1. Со шај те керен о терне пхраља?

ТЕРНЕ пхраљален тумен шај те овен бут корисна ко собрание. Бут тумендар тане силна хем пхерде енергија (Изр. 20:29). Тумен бут керена те шај те поможинен тумаре пхраленге хем пхењенге хем шај мангена те овен слуга-помошникија. Ама, шај мислинена туменге кај о јавера дикхена тумен сар бут терне хем кај сиен неискусна те шај те добинен несави важно задача. Иако сиен терне, иси буќа со шај те керен акана те шај те стекнинен и доверба хем о поштовање е јаверенгоро таро собрание.

2. Со ка дикха ки акаја статија?

² Ки акаја статија, ка разгледина о живото таро цари о Давид. Исто аѓаар, ка разгледина несаве настанија таро живото е дује царенгоро тари Јуда — о Аса хем о Јосафат. Ка дикха саве проблемија сине акале трине манушен, сар решинѓе лен хем со шај те сикљовен о терне пхраља таро ленгоро пример.

3. Кова тано јекх начин сар шај о потерне те поможинен е попхуренге ко собрание?

³ Џикоте сине терно, о Давид сиклило вештине со сине корисна е јаверенге. Јасно тано кај ле сине ле паше амалипе е Јеховаја, ов исто аѓаар бут трудинѓа пе те овел шукар музичари хем ов користинѓа пле вештине те поможинел  е Саулеске кова сине помазимо цари таро Девел (1. Сам. 16:16, 23). Дали ту сар терно мануш иси ту вештине кола со шај те овен корисна е јаверенге ко собрание? Буте тернен иси лен асавке вештине. На пример, шај приметинѓан кобор несаве таро попхуре тане благодарна кеда о терне сикавена ленге сар те користинен пумаре таблетија или јавера електронска уредија баши пумари лично студија хем башо состанокија. Ту шај бут те поможине е попхуренге адалеске со хаљовеа тут тари технологија.

4. Исто сар о Давид, кола особине мора о терне пхраља те развинен? (Дикх и слика тари насловно страна.)

⁴ Ко пло живото, о Давид докажинѓа кај тано одговорно хем кај е јаверен шај те овел лен доверба ки лесте. На пример, џикоте сине терно, ов грижинела пе сине бут пле дадескере бакхренге. Адаја сине јекх опасно задача. О Давид покасно вакерѓа е Саулеске: „Тло слуга аракхела сине пле дадескере бакхрен, хем тегани ало јекх лави, а јавер пути мечка, хем леља јекхе бакхре таро стадо. Прастандиљум пали лесте, кхувѓум ле хем икалѓум е бакхре таро лескоро муј“ (1. Сам. 17:34, 35). О Давид џанља кај тано одговорно те грижинел пе е бакхренге, хем ов храбро боринѓа пе те шај те заштитинел лен. О терне пхраља шај те џан пало е Давидескоро пример аѓаар со ка ден пестар са те исполнинен било која задача сој ленге денди.

5. Спрема Псалм 25:14, која тани и најважно бути со шај о терне пхраља те керен?

⁵ Панда сар терно, о Давид развинѓа бут паше амалипе е Јеховаја. Адава амалипе сине бут поважно тари е Давидескири храброст или лескири способност те башалел ки харфа. О Јехова на сине само е Давидескоро Девел, него ов сине исто аѓаар лескоро амал — лескоро паше амал. (Читин Псалм 25:14.) Терне пхраљален, и најважно бути со шај те керен тани те овен попаше тумаре небесно Дадеа, ако керена адава тумен шај те добинен повише задаче ко собрание.

6. Саво негативно мислење сине несавен башо Давид?

⁶ Јекх предизвик кова со о Давид ваљани сине те накхавел сине кај о јавера ки лесте дикхена сине сар бут терно хем неодговорно. На пример, кеда о Давид гело доброволно те боринел пе против о Голијат, о цари о Саул мангља те чхинавел ле, адалеа со вакерѓа леске: „Ту сиан панда чхаво“  (1. Сам. 17:31-33). Англедер, е Давидескоро пхрал кривинѓа ле кај тано неодговорно (1. Сам. 17:26-30). Ама, о Јехова на дикхела сине ко Давид сар незрело или неодговорно. Ов шукар џанела сине е Давиде. Хем о Давид шај сине те мударел е Голијате адалеске со сине ле доверба ко пло амал ко Јехова (1. Сам. 17:45, 48-51).

7. Со шај те сикљове таро јекх извештај башо Давид?

⁷ Со шај те сикљова таро е Давидескоро искуство? Сикљоваја кај ваљани те ова стрплива. Шај ка ваљани време околенге со џанена тут сар тикно чхаво те хаљовен кај ту бариљан. Ама, ов сигурно кај о Јехова на концентриринела пе ко адава сар изглединеа. Ов џанела кој сиан ту хем со шај те кере (1. Сам. 16:7). Кер позорало тло амалипе е Девлеа. О Давид керѓа адава адалеа со внимателно дикхела сине о буќа со керѓа лен о Јехова. Ов размислинела сине со сикавена адала буќа башо Јехова (Пс. 8:3, 4; 139:14; Рим. 1:20). Јавер бути со шај те кере тани те роде о Јехова те дел ту сила. На пример, дали несаве тле соученикија асана туке адалеске со сиан е Јеховаскоро сведоко? Ако аѓаар, молин тут е Јеховаске те поможинел туке те икљове ко крајо акале проблемеа. Применин о практична советија со аракхљона ко лескоро Лафи хем ко амаре публикацие хем видеоклипија. Секова пути кеда дикхеа сар о Јехова поможинела туке те икљове ко крајо е проблеменцар, тли доверба ки лесте ка бајрол. Исто аѓаар, кеда о јавера ка дикхен кај иси тут доверба ко Јехова, ту ка стекнине ленгири доверба.

8-9. Со поможинѓа е Давидеске стрпливо те аџикерел те овел цари, хем со шај о терне пхраља те сикљон таро лескоро пример?

⁸ Те дикха јекх јавер предизвик со сине е Давиде. Откеда сине помазимо те овел цари, о Давид ваљани сине те аџикерел бут берша англедер те почминел те владинел сар цари ки Јуда (1. Сам. 16:13; 2. Сам. 2:3, 4). Со поможинѓа леске ко адава периоди стрпливо те аџикерел? Наместо те овел бут обесхрабримо, о Давид концентриринѓа пе ко адава со шај те керел. На пример, кеда нашља ки филистејско пхув, о Давид користинѓа и прилика те боринел пе против о израелска душмања. Аѓаар, ов заштитинѓа о границе тари јудејско територија (1. Сам. 27:1-12).

⁹ Со шај о терне пхраља те сикљовен таро е Давидескоро пример? Користин и прилика те служине е Јеховаске хем тле пхраленге. Те дикха со случинѓа пе јекхе пхралеске со викинела пе Рикардо. * Панда кеда сине ле околу деш берш, сине ле желба те овел општо пионери. Ама, о старешине вакерѓе кај панда нане спремно. Наместо те овел обесхрабримо хем хољамо, о Рикардо користинѓа о време те џал повише ки служба. Ов вакерела: „Кеда размислинава башо време со накхља, хаљовава кај ваљани сине панда те напредујнав. Посетинава сине секоле јекхе со сикавела сине интерес хем спреминава ман сине баши секоја повторно посета. Чак водинѓум мло прво библиско курси. Кобор повише проповединава сине, добором похари трема сине ман“. О Рикардо акана служинела сар делотворно општо пионери хем сар слуга-помошнико.

10. Со керѓа о Давид ки јекх прилика англедер те анел јекх важно одлука?

¹⁰ Те дикха јекх јавер извештај таро е Давидескоро живото. Кеда гаравела пе сине таро Саул ки филистејско пхув, о Давид хем лескере мануша мукле пумаре фамилиен хем геле те боринен пе. Џикоте о мурша  на сине адатхе, несаве душмања силаја нападинѓе ленгере кхера хем заробинѓе ленгере фамилиен. Адалеске со сине искусно војнико, о Давид шај сине локхесте те мислинел песке кај ов шај те керел јекх шукар плани те шај те спасинел лен. Наместо адава, о Давид родинѓа водство таро Јехова. Преку јекх свештенико, кова со викинела пе сине Авијатар, о Давид пучља е Јехова: „Дали те џав пало акала чора?“ О Јехова вакерѓа е Давидеске те џал хем уверинѓа ле кај ка спасинел е заробеникон (1. Сам. 30:7-10). Со шај те сикљове таро акава настан?

11. Со шај те кере англедер те ане одлуке?

¹¹ Роде совет англедер те ане несаве одлуке. Кер лафи тле родителенцар. Исто аѓаар, шај те добине шукар совет кеда кереа лафи е искусна старешиненцар. Исто сар о Јехова, туте да шај те овел тут доверба ко акала именујме пхраља. О Јехова дикхела лен сар „поклон“ ко собрание (Еф. 4:8). Ту шај те ане шукар одлуке аѓаар со ка овел тут сар ленгири вера хем ка шуне о мудра предлогија со дена тут. Акана те дикха со шај те сикљова таро цари о Аса.

12. Кола особине сине е царе е Аса кеда почминѓа те владинел?

¹² Кеда сине терно, о цари о Аса сине понизно хем храбро. На пример, кеда уло цари пало пло дад о Авија, о Аса почминѓа те цидел о идолија тари адаја пхув. Ов исто аѓаар вакерѓа о народо тари Јуда те роден е Јехова хем те икерен лескоро закони хем лескере заповедија (2. Лет. 14:1-7). Кеда о Зара тари Етиопија хем лескере јекх милиони војникија нападинѓе и Јуда, о Аса постапинѓа мудро адалеа со родинѓа о Јехова те поможинел леске. Ов вакерѓа е Јеховаске: „Јехова, ту шај те поможине хем е силно народоске хем околе народоске сој слабо. Поможин амен, Јехова, амаро Девел, соске иси амен доверба ки туте“. Акала шуже лафија сикавена кај е Аса сине ле бари вера кај о Јехова шај те спасинел пле народо. Е Аса сине ле доверба ко пло небесно Дад хем „о Јехова побединѓа е Етиопјанен“ (2. Лет. 14:8-12).

13. Со случинѓа пе покасно е Асаске, хем соске?

¹³ Бут сине страшно кеда и војска таро јекх милиони војникија але те боринен  пе против лесте, ама адалеске со сине ле доверба ко Јехова о Аса сине успешно. Ама, жално тано адава со кеда сине ле потикно проблеми, о Аса на родинѓа совет таро Јехова. Кеда о лошно цари таро Израел о Васа заканинѓа пе леске, о Аса родинѓа помош таро сириско цари. Адаја одлука анѓа лошна последице! Преку о пророко о Ананиј, о Јехова вакерѓа е Асаске: „Адалеске со сине тут доверба ко сириско цари, а на ко Јехова, тло Девел, и војска таро сириско цари нашља таро тле васта“. Уствари, оттегани о Аса стално сине ки војна (2. Лет. 16:7, 9; 1. Цар. 15:32). Со шај те сикљова?

14. Сар шај те сикаве доверба ко Јехова, хем спрема 1. Тимотеј 4:12, саве резултатија ка анел адава?

¹⁴ Ачхов понизно хем понадари да нека овел тут доверба ко Јехова. Кеда крстинѓан тут, ту сикавѓан кај иси тут бари вера хем доверба ко Јехова. О Јехова сине бут бахтало кеда уљан дело тари лескири фамилија. Акана адава со ваљани ту те кере тано понадари да те овел тут доверба ко Јехова. Шај ка овел туке локхо те овел тут доверба ко Јехова кеда ваљани те ане баре одлуке, ама со ка кере ко јавера ситуацие? Бут тано важно те овел тут доверба ко Јехова кеда анеа одлуке, коте сој вклучими и забава, и бути хем о животна целија. Ма те овел тут доверба ки тли мудрост. Наместо адава, роде библиска начелија кола со ка поможинен туке те ане шукар одлуке хем пало адава постапин спрема ленде (Изр. 3:5, 6). Ако кереа адава, ка кере е Јехова бахтало хем о јавера ко собрание ка поштујнен тут. (Читин 1. Тимотеј 4:12.)

15. Спрема 2. Летописи 18:1-3; 19:2, саве грешке керѓа о цари о Јосафат?

¹⁵ Џанѓола пе, сар сарине ту да сиан несовршено, хем понекогаш ка кере грешке. Сепак, адава на ваљани те спречинел тут те кере са со шај ки служба е Јеховаске. Те дикха о пример таро цари о Јосафат. Ле сине ле бут шуже особине. Кеда почминѓа те владинел „ов родела сине е Девле пле дадескере хем живинела сине спрема лескере заповедија“. Освен адава, ов бичхалѓа кнезија те џан ко дизја ки Јуда те сикавен е манушен башо Јехова (2. Лет. 17:4, 7). Ама, ов понекогаш анѓа лошна одлуке. Сар последице тари јекх лошно одлука о Јосафат сине укоримо таро јекх претставнико е Јеховаскоро.  (Читин 2. Летописи 18:1-3; 19:2.) Со шај те сикљове таро акава извештај?

16. Со шај те сикљове таро е Раџифескоро искуство?

¹⁶ Прифатин хем применин о совет со добинеа ле. Најверојатно, сар буте терне пхраленге, туке да нане локхо и служба е Јеховаске те чхивела ко прво тхан ко тло живото. Ма обесхрабрин тут. Размислин башо искуство јекхе терне пхралескоро кова со викинела пе Раџиф. Кеда размислинела ко пле тинејџерска берша, ов вакерела: „Понекогаш на џанава сине со мангава те керав ко мло живото. Сар повише терне, ме да повише мангава сине о спорт хем и забава него те џав ко состанокија хем ки служба“. Со поможинѓа акале пхралеске? Јекх љубезно старешина денѓа ле совет. О Раџиф вакерела: „Ов поможинѓа манге те размислинав башо начело таро 1. Тимотеј 4:8“. О Раџиф сине понизно, применинѓа о совет хем размислинѓа башо адава сој леске најважно ко лескоро живото. Ов вакерела: „Одлучинѓум те чхивав манге духовна целија ко мло живото“. Кова сине о резултати? О Раџиф вакерела: „Некобор берша покасно, откеда добинѓум адава совет почминѓум те служинав сар слуга-помошнико“.

17. Сар осетинена пе о попхуре пхраља хем пхења кеда дикхена сар о терне служинена е Јеховаске?

¹⁷ О попхуре пхраља хем пхења ценинена е терне пхрален кола со заедно ленцар служинена сложно е Јеховаске (Соф. 3:9). Кеда ола дикхена кај ревно хем воодушевено кереа тли задача, ола тане бахтале хем бут ценинена тут (1. Јов. 2:14).

18. Спрема Изреки 27:11, сар осетинела пе о Јехова кеда дикхела сар служинена леске о терне пхраља?

¹⁸ Терне пхраљален, ма бистрен кај о Јехова мангела тумен хем иси ле доверба ки туменде. Ов вакерѓа кај ко последна диве ка овен бут терне кола со спремно ка нудинен пе (Пс. 110:1-3). Ов џанела кај мангеа ле хем кај мангеа те служине леске најшукар со шај. Адалеске ов стрпливо е јаверенцар, хем ов стрпливо коркори туја. Кеда кереа грешке, прифатин о совет хем о укор, соске адава авела таро Јехова (Евр. 12:6). Ревно кер било која задача со добинеа ла. А сој најважно, кер тло небесно Дад те дичинел пе туја са адалеа со кереа. (Читин Изреки 27:11.)