1-2. Piav seb peb yuav ua li cas peb thiaj taug tau Yexus tus hneev taw.

XAV TIAS koj nrog ib pab neeg taug kev hauv ib lub hav zoov nuj txeeg muaj daus dawb paug thiab txaus ntshai heev. Tiamsis muaj ib tug neeg uas paub lub hav zoov no zoo heev ua nej ntej coj kev. Muaj tej thaum, nws ua nej ntej deb dhau lawm ces nej tsis pom nws lawm. Tiamsis nej yeej tsis ntshai vim nej paub tias yog nej ua tib zoo taug raws nws tus hneev taw ces nej yeej yuav tsis poob zoo.

² Lub ntiajteb uas muaj kev phem kev qias peb nyob tamsim no zoo ib yam li lub hav zoov nuj txeeg uas txaus ntshai heev rau cov tseem Khixatia. Tiamsis peb zoo siab heev uas Yehauvas cia nws Leej Tub Yexus los coj peb kev thiab tseg nws tus hneev taw rau peb taug. (1 Petus 2:21, TT ) Muaj ib phau ntawv uas hais txog phau Vajlugkub hais tias: “Tos Petus muab Yexus piv rau tus neeg coj kev los yog vim nws tseg nws tus hneev taw rau peb taug.” Hauv zaj no peb yuav tham seb taug Yexus tus hneev taw yog li cas tiag? Vim li cas peb thiaj li yuav tsum taug Yexus tus hneev taw? Thiab peb yuav taug nws tus hneev taw li cas?

3. Thaum peb taug ib tug neeg tus hneev taw yog peb ua dabtsi?

³ Thaum ib tug neeg ua nws lub neej ces zoo li nws taug ib txojkev, nws tso tau nws tus qauv lossis tus hneev taw tseg. Thaum peb taug ib tug neeg tus hneev taw ces yog peb  xyaum ua peb lub neej li nws ua.​—Chivkeeb 6:9, 10; Pajlug 4:26.

4. Thaum peb taug Yexus tus hneev taw yog peb ua dabtsi?

⁴ Ib yam li ntawd, thaum peb taug Yexus tus hneev taw ces twb yog peb xyaum Yexus tus qauv. Nqi Vajlugkub rau zaj kawm no, Petus txhawb kom peb xyaum ua siab ntev thev kev tsim txom li Yexus. (1 Petus 2:18-25) Tiamsis tsis yog tag li ntawd xwb, tag nrho Yexus lub neej, tej nws hais thiab tej nws ua puav leej zoo rau peb xyaum.

5. Piav seb vim li cas peb yeej xyaum tau Yexus tus qauv txawm hais tias peb yog neeg zoo tsis tiav.

⁵ Peb yog neeg zoo tsis tiav, yog li ntawd peb puas yuav xyaum tau Yexus tus qauv? Peb yeej xyaum tau. Txawm peb taug tsis tau Yexus tus hneev taw zoo ib yam kiag li nws los yog peb ua zoo taug ces peb yeej yuav ua tau peb “lub neej kom zoo li Yexus Khetos lub” li Yauhas hais.​—1 Yauhas 2:6.

6-7. Vim li cas thaum peb xyaum Yexus tus qauv, peb txojkev sib raug zoo nrog Yehauvas thiaj ruaj khov tuaj?

⁶ Thaum peb taug Yexus tus hneev taw, peb yuav muaj kev sib raug zoo nrog Yehauvas dua. Vim li cas thiaj hais li ntawd? Qhov 1, Yexus ua nws lub neej raws li Yehauvas lub siab nyiam nkaus xwb. (Yauhas 8:29) Ces yog peb xyaum Yexus tus qauv, peb yuav paub ua haum Yehauvas siab thiab Yehauvas yuav nyob ze peb thiab ua peb tus phoojywg.​—Yakaunpaus 4:8.

⁷ Qhov 2, Yexus coj ib yam nkaus li nws Txiv Yehauvas, Yexus thiaj hais tias: “Tus uas pom kuv, tus ntawd twb pom Leej Txiv lawm.” (Yauhas 14:9) Yexus hlub tshua tibneeg kawg li. Nws hlub tus txivneej mob ruas, nws hlub tus pojniam uas muaj ib tug mob loj, thiab nws hlub cov uas quaj ntsuag vim muaj cov uas lawv hlub tas sim neej  lawm. Thaum peb xyaum hlub lwm leej lwm tus li Yexus ces twb cuag li peb xyaum Yehauvas lawm thiab. (Malakaus 1:40, 41; 5:25-34; Yauhas 11:33-35) Thaum peb xyaum coj li Yehauvas ces peb txojkev sib raug zoo nrog nws yuav ruaj khov tuaj.

8. Vim li cas thaum peb taug Yexus tus hneev taw yuav pab peb ‘kov yeej’ lub qab ntuj no?

⁸ Thaum peb taug Yexus tus hneev taw, peb yuav tsis cia lub qab ntuj no los cuam tshuam peb txojkev teev tiam Yehauvas. Hmo uas Yexus yuav raug luag tua, nws hais tias: ‘Kuv twb kov yeej lub ntiajteb no lawm.’ (Yauhas 16:33) Nws hais li ntawd vim nws tsis kam ua li cov neeg hauv lub qab ntuj no ua thiab nws tsis cia lawv hloov tau nws txojkev xav. Nws rau siab ntso ua nws tes haujlwm kom sawvdaws paub tias Yehauvas yog tus dawb huv thiab muaj cai kav noob neej. Lub qab ntuj no muaj ntau tsav ntau yam ua kom peb tsis txhob teev tiam Yehauvas tiamsis yog peb kub siab lug ua li Yehauvas hais ces peb yeej yuav ‘kov yeej’ lub qab ntuj ib yam li Yexus.​—1 Yauhas 5:5.

9. Yuav ua li cas peb thiaj li tau txojsia ntev dhawv mus ib txhis?

⁹ Yog peb taug Yexus tus hneev taw ces peb yuav tau txojsia ntev dhawv mus ib txhis. Thaum tus tub hluas nplua nuj nug tias yuav ua li cas nws thiaj tau txojsia mus ib txhis, Yexus hais rau nws tias kom nws los ua Yexus ib tug thwjtim. (Mathais 19:16-21) Thaum ib co neeg Yudas tsis ntseeg tias Yexus yog tus Khetos, nws hais rau lawv tias: “Kuv pab yaj . . . raws kuv qab. Kuv muab txojsia ntev dhawv mus ibtxhis rau lawv.” (Yauhas 10:24-29) Thiab thaum Nikaudemaus uas yog ib tug Falixais thiab ib tug thawj coj xav paub txog Yexus ntxiv, Yexus hais rau nws tias: ‘Tus uas ntseeg Leej Tub yuav tau txojsia ntev dhawv mus ibtxhis.’ (Yauhas 3:16) Yog peb ntseeg Yexus es ua li tej nws qhia thiab xyaum nws tus qauv ces peb thiaj yuav tau txojsia ntev dhawv mus ib txhis.​—Mathais 7:14.

10. Yuav kom peb paub Yehauvas thiab Yexus nkawd zoo zuj zus ntxiv, peb yuav tau ua dabtsi? (Yauhas 17:3)

¹⁰ Yuav kom peb taug tau Yexus tus hneev taw, peb yuav tsum paub nws zoo. (Nyeem Yauhas 17:3.) Yog li ntawd, peb yuav tsum niaj hnub kawm txog nws peb thiaj paub nws tus yam ntxwv, nws txojkev xav, thiab tej uas tseem ceeb rau nws. Txawm peb twb paub qhov tseeb ntev npaum li cas lawm los, peb yuav tsum rau siab ntso kawm kom peb paub Yehauvas thiab Yexus nkawd zoo zuj zus ntxiv.

11. Yehauvas muab dabtsi sau cia hauv phau Mathais, Malakaus, Lukas, thiab Yauhas?

¹¹ Yehauvas muab Yexus lub neej thiab Yexus tes haujlwm tshaj tawm sau cia hauv  phau Mathais, Malakaus, Lukas, thiab Yauhas. Plaub phau no qhia peb txog Yexus tus cwj pwm, nws txojkev xav, thiab tej nws ua thiab txhawb kom peb “nco ntsoov” txog Yexus cov qauv uas nws tso tseg rau peb xyaum. (Henplais 12:3) Thaum peb ua zoo kawm 4 phau no yuav pab kom peb paub Yexus zoo zuj zus ntxiv thiab pab kom peb paub taug Yexus tus hneev taw.

12. Peb yuav kawm phau Mathais, Malakaus, Lukas, thiab Yauhas li cas, 4 phau no thiaj yuav pab tau peb?

¹² Thaum peb nyeem phau Mathais, Malakaus, Lukas, thiab Yauhas, peb yuav tsum muab coj los ua tib zoo kawm thiab ua tib zoo xav thiaj li yuav pab tau peb. Peb tsis txhob lam nyeem kom tag xwb. (Muab piv rau Yausuas 1:8.) Cia peb mus tham txog 2 yam uas yuav pab kom peb ua tau li no thaum peb nyeem 4 phau no.

13. Koj yuav ua li cas zaj koj nyeem hauv phau Mathais, Malakaus, Lukas, thiab Yauhas thiaj li muaj tiag rau koj?

¹³ Yam 1, thaum koj nyeem phau Mathais, Malakaus, Lukas, thiab Yauhas xav tias koj yog ib tug uas nyob ntawd thiab. Ua tib zoo xav seb yog koj nyob ntawd no koj pom dabtsi thiab hnov dabtsi. Thaum koj mus tshawb nrhiav hauv peb tej ntaub ntawv Vajlugkub txog qhov uas koj nyeem ces yuav pab koj ua tau li ntawd. Tshawb nrhiav seb cov neeg nyob lub caij ntawd zoo li cas thiab tej liaj ia tebchaws zoo li cas. Ua zoo xyuas seb muaj dabtsi tshwm sim ua ntej thiab tom qab qhov uas koj tab tom nyeem. Mus nyeem seb lwm phau ho hais li cas txog tib qho ntawd rau qhov muaj tej yam ib phau hais tsis muaj tiamsis lwm phau ho hais muaj lossis hais tau ntxaws dua.

14-15. Peb yuav ua li cas peb thiaj paub muab tej uas peb kawm txog Yexus lub neej coj los siv rau peb lub neej?

¹⁴ Yam 2, muab tej koj nyeem hauv 4 phau no coj los siv. (Yauhas 13:17) Thaum koj nyeem tag ib zag, ua zoo xav seb puas muaj ib yam hauv zaj no uas koj yuav siv tau rau  koj tus kheej lossis yuav pab tau lwm tus. Yog koj xav coj mus pab ib tug twg ces tos kom zoo caij nyoog koj mam ua tib zoo qhia txog tej uas koj kawm rau nws.

¹⁵ Zaum no cia peb tham seb peb yuav ua li 2 yam no li cas. Peb yuav tham txog tus poj ntsuam txom txom nyem uas Yexus pom hauv lub tuam tsev.

16. Piav seb thaum koj nyeem Malakaus 12:41, koj pom muaj dabtsi.

¹⁶ Xav tias thaum tus poj ntsuam tso 2 lub nyiaj npib, koj nyob ntawd thiab. (Nyeem Malakaus 12:41.) Hnub ntawd yog hnub tim 11 lub hli Nixa xyoo 33 uas yog ob peb hnub ua ntej Yexus tuag. Yexus nyob hauv lub tuam tsev qhia Vajtswv Txojlus ib hnub. Tiamsis cov thawj coj ua nyuaj heev rau nws. Ib txhia nug tias leejtwg tso cai rau nws ua nws tes haujlwm. Hos ib txhia nug nws txog tej uas lawv xav tias nws yuav teb tsis tau. (Malakaus 11:27-33; 12:13-34) Thaum Yexus mus rau ntawm Pojniam Chav Pe Hawm Vajtswv, nws pom cov phij xab tso nyiaj nyob raws cov phab ntsa tsev. Nws txawm zaum saib cov neeg tso nyiaj rau hauv cov phij xab. Nws pom cov neeg nplua nuj coob tus tso nyiaj npib ntau ntau. Tej zaum Yexus kuj mus zaum ze tsawv ntawm cov phij xab thiab hnov cov npib nrov nrib nreeb nrib nreeb thaum neeg tso nyiaj.

17. Tus “pojntsuam pluag pluag” hauv Malakaus 12:42 ua dabtsi?

¹⁷ Nyeem Malakaus 12:42. Ces ib nyuag pliag ntawd, Yexus txawm pom ib tug “pojntsuam pluag pluag.” (Lukas 21:2) Nws txom nyem heev, tej zaum twb tsis muaj nyiaj txaus mus yuav zaub mov noj. Tiamsis nws nqa nws 2 lub txiaj toog me me, tej zaum twb tsis hnov nrov ib lub suab li thaum muab tso rau hauv lub phij xab. Yexus paub tias 2 lub txiaj toog ntawd muaj nqis tsawg heev, twb tsis txaus coj mus yuav ib tug noog tsev uas yog hom noog pheej yig tshaj plaws.

18. Raws li Malakaus 12:43, 44, Yexus hais li cas txog tus poj ntsuam uas tso 2 lub txiaj toog?

¹⁸ Nyeem Malakaus 12:43, 44. Tus poj ntsuam no ua raug Yexus siab heev, nws thiaj hu nws cov thwjtim los thiab hais rau lawv tias: “Tus pojntsuam uas pluag pluag ntawd tso nyiaj ntau dua lwm tus.” Thiab Yexus qhia rau lawv ntxiv tias: “Lwm tus muab lawv tej nyiaj uas seem coj tuaj tso xwb, tiamsis tus pojntsuam uas pluag pluag no, nws muab hlo ob lub txiaj toog uas nws muaj tuaj tso huv tibsi.” Thaum tus poj ntsuam no muab nws 2 lub txiaj toog pub rau Yehauvas, nws tso siab plhuav tias Yehauvas yeej yuav saib xyuas nws.​—Phau Ntawv Nkauj 26:3.

19. Cov lus uas Yexus hais txog tus poj ntsuam txom txom nyem qhia li cas rau peb?

¹⁹ Ua koj lub neej raws li tej uas koj nyeem. Ua zoo xav seb koj kawm tau li cas los ntawm Yexus cov lus uas nws hais txog tus poj ntsuam txom txom nyem ntawd. Tej zaum tus poj ntsuam ntawd yeej xav muab ntau tshaj rau Yehauvas tiamsis nws tsis muaj. Txawm li ntawd los nws muaj li cas nws yeej muab tag nrho rau Yehauvas. Yexus thiaj hais tias qhov nws muab ntawd muaj nqis heev rau Yehauvas. Qhov uas Yexus hais no qhia peb tias yog peb pe hawm Yehauvas kawg siab kawg ntsws lawm ces Yehauvas yeej yuav txaus siab rau peb. (Mathais 22:37; Kaulauxais 3:23) Thaum nws pom tias peb rau siab mus kev sib txoos thiab kub siab lug mus tshaj tawm ces yuav ua rau nws zoo siab heev!

20. Piav seb koj yuav muab qhov uas koj kawm tau los ntawm tus poj ntsuam mus pab lwm tus li cas.

 ²⁰ Koj yuav muab qhov uas koj kawm tau los ntawm tus poj ntsuam mus pab lwm tus li cas? Xav seb puas muaj tej tug uas koj yuav txhawb tau. Xws li puas muaj ib tug muam koj paub uas qaug zog vim nws xav tias nws tsis muaj nqis dabtsi lawm vim nws laus thiab mus tshaj tawm tsis tau npaum li qub? Lossis puas muaj ib tug kwvtij koj paub uas niaj hnub ntoog ib tug mob thiab mus koom tsis tau kev sib txoos txhua txhua zaus? Koj yuav txhawb tau lawv lub siab thiab cuab tau lawv lub zog yog koj txawj “hais tej lus zoo” thiab tej lus “muaj nqis” los nplig lawv. (Efexus 4:29) Koj cov lus yuav pab kom lawv ras ntsoov tias yog lawv twb ua li lawv ua tau lawm ces Yehauvas yeej txaus siab rau lawv. (Pajlug 15:23; 1 Thexalaunikes 5:11) Thaum koj qhuas lwm tus vim lawv muab qhov zoo tshaj plaws rau Yehauvas ces twb yog koj taug Yexus tus hneev taw.

21. Koj yuav ua li cas xwb?

²¹ Peb ua Yehauvas tsaug uas nws muab Yexus lub neej sau cia rau hauv phau Mathais, Malakaus, Lukas, thiab Yauhas los pab kom peb taug tau Yexus tus hneev taw thiab xyaum ua peb lub neej li nws. Yog li ntawd, cia peb rau siab ntso kawm 4 phau ntawv no rau peb tus kheej thiab nrog peb tsev neeg. Tiamsis yuav kom tej peb kawm pab tau peb, thaum peb nyeem peb yuav tsum xav tias peb nyob kiag ntawd ntag thiab muab tej peb kawm los xyaum ua neej. Peb yuav tsum ua zoo mloog Yexus peb thiaj paub xyaum ua peb lub neej kom zoo li nws. Zaj tom ntej peb yuav kawm txog Yexus cov lus ua ntej nws tuag.