1-2. Edena dalai Iesu aena gabudiai baita raka diba? Haheitalai ta ba gwauraia.

MANI a laloa, oi na haida ida uda lalona amo o raka o laomu bona tano na kopukopu. Una gabu mai dibana namonamo tauna ta ese e gunalaimui. Ia be vairai raka bona umui be ia aena gabudia o badinamu. Pada ta ai, ia na da e hahehuni! To oi na so gari badina umui iboumuiai ese ia aena gabudia o badina namonamomu!

² Ita na Kristen tauda korikoridia dainai, ita danu vaitani uda ta lalonai ta rakamu​—una na ina tanobada dikana. To ta moalemu badina Iehova ese Hegunalai Tauna hereadaena ta e heni​—ia Natuna, Iesu Keriso​—ia aena gabudia baita badina namonamo totona. (1 Pet. 2:21) Baibul e herevalaia bukana ta na e gwa, Petro ese Iesu na hegunalai tauna ta ida e haheḡereḡerea. Hegunalai tauna ese aena gabudia e rakatanimu heḡereḡerena, Iesu ese aena gabudia e rakatani, baita badina helaoreana. Ia aena gabudia baita badina totona, ini henanadai toi baita haerelaimu: Iesu aena gabudia baita badina anina be dahaka? Dahaka dainai aena gabudia baita badina? Bona aena gabudia be ede baita badina namonamo toma?

3. Ta aena gabudia baita badina anina be dahaka?

³ Ta aena gabudia baita badina anina be dahaka? Baibul lalonai, ini hereva “raka” bona ‘ae’ ese nega haida taunimanima ta ena mauri dalana e herevalaia. (Gen. 17:1; Her. 4:26) Taunimanima ta ena mauri dalana na vaitani ta aena gabudia e rakatanimu karana ida baita haheḡereḡereamu. Una dainai, ta aena gabudiai baita raka anina na, iena haheitalai baita badinaia eiava baita tohotohoa.

4. Iesu aena gabudia baita badina anina be dahaka?

 ⁴ Iesu aena gabudia baita badina anina be dahaka? Anina na ena haheitalai baita tohotohoa. Ina stadi ena siri badana ai, aposetolo Petro ese e hahedinaraia Iesu na haheitalai namona badina hisihisi e haheaukalaia; to danu dala momo ai Iesu baita tohotohoa diba. (1 Pet. 2:18-25) Momokani, Iesu ena mauri dalana idoinai​—ena hereva bona kara​—na haheitalai namona ita ese baita badinaia totona.

5. Dia ḡoevadae taudia ese Iesu ena haheitalai ḡoevadaena bae badinaia diba, a? Ba herevalaia.

⁵ Ita na dia ḡoevadae dainai, Iesu ena haheitalai baita badinaia namonamo diba, a? Oibe. Petro na se gwa, Iesu aena gabudia ai baita raka ḡoevaḡoeva. To ita e hagoadada namona na ia ‘aena gabudia ai baita raka’ namonamo. Bema eda goada heḡereḡerenai ia aena gabudia baita badina namonamomu, ita ese aposetolo Ioane ena hereva baita badinaiamu, eto: ‘Iesu ena raka heḡereḡerena ai do ba raka.’​—1 Ioa. 2:16.

6-7. Dahaka dainai Iesu aena gabudia baita badinamu neganai, Iehova turana namona ai baita laomu?

⁶ Iesu aena gabudia baita badinamu neganai, Iehova turana namona ai baita laomu. Dahaka dainai unu ta gwau tomamu? Badi ginigunana na, Dirava ese e moalelaia mauri dalana na Iesu ese e hahedinaraia. (Ioa. 8:29) Una dainai, Iesu aena gabudia baita badinamu neganai, Iehova baita hamoaleamu. Bona ta dibamu Tamada gubai ese ia e raka henia kahimu taudia na ia ese danu e raka henidia kahimu.​—Iak. 4:8.

⁷ Badi iharuana na, Iesu ese Tamana na e tohotohoa ḡoevaḡoeva. Una dainai Iesu na baine gwa diba: “Vada eme itagu tauna ese  Tamagu danu vada eme itaia.” (Ioa. 14:9) Iesu ena kara namodia bona ma haida e kara henidia dalana baita tohotohoa diba. Heḡereḡere, lepera tauna ta, mai ena gorere hahinena ta, bona mase dainai daradia e dokova taudia e bogadia hisi. Iesu baita tohotohoamu neganai, ita ese Iehova danu ta tohotohoamu. (Mar. 1:40, 41; 5:25-34; Ioa. 11:33-35) Iehova baita tohotohoamu neganai, ia turana namona ai baita laomu.

8. Dahaka dainai Iesu aena gabudia baita badina karana ese be durudamu tanobada baita “hadarerea”? Ba gwauraia hedinarai.

⁸ Iesu aena gabudia baita badinamu neganai, ina tanobada dikana ese laloda basine veriamu. Iesu ena hanuaboi orenai, ini e gwau toma: “Lau ese tanobada vada name hadarerea.” (Ioa. 16:33) Iena hereva anina na, ia ese dala na se kehoa tanobada ena lalohadai, ena ura, bona ena kara ese lalona baine veria. Bona ia ese tanobada ema badina na se laloaboio, una na Iehova ladana baine hahelaḡaia. Ita be ede bamona? Ina tanobada ai, ḡau momo ese laloda bae veri diba. To Iesu heḡereḡerena, bema Dirava ena ura ikarana baita laloa badamu, ita danu ‘tanobada baita hadarerea’ dibamu.​—1 Ioa. 5:5.

9. Dahaka baita kara unu amo mauri hanaihanai baita abia?

⁹ Iesu aena gabudia baita badinamu neganai, mauri hanaihanai baita abiamu. Taḡa tauna ta ese Iesu e nanadaia dahaka baine kara mauri hanaihanai baine abia neganai, Iesu na e haere eto: “Murigu ai boma raka.” (Mat. 19:16-21) Iesu ese ia asie abia daeva Iuda taudia e hamaorodia eto: “Egu mamoe . . . [na] lau murigu ai e rakamu. Mauri hanaihanai danu na henidiamu.” (Ioa. 10:24-29) Nikodemo, Sanhedrin ena memba ta bona Iesu ena hahediba herevadia e ura heniva tauna na Iesu ese e hamaoroa, ia “bae abidadama henia taudia” ese “mauri hanaihanai bae abia.” (Ioa. 3:16) Eda abidadama Iesu enai baita hahedinaraia totona, ena hahediba herevadia baita badina bona ena haheitalai baita tohotoho. Bema unu baita kara tomamu, mauri hanaihanai baita abia dibamu.​—Mat. 7:14.

10. Iesu baita ‘dibaia’ namonamo anina be dahaka? (Ioane 17:3)

¹⁰ Iesu aena gabudia baita badina namonamo totona, namona na ia baita dibaia. (Ioane 17:3 ba duahia.) Iesu idibana karana na basita hadokoa. Namona na hanaihanai ena kara, lalohadai, bona hereva baita dibadia namonamo. Herevana laḡani hida hereva momokani lalonai vada ta noho, to namona na dounu baita ḡaukara goada Iehova bona Natuna baita dibadia.

11. Evanelia bukadia haniosi ese dahaka e herevalai?

¹¹ Iehova na ena Hereva ai Evanelia bukadia haniosi e ato, ia Natuna baita dibaia  namonamo totona. Evanelia bukadia ese Iesu ena mauri bona ena hesiai ḡaukara e herevalai. Unu sivarai ese Iesu ena hereva, e kara ḡaudia, bona ena hemami e hahedinaraia. Ini buka haniosi ese be durudamu Iesu ena haheitalai baita ‘haerodia’ namonamomu. (Heb. 12:3) Momokani, idia ese Iesu aena gabudia o ena haheitalai e herevalai. Una dainai, Evanelia bukadia baita stadilaimu neganai, Iesu baita dibaia namonamomu. Unu amo ia aena gabudia baita badina namonamomu.

12. Dahaka baita kara Evanelia bukadia amo heduru baita abi?

¹² Evanelia bukadia amo namo baita abi totona, baita duahidia mo na dia heḡereḡere. Namona na nega baita ato baita stadilai bona baita lalodia dobu. (Ios. 1:8) Evanela bukadia ai ta duahimu sivaraidia baita lalo dobu bona baita badina totona, mani heduru daladia rua aita herevalai.

13. Evanelia sivaraidia be ede baita hamauridia toma?

¹³ Ginigunana na, Evanelia sivaraidia ba hamauridia. Emu lalohadai karana ba ḡaukaralaia e vara ḡaudia ba ita, ba kamonai, bona ba mami. Unu ba kara toma totona, Iehova ena orea ese e halasimu stadi ḡaudia ba ḡaukaralai. O duahiamu sivaraina​—ia vairanai o murinai e vara ḡaudia​—ba haeroa. Una sivarai ai e herevalaidia taudia bona gabudia edia infomeisen ma haida ba hetahulai. O stadilaiamu sivaraina na Evanelia bukana ma ta ese e sivarailaia dalana ida ba haheḡereḡerea. Nega haida reana Evanelia bukana e torea tauna ese se torea ḡauna na ma ta ese e torea.

14-15. Edena dalai ita ese Evanelia sivaraidia na eda mauri ai baita badina?

¹⁴ Iharuana na, Evanelia sivaraidia na emu mauri ai ba badina. (Ioa. 13:17) Evanelia sivaraina ta ba stadilaia namonamo murinai, sibomu ba henanadai: ‘Ina sivarai ai name dibaia ḡauna ta be egu mauri ai baina badinaia diba, a? Edena dalai ina sivarai baina ḡaukaralaia ma ta baina durua?’ Ba durua tauna ta ba laloa, bena nega  maoronai, mai emu lalokau bona aonega ida, una sivarai amo o diba ḡaudia na ia ba durulaia.

¹⁵ Mani unu heduru daladia rua baita ḡaukaralaidia haheitalaina ta aita herevalaia. Iesu ese dubu ai e itaia vabu ogoḡamina ta ena sivarai baita herevalaiamu.

16. Mareko 12:41 ai e vara ḡauna ba herevalaia.

¹⁶ Sivarai ba hamauria. (Mareko 12:41 ba duahia.) Mani lalomu ai ina a piksaia. Una na Nisan 11, 33 C.E.​—dina haida muridiai Iesu da be masemu. Una dina ibounai lalonai Iesu na dubu ai e hahediba. E inai heniava dubu igunalaidia taudia ese e gwau henia. Haida ese ena siahu e henanadailaia. Ma haida be ia bae idoaia totona henanadai aukadia e heniva. (Mar. 11:27-33; 12:13-34) Hari, Iesu na dubu kahana ma ta ela. Unuseniai​—reana Hahine Edia Ariara​—ariara habana badinai e ato boubou mauadia na baine ita diba. Ia na e helai bona taunimanima e itadiamu, unu maua ai edia moni e udamu. Taḡa taudia momo e itadia moni momo e uda. Reana ia na unu maua badidiai dainai, edia moni e udava reḡedia na e kamonaiva.

17. Mareko 12:42 ai e herevalaia vabu ogoḡamina be dahaka e kara?

¹⁷ Mareko 12:42 ba duahia. Nega sisina murinai, Iesu ese hahine ta e itaia. Ia na “vabu ogoḡamina” ta. (Luka 21:2) Ena mauri na auka; reana e hekwarahiva ena mauri iduruna ḡaudia baine abi. To, ela una maua ta ai moni maraḡidia rua e uda, reana e uda neganai reḡedia na se dae. Iesu na mai dibana una vabu na koini maraḡi-maraḡidia (lepta coins) rua e uda, una negai e ḡaukaralaiva koini maraḡidia. Una moni na dia heḡereḡere baine ania dava maraḡi bisinina ta baine hoia totona.

18. Mareko 12:43, 44 heḡereḡerena, Iesu ese vabu e udaia dobi monina be ede e herevalaia toma?

¹⁸ Mareko 12:43, 44 ba duahi. Iesu ese una vabu ena kara na e laloa bada. Una dainai ena hahediba e boiridia, bena una vabu e herevalaia e gwa, “Una vabu e udaia dobi ḡauna na bada, a idia iboudiai e uda dobi ḡaudia na mamaraḡi.” Bena ena hereva anina e gwauraia: “Idia [taḡa taudia] ese edia taḡa amo sina taina e udaia dobi; a ia na ena ogoḡami amo ena ḡau idoinai, ena mauri helaoreana, e udaia dobi.” Una dina ai una abidadama vabuna ese ena moni orena e heni neganai, ia ese ena mauri na Iehova ena henari imana ai e atoa.​—Sal. 26:3.

19. Iesu ese vabu ogoḡamina e herevalaia amo ita be dahaka ta dibamu?

¹⁹ O duahiamu sivaraina na emu mauri ai ba badinaia. Sibomu ba henanadai, ‘Iesu ese vabu ogoḡamina e herevalaia herevadia amo dahaka na dibamu?’ Una vabu ba laloa. Ia na e urava ḡau momo Iehova baine henia. To ienai mia ḡauna na mai kudouna idoinai ida Iehova e henia. Bona Iesu na mai dibana Tamana enai, una vabu ese e udaia ḡauna na mai anina bada. Ita ese ta dibaiamu mai anina bada ḡauna na ina: Iehova na be moalemu bema eda mauri idoinai bona mai kudouda idoinai ida Ia baita hesiai heniamu. (Mat. 22:37; Kol. 3:23) Iehova na e moalemu bema e itaiamu baita kara diba ḡaudia ta karamu. Heḡereḡere eda tomadiho, haroro ḡaukara, bona hebou ilao henina karadia ai eda nega bona goada ta ḡaukaralaimu neganai, Ia na e moalemu.

20. Vabu ena sivarai amo o diba ḡaudia be ede ba badina toma? Haheitalai ta ba gwauraia.

²⁰ Vabu ena sivarai amo o diba ḡaudia be ede ba badina toma? Ba durua tauna ta ba laloa, ba hagoadaia bena baine diba Iehova ese ena ḡaukara na e moalelaiamu. Heḡereḡere,  reana oi mai dibamu taihu iahuna ta na e lalomanokamu badina ena goada na dia heḡereḡere eiava gorere dainai ena hesiai ḡaukarana na se karaia momomu dia guna heḡereḡerena. Eiava, reana tadikaka ta na e lalomanokamu badina ena gorere na bada dainai dia heḡereḡere hebou iboudiai bainela. Tadikaka taihu unu bamodia na “hereva namodia” amo lalodia baita hagoada. (Efe. 4:29) Vabu ogoḡamina sivaraina amo ta diba ḡauna na idia ida baita herevalaia. Emu hahegoada herevadia ese be durudiamu, bena be dibamu, Iehova na mai kudouda idoinai ida ia ta hesiai heniamu neganai, e moalemu. (Her. 15:23; 1 Tes. 5:11) Bema haida bo hanamodiamu badina mai kudoudia idoinai ida edia goada heḡereḡerenai Iehova e hesiai heniamu, oi na Iesu aena gabudia o badina namonamomu.

21. Lalomu ba hadaia dahaka ba kara?

²¹ Ta moale badamu Evanelia bukadia ai Iesu sivaraina momo e hetore, unu ese e durudamu Iesu baita tohotohoa bona aena gabudia baita badina namonamo! Nega bavato diba sibomu emu stadi o Ruma Bese Tomadihona ai Evanelia bukadia ba stadilai. Namona na baita helalotao, una stadi amo namo baita abi totona, namona na unu sivarai na baita hamauridia bona eda mauri ai baita badina. Namona na Iesu e kara ḡaudia baita tohotoho bona e gwaurai herevadia baita kamonai. Atikol gabenai ita ese Iesu tanobadai ena hereva ginigabedia amo baita dibamu ḡaudia baita herevalaimu.