1-2. Oriruo vẹ o rẹ sai fiobọhọ kẹ omai wo otoriẹ ẹme nọ ọ rrọ 1 Pita 2:21 na?

MA REHỌ iẹe nọ whẹ avọ ahwo jọ wha be nya oria jọ vrẹ, yọ edhere na ọ rẹ whra gaga. Ohwo nọ ọ riẹ edhere na ziezi ọ tẹ karo kẹ owhai, kẹsena wha te bi lele ithihi riẹ. Nọ u te oria jọ, wha gbẹ be ruẹ ohwo na ha. Rekọ fikinọ ithihi riẹ i mu fihọ otọ, ozọ u mu owhẹ hẹ inọ whọ te riẹ oria nọ who ti fi owọ họ họ. Ukpoye, whẹ avọ ahwo nọ wha gbẹ rrọ usu wha te bi lele ithihi na vrẹ ọvo.

² Akpọ omuomu Setan nana ọ wọhọ oria utioye nọ o be whra, yọ Ileleikristi uzẹme a wọhọ utu ahwo nọ a be nya oria na vrẹ. Rekọ u woma gaga inọ Ọghẹnẹ ọ kẹ omai ohwo nọ o bi su omai, Ọmọ riẹ nọ ọ rrọ gbagba na Jesu Kristi. Ọye họ ọnọ ma rẹ sai lele ithihi riẹ kpekpekpe. (1 Pita 2:21) Obe jọ nọ o rẹ fotọ eme Ebaibol o ta nọ, ẹme nọ Pita ọ rrọ etenẹ ta na họ, Jesu ọ wọhọ ohwo nọ o re su ahwo. Ithihi Jesu e rrọ otọ kẹ omai nọ ma rẹ sai lele wọhọ ithihi ohwo nọ o bi su ahwo nya oria vrẹ. Obọnana joma kuyo enọ esa jọ. Eme u dhesẹ re a lele ithihi Jesu? Fikieme u ro wuzou re ma lele ithihi Jesu? Kọ ẹvẹ ma sai ro ru ere?

3. Eme u dhesẹ re a lele ithihi ohwo?

³ Re a lele ithihi ohwo eme u dhesẹ? Evaọ Ebaibol, ẹsejọ ẹme na “nya” hayo “awọ” u re dhesẹ oghẹrẹ uzuazọ nọ ohwo o bi yeri. (Emu. 6:9; Itẹ 4:27) A rẹ sae rọ oghẹrẹ uzuazọ nọ ohwo o yeri dhesẹ ithihi nọ ọ be nyaseba kẹ ahwo nọ a rrọ emu riẹ. Fikiere nọ ohwo o te bi lele ithihi omọfa, u dhesẹ nọ ọ be rọ aro kele ohwo na.

4. Eme u dhesẹ re ma lele ithihi Jesu?

 ⁴ Re ma lele ithihi Jesu eme u dhesẹ? U dhesẹ nọ ma rẹ rọ aro kele iei. Pita ukọ na ọ jọ oria ikere nọ a rehọ uzoẹme nana no ze na ta kpahe oghẹrẹ nọ Jesu o ro thihakọ uye nọ o bẹ riẹ gbe epanọ ma sae rọ rehọ aro kele iei. Rekọ eware efa buobu e riẹ nọ ma rẹ sae jọ rọ aro kele Jesu. (1 Pita 2:18-25) Uzẹme riẹ họ, Jesu o fi emamọ oriruo hotọ kẹ omai nọ ma re lele evaọ oghẹrẹ nọ o yeri uzuazọ riẹ, te eme nọ ọ ta gbe eware kpobi nọ o ru.

5. Kọ ahwo-akpọ nọ a gba ha a sai gine lele ithihi Jesu? Kẹ oriruo.

⁵ Kọ ahwo-akpọ nọ a gba ha a sae ginẹ rọ aro kele Jesu? Ee. Kareghẹhọ nọ Pita ọ ta nọ ma “lele ithihi [Jesu] kpekpekpe,” orọnikọ gbagba ha. Ma tẹ romatotọ lele ithihi Jesu te epanọ o rẹ lọhọ te kpobi, kiyọ oware nọ Jọn ukọ na ọ ta ma bi ru na inọ: “Ruabọhọ nya wọhọ epanọ [Jesu] ọ nya.”​—1 Jọn 2:6.

6-7. Fikieme usu mai avọ Jihova o rẹ rọ kpekpe nọ ma tẹ be rọ aro kele Jesu?

⁶ Ma te bi lele ithihi Jesu, u re ru nọ ma re ro si kẹle Jihova ziezi. Fikieme o rọ rrọ ere? Orọ ọsosuọ, oke nọ Jesu ọ jọ otọakpọ, ọ jẹ hai ru eva were Jihova ẹsikpobi. (Jọn 8:29) Fikiere nọ ma te bi lele ithihi Jesu, ma te hai ru eware nọ e rẹ were Jihova. Yọ Ọsẹ obọ odhiwu mai na o re si kẹle ohwo kpobi nọ ọ be daoma ru oware nọ o rẹ were iẹe.​—Jem. 4:8.

⁷ Orọ avọ ivẹ, Jesu ọ rọ aro kele Ọsẹ riẹ gbagba. Oyejabọ nọ ọ rọ ta nọ: “Ohwo kpobi nọ ọ ruẹ omẹ ọ ruẹ Ọsẹ na no re.” (Jọn 14:9) Jesu o wo emamọ uruemu, yọ ọ jẹ hae riẹ amọfa ru ziezi. Wọhọ oriruo, ọ re ohrọ ohwo jọ nọ ọ jẹ  mọ oti, aye jọ nọ o je hwẹ azẹ, gbe ahwo nọ ahwo a whu ku. Ma tẹ be rọ aro kele Jesu re ohrọ amọfa je fiobọhọ kẹ ae, yọ Jihova ma be rọ aro kele na. (Mak 1:40, 41; 5:25-34; Jọn 11:33-35) Ma tẹ be rọ aro kele Jihova, usu mai kugbei o te kpekpe ziezi.

8. Ma tẹ rọ aro kele Jesu, ẹvẹ o sai ro fiobọhọ kẹ omai “fi akpọ na kparobọ”?

⁸ Ma te bi lele ithihi Jesu, eware akpọ omuomu nana e te sai reghe omai hi. Evaọ aso urere taure Jesu o te ti whu, ọ ta nọ: “Me fi akpọ na kparobọ no.” (Jọn 16:33) Otọ ẹme riẹ na họ, ọ kuvẹ hẹ re ilale akpọ gbe isiuru akpọ na i si iroro riẹ no oware nọ ọ rọ fiki riẹ ziọ otọakpọ, koyehọ re ọ wha orro se Jihova. Kọ mai omamai? Eware buobu e rrọ akpọ na nọ e rẹ sai reghe iroro mai. Rekọ ma tẹ rọ aro kele Jesu tẹrovi epanọ ma re ro ru oreva Jihova, ma rẹ sai “fi akpọ na kparobọ” re.​—1 Jọn 5:5.

9. Eme ma re ru nọ o rẹ sai fiobọhọ kẹ omai wo uzuazọ ebẹdẹ bẹdẹ?

⁹ Ma te bi lele ithihi Jesu, ma ti wo uzuazọ ebẹdẹ bẹdẹ. Nọ ọmoha jọ nọ ọ jọ ọdafe ọ nọ Jesu oware nọ o re ru re ọ sai wo uzuazọ ebẹdẹ bẹdẹ, Jesu ọ ta kẹe nọ: “Nyaze te jọ olele mẹ.” (Mat. 19:16-21) Jesu ọ ta kẹ ahwo Ju jọ nọ a rọwo nọ ọyomariẹ họ Kristi na ha inọ: “Igodẹ mẹ . . . a re lele omẹ. Mẹ rẹ kẹ ae uzuazọ ebẹdẹ bẹdẹ.” (Jọn 10:24-29) Jesu ọ ta kẹ ohwo ogbẹgwae Sanhẹdrin jọ nọ a re se Nikodimọs, ọnọ iwuhrẹ Jesu e jẹ were inọ, “ohwo kpobi nọ o fi ẹrọwọ họ iẹe” o ti “wo uzuazọ ebẹdẹ bẹdẹ.” (Jọn 3:16) Ma te bi ru eware nọ Jesu ọ ta je lele oriruo riẹ, u re dhesẹ nọ ma fi ẹrọwọ họ iẹe. Yọ ma te fi ẹrọwọ họ iẹe, ma ti wo uzuazọ ebẹdẹ bẹdẹ.​—Mat. 7:14.

10. Re a riẹ Jesu ziezi, eme u dhesẹ? (Jọn 17:3)

¹⁰ Ma rẹ riẹ kpahe Jesu taure ma tẹ te sai lele ithihi riẹ kpekpekpe. (Se Jọn 17:3.) Re ma “riẹ” Jesu o gwọlọ nọ ma re wuhrẹ kpahe iẹe, yọ orọnikọ oware umutho oke jọ ọvo ho. Ma rẹ daoma riẹ oghẹrẹ ohwo nọ ọ rrọ ziezi, te uruemu riẹ, oghẹrẹ nọ o re rri eware, eware nọ e rẹ were iẹe gbe enọ e rẹ dhae eva. Ma tẹ make rrọ ukoko na kri no, ma rẹ gbẹ daoma wuhrẹ kpahe Jihova avọ Ọmọ riẹ Jesu Kristi re ma riẹ ae vi epaọ anwẹdẹ kpobi.

11. Iku vẹ e rrọ ebe Usi Uwoma na?

¹¹ Jihova o ru nọ a ro kere iku Jesu fihọ ebe Usi Uwoma ene na, koyehọ obe Matiu, Mak, Luk gbe Jọn re o sai fiobọhọ kẹ omai riẹ Ọmọ riẹ ziezi. A jọ ebe nana ta kpahe uyẹ Jesu gbe iruo usi uwoma ota riẹ. Enẹ ma rọ riẹ eme nọ  Jesu ọ ta, eware nọ o ru gbe epanọ eware e jọ kẹe. Ebe ene nana i re fiobọhọ kẹ omai “romatotọ roro kpahe” oriruo Jesu. (Hib. 12:3) Ma rẹ jarae ruẹ ithihi Jesu wọhọ odẹme. Fikiere nọ ma te bi se ebe Usi Uwoma na, u re fiobọhọ kẹ omai riẹ Jesu ziezi. Onana u ve ti ru nọ ma sai ro lele ithihi riẹ kpekpekpe.

12. Ẹvẹ ma sai ro wo erere ziezi no ebe Usi Uwoma na ze?

¹² Re ma sai gine wo erere ziezi no ebe Usi Uwoma na ze, orọnikọ ese ọvo ma re se ai hi. Ma rẹ jẹ romatotọ wuhrẹ ae je roro didi kpahe eware nọ ma wuhrẹ. (Je rri Joshua 1:8, ẹme-obotọ.) Joma ta kpahe eware ivẹ jọ nọ i re fiobọhọ kẹ omai roro didi nọ ma te bi se ebe Usi Uwoma na, ma vẹ jẹ sai ru eware nọ ma wuhrẹ no ai ze.

13. Oghẹrẹ vẹ who re se iku nọ o rẹ rọ wọhọ nọ whọ jariẹ nọ oware na o jẹ via?

¹³ Orọ ọsosuọ, roro kpahe iku na evaọ oghẹrẹ nọ o rẹ rọ wọhọ nọ whọ jọ etẹe. Roro kpahe iku na re o jọ wọhọ nọ whẹ họ ohwo nọ eware na e be via kẹ, nọ ọ be ruẹ eware nọ e be via, je bi yo edo nọ ọ rrọ etẹe. Re o sae jọ enẹ, who re ru ekiakiẹ evaọ ebe ukoko na. Roro kpahe eware nọ e via no taure u te ti te oria nọ who bi se na gbe enọ e via evaọ obaro oria na. Kiẹ kpahe ahwo gbe eria nọ a fodẹ evaọ oria nọ who bi se na. Rri iku nọ who bi se na evaọ ebe Usi Uwoma na efa. Ẹsejọ whọ sae jọ ebe Usi Uwoma na efa ruẹ eware jọ nọ oria nọ who bi se na o ta te he.

14-15. Ẹvẹ ma sai ro ru oware nọ ma wuhrẹ evaọ ebe Usi Uwoma na?

¹⁴ Orọ avọ ivẹ, ru oware nọ who wuhrẹ no iku na ze. (Jọn 13:17) Whọ tẹ jọ obe Usi Uwoma na jọ se iku jọ kpahe Jesu no, nọ omara nọ: ‘Eme me wuhrẹ no iku nana ze nọ mẹ rẹ sai ru? Ẹvẹ mẹ sae rọ rehọ oware nọ mẹ jọ iku nana wuhrẹ  fiobọhọ kẹ omọfa?’ Roro kpahe ohwo jọ nọ whọ sae rọ iku na fiobọhọ kẹ. Kẹsena evaọ oke nọ u kiehọ, whọ vẹ rọ edhere oyoyou avọ orimuo vuẹe oware nọ who wuhrẹ, nọ o rẹ sai fiobọhọ kẹe.

¹⁵ Joma kẹ oriruo epanọ ma sai ro ru eware ivẹ nọ ma ta na. Ma te ta kpahe aye-uku oyogbe nọ Jesu o muẹrohọ evaọ etẹmpol na.

16. Gbiku nọ e rrọ obe Mak 12:41 na ze.

¹⁶ Roro kpahe iku na evaọ oghẹrẹ nọ o rẹ rọ wọhọ nọ whọ jọ etẹe. (Se Mak 12:41.) Oware na o via evaọ Nisan 11, 33 C.E., emedẹ jọ i kiọkọ taure a te ti kpe Jesu. Jesu o wuhrẹ ahwo euwa buobu no evaọ etẹmpol na. Whaọ isu egagọ na a be wọso ẹe anwẹsiẹ. Omoke jọ nọ o vrẹ, a nọ riẹ unu kpahe ohwo nọ ọ kẹ riẹ udu nọ o bi ro ru eware nọ o bi ru na. Isu egagọ na jọ a jẹ rọ enọ zere iei, bi roro nọ ọ te sae za ha. (Mak 11:27-33; 12:13-34) Obọnana, Jesu o kpohọ abọ ọfa etẹmpol na no, oria nọ o wọhọ nọ a re se Ọgwa Eyae na. Evaọ oria nọ ọ rrọ na, ọ be ruẹ etehe nọ a re fi unevaze họ nọ o kẹle ugbẹhẹ. Ọ keria yọ ọ be jọ etẹe ruẹ ahwo nọ a bi fi igho họ etehe na. O muẹrohọ nọ edafe buobu a bi fi ibigho buobu họ etehe na. O wọhọ nọ ọ kẹle oria na te epanọ o je ro yo edo ibigho nọ i bi kie fihọ evaọ etehe na.

17. Eme aye-uku oyogbe nọ a fodẹ evaọ Mak 12:42 na o ru?

¹⁷ Se Mak 12:42. Nọ Jesu o gbe bi rri na, ọ tẹ ruẹ aye jọ. “Aye-uku,” ọ tẹ jẹ rrọ oyogbe. (Luk 21:2) Eware e rrọ gaga kẹe, o wọhọ nọ o tube wo ugho nọ u re tei dẹ eware nọ ọ rẹ rọ rẹrote omariẹ hẹ. Aye nana ọ tẹ nya kẹle etehe na jọ jẹ rọ ẹmẹrera fi ibigho ivẹ fihọ iẹe, yọ o wọhọ nọ i ru emamọ edo ọvo dede he nọ i je kie fihọ etehe na. Jesu ọ riẹ unuigho nọ aye na o fihọ etehe na, ibigho lẹpta ivẹ. Eye e jọ ibigho nọ e mae kawo evaọ oke yena. Ibigho ivẹ na i tube te unuigho nọ a rẹ rọ dẹ omuedi ọvo ho, ọmọvra nọ ọ mae kawo nọ a jẹ hae re evaọ oke yena.

18. Wọhọ epanọ o rrọ Mak 12:43, 44, eme Jesu ọ ta kpahe okẹ unevaze aye-uku na?

¹⁸ Se Mak 12:43, 44. Oware nọ aye-uku na o ru na u duobọte Jesu gaga. Fikiere o te se ilele riẹ, kẹsena o te dhesẹ aye-uku na kẹ ae jẹ ta nọ: “Aye-uku oyogbe nana o fihọ bu vi ahwo nọ i kiọkọ kpobi.” O te je ru ẹme na vẹ kẹ ae inọ: “Evaọ usu enọ e da rai obọ fia aikpobi [maero kọ edafe] na a jọ rehọ ze ti fihọ, rekọ aye nana, avọ uvuhu nọ o riẹe oma, o ro fi onọ o wo kpobi họ, onọ o wo kpobi evaọ uzuazọ riẹ.” Nọ aye-uku na ọ rọ ugho nọ o wo kpobi ru unevaze no na, koyehọ o fievahọ Jihova inọ ọ te rẹrotei.​—Ol. 26:3.

19. Eme ma rẹ sai wuhrẹ no ẹme nọ Jesu ọ ta kpahe aye-uku na ze?

¹⁹ Ru oware nọ who wuhrẹ no iku na ze. Nọ omara nọ, ‘Eme mẹ rẹ sai wuhrẹ no oware nọ Jesu ọ ta kpahe aye-uku oyogbe na ze?’ Wariẹ roro kpahe aye-uku na. O sae jọ nọ ọ jẹ jọ udu riẹ roro nọ dodokọ ọ sae kẹ Jihova vi utho nọ o fihọ na. Dede na, onọ o wo kpobi ọ rọ kẹ Jihova na! Yọ Jesu ọ riẹ nọ Ọsẹ obọ odhiwu riẹ o rri unevaze riẹ na ghaghae. Oware jọ nọ u wuzou gaga nọ ma rẹ sai wuhrẹ no iku na ze ona: O rẹ were Jihova nọ ma tẹ be kẹe onọ o mai woma, koyehọ nọ ma tẹ be rọ udu mai kpobi ru iruo kẹe. (Mat. 22:37; Kọl. 3:23) Eva e rẹ were Jihova gaga nọ ọ tẹ ruẹ nọ ma be dawo utho  ẹgba mai kpobi evaọ egagọ riẹ. Wọhọ oriruo, o rẹ were iẹe nọ ma tẹ be rọ oke gbe ẹgba mai ru iruo Uvie na ziezi, te ewuhrẹ ọnya gbe usi uwoma ota.

20. Eme whọ rẹ sai ru kpahe eware nọ who wuhrẹ no iku aye-uku na ze? Kẹ oriruo.

²⁰ Eme whọ rẹ sai ru kpahe oware nọ who wuhrẹ no iku aye-uku na ze? Roro kpahe inievo jọ nọ i bi rri omarai inọ a bi ru te epanọ a gwọlọ họ evaọ egagọ Jihova, re who jiri ai. Who te ru ere, o te bọ ae ga. Wọhọ oriruo, kọ whọ riẹ oniọvo-ọmọtẹ jọ nọ ọ kpako no, nọ o be hae kẹ uye inọ ọ gbẹ be sai ru te epanọ ọ gwọlọ họ evaọ iruo Uvie na fiki ẹyao hayo owho? Kọ whọ kareghẹhọ oniọvo-ọmọzae jọ nọ eva e be were he fikinọ ẹyao ọ be jae kpohọ ewuhrẹ ẹsikpobi hi? Daoma ta eme iwoma nọ e rẹ ‘bọ ae ga.’ (Ẹf. 4:29) Whọ sae vuẹ ae emamọ eware nọ who wuhrẹ no iku aye-uku na ze nọ o rẹ bọ ae ga. Eme itienana e rẹ sae lẹliẹ ae kareghẹhọ nọ utho nọ a be sai ru evaọ egagọ Jihova o be dae ẹro fia. (Itẹ 15:23; 1 Tẹs. 5:11) Whọ tẹ be hai jiri amọfa kẹ eware nọ a be sai ru evaọ egagọ Jihova, yọ Jesu whọ be rọ aro kele hayo lele ithihi riẹ na.

21. Eme whọ gba riẹ mu nọ who re ru?

²¹ Eva e were omai gaga inọ a jọ ebe Usi Uwoma na ta eware buobu kpahe Jesu nọ e rẹ sai fiobọhọ kẹ omai lele ithihi riẹ kpekpekpe! O sai fiobọhọ kẹ owhẹ ziezi nọ whọ tẹ rọ iku Jesu ru uwuhrẹ omobọ ra hayo ru egagọ uviuwou. Kareghẹhọ nọ re whọ sai wo erere no uwuhrẹ na ze, who re se iku na evaọ oghẹrẹ nọ o rẹ rọ wọhọ ẹsenọ whọ jariẹ nọ eware na e jẹ via, who ve je ru eware nọ who wuhrẹ. U te no eware nọ Jesu o ru nọ ma rẹ rọ aro kele iei ru no, ma rẹ gaviezọ kẹ eme nọ ọ ta re. Ma te jọ uzoẹme nọ o rrọ aro na ta kpahe eware nọ ma rẹ sai wuhrẹ nọ ma te roro kpahe eme nọ Jesu ọ ta re o te ti whu.