1-2. Éé ní ea náa vaá àé láá valí kọ é nyoone nvéè ká tọọ̀ Jíízọ̀s e? Nè nu dòòmà bá.

NI DOOMÀ dẽe ló kọọ̀ ò di zẹ̀ẹ̀ gbò e bà gé kyãà tení boo kpáà bàlà ól e gbò nuù gẹẹ-gẹẹ ló nè gbá dì. Nen ea palàge nyimá deè gé túlèi. Ò monìì a ká tọ gbàà gbáa buù kiẽ́e ea gé kyãà tení. À gbóó ié tṍó e nen ea géè tulèiá kyãà iná kpã́á naa ní e nóo monnàì ẽ! Sõò pọ̀ náa síí ni boo béè kọọ̀ ólò nè gbò eo gé gbái kyãaniiá láà palàge monii ká tọọ̀ nen ea géè tulèiá naa ní eo láá biilííe tọ́ nvée!

² Pọ́lọ́ bàlà booí belí kpáà bàlà ól ea fáálá gã́bug nuù gẹẹ-gẹẹ lóá, vaá gbò e bà gé nyoone nvéè Kráìst belí gbò e bà gé kyãà tení boo kpáà bàlà ólá. Nyíéi palàge ẹẹ kọọ̀ Jìhóvà néi a Sã́áná Jíízọ̀s Kráìst ea dú bẹẹ Neǹ Tulè eé láá nyoone nvéè a ká tọ. (1 Pít. 2:21) Ene kà kpá ea ólò baatẽ́ nu e Kpá Káí kọ́ọ̀ Pítà tú Jíízọ̀s doolé ló neǹ tùle. Dì belí bé e nen ólò láá bii tọ́ nvéè ká tọọ̀ a neǹ tùle naaá, níà bé e beele é láá nyoone nvéè nu dòòmà bá e Jíízọ̀s beè gbẹẹ́ kẽ sẹ̀ẹ̀i naa ẽ́. Naanii èé áálá taà kà bíb ea kil ló gè nyoone nvéè a ká tọ ea dú: Éé ní ea kọlà ge nyoone nvéè a ká tọ ẹ́? Éé ní ea náa vaá èé nyoone nvéè a ká tọ ẹ́? Nè mósĩ́ deè ní eé láá nyoone nvéè a ká tọ ẹ́?

3. Éé ní ea kọlà ge nyoone nvéè ká tọọ̀ nen ẽ́?

³ Éé ní ea kọlà ge nyoone nvéè ká tọọ̀ nen ẽ́? Sìgà tṍó mm̀ Kpá Káí, à ólò dú gè tú moǹ bel ea kọlà “kyã̀à” nè “ká tọ” bààmà tẽ́ bé e nen tõó dùm naa. (Jén. 6:9; Pró. 4:26) Bàé láá tú bé e nen tõó dùm naa doolé ló ká tọ ea gbẹẹ́ kẽ tṍó ea kyãà. Vóà naa, ge nyoone nvéè ká tọọ̀ nen tõó dọ̀ ge nó a nu dòòmà bá nè bé ea beè tõó dùm naa.

4. Éé ní ea kọlà ge nyoone nvéè ká tọọ̀ Jíízọ̀s e?

 ⁴ Éé ní ea kọlà ge nyoone nvéè ká tọọ̀ Jíízọ̀s e? À tõó dọ̀ ge nó a nu dòòmà bá. Mm̀ dọ̀ Kpá Káí e togó belí aà, neǹ tóm Pítà beè ló bel boo gbò lé nu dòòmà bá Jíízọ̀s ea kil ló gè ĩ̀ìmà kèbá tã̀àgã̀; sõò, à íe gã́bug nú eé láá nó lọl ló Jíízọ̀s. (1 Pít. 2:18-25) Èé láá nó nu lọl ló kọ̀láá kà nu e Jíízọ̀s beè kọ̀ vaá naa.

5. É kọọ̀ gbò nen e bà náa gbõoma é láá nyoone nvéè nu dòòmà bá Jíízọ̀s ea gbõoma? Baatẽ́.

⁵ Dì belí gbò e bè née gbõomà, é kọọ̀ èé láá nó nu dòòmà bá Jíízọ̀s? Ẽei, èé láá naa vó. Kẽ̀èa boo kọọ̀ Pítà beè sièi kpóó ló kọ é ‘nyoone nvéè ká tọọ̀ [Jíízọ̀s],’ vaá níí náa tõó dọ̀ kọọ̀ èé íè ge naa gbõ̀ònà nú e ẹlẹ beè naa. Be à gá náa è pììgà bé e bẹẹ kpóó sim tùlà naa gè nyoone nvéè a ká tọ, àé gbóó dú kọọ̀ è gé gban tṍ ló bel e neǹ tóm Jọ́ọ̀n beè kọ̀a, kọọ̀: “Tõo dùm e ẹlẹ, Jíìzọ̀s Kráìst, beè tõo.”—1 Jọ́ọ̀n 2:6.

6-7. Éé ní ea náa vaá èé láá kọọ̀ ge nyoone nvéè ká tọọ̀ Jíízọ̀s é náa kọ é kpáá palàge tõo bã ló Jìhóvà ẹ?

⁶ Ge nyoone nvéè ká tọọ̀ Jíízọ̀s é náa kọ é kpáá tõo bã ló Jìhóvà. Éé ní ea náa vaá èé láá kọ́ vó é? Túá kà, gbò nu dòòmà bá Jíízọ̀s noòmài bé eé láá tõó dùm ea léémá Jìhóvà naa. (Jọ́ọ̀n 8:29) Tení dú ló gè nyoone nvéè ká tọọ̀ Jíízọ̀s, èé náa nú ea é léémá Jìhóvà. Vaá è nyímà kọọ̀ Jìhóvà é tõo bã ló kọ̀láá nen ea gé piigà bé ea kpóó sim tùlà naa ge dú a kóò.—Jém̀z 4:8.

⁷ Ní ea égè bàà kà, Jíízọ̀s beè nó a Tẹ̀ mm̀ sĩ́deè ea gbõoma. Níà nú ea náa vaá Jíízọ̀s beè láá kọọ̀: “Nen e a ni mon nda a mon Tẹ̀” ẹ. (Jọ́ọ̀n 14:9) Tṍó e nóò gbò kpãà Jíízọ̀s nè bá ea beè sẹ̀ẹ̀mà gbò nen —dì belí nu dòòmà bá, bé ea beè ié sàn nyíé ló nen e kom̀ kulè beè di ló naa, bé ea beè ié tọa ló kilma ló ene kà ńnváá  e kpá lóe géè palàge zọ̀ naa, nè bé ea beè ié tóè sàn kilma ló gbò e nen ú ló naa—è gé nó nágé Jìhóvà. (Máàk 1:40, 41; 5:25-34; Jọ́ọ̀n 11:33-35) Bé e nóò gè láá ié gbò kpãà Jìhóvà naa, níà bé eé kpáá palàge tõo bã̀é ló naa ẽ́.

8. Baatẽ́ nú ea náa vaá gè nyoone nvéè ká tọọ̀ Jíízọ̀s é náa kọ é bé bàlà booí “èl bá.”

⁸ Ge nyoone nvéè ká tọọ̀ Jíízọ̀s é náa kọọ̀ gbò nú ea di mm̀ bàlà booí á gá òòmài lọl ló gè sí tóm nè Jìhóvà. Jíízọ̀s beè kọ́ kà lèlà bílá deè deé ea zilà dú deé e bà fẹ́ẹá kọọ̀: “Nda beè bé bàlà boo èl bá.” (Jọ́ọ̀n 16:33) Níà ge kọọ̀, náa beè sọ̀tọ́ deè kọọ̀ bé e pá bàlà boo ólò bugi togó naa, gbò nú e bà sẹẹ̀a sĩ́, nè ba láb á lẹ̀ẹ̀là bel ló bé ea é lábví láb vaá bugi togó boo nu naa. Jíízọ̀s náa beè sọ̀tọ́ deè kọọ̀ tọ́ọ̀ nu á maanàè a bùlà lọl ló nú ea náa vaá a beè dú boo kunukẽ̀í—ea dú gè õ̀ònà béè Jìhóvà lọl kèbá gbẹ́a. Vaá beéle à? Gã́bug nú ea é láá maanái bùlà lọl ló gè sí tóm nè Jìhóvà di mm̀ bàlà booí. Be è ká bùlà gbẹẹ́ boo gè naa bùlà Jìhóvà dì belí Jíízọ̀s, beéle é láá “bé bàlà boo èl bá.”—1 Jọ́ọ̀n 5:5.

9. Éé ní ea bọ́ló kọ é naa kọbé è íe dùm e bè náa tá ẹ́?

⁹ Ge nyoone nvéè ká tọọ̀ Jíízọ̀s é náa kọ é ié dùm e bè náa tá. Tṍó e ene kà neǹ méné beè bĩiná nú ea é náa kọbé à láá ièè dùm e bè náa tá, Jíízọ̀s beè aalá nèe kọọ̀: “Dù gé nyooném̄ nvée.” (Máát. 19:16-21) Jíízọ̀s beè kọ́ nè sìgà pá Júù e bà náa beè zìgà kọọ̀ ẹlẹ ní ea dú Kráìste kọọ̀: “Nà naanà ból . . . ólò nyooném̄ nvée. M̀ é néva dùm e bè náa tá.” (Jọ́ọ̀n 10:24-29) Jíízọ̀s beè kọ́ nè Nicodemus ea dú ene nen zẹ̀ẹ̀ gbò dóm bèèla pá Júù ea beè ié lèèmá mm̀ bel ea géè kọ̀, kọọ̀, “kọ̀láá nen e a [dẹlẹ́m] nyíe boo” é “íe dùm e bè náa tá.” (Jọ́ọ̀n 3:16) È zógè kọọ̀ è dẹlẹ̀ẹ̀ nyíé boo Jíízọ̀s tení dú ló gè tú gbò nú ea kọ́ siimá tóm vaá nó gbò a nu dòòmà bá. Be è náa vó, èé íe dùm e bè náa tá.—Máát. 7:14.

10. Éé ní ea bãàa mm̀ “ge nyimá ló” Jíízọ̀s leevè e? (Jọ́ọ̀n 17:3)

¹⁰ Kọbé è láá nyoone nvéè ká tọọ̀ Jíízọ̀s, èé íè ge zẹ́ẹ́ nyimáe ló. (Bugi Jọ́ọ̀n 17:3.) “Ge nyimá ló” Jíízọ̀s dú nú e nen é ólòó kilsĩ́ gè naa. Kọbé è láá nyimáe ló, èé íè ge kilsĩ́ gè olòó nó nú ea kil ló gbò a kpãa, bé ea ólò bugi togó naa, nè gbò a nòòkúu. Èé íè ge kilsĩ́ ge nyimá ló Jìhóvà nè a Sã́áná kọ̀láá bé e ni tú gã́bug gbáá diima mm̀ kà kàí naa.

11. Éé ní ea di mm̀ ténì kà kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s e?

¹¹ Kọbé è láá nyimá ló a Sã́áná leevè, Jìhóvà beè naa kọ bàá emí nú ea kilíé ló mm̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s (ea dú Máátìù,  Máàk, Lúùk, nè Jọ́ọ̀n). Gbò kpáí nootẽ́ bé e Jíízọ̀s beè tõó dùm naa nè nú ea kil ló a sìtóm kọ̀ kpẹ̀a. Gbò kpáí nootẽ́ gbò nú e Jíízọ̀s beè kọ̀, gbò nú ea beè naa, nè bé e nu beè toáẹ́ ló naa. Ténì kà kpáí náa kọ é “[bugi] togó” boo gbò nu dòòmà bá Jíízọ̀s. (Híb. 12:3) È gé kọ́ọ̀, ténì kà kpáí kọ́ nú ea kil ló ká tọ e Jíízọ̀s beè gbẹẹ́ kẽ sẹ̀ẹ̀i. Ge nó gbò kpáí é náa kọ é kpáá palàge nyimá ló Jíízọ̀s leevè. Vó é gbóó naa kọọ̀ é láá nyoone nvéè a ká tọ.

12. Éé ní eé náa kọbé gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s láá palàge dọ̀ bélè nèi ẽ́?

¹² Kọbé gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s láá palàge dọ̀ bélè nèi, èé náa èlmà pọ́ì ge bugi. Èé noo tṍó nyòòmà ge bugi vaá palàge bugi togó boo gbò nú e nóò. (Doolé ló Jóshùà 1:8, émì nú ea di kè kẽ.) Naanii èé ló bel boo bàà kà lọ̀ọ̀gà bùlà ea é láá nvèè bá nèi kọ é bugi togó boo nú e nóò lọl mm̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s nè bé eé láá tú gbò nu e bugi siimá tóm naa.

13. Mósĩ́ deè ní eo é láá dòòmà dẽe ló nú eo gé bugi mm̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s e?

¹³ Túá kà, dòòmà dẽe ló nú eo gé bugi mm̀ gbò kpáí. Dòòmà dẽe ló kọ ò gé monìè, dãè, vaá nú ea gé naaá tọàẹ ní ló. Ge gbĩ́tẽ́ ló nu lọl mm̀ gbò kpá e bõ̀ònatõ̀ò Jìhóvà ni émí é nveè bá nè ni kọ ó láá naa vó. Bugi togó boo gbò nú ea géè naaá tṍóá—ea dú gbò nú ea beè naaá besĩ́ nú eo gé bugiá à kálá naaá nè gbò nú ea nááá tṍó e nú eo gé bugiá ni nááá lọ̀l. Gbĩ́tẽ́ ló nu ea kil ló gbò e bà kólí béè nè kiẽ́e bà kólí béè mm̀ nòòtẽ́ eo gé bugi. Tú nú eo bugì mm̀ ene kà kpá ea di zẹ̀ẹ̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s doolé ló nú e dõòna kà kpá ea di zẹ̀ẹ̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s kọ́ kilma ló togó belá. Sìgà tṍó, nen ea beè emí ene kà kpá ea di zẹ̀ẹ̀ gbò kpáí é láá emí nú ea palàge dú bíi e nen ea beè emí dõòna kà kpá ea di zẹ̀ẹ̀ gbò kpáí náa émí.

14-15. Mósĩ́ deè ní eé láá tú gbò nú e bugi mm̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s siimá tóm mm̀ bẹẹ dùm ẽ?

 ¹⁴ Ní ea égè bàà kà, tú gbò nú eo bugì mm̀ gbò kpáí siimá tóm mm̀ o dùm. (Jọ́ọ̀n 13:17) Tṍó eo ni bugi ene kà nòòtẽ́ ea di mm̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s lọ̀l, bĩiná o bá kọọ̀: ‘É kọọ̀ à ié nú ea di mm̀ nòòtẽ́ em bugìí em é láá tú siimá tóm mm̀ nà dùm? Mósĩ́ deè ní em é láá tú nòòtẽ́ em bugìí nvèèmà bá nè dõòna nen ẽ?’ Bugi togó boo nen eo é láá tú nu eo géè bugiá nvèèmà bá nè, vaá tṍó ea bọ́ló, ò gbóó tú bá kalì kọọmá gbò nú eo nóò lọl mm̀ nòòtẽ́á nèe.

¹⁵ Naanii èé ló bel boo nu dòòmà bá ea kil ló bé eé láá tú bàà kà lọ̀ọ̀gà bugí siimá tóm naa. Èé ló bel boo nòòtẽ́ ea kil ló vaà tãa e Jíízọ̀s beè mòn gbẹá tọọ̀ káíá.

16. Baatẽ́ nú ea géè naaá mm̀ kpá Máàk 12:41.

¹⁶ Dòòmà dẽe ló nú ea beè naaá. (Bugi Máàk 12:41.) Dòòmà dẽe ló bé e nu beè naaá naa. Aẹ̀ bèè Nisan 11, 33 C.E.—naamá pọ́ì ńkem̀ dee aa ló deé e bàé gé fẹ́ Jíízọ̀s. Jíízọ̀s á tú gã́bug dee tõomá mm̀ tọọ̀ káí vaá noòmà nuù gbò nen. Sõò gbò tùle tọ Bàrì pá Júù beè olòó naa uúé boo. Pọ́ì ńkem̀ tṍó besĩ́ à kálá dọ̀ tṍóá, sìgà gbò beè bĩináe nen e kpóó ea gé tú siimá tóm aa bá. Dõòna gbò à bĩináe gbò bíb e bà túúmá kọọ̀ náa gé láá aalá. (Máàk 11:27-33; 12:13-34) Kátogóí, Jíízọ̀s di dõòna ketõ̀ò ea di ló tọọ̀ káíá. Àé láá dú gè kọọ̀ a beè di ĩ́ìtẽ́ kiẽ́e ea kọlà Kiẽ́e Gbò Pábia Ólò Bõoná, vaá a géè mòn nú e bà ólò tẹlẹ kpègè m. A beè ĩìtẽ́ kẽ vaá ẹ̀b gbò e bà gé tẹ́lẹ̀gì kpègè. A beè mòn gbò méné e bà gé tẹ́lẹ̀ gã́bug kpègè. Be à sẹlẹ náa beè di kpã́á aa ló nú e bà ólò tẹlẹ kpègè m naa ní ea dã́ moǹ kpègè ea gé dó kètẽ́ nu e bà ólò tẹlẹ̀ kpègè m-má.

17. Éé ní e vaà tãa e kpá Máàk 12:42 kọ́ nú ea kil lóá beè naa ẽ́.

¹⁷ Bugi Máàk 12:42. Pọ́ì ńkem̀ tṍó aa ló tṍóá, Jíízọ̀s beè mòn ene kà ńnváá. Ńnvááá beè “sàn vaà tãa.” (Lúùk 21:2) Nu beè palàge tàvàlàẹ́ ló; vaá náa íe kpègè ge zalmá gbò nú ea dúe bíi ló mm̀ dùm. Sõò, a beè kyã̀à bã ló nu gè tẹlẹ̀ kpègè m-má vaá tú bàà kà sọ́gọ́ kpègè tẹlẹ m, vaá àé láá dú kọọ̀ bàà kà sọ́gọ́ kpègèá náa beè bọọgẹ̀ sẹlẹ mon tṍó ea tẹ́lẹ m. Jíízọ̀s beè nyimá kọọ̀ bàà kà sọ́gọ́ kpègè ní ea tẹ́lẹ m ẽ́, vaá kpègèá ní ea kil kẽ lọ̀l vaá a lee tṍóá ẽ́. Nen náa é láá tú kpègèá zalmá ene kà ńgá kṍò, ea dú ńnóm ea di zẹ̀ẹ̀ gbó ńnóm e náa ólò sí kpègè.

18. Dẹ̀ẹ̀a boo nú ea di mm̀ kpá Máàk 12:43, 44, éé ní e Jíízọ̀s beè kọ́ kilma ló kpègè e vaà tãaá beè tẹlẹ̀ ẹ?

¹⁸ Bugi Máàk 12:43, 44. Nú e vaà tãaí beè naa beè palàge tọá ló Jíízọ̀s. Vó beè naa kọ́ á kólí gbò e bà ólò nyoonée nvée vaá kọ́ nú ea kil ló vaà tãaá nè va kọọ̀: “Nu e sàn vaà tãaí tẹ́lẹ̀ bọọ èl ní e dénè nen beè tẹlẹ̀gì.” À gbóó baatẽ́ nèva kọọ̀: “Dénè na gbòa [naamá gbò méné] tẹ́lẹ̀ lọl dẽè gbele tõ̀ò kpègè e bà íe. Sõò vaà tãaí, náa kal ló bée kọ a dì tõ̀ò kilí kẽ, a tẹ́lẹ̀ kọ̀láá nu e a beè dìé bá e a gá è beè tõ̀òma dùm.” Ge kọọ̀ vaà tãaí tẹ́lẹ̀ dénè kpègè ea beè dìé bá zógè kọọ̀ a beè dẹlẹ nyíé boo kọọ̀ Jìhóvà é ẹb nú ea kilìèé ló.—Ps. 26:3.

19. Mókà pọ̀bkà nu ní eé láá nó lọl ló gbò bel e Jíízọ̀s beè kọ́ kilma ló vaà tãaá ẽ́?

¹⁹ Tú nú eo bugi siimá tóm mm̀ o dùm. Bĩiná o bá kọọ̀, ‘Éé ní em é láá nó lọl ló gbò bel e Jíízọ̀s kọ́ kilma ló vaà tãaá ẽ́?’ Bugi togó boo dìtõ̀ò vaà tãaá. Tọ́ọ̀ kà bàà-bàà bùlà á gé ló kọọ̀ a beè ẹ̀bmà dẽe gè tú nú ea èlvó nè Jìhóvà. Sõò, a beè nè  Jìhóvà dénè nú e báẹ sim tùlà. Vaá Jíízọ̀s beè nyimá kọọ̀ a Tẹ̀ nveè ka ló dõ̀ònùá. Nee nú e beéle é nọ́ lọl lóí: Nyíè Jìhóvà ólò ẹẹ tṍó e neèe nú e báí sim tùlà—ea dú tṍó e sii tóm nèe lọa nyíé. (Máát. 22:37; Kọ́l. 3:23) Nyíè Jìhóvà ólò ẹẹ tṍó ea mon kọọ̀ è gé piigà bé e bẹẹ kpóó sim tùlà naa! Nakà nòòkúuí é síá nágé tóm nyòòmà gã́bug tṍó e nveè mm̀ ge nèèmàe fã̀, nè gã́bug tṍó e kọ́ọ̀mà kpẹ̀a vaá siimá nònù.

20. Mósĩ́ deè ní eo é láá tú nú eo nóò lọl ló nòòtẽ́ ea kil ló vaà tãaá nvèèmà bá nè dõòna gbò e? Nè nu dòòmà bá.

²⁰ Mósĩ́ deè ní eo é láá tú nòòtẽ́ ea kil ló vaà tãaá siimá tóm mm̀ o dùm ẽ? Bugi togó boo gbò e ba íe bíi ló gè àgala boo kọọ̀ Jìhóvà nveè ka ló gbò tóm e bà gé sí. Dì belí nu dòòmà bá, é kọọ̀ ò nyímà ló ene kà vígà pábia ea ni dú kànen mm̀ dee e zọ̀ ló a náa kọ á gá láá tú gã́bug tṍó kọọmá kpẹ̀a belí bé ea beè olòó naa naa? Àbèè kọọ̀ ò nyímà ló ene kà vígà págbálà ea ni dú kànen mm̀ dee e kpá lóe gé palàge zọ̀ vaá lóóe ọọ boo béè kọọ̀ náa láà si ná dénè nònù belí bé ea beè olòó sí naa? Nvèè bá nè íb gbò e bà dì naa vó tení dú ló gè ló ‘bel ea é nveè bá nè va vaá tìbva.’ (Ẹ́fẹ. 4:29) Ló gbò bel sìà kpóó ló eo nóò lọl ló nòòtẽ́ ea kil ló vaà tãaá nèva. O bel sìà kpóó ló é láá naa kọ bàá kẽ̀èa boo kọọ̀ nyíè Jìhóvà ólò ẹẹ tṍó e piigà bé e bẹẹ kpóó sim tùlà naa. (Pró. 15:23; 1 Tẹ̀s. 5:11) Kọ̀láá tṍó eo leèlà gbò nen ló bé e bà gé piigà bé e ba kpóó sim tùlà naa, kọ̀láá bé e nú e bà náa dú ńkem̀ naa, ò gé nyoone nvéè ká tọọ̀ Jíízọ̀s.

21. Éé ní eo béèlàfùl ge naa ẽ́?

²¹ Ẹ̀b bé ea ẹ́ẹ̀lẹ̀i nyíé naa gè nyimá kọọ̀ gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s kọ́ gã́bug nú ea kil ló bé e Jíízọ̀s beè tõó dùm naa ea náa kọ á válíí ló gè nóe vaá nyoone nvéè a ká tọ naaà! É kọọ̀ òó láá noo gè nó nu ea kil lo gbò kpá ea kọ́ nú ea kil ló dùm nè sìtóm kọ̀ kpẹ̀a Jíízọ̀s boo o lóó àbèè tṍó eo íèì fã̀ pá tọ? Á gá táí nyíé kọọ̀, kọbé nú e gé nó láá palàge dọ̀ bélè nèi, àé dú bíi kọ é dòòmà dẽe ló nú ea beè naaá vaá tú nú e bugì siimá tóm mm̀ bẹẹ dùm. Gbá ló gè nó gbò nú e Jíízòs beè naa, àé bọ́ló kọ é gbàn tṍ ló nú ea kọ́. Mm̀ togó bel ge nò ea bẽene níí, èé ló bel boo gbò nú eé láá nó lọl ló gbò dee deè nvéè bel e Jíízọ̀s beè lò besĩ́ à kálá ù.