitu Diosta sirvingapajmi tucui pudishcata rurarca. Por ejemplo, filisteocunapaj llajtapi miticushpa, puricushpaca israelitacunapaj contracunahuan macanacungapajmi tiempota alli utilizarca. Chashnami Judá llajtata ama llaquichichun cuidarca (1 Samuel 27:1-12).

⁹ ¿Jovencunaca Davidpaj ejemplomantaca imatataj yachai tucunguichij? Huauqui panicunata ayudangapajmi tucui pudishcata rurana canguichij. Huauqui Ricardopi yuyashun. * Paica jovenraj cashpaca precursor regular canatami munarca. Pero precursor regular cangapaj manaraj listo cashcatami cuentata curca. Paica: “Bibliamanta yachasha nijcunata mashcangapajmi esforzarircani. Shinallataj revisitata rurangapajpish allimi prepararij carcani. Bibliamantapish estudiotami callarichircani. Ashtahuan predicangapaj esforzarishpaca ña mana tanto manchaita charircanichu. Caicunata ruranami ñucataca alli precursor cachun ayudarca” ninmi. Cunanca huauqui Ricardoca siervo ministerial, precursor regularmi can.

10. ¿Davidca importante decisionta agllangapajca imatataj rurarca?

¹⁰ David shujtaj problemacunahuan chꞌimbapurashcata ricushun. Davidca paipaj runacunahuanmi rey Saulmanta miticushpa puricurcacuna. Shuj cutinca miticushpa puricushcamantami paicunapaj familiacunataca huasipi saquishpa rircacuna. Chaimi Davidpaj contracunaca Davidpaj familiacunataca tucui prezu apashpa rircacuna. Chaita yachaj chayashpaca Davidca ‘ñucaca alli macanacujmi cani, paicunataca catishpa rishpa japimushami’ ninapaj randica Jehová Diostami imata ruranata tapurca. Davidca Jehová Diostaca: “¿Prezu apashpa ricujcunataca catishpa rishachu? ¿Paicunataca cati japishachu?” nishpami tapurca. Chaimi Mandaj Diosca: “Cati japinguimi. Paicunataca prezushpa apamushcatapish quishpichinguimi. Rilla” nishpa cutichirca (1 Samuel 30:7-10). ¿Caimantaca imatataj yachai tucunguichij?

11. ¿Jovencunaca manaraj decisionta agllashpaca imatataj rurana canguichij?

¹¹ Jovencuna, ima alli decisionta agllangapajca cancunapaj yaya mamata, congregacionta pushajcunatapishmi consejota cuchun mañana canguichij. Congregacionta pushajcunaca achca experienciatami charincuna. Paicunataca Jehová Diosca congregacionta  pushachun, huauqui panicunata cuidachunmi agllashca. Diosca paicunataca shuj regalota shinami ricun (Efesios 4:8). Chaimantami paicunapi confiai tucunguichij. Paicunapaj ejemplota catishpa, paicunapaj consejocunata chasquishpaca alli decisioncunatami agllanguichij. Cunanca rey Asapaj ejemplomanta yachashunchij.

12. ¿Rey Asaca mandai callarishpaca ima shinataj carca?

¹² Asaca jovenraj cashpaca humilde, mana manchajmi carca. Por ejemplo, paipaj yaya huañujpica paimi paipaj yayapaj randi mandai callarirca. Shinallataj chai llajtapi tiyaj tucui yanga dioscunata tucuchingapajmi shuj campañata rurarca. Paica Judá llajtapi causajcunataca Yayitu Diosta sirvichun, Diospaj mandashcacunata cazuchunmi ayudarca (2 Crónicas 14:1-7). Shinallataj Etiopía llajtamanta mandaj Zera paipaj millón soldadocunahuan Judá llajtapi causajcunata llaquichinaman shamujpica rey Asaca Jehová Diostami ayudachun mañarca. Paica: “¡Mandaj Taita Dioslla, can ayudashpallami achca soldadocuna cajpipish mishachingui! Ashacunalla cajpipish, can ayudashpaca mishachinguillami. Chaimantami ñucanchijta Mandaj, can Taita Diosllapi shungutaca churanchij. Ñucanchijta ayudahuaiyari” nircami. Chashna mañashpaca Asaca Jehová Diospi confiashcatami ricuchirca. Diospi confiashcamantami paitaca etíope soldadocunata mishachun Diosca ayudarca (2 Crónicas 14:8-12).

13. ¿Rey Asaca imapitaj pandarirca?

¹³ Asapajca millón soldadocunahuan macanacunaca sinchimi cashcanga. Pero Asaca Jehová Diospi confiashcamantami paicunataca mishai tucurca. Asha tiempo qꞌuipaca Israel llajtata mandaj rey Baasami paipaj asha soldadocunahuan Judá llajtapi causajcunata llaquichinaman shamurcacuna. Pero rey Asaca Jehová Diosta ayudachun mañanapaj randica Siria llajtata mandajtami ayudachun mañarca. Chaimi profeta Hananica Jehová Dios ima nishcata nirca. Paica: “Canca canta Mandaj Dios ayudachun paipi shunguta churanapaj randica, Siria llajtata jatun mandajtamari ayudachun mañashcangui. Chaimi Siria llajtata jatun mandajpaj soldadocunaca, cambaj maquimanta quishpirishpa  rishcacuna” nircami. Chai punllamanta huichimanca rey Asaca guerracunapimi macanacui solo pasaj carca (2 Crónicas 16:7, 9; 1 Reyes 15:32).

14. a) ¿Jovencunaca Jehová Diospi confiashcataca ima shinataj ricuchina canguichij? b) ¿Jovencunaca 1 Timoteo 4:12-pi nishcacunataca imamantataj cazuna canguichij?

¹⁴ ¿Jovencunaca rey Asamantaca imatataj yachai tucunguichij? Cancunaca bautizarishpaca Jehová Diospi sinchi feta charishcata, paipi confiashcatami ricuchircanguichij. Chaimi Yayitu Diospish paipaj pueblopica cushilla chasquishca. Pero cunanca Yayitu Diospimi confiashpa catina canguichij. Huaquinpica ima decisioncunata agllacushpaca Jehová Diospi confiashcatami ricuchinguichij. Shinapish tal vez imapi pugllanata agllacushpa, imapi trabajanata agllacushpa o causaipaj imata ruranata agllacushpaca Jehová Diospi confianaca sinchichari canga. Pero cancunapaj yuyaillapi confianapaj randica Bibliapi ima yachachishcacunatami pajtachina canguichij (Proverbios 3:5, 6). Chashnami Jehová Diostapish cushichinguichij y huauqui panicunapish cancunatami respetangacuna (1 Timoteo 4:12-ta liyipai).

15. 2 Crónicas 18:1 al 3; 19:2-pi nishca shinaca ¿rey Josafatca imallapitaj pandarirca?

¹⁵ Jovencuna, cancunapish ñucanchij shinallatajmi huaquinpica pandaringuichij. Pandarishpapish Jehová Diosta sirvinataca manataj saquinachu canguichij. Rey Josafatpaj ejemplopi yuyashun. Paica jovenraj cashpaca Jehová Diostami mashcarca, paipaj mandashcacunatapishmi cazurca. Shinallataj paita sirvijcunatami Judá llajtapipish Diosmanta huillachun cacharca (2 Crónicas 17:4, 7). Pero huaquinpica Josafatca mana alli decisioncunatami agllarca. Chaimantami Jehová Diosca paitaca corregirca (2 Crónicas 18:1-3; 19:2-ta liyipai). Paipaj ejemplomanta imata yachai tucushcata ashtahuan ricushun.

16. ¿Rajeev shuti huauquimantaca imatataj yachai tucunguichij?

¹⁶ Maijan jovencunapajca Jehová Diosta sirvinata punta lugarpi churanaca paicunapajca sinchimi ricurin. Pero ama desanimarichu. Dios cushca consejocunata chasquishpaca Diostaca sirvi tucunguichijmi. Rajeev shuti huauquipi yuyashun. Paica: “Ñucaca jovenraj  cashpaca tandanacuicunaman rinapaj randi, huillanaman llujshinapaj randica pugllanacunata, divirtirinacunatami munaj carcani. Pero congregacionta pushaj shuj huauquimi ñucataca aconsejarca. Paica 1 Timoteo 4:8-pi ima yachachishcacunapi yuyachunmi ayudarca” ninmi. Rajeev shuti huauquica humildadhuanmi Dios cushca consejocunata chasquishpa Diosta punta lugarpi churarca. Chaimantami paica qꞌuipaca siervo ministerial tucurca.

17. ¿Jovencitocuna Jehová Diosta sirvijpica huauqui panicunaca ima shinataj sintirincuna?

¹⁷ Jovencitocuna, congregacionpi huauqui panicunahuan cancuna tandalla Diosta sirvijpica paicunaca cushillami sintirincuna (Sofonías 3:9). Congregacionpipish ima mingashcacunata cushilla pajtachijta ricushpaca paicunaca cushicuncunami. Chaimanta paicunaca cancunatami respetancuna, cancunapimi confiancuna (1 Juan 2:14).

18. Proverbios 27:11-pi nishca shinaca ¿jovencitocuna Jehová Diosta tucuipi sirvingapaj esforzarijpica paica ima shinataj sintirin?

¹⁸ Jovencitocuna, Jehová Dios cancunata cꞌuyashcata, cancunapi confiashcataca amataj cungaringuichij. Yayitu Diosca ‘tucuri punllapica jovencunaca ñucata sirvingapajmi tucui pudishcata rurangacuna’ nircami (Salmo 110:1-3, NWT ). Yayitu Diosca can paita cꞌuyajta, paita sirvingapaj esforzarishcataca allimi yachan. Chaimanta canllatajpish shujtajcunahuanpish pacienciata charingapaj esforzari. Imapi pandarishpapish shujtajcuna consejajpi, corregijpica chasquingui. Tucui caicunaca Jehová Diosmantami shamun (Hebreos 12:6). Imata mingashcatapish alli pajtachi. Ashtahuancarin Jehová Diosta jatunyachingapaj, paita tucuipi cushichingapaj esforzari (Proverbios 27:11-ta liyipai).