1. Xeeni ohimyaka wira amiravo anoowerya opaka itthu sinceene mmulokoni?

NYUWO AMIRAVO, sookhala itthu sinceene mukhanle anyu oopaka mmulokoni. Anamunceene a nyuwo mookhalana ikuru ni munniwerya opaka itthu sinceene. (Mir. 20:29) Moohaanyiherya, nyuwo munnaakhaliherya anna ni arokora a muloko anyu. Nave woonasa wene, mwaaniphavela wira mwaathanliwe wira mukhale murumeyi ookhaliherya. Hata vari siiso, nyuwo pooti wuupuwelaka wira akina aniwoonani okhala mwaana, nto anuupuwela wira khamuniphwanelela ovahiwa miritti. Nnaamwi nyuwo muri ene mmiravo, sookhala itthu mukhanle anyu oopaka wira atthu akina yoottittimihekeni ni woororomelani.

2. Mwaha ola, ninrowa othokorerya exeeni?

² Mwaha ola, ninrowa othokorerya ntakiheryo na Mwene Davidi. Nave ninrowa othokorerya itthu vakhaani saamwiiranenle mwene Asa ni Yosafati, yaawo yaalamulela oYuda. Nto wanikisa waya ninrowa othokorerya mixankiho saaphwannye alopwana awo araru, etthu yaapanke aya wira axintte ni etthu ntakiheryo naya ninwiixuttiha aya amiravo.

3. Amiravo anrowa waakhaliherya sai anna ni arokora oowuuluvala a mmulokoni?

³ Okathi aari awe mmiravo, Davidi aahikhalana mikhalelo atthu akina yoona aya okhala sa faita yinceene. Owo aahikhalana waataana wooloka ni Yehova, aaniimananiha wiipa saana nave aanirumeela wiipa iwo wira omukhaliherye mwene Sawuli, yoowo aathanliwe ni Muluku. (1 Sam. 16:16, 23) Niireke nyuwo amiravo yookhala etthu muniwerya anyu opaka wira mwaakhaliherye anna ni arokora a muloko anyu? Anceene a nyuwo mookhalana. Mwa ntakiheryo anna oowuuluvala annooxukhurelani vanceene okathi munaakhaliherya anyu moota woowaarumeela ataableti ni ikaruma  sikina eletroniko okathi anipaka aya yoosoma ya Biibiliya ni okathi wa mithukumano. Tthiri osuwela wanyu orumeela ikaruma iyo eletroniko onnaakhaliherya vanceene anna ni arokora oowuuluvala.

4. Amutakihaka Davidi, mikhalelo xeeni amiravo anireerela aya okhalana? (Nwehe elatarato ya ekaapa.)

⁴ Khula nihiku, Davidi aanooniherya wira aari mutthu oororomeleya. Mwa ntakiheryo, ori ene mmiravo, aaniimananiha okhapelela ipwittipwitthi sa paapa awe. Masi muteko owo khahiyo waari wookhweya, maana muhoolo mwaya ovaanelaka ni Mwene Sawuli, Davidi aahimmye so: “Murumeyi any’ula ànilipelela inama s’atithi awe. Okathi wakhumelelawe kharamu walá havara, anavara epwittipwitthi ya munikotoni mwaka, miyo kanimomola mpakha onvara, khíyammana, khíyamwakha epwittipwitth’iyo mwano mwawe”. (1 Sam. 17:34, 35) Davidi aanisuwela wira aahaana okhapelela ipwittipwitthi iye. Nave moolipa murima, aahiwana ni inama sootakhala wira okhapelele. Nto nyuwo amiravo, munoowerya otthara ntakiheryo na Mwene Davidi nvaraka saana miteko munivahiwa anyu mmulokoni.

5. Moovarihana ni Esalimo 25:14, etthu xeeni yuulupale nyuwo amiravo mukhanle anyu oopaka?

⁵ Hata okathi aari awe mmiravo, Davidi aahikhalana waataana wooloka ni Yehova. Nto Davidi aanivaha efaita yinceene waataana aarina awe ni Yehova ovikana olipa murima, ikuru aahiiso owerya wawe omoopa xittaattha. Nave ohiya paahi okhala Muluku a Davidi, Yehova aari mpatthani awe muulupale. (Musome Esalimo 25:14.) Nto nyuwo amiravo, etthu yuulupale mukhanle anyu oopaka ori olipiha waataana wanyu ni Tiithi anyu a wiirimu, mwiira siiso, munoovahiwa miritti mmulokoni.

6. Miyoonelo xeeni soohiloka atthu akina yaarina aya voohimya sa Davidi?

⁶ Davidi aahikhalana muxankiho mmosa. Atthu akina yuupuwela wira aahitepa oyeva ni khaaphwanelela ovahiwa miritti. Mwa ntakiheryo, okathi aaphavela awe orowa owana ni Goliyathi, Mwene Sawuli aahimukhoottiherya ohimyaka so: “Nyuwo mwanamwané”. (1 Sam. 17:31-33) Wanipacerya, muulupale awe Davidi, aahimootherya wira yena aari mutthu ookhummwa murima. (1 Sam. 17:26-30) Hata vaari siiso, Yehova khaamoona Davidi wira aahitepa oyeva wala khaasuwela etthu maana Yehova aanimusuwela oratteene. Davidi aahiwerya omwiiva Goliyathi mwaha woowi aanimuroromela vanceene Yehova.—1 Sam. 17:45, 48-51.

7. Yowiiraneya ya Davidi eniwiixuttihani exeeni?

⁷ Yowiiraneya ya Davidi enniixuttiha exeeni? Enniixuttiha wira nihaana okhala oopixa murima. Pooti ovira okathi wira ale yoosuwenleni muri ene mwaana yoone wira vano muhinnuwa.  Mukupaliki wira Yehova onniweha itthu sikina murina anyu ohiya paahi mukhalelo wa erutthu anyu, maana yena onnookhapelelani saana ni onnisuwela itthu muniwerya anyu opaka. (1 Sam. 16:7) Tivonto mulipiheke waataana wanyu ni Muluku. Davidi aahiwerya olipiha waataana wawe ni Yehova owehaka itthu opattunxe awe. Maana okathi aaweha awe soopattuxiwa, owo aaniixutta itthu voohimya sa Mpattuxa ahu. (Esal. 8:4, 5; 139:14; aRom. 1:20) Etthu ekina mukhanle anyu oopaka ori omuroromela Yehova wira onimoovahani ikuru wira muxintte mixankiho. Mwa ntakiheryo, niireke ale munisomana anyu oxikola annooveehani mwaha wookhala Namoona a Yehova? Akhala wira ti siiso, munvekeleke Yehova wira ookhaliheryeni ovilela muxankiho owo. Nave yookhala etthu ekina nyuwo munireerela anyu opaka. Etthu ene tiila: Nvariheleke muteko malakiheryo muniphwanya anyu mBiibiliyani, iliivuru sinimutthokiherya Biibiliya ni iviidiyu. Nto vaavo munrowa anyu woonaka wira Yehova onnookhaliheryani ovilela mixankiho, omuroromela wanyu onrowa otepaka wunnuwa. Ohiya-vo, vaavo atthu akina anrowa aya woonaka wira munnimuroromela Yehova awo anoopacerya woororomelani.

8-9. Etthu xeeni yaamukhalihenrye Davidi olipelela moopixa murima mpakha okhalihiwa mwene? Ntakiheryo na Davidi ninwiixuttiha exeeni amiravo?

⁸ Vano nrowe nithokorerye muxankiho mukina Davidi aarina awe. Nuumala othanliwa wira okhale mwene, Davidi aahaana olipelela iyaakha sinceene wira opacerye olamulela oYuda. (1 Sam. 16:13; 2 Sam. 2:3, 4) Nto etthu xeeni yaamukhalihenrye Davidi olipelela moopixa murima okathi owo wotheene? Ohiya oxanka ni okhulumuwa, Davidi aaniimananiha opaka ele aawerya awe. Mwa ntakiheryo, okathi aakhala awe mittetthe sa aFilisti, vaavo aamutthyawa awe Sawuli, Davidi aahirumeela okathi owo wira owane ni awanani a Isarayeli. Mwaha woopaka eyo, Davidi aahikhapelela mikano sa muttetthe wa oYuda.—1 Sam. 27:1-12.

⁹ Ntakiheryo na Davidi ninwiixuttiha exeeni amiravo? Mwiimananiheke opaka sotheene muniwerya anyu wira mwaakhaliheryeke anna ni arokora. Nkahaya nwehe yowiiraneya ya munna oniitthaniwa Ricardo. * Okathi aari awe mmiravo, owo aaniphavela okhala pioneero ookilaatheya. Masi makhalelo awe khiyaamweemererya. Ohiya oxanka ni okhulumuwa, Ricardo aahincererya muteko awe woolaleerya. Ricardo onihimya so: “Kuupuwelaka itthu sikikhumelenle khalai, kihoona wira kaahaana opaka marukunuxo vakhaani voohimya sa muteko aka woolaleerya. Nto kaahipacerya wiimananiha otthikela omuxukurya khula mutthu aaphavela ihapari sooreera ni wiilokiherya oratteene wira kapake irevisita iyo. Mwaha woopaka eyo, kaahipacerya okhalana soosomiha sa Biibiliya. Nave vaavo kaatepa aka olaleerya kaanivukula oxanka ni kaanikela vahoolo”. Olelo-va, Ricardo pioneero ookilaatheya onikhumela saana nave onirumeela ntoko murumeyi ookhaliherya.

10. Okathi omosa etthu xeeni Davidi aapanke awe ohinatthi opaka yoothanla yuulupale?

¹⁰ Vano nrowe nithokorerye etthu ekina yaamwiiranenle Davidi. Okathi Davidi aakhala awe mittetthe sa aFilisti omutthyawaka mwene Sawuli wira ohimwiive, Davidi ni atthu awe yaahaana waahiya axaaraya ni anaaya wira yawane ekhotto. Nlelo ari ene okhottoni, awanani aya yaahirwa anyaanya ipa saya ni waakuxa anaaya ni axaaraya. Okhala wira Davidi aanisuwela owana ekhotto pooti wira aamuupuwela enamuna yoolokexa ya moota wowoopola atthu ale yaakuxiwe ni awanani aya. Masi ohiya opaka eyo, Davidi aahinvekela Yehova malakiheryo. Nto okhaliheriwaka ni mukhulupale a anamukuttho Abiyatari, Davidi aahimukoha Yehova wira: “Katthimakeleke alavilavi ale? Kinimwaphwanya?” Nuumala-vo, Yehova aahimuleela Davidi wira aahaana waatthimakela alavilavi ale ni anwoopola atthu awe otheene. (1 Sam. 30:7-10) Yowiiraneya ela eniwiixuttihani exeeni?

11. Etthu xeeni munireerela anyu opaka muhinatthi opaka yoothanla?

 ¹¹ Muhinatthi opaka yoothanla mwaavekeleke miruku atthu akina. Nyuwo pooti waavekela anamuyari anyu. Nave ovaanela ni axitokweene arina sookumanana sinceene animoovahani miruku sooloka. Yehova, onnaaroromela vanceene axitokweene. Nave, oniphavela wira nyuwo mwaaroromeleke ni murima anyu wotheene. Yehova onnaathokorerya axitokweene awo ntoko “soovaha” sawe mmulokoni. (aEef. 4:8) Tthiri, munoottottela mureerelo otakiha waamini waya ni weettela malakiheryo otheene anoovahaayani. Vano, nrowe nithokorerye etthu nniixutta ahu ni yowiiraneya ya Mwene Asa.

12. Okathi Mwene Asa aapacenrye awe olamulela, mikhalelo xeeni aarina awe?

¹² Okathi aari awe mmiravo, Mwene Asa aari oowiiyeviha ni oolipa murima. Mwa ntakiheryo nuumala paapa awe iihaniwa Abiya okhwa, Asa aahikhalihiwa mwene. Nto moohipisa owo aahipacerya omala-maliha ilatarato sotheene saakokhoreliwa elapo ele. Nave Asa “ahatumererya atthu òYuda wira yaphaveleke Apwiya, Muluku àxitithi aya, ni wira yetteleke ikano ni soruma s’Apwiya”. (2 Wah. 13:23-14:6) Nave okathi Zerahi mwene a wEthiyopia arwiiye awe otuphela oYuda ni anakhotto 1.000.000, mwa miruku Asa aahinvekela Yehova nikhaliheryo ohimyaka wira: “Nyuwo Apwiya! Khavo onwerya owakiha atthu òlosowa mmatatani mw’atthu òwali, muhikhanle nyuwo. Nyuwo Apwiya Muluku ahu, munikhaliherye! Tthiri ti nyuwo ninlipanahu: ni nsina nanyu ti nirwiyahu womola muttitthi ula w’atthu”. Tthiri moolumo ala ooreera a Mwene Asa, annooniherya oratteene wira Asa aanikupali wira Yehova ookhalana owerya ni onniwoopola atthu awe. Okhala wira Asa aanimuroromela Tiithi awe a wiirimu, “Apwiya [Yehova] yahaxintta anakhotto” a wEthiyopia. —2 Wah. 14:7-11.

13. Etthu xeeni yaamukhumelenle Asa ni nthowa xeeni?

¹³ Tthiri nyuwo munnikupali wira waari muxankiho muulupale Asa orowa owana ni anakhotto 1.000.000. Masi okhala wira Asa aahimuroromela Yehova, owo aahixintta ekhotto ele. Mooriipiha murima, okathi mukina Asa aarina awe muxankiho, owo khaamuroromenle Yehova maana khaamukonhe etthu yoopaka. Maana okathi Asa oopopihiwa awe ni Mwene a wIsarayeli iihaniwa Bayexa, Asa aahaavekela nikhaliheryo atthu a wAsiria. Yoothanla ele yoohiloka yaahikumiherya ehasara yuulupale! Omurumeelaka profeta awe iihaniwa Hanani, Yehova aahimuleela Asa wira: “Okhala wira momuroromela mwené  òSiriya, muharoromelaka Apwiya Muluku anyu, anakhotto a mwené òSiriya àtthyawa mmatatani mwanyu”. Tthiri okhuma nihiku nle orowa ohoolo, Asa aamakela owana ekhotto. (2 Wah. 16:7, 9; 1 Mam. 15:32) Nniixutta exeeni?

14. Moovarihana ni 1 Timootheyo 4:12, munrowa wooniherya sai wira munnimuroromela Yehova? Akhala wira munoomuroromela, etthu xeeni enrowa okhumelela?

¹⁴ Mukhaleke oowiiyeviha ni muhihiye omuroromela Yehova. Okathi mwaapatisiwe anyu, mwaahooniherya waamini wuulupale ni omuroromela Yehova. Tthiri moohakalala, Yehova aahoovahani eparakha ya wiirela mpantta emusi awe. Nto vano, etthu mukhanle anyu oopaka, ori ohihiya omuroromela Yehova. Nyuwo pooti woonaka wira vannikhweya omuroromela Yehova vaavo muniphavela anyu opaka yoothanla enrowa oturuka okumi anyu. Masi ankhi soothanla sikina? Ti vooloka omuroromela Yehova vaavo munipaka anyu soothanla. Ohela muhina soothanla voohimya sa matthekulelo, muteko wa mulaponi munrowa anyu ovaraka ni soolukama sanyu sa muhoolo! Nto okathi munipaka anyu soothanla, muhiroromeleke osuwela anyu. Ohiya-vo, muroromeleke malakiheryo a mBiibiliyani wira yookhaliheryeni opaka soothanla ni ovarihela muteko malakiheryo awe. (Mir. 3:5, 6) Mwiira siiso, munoomuhakalaliha Yehova ni munoottittimihiwaka ni atthu akina a mmulokoni.—Mmusome 1 Timootheyo 4:12.

15. Moovarihana ni 2 Wahala 18:1-3; 19:2, etthu xeeni yoohiloka Yosafati aapanke awe?

¹⁵ Okhala wira otheene ahu na anatampi, nto okathi mukina nyuwo pooti opaka itthu soohiloka. Masi, eyo ehookhoottiheryekeni opaka sotheene muniwerya anyu wira nvare muteko wa Yehova. Nkahaya nwehe ntakiheryo na Mwene Yosafati. Owo aahikhalana mikhalelo sinceene sooloka. Okathi aari awe mmiravo, Yosafati “ahaphavela Apwiya, Muluku àxitithi awe, ìwelelaka ikano saya”. Nave owo aahaaruma makhulupale awe orowa mittetthe sotheene sa oYuda wira awiixuttihe atthu ikano sa Yehova. (2 Wah. 17:4, 7) Nnaamwi aapanke itthu iyo sinceene sooloka, okathi mukina Yosafati aahipaka soothanla soohiloka. Nto okhala wira Yosafati aahipaka soothanla iyo soohiloka, owo aahivahiwa miruku ni atthu Yehova aaruma awe. (Mmusome 2 Wahala 18:1-3; 19:2.) Ntakiheryo na Yosafati ninniixuttiha exeeni?

16. Ntakiheryo na Rajeev niwiixuttinheni exeeni?

¹⁶ Mweemereryeke ni nvariheleke muteko malakiheryo munivahiwa anyu. Woonasa wene, ntoko  amiravo anceene nyuwo vannoovilani ohela nipuro noopacerya mookumi mwanyu ovara muteko wa Yehova. Akhala wira ti siiso, muhikhulumuwe. Nkahaya nwehe yowiiraneya ya munna oniihaniwa Rajeev. Olavulaka itthu saamukhumelenle okathi aari awe mmiravo Rajeev onihimya so: “Okathi ole kinoona wira kaahirimeela. Ntoko amiravo akina, etthu yaatepa okisivela yaari axooku ni opaka itthu sikina ohiya orowela mithukumano ni olaleerya”. Etthu xeeni yaamukhalihenrye Rajeev? Mutokweene ooreera murima aahinvaha miruku soovareleya muteko. Rajeev onihimya so: “Mutokweene ole aahikikhaliherya wuupuwelela oratteene malakiheryo ari 1 Timootheyo 4:8”. Nto moowiiyeviha, Rajeev aaheemererya miruku iye aavahiwe awe ni aahivarerya itthu aahela awe nipuro noopacerya mookumini mwawe. Owo onihimya so: “Kaahipacerya ohela nipuro noopacerya mookumini mwaka omurumeela Yehova mwa inamuna soovirikana”. Etthu xeeni yaakhumelenle? Rajeev onitthokiherya so: “Nuuvira iyaakha vakhaani paahi kaahiphwanelela okhala murumeyi ookhaliherya”.

17. Anna oowuuluvala, aniwoonela sai amiravo animurumeela Yehova?

¹⁷ Anna oowuuluvala annihakalala vanceene omurumeela Yehova vamosa ni nyuwo amiravo! (Sof. 3:9) Awo annixukhurela vanceene okhalela wanyu nthiti ni oluttuweliwa ovara saana miteko sotheene munivahiwa anyu mmulokoni. Tthiri awo annoovahani efaita yinceene.—1 Yoh. 2:14.

18. Ntoko onooniherya awe Miruku 27:11, Yehova oniwoonela sai amiravo animurumeela?

¹⁸ Nyuwo amiravo, muhikhala-khale muliyalaka wira Yehova onnoophentani ni onnoororomelani. Owo aahihimya vahinatthi wira mahiku ala ookiserya yaamukhala amiravo anceene ntoko anakhotto, yaarowa wiivahererya vootthuna vaya wira amurumeeleke. (Esal. 110: 1-3) Nave Yehova onnisuwela wira munnimphenta vanceene ni munniphavela omurumeela mpakha vaniwerya anyu. Nto mwaapixeryeke murima atthu akina ni mwiipixeryeke murima mmansinyu. Akhala wira munnivonya, mweemereryeke wiixuttihiwa ni mweemereryeke malakiheryo munivahiwa anyu. Musuweleke wira malakiheryo awo anikhuma wa Yehova. (aHeeb. 12:6) Nto mwiimananiheke ovara saana miteko sotheene munivahiwa anyu, otepexa wene, itthu sotheene munipaka anyu, mpakeke wira mmuhakalalihe Tiithi inyu a wiirimu.—Musome Miruku 27:11.