1-2. Kasanotayo a masurot dagiti addang ni Jesus? Iyilustrar.

IMADYINEM a karamanka iti grupo nga ag-hiking iti lugar a napeggad ken naaplagan iti niebe. Eksperiensiado ti giyayo. Bayat a magmagna, makita iti niebe dagiti tugotna. Adda tiempo a diyo makita ti giyayo. Ngem dikay madanagan ta sursurotenyo a naimbag dagiti tugotna!

² Kas pudno a Kristiano, kaslatay agha-hiking iti delikado a lugar​—daytoy dakes a lubong. Imbag laengen ta nangipaay ni Jehova iti perpekto a Giya​—ti Anakna, ni Jesu-Kristo, a dagiti tugotna ket kabaelantayo a suroten a naimbag. (1 Ped. 2:21) Sigun iti maysa a reperensia iti Biblia, inyarig ni Pedro ni Jesus iti maysa a giya. Kas iti giya a mangibati iti tugotna, nangibati ni Jesus kadagiti tugot a mabalintayo a suroten. Usigentayo ti tallo a saludsod maipapan iti panangsurot kadagiti addangna​—ania? apay? ken kasano?

3. Ania ti kayat a sawen ti panangsurot kadagiti addang ti maysa a tao?

³ Ania ti kayat a sawen ti panangsurot kadagiti addang ti maysa a tao? Iti Biblia, ti sasao a “magna” ken “saka” tukoyenda no dadduma ti kabibiag ti maysa a tao. (Gen. 6:9; Prov. 4:26) Ti ulidan nga ipakpakita ti maysa a tao ket mayarig kadagiti tugot, wenno addang, bayat a magmagna. Isu a ti panangsurot kadagiti addang ti maysa kayatna a sawen ti panangsurot iti ulidanna, ti panangtulad kenkuana.

4. Ania ti kayat a sawen ti panangsurot kadagiti addang ni Jesus?

⁴ No kasta, ania ti kayat a sawen ti panangsurot kadagiti  addang ni Jesus? Iti simple a pannao, kaipapananna ti panangtulad iti ulidanna. Iti pannakatema a tekstotayo, espesipiko a kinomentuan ni apostol Pedro ti nagsayaat nga ulidan ni Jesus iti panangibturna iti panagsagaba; ngem adu pay ti pamay-an a matuladtayo ni Jesus. (1 Ped. 2:18-25) Talaga a ti intero a biag ni Jesus​—ti amin nga imbaga ken inaramidna​—ket ulidan a surotentayo.

5. Talaga kadi a kaya ti imperpekto a tattao a suroten ti ulidan ni Jesus? Ilawlawag.

⁵ Kas imperpekto a tattao, talaga kadi a kayatayo a suroten ti ulidan ni Jesus? Wen. Laglagipentayo nga imbalakad ni Pedro a ‘surotentayo a naimbag dagiti addang’ ni Jesus​—saan nga iti perpekto a pamay-an. No surotentayo a naimbag dagiti addangna, nga aramidentayo ti amin a kabaelantayo kas imperpekto a tattao, ipangpangagtayo dagiti sasao ni apostol Juan: “Agtultuloy[tayo] a magna a kas iti pannagna idi ni Jesus.”​—1 Juan 2:6.

6-7. Apay a maibagatayo a sumingedtayo ken Jehova no surotentayo dagiti addang ni Jesus?

⁶ Ti panangsurot kadagiti addang ni Jesus pasingedennatayo ken Jehova. Apay a maikunatayo a kasta? Umuna, nangipakita ni Jesus iti nagsayaat nga ulidan no kasano ti agbiag a makaay-ayo iti Dios. (Juan 8:29) Isu a no surotentayo dagiti addang ni Jesus, maay-ayotayo ni Jehova. Ken masiguradotayo a ti nailangitan nga Amatayo ket suminged kadagidiay mangikagkagumaan nga agbalin a gagayyemna.​—Sant. 4:8.

⁷ Maikadua, tinulad ni Jesus ni Amana iti perpekto a pamay-an isu a naibagana: “Ti nakakita kaniak nakitana metten ti Ama.” (Juan 14:9) No tuladentayo dagiti kualidad ni Jesus ken ti pamay-an ti pannakilangenna iti sabsabali​—kas iti asina iti agkukutel, ti empatiana iti maysa a babai a nakaro ti sakitna,  ti pannakipagriknana kadagiti natayan​—tultuladentayo metten ni Jehova. (Mar. 1:40, 41; 5:25-34; Juan 11:33-35) No ad-adda a tuladentayo ni Jehova, ad-adda a sumingedtayo kenkuana.

8. Ilawlawag no apay a makatulong ti panangsurot kadagiti addang ni Jesus tapno ‘maparmektayo’ ti lubong.

⁸ Ti panangsurot kadagiti addang ni Jesus tulongannatayo a saan nga agpasinga iti daytoy dakes a lubong. Iti maudi a rabii ti biag ni Jesus ditoy daga, naibagana: “Naparmekko ti lubong.” (Juan 16:33) Kayatna a sawen a dina impalubos a maimpluensiaan iti panagpampanunot, kalat, ken tigtignay daytoy a lubong. Di pulos nalipatan ni Jesus ti rason a naibaon ditoy daga​—tapno masantipikar ti nagan ni Jehova. Datayo ngay? Iti daytoy a lubong, adu ti mabalin a mangsinga kadatayo. Ngem no tuladentayo ni Jesus nga agtultuloy nga agpokus iti panagaramid iti pagayatan ni Jehova, ‘maparmektayo’ met ti lubong.​—1 Juan 5:5.

9. Ania ti masapul nga aramidentayo tapno agtalinaedtayo iti dalan nga agturong iti biag nga agnanayon?

⁹ Ti panangsurot kadagiti addang ni Jesus iturongnatayo iti biag nga agnanayon. Idi insaludsod ti maysa a nabaknang a lalaki no ania ti masapul nga aramidenna tapno agbiag nga agnanayon, insungbat ni Jesus: “Umayka ket agbalinka a pasurotko.” (Mat. 19:16-21) Iti dadduma a Judio a saan a namati nga isu ti Kristo, imbaga ni Jesus: “Dagiti karnerok . . . surotendak. Ikkak ida iti biag nga agnanayon.” (Juan 10:24-29) Ken Nicodemo, a miembro ti Sanhedrin a naginteres kadagiti sursuro ni Jesus, imbaga ni Jesus a dagiti “mangipakita iti pammati kenkuana” ket “maaddaan iti biag nga agnanayon.” (Juan 3:16) Ipakpakitatayo ti pammatitayo ken Jesus no iyaplikartayo dagiti insurona ken tuladentayo ti ulidanna. No aramidentayo dayta, agtalinaedtayo iti dalan nga agturong iti biag nga agnanayon.​—Mat. 7:14.

10. Ania ti karaman iti ‘panangam-ammo’ a naimbag ken Jesus? (Juan 17:3)

¹⁰ Sakbay a masurottayo a naimbag dagiti addang ni Jesus, masapul nga am-ammuentayo isuna. (Basaen ti Juan 17:3.) Ti ‘panangam-ammo’ ken Jesus ket agtultuloy a proseso. Masapul nga ad-adda pay nga am-ammuentayo a naimbag​—ammuentayo dagiti kualidad, panagpampanunot, ken pagalagadanna. Kasanoman kabayagtayon iti kinapudno, masapul nga itultuloytayo nga am-ammuen ni Jehova ken ti Anakna.

11. Ania ti linaon ti uppat nga Ebanghelio?

¹¹ Tapno matulongannatayo ni Jehova a mangam-ammo iti Anakna, siaayat nga inramanna iti Saona ti uppat nga Ebanghelio. Naisalaysay kadagiti Ebanghelio ti biag ken ministerio ni Jesus. Mabasatayo kadagita dagiti  imbaga, inaramid, ken narikna ni Jesus. Makatulong dagitoy nga uppat a libro tapno ‘masurottayo a naimbag’ ti ulidanna. (Heb. 12:3) Naglaon dagita kadagiti addang nga imbatina. Isu a no sukimatentayo dagiti Ebanghelio, ad-adda a maam-ammotayo ni Jesus. Iti kasta, masurottayo a naimbag dagiti addangna.

12. Kasano nga ad-adda a magunggonaantayo kadagiti Ebanghelio?

¹² Tapno ad-adda a magunggonaantayo kadagiti Ebanghelio, saantayo laeng a basta basaen dagita. Masapul nga iwayaantayo nga adalen ken utoben a naimbag dagita. (Idilig ti Josue 1:8, footnote.) Pagsasaritaantayo ti dua a suhestion a makatulong kadatayo a mangutob kadagiti Ebanghelio ken mangyaplikar kadagiti mabasatayo kadagita.

13. Kasanotayo a mapagbalin a nabiag iti isiptayo dagiti salaysay kadagiti Ebanghelio?

¹³ Umuna, pagbalinem a nabiag iti isipmo dagiti salaysay kadagiti Ebanghelio. Usarem ti imahinasionmo tapno makitam, mangngegmo, ken mariknam ti mapaspasamak. Tapno maaramidmo dayta, ag-research-ka. Usarem dagiti publikasion nga impaay ti organisasion ni Jehova. Usigem ti konteksto​—dagiti pasamak sakbay wenno kalpasan ti salaysay nga ad-adalem. Mangbirokka iti impormasion a mangilawlawag kadagiti tattao ken lugar a nadakamat iti salaysay. Ikomparam ti salaysay nga ad-adalem iti kaparehona a salaysay iti sabali nga Ebanghelio. No dadduma, adda napateg a detalye nga inraman ti maysa a nangisurat iti Ebanghelio nga awan iti sabali nga Ebanghelio.

14-15. Kasanotayo a mayaplikar dagiti nasursurotayo kadagiti Ebanghelio?

¹⁴ Maikadua, iyaplikarmo iti biagmo dagiti masursurom kadagiti Ebanghelio. (Juan 13:17) Kalpasan a naadalmo a naimbag ti maysa a salaysay iti Ebanghelio, isaludsodmo iti bagim: ‘Adda kadi masursurok iti daytoy a salaysay a mabalinko nga iyaplikar iti biagko? Kasanok a mausar daytoy a salaysay tapno matulongak ti sabsabali?’ Mangpanunotka  iti maysa nga am-ammom, ket iti maitutop a tiempo, siaayat ken sitataktika nga iranudmo dagiti nasursurom.

¹⁵ Usigentayo ti maysa a pagarigan no kasano a mayaplikartayo dagitoy dua a suhestion. Kitaentayo ti salaysay maipapan iti napanglaw a balo a babai a pinaliiw ni Jesus iti templo.

16. Deskribirem ti eksena a mabasa iti Marcos 12:41.

¹⁶ Pagbalinem a nabiag iti isipmo ti salaysay. (Basaen ti Marcos 12:41.) Imadyinem ti eksena. Nisan 11, 33 C.E. idi​—sumagmamano nga aldaw laengen, matayen ni Jesus. Inusar ni Jesus ti kaaduan a tiempo iti dayta nga aldaw a nangisuro idiay templo. Ngem busbusoren dagiti lider ti relihion. Sakbay dayta, dadduma kadakuada ti nangkuestionar iti autoridadna. Pinadas met ti dadduma ti nagdamag kenkuana kadagiti saludsod nga impagarupda a dina masungbatan. (Mar. 11:27-33; 12:13-34) Idi kuan, napan ni Jesus iti sabali a paset ti templo​—posible nga iti lugar a maawagan iti Paraangan ti Babbai​—a sadiay a makitana dagiti pagitinnagan iti kontribusion. Nagtugaw sana pinaliiw dagiti tattao a mangikabkabil kadagiti kontribusionda kadagiti pagitinnagan. Makitkitana ti adu a babaknang a mangipispisok iti adu a sinsilio. Nalabit asideg isu a mangngegna ti uni dagiti sinsilio a maipisok kadagiti pagitinnagan.

17. Ania ti inaramid ti napanglaw a balo a babai a nadakamat iti Marcos 12:42?

¹⁷ Basaen ti Marcos 12:42. Di nagbayag, adda babai a nakaala iti atension ni Jesus. Isu ket pobre, “napanglaw a balo a babai.” (Luc. 21:2) Nakarigrigat ti biagna; ken posible nga awan ti umdas a panggatangna kadagiti kasapulanna. Nupay kasta, napan iti maysa kadagiti pagitinnagan iti kontribusion ket dina impadpadlaw ti panangipisokna iti dua a babassit a sinsilio, a mabalin a dandani saan a nangngeg ti unida idi impisokna dagita. Ammo ni Jesus ti impisok ti balo​—dua a lepta a sinsilio, ti kabassitan ti balorna a sinsilio idi a tiempo. Di pay umanay dayta a panggatang iti maysa a billit tuleng, a karaman kadagiti kalakaan a billit a mailaklako tapno masida.

18. Sigun iti Marcos 12:43, 44, ania ti imbaga ni Jesus maipapan iti kontribusion ti balo a babai?

¹⁸ Basaen ti Marcos 12:43, 44. Bilib unay ni Jesus iti daytoy a balo. Inayabanna dagiti adalanna sa imbagana: “Ad-adu ti impisok daytoy napanglaw a balo ngem iti amin.” Sa inlawlawagna: “Tedtedda laeng ti impisokda [nangruna dagiti babaknang]. Ngem ti balo, nupay napanglaw, impisokna ti amin nga adda kenkuana, ti amin a pagbiagna.” Idi inted daytoy a matalek a balo ti nabatbati a kuartana iti dayta nga aldaw, agtaltalek nga ipaay ni Jehova dagiti kasapulanna.​—Sal. 26:3.

19. Ania ti napateg a masursurotayo iti imbaga ni Jesus maipapan iti napanglaw a balo?

¹⁹ Iyaplikarmo iti biagmo dagiti masursurom iti salaysay. Isaludsodmo iti bagim, ‘Ania ti masursurok kadagiti imbaga ni Jesus maipapan iti napanglaw a balo a babai?’ Panunotem dayta a balo. Sigurado a kayatna nga ad-adu koma ti maitedna ken Jehova. Ngem inaramidna ti kabaelanna; intedna ken Jehova ti kasayaatan nga adda kenkuana. Ammo ni Jesus a ti kontribusion ti balo ket napateg ken Amana. Daytoy ngarud ti napateg a masursurotayo: Maragsakan ni Jehova no ipaaytayo kenkuana ti kasayaatan nga adda kadatayo​—ti amin a puso ken amin-kararua a panagserbitayo. (Mat. 22:37; Col. 3:23) Maragragsakan ni Jehova no makitana nga ar-aramidentayo ti amin a kabaelantayo! Agaplikar dayta a prinsipio iti tiempo ken pigsa nga us-usarentayo  iti panagdaydayawtayo, a pakairamanan ti ministerio ken dagiti gimong.

20. Kasanom nga iyaplikar dagiti nasursurom iti salaysay maipapan iti balo a babai? Mangted iti pagarigan.

²⁰ Kasanom nga iyaplikar dagiti nasursurom maipapan iti balo a babai? Mangpanunotka kadagiti am-ammom a maparegta no ipalagipmo kadakuada a maragragsakan ni Jehova iti maar-aramidanda para kenkuana. Kas pagarigan, adda kadi am-ammom a baket a kabsat a masaksakit wenno nakapuyen ken makonkonsiensia wenno mariknana nga awanen ti serserbina ta dinan kabaelan ti dati a maar-aramidanna iti ministerio? Wenno adda kadi mapanunotmo a kabsat a nabayagen nga agsagsagaba iti naut-ot a sakit isu a maup-upay ta saanen a regular a makagimong iti Kingdom Hall? Tulongam ida babaen ti “nasayaat ken makapabileg” a pannakisaritam. (Efe. 4:29) Iyestoriam dagiti makapabileg a nasursurotayo iti salaysay maipapan iti napanglaw a balo. Ti makaparegta a sasaom ti mangipasigurado kadakuada a maragsakan ni Jehova no ipaaytayo ti kasayaatan nga adda kadatayo. (Prov. 15:23; 1 Tes. 5:11) No komendaram dagidiay mangipapaay iti kasayaatanda ken Jehova​—kasanoman kabassit dayta​—sursurotem a naimbag dagiti addang ni Jesus.

21. Ania ti determinasionmo?

²¹ Anian a yamantayo ta nangipaay dagiti Ebanghelio iti adu a detalye maipapan iti biag ni Jesus, tapno matulad ken masurottayo a naimbag dagiti addangna! Mabalin kadi nga agpokuska kadagiti Ebanghelio iti personal a panagadalmo wenno iti Panagdaydayaw ti Pamiliayo? Laglagipentayo a tapno naan-anay a magunggonaantayo kadagita a panagadal, masapul a pagbalinentayo a nabiag iti isiptayo dagiti salaysay ken iyaplikartayo dagita iti biagtayo. Malaksid iti panangtuladtayo kadagiti inaramid ni Jesus, masapul met a dumngegtayo kadagiti imbagana. Iti sumaruno nga artikulo, usigentayo no ania ti masursurotayo iti maudi a sasao ni Jesus kas tao.