1-2. Edena dala ai Iesu ena aena gabudia ai ita raka diba? Haheitalai gwauraia.

MANI oi piksaia, oi be ma haida ida kopukopu gabuna ta ai umui raka noho, bona unai gabu ia diba namonamo tauna ese umui ia hakaua noho. Ia raka neganai, iena aena gabudia be kopukopu dekenai idia hedinarai. Nega haida hakaua tauna do oi itaia lasi, to oi gari lasi! Umui raka hebou taudia ese hakaua tauna ena aena gabudia umui badinaia namonamo.

² Ita be Keristani taudia korikoridia dainai laulau dalanai ita be gabu dikana dekenai ita raka noho bamona​—unai be inai tanobada dikana. Ita moale, badina Iehova ese Hakaua Tauna goevadaena, iena Natuna, Iesu Keriso ia henia, iena aena gabudia ita badinaia totona. (1 Pet. 2:21) Baibel ia herevalaia bukana ta ia gwau, Petero ese Iesu be hakaua tauna ta ida ia hahegeregerea. Hakaua tauna ena aena be kopukopu dekenai idia hedinarai hegeregerena, Iesu ese ena aena gabudia ia rakatania, ita badinaia totona. Mani inai henanadai toi ita laloa, Iesu ena aena gabudia ai ita raka ena anina be dahaka? Dahaka dainai unai bamona ita karaia? Bona edena dala ai unai ita karaia diba?

3. Ma ta ena aena gabudia ai ita raka ena anina be dahaka?

³ Ma ta ena aena gabudia ai ita raka ena anina be dahaka? Baibel lalonai inai hereva “raka” bona “aena,” be nega haida ta ena mauri lalonai ia karaia gaudia ia herevalaia. (Gen. 6:9; Aon. 4:26) Ta ena mauri ai ia karaia gaudia be ena aena gabudia  ida ita hahegeregerea diba. Unai dainai ma ta ena aena gabudia ai ita raka ena anina be iena haheitalai ita tohotohoa.

4. Iesu ena aena gabudia ai ita raka ena anina be dahaka?

⁴ Iesu ena aena gabudia ai ita raka ena anina be dahaka? Anina be iena haheitalai ita tohotohoa. Inai atikol ena siri badana ai, aposetolo Petero be Iesu ese hisihisi ia haheaukalaia karana ia herevalaia. To dala ma haida ai Iesu ita tohotohoa diba. (1 Pet. 2:18-25) Oibe, Iesu ena mauri ibounai lalonai ia gwauraia bona karaia gaudia ita badinaia be namo.

5. Goevadae lasi taudia ese Iesu ena haheitalai idia badinaia goevagoeva diba, a? Gwauraia.

⁵ Ita be goevadae lasi taudia dainai, Iesu ena haheitalai ita tohotohoa diba, a? Oibe, ita karaia diba. Laloatao, Petero ia gwau lasi Iesu ena aena gabudia ita badinaia goevagoeva. To, ita ia hagoadaia Iesu ena ‘aena gabudia ai do ita raka.’ Bema iseda goada hegeregerena Iesu ena aena gabudia ai ita raka namonamo, ita be aposetolo Ioane ena hereva ita badinaia: “Iesu ia raka hegeregerena do [umui] raka noho.”​—1 Ioa. 2:6.

6-7. Dahaka dainai ita gwau diba Iesu ena aena gabudia ai ita raka neganai, Iehova kahirakahira do ita lao?

⁶ Iesu ena aena gabudia ai ita raka neganai Iehova kahirakahira do ita lao. Dahaka dainai unai bamona ita gwau diba? Ginigunana, Iesu be ena mauri ibounai lalonai Dirava hamoalea karadia ia karaia. (Ioa. 8:29) Unai dainai Iesu ena aena gabudia ai ita raka neganai, Iehova do ita hamoalea. Bona ita abia dae iseda guba Tamana be idia hekwarahi iena turana ai idia lao taudia kahirakahira do ia noho.​—Iam. 4:8.

 ⁷ Iharuana, Iesu be iena Tamana ia tohotohoa goevagoeva. Unai dainai ia gwau: “Lau ia itaia tauna be Tamana danu ia itaia vadaeni.” (Ioa. 14:9) Iesu ena kara namodia bona ma haida ia kara henia dalana ita tohotohoa diba. Hegeregere, ia ese lepera tauna bona mase dainai idia lalohisihisi taudia ia hebogahisi henia bona gorere badana ia abia hahine ia laloa bada. Iesu ita tohotohoa neganai, Iehova ita tohotohoa danu. (Mar. 1:40, 41; 5:25-34; Ioa. 11:33-35) Iehova ena kara namodia ita hahedinaraia neganai, iseda hetura karana ia ida do ia goada.

8. Edena dala ai tanobada ita “halusia” diba? Herevalaia

⁸ Iesu ena aena gabudia ai ita raka neganai, inai tanobada dikana ese iseda lalona do ia veria lasi. Iesu ena hanuaboi ginigabena ai, ia gwau: “Lau be tanobada lau halusia vadaeni.” (Ioa. 16:33) Anina be ia ura lasi inai tanobada ena laloa dalana, tahua gaudia, bona kara ese ia idia biagua. Iesu be tanobada dekenai ia mai Iehova ena ladana ia hahelagaia totona, bona ia ura lasi gau ta ese unai ia hadikaia. To ita be edena bamona? Inai tanobada ai gau momo ese iseda lalona idia veria diba. To bema Iesu bamona, Iehova ena ura ita karaia noho, ita danu ese tanobada ita “halusia” diba.​—1 Ioa. 5:5.

9. Mauri hanaihanai ita abia totona dahaka ita karaia be namo?

⁹ Iesu ena aena gabudia ai ita raka neganai, mauri hanaihanai do ita abia. Taga tauna ta be mauri hanaihanai abia dalana ia henanadailaia neganai, Iesu ia haere: “Oi mai egu hahediba tauna ai oi lao.” (Mat. 19:16-21) Iuda taudia haida idia abia dae lasi Iesu be Keriso, unai dainai ia gwau: “Lauegu mamoe . . . be egu murinai idia raka. Idia dekenai mauri hanaihanai lau henia.” (Ioa. 10:24-29) Sanhedrin ena memba ta, Nikodemo be Iesu ena hahediba herevadia ia abia dae, badina Iesu ia gwau: “Ia idia abidadama henia taudia ibounai” be “mauri hanaihanai do idia abia.” (Ioa. 3:16) Iesu ita abidadama henia bema iena hahediba herevadia ita badinaia, bona iena kara ita tohotohoa. Bema unai bamona ita karaia, mauri hanaihanai ita abia diba.​—Mat. 7:14.

10. Iesu ita dibaia totona, dahaka ita karaia be namo? (Ioa. 17:3)

¹⁰ Iesu ena aena gabudia ai ita raka totona, ia ita dibaia be namo. (Ioane 17:3 duahia.) Unai be hanaihanai do ita karaia noho gauna. Namona be iena kara namodia, iena lalohadai, bona ena kara maoromaoro taravatudia ita diba namonamo. Herevana lagani hida hereva momokani lalonai ita noho, namona be ita gaukara goada  Iehova bona ena Natuna ita dibaia totona.

11. Evanelia bukadia foa ese dahaka idia herevalaia?

¹¹ Iehova ena Natuna ita dibaia totona, iena Hereva lalonai Evanelia bukadia foa ia atoa. Unai amo Iesu ena mauri bona haroro gaukara ena sivarai ita dibaia. Unai buka foa ese Iesu ia gwauraia gaudia, ia karaia gaudia, bona ena hemami idia herevalaia. Danu ita idia durua Iesu ena haheitalai ita “laloa namonamo” totona. (Heb. 12:3) Bona Iesu ena mauri lalonai ia karaia gaudia ibounai idia herevalaia. Unai dainai inai buka foa, Mataio, Mareko, Luka bona Ioane ita stadilaia neganai, Iesu do ita dibaia namonamo. Danu iena aena gabudia ai do ita raka.

12. Edena dala ai Evanelia bukadia amo heduru ita abia diba?

¹² Unai Evanelia bukadia amo heduru ita abia totona, ita duahia sibona be hegeregere lasi. To, namona be nega ita atoa, ita stadilaia namonamo bona ita lalodia dobu. (Iosua 1:8 ena futnout hahegeregerea.) Evanelia bukadia ita laloa dobu bona ita duahia gaudia ita badinaia totona, ita do idia durua dala rua mani ita herevalaia.

13. Edena dala ai Evanelia bukadia edia sivarai oi hamauria diba?

¹³ Ginigunana, Evanelia bukadia edia sivarai oi hamauria. Bona oi piksaia oi be idia vara gaudia oi itaia, oi kamonai, bona oi mamia. Unai oi karaia totona, namona be Iehova ena orea ese ia halasia pablikeisen idauidau ai tahua gaukara oi karaia. Namona be oi duahia sivaraina lalonai, guna idia vara gaudia bona gabeai do idia vara gaudia oi laloa. Unai sivarai lalonai oi duahia taudia bona gabudia edia infomeisen oi tahua namonamo. Bema Evanelia bukana ta ai oi duahia sivaraina be Evanelia bukana ma ta ai ia noho, namona be unai sivarai ruaosi oi hahegeregerea. Badina nega haida, Evanelia bukana ta ai ia noho mai anina bada point be Evanelia bukana ma ta ai ia noho lasi.

14-15. Edena dala ai Iesu ena sivarai amo ita dibaia gaudia ita badinaia diba?

 ¹⁴ Iharuana, Evanelia bukadia edia sivarai be emu mauri ai oi badinaia. (Ioa. 13:17) Evanelia bukana ta ai ia noho sivarai ta oi stadilaia murinai sibona oi nanadaia: ‘Inai sivarai amo lau dibaia gauna ta be egu mauri ai lau badinaia diba, a? Edena dala ai lau dibaia gauna amo ma ta lau durua diba?’ Emu tura namona ta oi laloa, bona nega maorona ai mai lalokau bona mai aonega ida oi dibaia gauna be ia dekenai oi hadibaia.

¹⁵ Unai dala rua ita badinaia diba ena haheitalai ta mani ita laloa. Dubu helaga ai Iesu ese ogogami vabu ia itaia ena sivarai do ita herevalaia.

16. Mani Mareko 12:41 oi herevalaia.

¹⁶ Sivarai oi hamauria. (Mareko 12:41 duahia.) Mani oi piksaia. Inai be Nisan 11, 33 C.E. bona Iesu be wiki ta murinai do idia hamasea. Iesu be dina ibounai lalonai dubu helaga ai ia haroro. To, tomadiho gunalaia taudia be ia idia inai henia. Haida idia henanadai daika ese siahu ia henia unai gaukara ia karaia totona. Ma haida be henanadai aukadia amo ia idia tohoa. (Mar. 11:27-33; 12:13-34) Hari Iesu be dubu helaga ena kahana ma ta dekenai ia lao. Ia be Hahine Edia Ariara dekenai bona moni mauadia ia itaia diba. Ia helai bona maua lalonai kontribiusen idia udaia taudia ia raraia noho. Ia itaia, taga taudia be koini momo idia udaia noho. Reana ia be maua lalonai koini idia moru ena regena ia kamonai diba.

17. Mareko 12:42 ese ia herevalaia ogogami vabu be dahaka ia karaia?

¹⁷ Mareko 12:42 duahia. Daudau lasi murinai, Iesu ese “ogogami vabuna ta” ia itaia. (Luka 21:2) Ena mauri be auka bona ia hegeregere lasi sibona durua gaudia ia hoia totona. To, ia lao bona maua ta dekenai koini maragidia rua ia udaia. Reana maua lalonai idia moru neganai regena be lasi. To, Iesu ia diba unai hahine be lepta koini rua ia udaia. Unai nega ai unai moni be siahu lasi. Danu, ia hegeregere lasi aniani totona idia hoihoilaia davana maragi manu ta ia hoia totona.

18. Mareko 12:43, 44 bamona, Iesu ese vabu ena kontribiusen be edena bamona ia herevalaia?

¹⁸ Mareko 12:43, 44 duahia. Iesu be unai vabu ena kara dekenai ia hoa, unai dainai iena hahediba taudia ia boiria unai vabu idia itaia totona, bona ia gwau: “Inai ogogami vabu ese ia udaia moni be ibounai ese maua lalonai idia udaia monina ia hereaia.” Ma ia gwau: “Idia [taga taudia] ibounai be edia moni momo amo sisina sibona idia udaia, to ena be unai vabu ia ogogami momokani, ia ese sibona ena mauri durua moni ibounai ia udaia.” Unai vabu be ena moni orena ia henia neganai, iena mauri be Iehova ena imana lalonai ia atoa.​—Sal. 26:3

19. Iesu ese ia herevalaia vabu amo dahaka mai anina bada gauna ta ita dibaia?

¹⁹ Unai sivarai be emu mauri lalonai oi badinaia. Sibona oi nanadaia: ‘Iesu ese ia herevalaia vabu amo dahaka lau dibaia?’ Mani oi laloa, unai vabu be ia ura kontribiusen badana do ia henia. To ia dekenai ia noho harihari gauna hegeregerena Iehova ia henia. Bona Iesu ia diba iena harihari gauna be Iehova ese ia laloa bada. Mai anina bada gauna be inai: Iehova ia moale bema mai kudouna ibounai ida Ia ita hesiai henia. (Mat. 22:37; Kol. 3:23) Unai hakaua hereva hegeregerena, bema iseda nega bona goada ita gaukaralaia Iehova ita tomadiho henia, ena hesiai gaukara ita karaia bona hebou ita lao, unai ia laloa bada.

20. Vabu ena sivarai amo oi dibaia gauna be edena bamona oi badinaia diba? Haheitalai ta gwauraia.

 ²⁰ Vabu ena sivarai amo oi dibaia gauna be edena bamona oi badinaia diba? Reana kongrigeisen lalonai haida oi laloa. Idia oi hadibaia Iehova be idia karaia gaukara namodia dainai ia moale. Hegeregere, reana taihu burukana ta oi diba, ia be ia lalohisihisi badina ena gorere dainai ia hegeregere lasi hesiai gaukara ia karaia totona, guna bamona lasi. Eiava nega daudau lalonai ia gorere tadikaka ta oi laloa. Ia be ia lalomanoka badina hebou totona Kingdom Hall dekenai ia mai lasi. “Hereva namodia” amo unai bamona taudia oi hagoadaia. (Efe. 4:29) Ogogami vabu ena sivarai amo idia oi durua. Emu hagoadaia herevadia ese idia do ia durua bena do idia diba, Iehova ese edia hesiai gaukara ia laloa bada. (Aon. 15:23; 1 Tes. 5:11) Bema ma haida oi hanamodia badina edia goada hegeregerena Iehova idia hesiai henia, oi be Iesu ena aena gabudia ai oi raka noho.

21. Emu lalona oi hadaia dahaka do oi karaia?

²¹ Ita moale badina Evanelia bukadia ai Iesu ena mauri sivaraidia idia noho. Unai ese ita ia durua, Iesu ita tohotohoa bona iena aena gabudia ai ita raka. Bema hegeregere, sibona emu stadi eiava ruma bese tomadiho ai unai Evanelia bukadia oi stadilaia. Unai stadi amo namo ita abia totona, unai sivarai ita hamauridia bona iseda mauri lalonai do ita badinaia. Iesu ia karaia gaudia ita tohotohoa sibona lasi, to namona be ia gwauraia gaudia ita kamonai henia danu. Stadi atikol 15 ai, Iesu be kahirakahira ia mase neganai ia gwauraia herevadia do ita stadilaia.