1-2. Ongahelipi hatu dulu okushikula eenghatu daJesus? Shi faneka.

DILADILA nee ngeno mu li ongudu tamu ende moshana mu na eenhata. Omu kwetelwe komesho komunhu e na owino. Eshi ta ende okwa fiya po eemhadi daye, ile tu tye oshikoti shaye. Peemhito dimwe otashi dulika u kale uhe mu wete. Ashike ino pumbwa okukala wa tila. Ponhele yaasho, ove nosho yo ongudu oyo tamu ende pamwe nayo otamu dulu okushikula filufilu eemhadi domukwatelikomesho weni.

² Ounyuni ou wa kolokosha owa fa oshana osho sha nyika oshiponga, nOvakriste vashili ova fa ongudu oyo tai ende moshana osho. Lao linene, Jehova okwe tu pa omuwiliki a denga mbada, Omona waye, Jesus Kristus, opo tu shikule filufilu eenghatu daye. (1 Pet. 2:21) Odjo imwe yOmbiibeli oya popya kutya pomhito opo Petrus okwa longifa omupopyofano, ta yelekanifa Jesus nomunhu oo ta kwatele komesho osheendo. Ngaashi omuwiliki ha fiye po eemhadi daye, Jesus naye okwa fiya po eemhadi daye, ile tu tye eenghatu daye odo tu na okushikula. Opo tu shikule eenghatu daye, natu ka kundafaneni omapulo atatu taa shikula. Osha hala okutya ngahelipi okushikula eenghatu daye? Omolwashike twa pumbwa okuninga ngaho? Nongahelipi hatu dulu oku shi ninga?

3. Osha hala okutya ngahelipi okushikula eenghatu daumwe?

³ Osha hala okutya ngahelipi okushikula eenghatu daumwe? PaMbiibeli, oshitya ‘okweenda’ nosho yo ‘eemhadi’ omafimbo amwe ohashi yukifwa konghedi yokukalamwenyo yomunhu. (Gen. 6:9; Omayel. 4:26) Pashihopaenenwa, onghedi yokukalamwenyo yomunhu otai dulu okuyelekanifwa neenghatu, ile neemhadi odo  a fiya po eshi a enda. Onghee hano, okushikula eenghatu daumwe osha hala okutya okushikula oshihopaenenwa shaye, to mu hopaenene.

4. Osha hala okutya ngahelipi okushikula eenghatu daJesus?

⁴ Mbela osha hala okutya ngahelipi okushikula eenghatu daJesus? Oku shi popya pauxupi, osha hala okutya okushikula oshihopaenenwa shaye. Momushangwa wenenediladilo, omuyapostoli Petrus okwa popya kondadalunde oshihopaenenwa shiwa osho sha tulwa po kuJesus, eshi e lididimikila okumona oixuna. Ashike ope na eenghedi dikwao dihapu omo hatu dulu okuhopaenena Jesus. (1 Pet. 2:18-25) Jesus okwe tu tulila po oshihopaenenwa tu shikule onghedi yaye yokukalamwenyo aishe, okupitila mwaasho a popya naasho a ninga.

5. Mbela ovanhu inava wanenena otava dulu ngoo shili okushikula oshihopaenenwa shaJesus sha wanenena? Shi yelifa.

⁵ Tu li ovanhu inava wanenena, mbela ohatu dulu ngoo shili okushikula oshihopaenenwa shaJesus? Heeno, ohatu dulu. Dimbuluka kutya Petrus okwe tu ladipika tu ‘shikule filufilu eenghatu daJesus,’ ndele ina tya monghedi ya wanenena. Ngeenge otwa shikula filufilu eenghatu daJesus, nokuninga ngaashi hatu dulu tu li ovanhu inatu wanenena, kungaho ohatu wanifa po eendjovo domuyapostoli Johannes odo tadi ti: ‘Otu na okukala hatu lihumbata monghedi ya faafana noyaJesus.’ — 1 Joh. 2:6.

6-7. Omolwashike hatu dulu okutya okushikula eenghatu daJesus otashi tu ehenifa popepi elela naJehova?

⁶ Ngeenge otwa shikula eenghatu daJesus ohatu ka ehena popepi elela naJehova. Omolwashike hatu tile ngaho? Shotete, Jesus okwe tu tulila po oshihopaenenwa sha denga mbada shi na sha nokulihumbata monghedi oyo tai hafifa Kalunga. (Joh. 8:29) Onghee hano, ngeenge otwa shikula eenghatu daJesus ohatu ka hafifa Jehova. Ohatu ka kala yo noushili kutya Tate yetu womeulu ota  ka ehena popepi naavo tava kendabala okuninga ookaume kaye. — Jak. 4:8.

⁷ Oshitivali, Jesus okwa hopaenena Xe monghedi ya wanenena. Nomolwaasho Jesus a popya ta ti: “Keshe ou a mona nge, okwa mona yo Tate.” (Joh. 14:9) Ohatu dulu okuhopaenena omaukwatya aJesus nosho yo onghedi omo a li ha ungaunga novanhu. Pashihopaenenwa, okwa li a kenukila omunashilundu, a li a fila onghenda omukainhu oo a li a wililwa po kouyahame nokuudila oukwao wananghali ovo va li va filwa ovaholike vavo. Ngeenge hatu hopaenene Jesus, kungaho ohatu hopaenene yo Jehova. (Mark. 1:40, 41; 5:25-34; Joh. 11:33-35) Eshi ngoo hatu ende hatu hopaenene Jehova, osho ngoo hatu ende hatu ehene popepi elela naye.

8. Yelifa nghee okushikula eenghatu daJesus taku ke tu kwafela tu ‘finde’ ounyuni.

⁸ Okushikula eenghatu daJesus ohashi tu kwafele tuha piyaanekwe kounyuni ou wa kolokosha. Jesus okwa popya moufiku waxuuninwa wokukalamwenyo kwaye kombada yedu, a ti: “Ame onda finda ounyuni.” (Joh. 16:33) Okwa li a hala okutya ina pitika a nwefwe mo komadiladilo, komalalakano nosho yo keenghatu dovanhu ovo ve li mounyuni ou. Jesus okwa kala ta yandje elitulemo koshinakuwanifwa osho a li a endela kombada yedu, okuyapulifa edina laJehova. Ongahelipi shi na sha nafye? Mounyuni ou omu na oinima ihapu oyo tai dulu oku tu piyaaneka. Ndele ngaashi Jesus, ngeenge otwa kala hatu yandje elitulemo kokulonga ehalo laJehova, nafye ohatu ka “finda” ounyuni ou. — 1 Joh. 5:5.

9. Oshike twa pumbwa okuninga opo tu kale mondjila oyo tai twala komwenyo waalushe?

⁹ Ngeenge otwa shikula eenghatu daJesus ohatu ka kala nomwenyo waalushe. Omulumenhu umwe omunyasha oshipuna eshi a li e mu pula kutya oshike e na okuninga opo a ka mone omwenyo waalushe, Jesus okwe mu lombwela a ti: ‘Ninga omushikuli wange.’ (Mat. 19:16-21) Jesus okwa li a lombwela Ovajuda vamwe, ovo va li inava itavela kutya oye Kristus, a ti: ‘Eedi dange ohadi shikula nge. Ohandi di pe omwenyo waalushe.’ (Joh. 10:24-29) Jesus okwa li a lombwela Nikodemus, oo a li oshilyo shOmhangu yoPombada yOvajuda nokwa li e na ohokwe momahongo aye, a ti kutya “ou te mu itavele” ota ka “mona omwenyo waalushe.” (Joh. 3:16) Ohatu ulike kutya otu na eitavelo muJesus mokutula moilonga osho e tu honga noku mu hopaenena. Ngeenge otwa ningi ngaho, ohatu ka kala mondjila oyo tai twala komwenyo waalushe. — Mat. 7:14.

10. Oshike twa pumbwa okuninga opo tu ‘shiive’ Jesus nawanawa? (Johannes 17:3)

¹⁰ Fimbo inatu shikula eenghatu daJesus filufilu, tete otwa pumbwa oku mu shiiva. (Lesha Johannes 17:3.) “Okushiiva” Jesus oshinima tashi twikile. Otu na okutwikila okulihonga shihapu kombinga yaye, ngaashi okulihonga kombinga yomaukwatya aye, onghedi yaye yokudiladila nelihumbato laye. Kashi na nee mbudi kutya otwa kala moshili efimbo li fike peni, otwa pumbwa okutwikila okushiiva Jehova nOmona waye.

11. Omavaengeli ane okwa popya kombinga yashike?

 ¹¹ Opo Jehova e tu kwafele tu shiive Omona waye, okwa shangifa onghalamwenyo yOmona waye mOmavaengeli ane, mEendjovo daye. Omavaengeli oo okwa popya ondjokonona yonghalamwenyo yaJesus nosho yo oukalele waye. Omahokololo oo otae tu lombwele osho Jesus a popya, osho a ninga nonghee a li e udite. Omambo oo ane otae tu kwafele tu ‘diladile’ koshihopaenenwa shaJesus. (Heb. 12:3) Omavaengeli oo okwa popya eenghatu, ile eemhadi odo Jesus a fiya po. Onghee hano, ngeenge otwa kala hatu konakona Omavaengeli oo, ohatu ka shiiva Jesus nawanawa. Nokungaho, ohatu ka shikula eenghatu daye filufilu.

12. Oshike twa pumbwa okuninga opo tu mone ouwa pauyadi mOmavaengeli?

¹² Opo tu mone ouwa mOmavaengeli, otwa pumbwa okuninga shihapu shihe fi ashike oku a lesha. Otwa pumbwa okukonga efimbo tu a konakone noukeka nokudilonga moule kwaasho twa lesha. (Yelekanifa naJosua 1:8.) Natu ka kundafaneni omaetepo opavali oo tae tu kwafele tu dilonge kOmavaengeli nokutula moilonga osho twa lesha mo.

13. Ongahelipi to dulu okumwenyopaleka omahokololo Omavaengeli?

¹³ Shotete, mwenyopaleka omahokololo Omavaengeli. Kala wa fa u wete momadiladilo oye nou udite osho tashi ningwa. Opo u dule okuninga ngaho, owa pumbwa okuninga omapekapeko moishangomwa oyo twa longekidilwa kehangano laJehova. Konakona oshikalimo, sha hala okutya, oiningwanima oyo ya tetekela naayo ya shikula ehokololo olo to lesha. Konga ouyelele u na sha novanhu nosho yo neenhele odo da tumbulwa mehokololo olo. Yelekanifa ehokololo olo to konakona nomahokololo oo a pambafana e li mOmavaengeli makwao. Omafimbo amwe omushangi umwe wEvaengeli otashi dulika a shanga ouyelele tau ti sha, oo inau popiwa kuvakwao.   

14-15. Oshike tu na okuninga opo tu tule moilonga osho hatu lihongo momahokololo e na sha nonghalamwenyo yaJesus?

¹⁴ Oshitivali, tula moilonga omahokololo Omavaengeli monghalamwenyo yoye. (Joh. 13:17)  Konima eshi wa konakona noukeka kombinga yehokololo olo, lipula kutya: ‘Mbela omu na oshilihongomwa mehokololo eli osho handi dulu okutula moilonga monghalamwenyo yange? Ongahelipi handi dulu okulongifa ehokololo eli opo ndi kwafele umwe?’ Kendabala okudiladila komunhu wonhumba kondadalunde. Ngeenge owa mono efimbo tali wapalele, mu lombwela pahole nosho yo nelungi kombinga yoshilihongomwa osho we lihonga.

¹⁵ Paife natu ka taleni koshihopaenenwa shanghee hatu dulu okutula moilonga omaetepo oo opavali. Ohatu ka konakona ehokololo lopaMbiibeli lomufiyekadi ohepele, oo Jesus a li ta konenene motembeli.

16. Hokolola oshiningwanima osho sha tumbulwa muMarkus 12:41.

¹⁶ Mwenyopaleka ehokololo. (Lesha Markus 12:41.) Faneka momadiladilo osho sha ningwa po. Osha li 11 Nisan 33 O.P., eshi kwa li ku na omafiku manini Jesus a fye. Jesus okwa li a uhala efiku alishe ta hongo motembeli. Ovawiliki vomalongelokalunga ova li tave mu pataneke. Vamwe vomuvo ova li ve mu pula shi na sha neenghonopangelo daye. Ofimbo vamwe va li tava kendabala oku mu pula omapulo a kitakana. (Mark. 11:27-33; 12:13-34) Opo nee Jesus okwa li a ya kombinga ikwao yotembeli. Okwa li e uya ponhele hai ifanwa Oshihale shOvakainhu, omo mwa li mu na oshikefa shomayambidido. Jesus okwa li omutumba nokwa li ta tale ovanhu eshi tava tula omayambidido moshikefa. Okwa li a mona oipuna ihapu eshi tai tula mo oimaliwa ihapu ikukutu. Otashi dulika a li a loloka okupwilikina omikwelengedjo doimaliwa eshi tai lidenge moshikefa.

17. Oshike omufiyekadi ohepele oo a tumbulwa muMarkus 12:42 a ninga?

¹⁷ Lesha Markus 12:42. Konima yokafimbo, Jesus okwa li a mona omukainhu umwe. Okwa li “omufiyekadi ohepele.” (Luk. 21:2) Onghalamwenyo kaya li ipu kuye. Okwa li ta nane nombali opo a mone oipumbiwa yakeshe efiku. Okwa li e uya poshikefa shomayambidido, ndele ta tula mo oumaliwa vavali, ovo nokuli tashi dulika inava kwelengedja eshi tava wile moshikefa. Jesus okwa li a mona kutya omukainhu oo okwa tula mo ouhaulapa vavali, oimaliwa oyo ya li i na ongushu inininini pefimbo opo. Oumaliwa ovo kava li nokuli tava dulu okulanda oshiyandja shimwe, okadila oko ka li ke na ombilixa elela.

18. Metwokumwe naMarkus 12:43, 44, oshike Jesus a popya shi na sha nomayambidido omufiyekadi?

¹⁸ Lesha Markus 12:43, 44. Jesus okwa li a kuminwa neenghono omufiyekadi oo. Onghee okwa ifana ovahongwa vaye, nokwe va lombwele va tale omukainhu oo omufiyekadi, ndele ta ti: “Omufiyekadi oo ohepele okwa tula mo shihapu e dule aveshe.” Opo nee okwe va yelifila ta ti: “Aveshe [unene tuu oipuna] ova tula mo oixupe yeliko lavo, ndele omufiyekadi oo, nonande okwa li ohepele, okwa tula mo ashishe osho a li e na.” Eshi omufiyekadi oo omudiinini a yandja po okamaliwa akeshe oko a li e na efiku olo, kungaho okwa li e na elineekelo kutya Jehova ote ke mu fila oshisho. — Eps. 26:3.

19. Oshilihongomwa sha fimana shilipi hatu lihongo meendjovo daJesus di na sha nomufiyekadi ohepele?

¹⁹ Tula moilonga ehokololo olo. Lipula kutya, ‘Oshilihongomwa shilipi handi lihongo meendjovo daJesus di na sha nomufiyekadi ohepele?’ Diladila kombinga yomufiyekadi oo. Nopehe na omalimbililo, omufiyekadi oo okwa li a hala okupa Jehova shihapu. Ashike okwa ninga ngaashi ta dulu. Okwa pa Jehova osho sha denga mbada. Jesus okwa li e shii kutya omayambidido omufiyekadi oo oku na ondilo momesho aXe. Mehokololo olo omu na oshilihongomwa sha fimana kufye osho kutya: Jehova oha kala a hafa ngeenge hatu mu pe osho sha denga mbada, hatu mu longele nomutima wetu aushe nomwenyo wetu aushe. (Mat. 22:37; Kol. 3:23) Jehova oha kala a hafa ngeenge te tu tale hatu ningi ngaashi hatu dulu. Efinamhango olo otali dulu okutulwa moilonga  ngeenge tashi uya pefimbo nosho yo eenghono odo hatu longifa ngeenge hatu mu longele, kutya nee omoukalele, ile opokwoongala.

20. Ongahelipi to dulu okutula moilonga oshilihongomwa osho shi li mehokololo li na sha nomufiyekadi? Yandja oshihopaenenwa.

²⁰ Ongahelipi to dulu okutula moilonga oshilihongomwa osho tashi hangwa mehokololo li na sha nomufiyekadi? Kendabala okudiladila koohandimwe ovo tashi dulika va pumbwa okushilipalekwa kutya eenghendabala davo otadi hafifa Jehova. Pashihopaenenwa, mbela ou shii omumwameme omunamido, oo e udite ondjo, ile e udite ehe na oshilonga, molwaashi ehe na oukolele, ile eenghono dokulonga moukalele ngaashi nale? Ile mbela ou shii omumwatate umwe, oo e na omukifi wa kwata moiti nouyahama neenghono, a teka omukumo molwaashi iha dulu vali okukala pokwoongala keshe pOlupale lOuhamba? Kwafela oohandimwe va tya ngaho mokupopya navo “eendjovo diwa.” (Ef. 4:29) Va lombwela eendjovo tadi tu omukumo di na sha naasho we lihonga mehokololo li na sha nomufiyekadi ohepele. Eendjovo doye tadi tu omukumo otadi dulu oku va shilipaleka kutya Jehova oha kala a hafa ngeenge tave mu pe osho sha denga mbada. (Omayel. 15:23; 1 Tes. 5:11) Ngeenge to pandula vamwe eshi tava yandje kuJehova osho sha denga mbada, kashi na nee mbudi kutya otashi monika shinini, kungaho oto shikula eenghatu daJesus filufilu.

21. Owa tokola toko okuninga shike?

²¹ Inatu pandula tuu eshi omahokololo Omavaengeli e na ouyelele muhapu u na sha nonghalamwenyo yaJesus, oo tae tu kwafele tu mu hopaenene nokushikula filufilu eenghatu daye! Litulila po efimbo u konakone paumwene Omavaengeli oo, ile pElongelokalunga lOukwaneumbo. Natu dimbuluke kutya opo tu mone ouwa pekonakono la tya ngaho, otwa pumbwa oku a mwenyopaleka noku a tula moilonga monghalamwenyo yetu. Kakele kokuhopaenena osho Jesus a ninga, otwa pumbwa yo okupwilikina kwaasho a popya. Moshitukulwa tashi shikula ko ohatu ka tala osho hatu lihongo meendjovo daJesus daxuuninwa, odo a popya ofimbo ina fya.