1, 2. Xikonijto se neskayot tein techpaleuia maj tikajsikamatikan tein kijtoua 1 Pedro 2:21.

MAJ tiknemilikan ke tiojtokatokej iniuan oksekin kampa semi ouijkan uan semi sokitaj. Tiktojtokaj se takat akin ixmati uan tikitstiouij kanikauin taksa. Sayoj ke sepasaj amo tikitajok takat, maski ijkon, amo timouij porin ueli tikitaj kampa ika taksatiaj.

² Tiitatojtokakauan Cristo no kemej yeskia tiojtokatokej kampa semi ouijkan porin tinemij itech nejin taltikpak kampa mochiua tein amo kuali. Sayoj ke Jiova kitemakak iKonetsin Jesucristo, akin technextilij kanikauin moneki tiojtokaskej (1 Ped. 2:21, TNM). Pedro kiteajsikamatiltij ke Jesús kemej yeskia se takat akin kintanextilijtiuj oksekin. Ijkon kemej se taltikpaknenkej akin youi nemiti kansaika ueli kitojtoka akin kitanextilijtiuj, tejuan no ueli tiktojtokaj Jesús. Sayoj ke ¿toni kijtosneki tiktojtokaskej Jesús? ¿Keyej moneki tiktojtokaskej? Uan ¿keniuj uelis tikchiuaskej?

3. ¿Toni kijtosneki tiktojtokaskej se taltikpaknenkej?

³ ¿Toni kijtosneki tiktojtokaskej se taltikpaknenkej? Itech Biblia, keman ika motajtoua imetsuan se taltikpaknenkej oso keman kijtoua ke nentinemi oso ojtoka, kemansa kiteajsikamatiltia tein kichiua itech nochi inemilis (Gén. 6:9; Prov. 4:26). Yejua ika, tiktojtokaskej se taltikpaknenkej kijtosneki tikchiuaskej kemej yejua.

4. ¿Toni kijtosneki tiktojtokaskej Jesús?

 ⁴ Komo ijkon, ¿toni kijtosneki tiktojtokaskej Jesús? Kijtosneki tikchiuaskej kemej yejua. Itech 1 Pedro 2:21, tatitanil Pedro kijtoj ke Jesús techkauilij se kuali neskayot porin taxikoj keman kitajyouiltijkej. Sayoj ke Jesús no kichiuak okseki taman tein no uelis tikchiuaskej (1 Ped. 2:18-25). Tein melauj, ika nochi tein kijtoj uan kichiuak techkauilij se kuali neskayot.

5. ¿Keyej tinochin uelis tikchiuaskej kemej Jesús maski titajtakolejkej?

⁵ Maski titajtakolejkej, uelis tikchiuaskej kemej Jesús. Sayoj ke Pedro amo kijtoj ke moneki senkis tikchiuaskej ijkon kemej Jesús, ta ke moneki timochikauaskej tikchiuaskej kemej yejua. Ijkon tiktakamattoskej tein kijtoj tatitanil Juan uan tinentinemiskej “ijkon keme Cristo chipaukanemik” (1 Juan 2:6).

6, 7. ¿Keyej komo tikchiuaj kemej Jesús okachi kuali timouikaskej iuan Jiova?

⁶ Komo tikchiuaj kemej Jesús, kuali timouikaskej iuan Jiova. ¿Keyej? Yekinika, porin Jesús technextilij keniuj tinemiskej kemej tikyolpaktiskej Dios (Juan 8:29). Yejua ika, komo tikchiuaj kemej Jesús, tikyolpaktiskej Jiova. Uan no, tikmatij ke toTajtsin Jiova motokis iniuan akin mochikauaj kuali mouikaskej iuan (Sant. 4:8).

⁷ Ojpatika, Jesús senkis kichiuak kemej iTajtsin. Yejua ika kijtoj: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Tikchiuaj kemej Jiova keman tiknextiaj kualneskayomej tein Jesús kinextij uan keman tikinitaj oksekin kemej Jesús kinitak. Kemej neskayot, kinextilij netasojtalis se takat akin kipiaya lepra, kiajsikamatik keniuj momachiliaya se siuat  akin semi mokokouaya uan kiniknelij akin momikilijka se ininchankauj (Mar. 1:40, 41; 5:25-34; Juan 11:33-35). Komo okachi timochikauaj tikchiuaskej kemej Jiova, okachi kuali timouikaskej iuan.

8. ¿Keyej komo tikchiuaj kemej Jesús techpaleuis maj amo techtapololti tein onkak nikan taltikpak?

⁸ Komo tikchiuaj kemej Jesús, amo techtapololtis tein onkak nikan taltikpak. Youak achto ke momikiliskia, Jesús kijtoj: “Nejuatsin nochi niktamixijxikoj ya in chikaualis den amokuali Satanás” (Juan 16:33). Jesús kijtosnekik ke amo kikauak maj akin amo kitekitiliayaj Dios kipatanij tein kiixtalijtoya kichiuas, kemej tanemiliaya uan tein kichiuaya. Mochikauak nochipa kielnamikis keyej ualajka nikan taltikpak: tapaleuis maj mochipaua itokay Jiova. ¿Toni tikchiuaskej tejuan? Onkak miak taman tein uelis techtapololtis. Sayoj ke komo tiktayekanaltiaj tikchiuaskej tein Jiova kiyolpaktia ijkon kemej kichiuak Jesús, amo techtapololtis tein onkak nikan taltikpak (1 Juan 5:5).

9. ¿Toni moneki tikchiuaskej komo tiknekij tinemiskej nochipaya?

⁹ Komo tikchiuaj kemej Jesús, tinemiskej nochipaya. Keman se telpoch akin kipiaya miak tomin kitajtanij Jesús toni monekia kichiuas tein kipaleuiskia maj ueli nemi nochipaya, yejua kinankilij: “Xiuiki nouan uan xinechtoktiliki” (Mat. 19:16-21). Uan seki judíos akin amo kineltokayaj ke Jesús katka Cristo, kiniluij: “Noichkauan [...] nechtoktiliaj. Uan ijkon nejua nikinmakatinemi [...] ne nemilis nachipa” (Juan 10:24-29). Uan no, Nicodemo, se tamelaujkej itech Sanedrín akin kinekia kiixmatis tein tamachtiaya, Jesús kiluij ke akin iuan takuaujtamatiskej uelis nemiskej nochipaya (Juan 3:16). Tiknextiaj ke titakuaujtamatij iuan Jesús keman tikchiuaj tein tamachtij uan tein kichiuak. Komo tikchiuaj nejin, uelis tinemiskej nochipaya (Mat. 7:14).

10. ¿Keniuj uelis okachi tikixmatiskej Jesús? (Juan 17:3).

¹⁰ Moneki tikixmatiskej Jesús uan ijkon uelis tiktojtokaskej ika miak nejmachkayot (xikonixtajtolti Juan 17:3). Okachi tikixmatiskej Jesús komo tiksentokaj timomachtiaj ikualneskayouan, kemej tanemilia uan tanauatilmej tein kitakamatik. Tinochin moneki tiksentokaskej okachi tikixmatiskej Jiova uan iKonetsin, maski miak xiujmejya tiktekitilijtokej Jiova oso yankuixtokok.

11. ¿Toni ika tajtouaj amatajkuilolmej Mateo, Marcos, Lucas uan Juan?

¹¹ Kemej Jiova semi techtasojta, kichiuak maj moijkuilouani itech iTajtol amatajkuilolmej Mateo, Marcos, Lucas uan Juan, porin kineki techpaleuis maj tikixmatikan iKonetsin. Itech nejin naui amatajkuilolmej ika  motajtoua inemilis uan itanojnotsalis Jesús. Ika tajtouaj tein kichiuak, tein kijtoj uan keniuj momachilij. Techpaleuiaj maj itech titanemilikan ineskayo (Heb. 12:3). Komo timomachtiaj nejin naui amatajkuilolmej, okachi tikixmatiskej Jesús uan uelis tikchiuaskej kemej yejua.

12. ¿Keniuj uelis okachi techpaleuiskej amatajkuilolmej Mateo, Marcos, Lucas uan Juan?

¹² Amatajkuilolmej Mateo, Marcos, Lucas uan Juan uelis techpaleuiskej komo amo sayoj tikixtajtoltiaj, ta no komo kuali timomachtiaj uan itech titanemiliaj tein tikixtajtoltiaj (no xikonita Josué 1:8). Maj tikitakan ome taman tein uelis techpaleuis maj itech titanemilikan tein tikixtajtoltiaj itech nejin naui amatajkuilolmej uan maj tikchiuakan.

13. Keman tikixtajtoltiskej Mateo, Marcos, Lucas uan Juan, ¿toni techpaleuis maj tiknemilikan ke timoajsij itech tein tikixtajtoltijtokej?

¹³ Yekinika, keman tikixtajtoltiskej Mateo, Marcos, Lucas uan Juan maj tiknemilikan ke timoajsij itech tein tikixtajtoltijtokej. Maj tiknemilikan ke tikitstokej uan tikaktokej tein panotok. Toamaixuan uelis techpaleuiskej maj ijkon tikchiuakan. Itech tajkuilolmej tein tikixtajtoltijtokej, maj tikitakan toni panok achto uan toni panok satepan. Maj tiktemokan tamachtilis tein techpaleuis maj okachi tikinixmatikan taltikpakneminij akin ininka motajtojtok uan xolalmej tein ixnesij itech tajkuilolmej. Komo tikixtajtoltijtokej teisa tein no ika motajtoua itech okseki eyi amatajkuilolmej, maj no tikixtajtoltikan. Ompa xa moijtoua seki taman tein itech amatajkuilol tein tikixtajtoltijtokej amo moijtoua.

14, 15. ¿Toni techpaleuis maj tikchiuakan tein timomachtiaj itech Mateo, Marcos, Lucas uan Juan?

¹⁴ Maj tikchiuakan tein timomachtiaj itech Mateo, Marcos, Lucas uan Juan (Juan 13:17). Satepan ke kuali timomachtiskej teisa tein ika motajtoua itech semej nejin amatajkuilolmej, maj timotajtanikan: “¿Toni tein nimomachtij itech nejin tajkuilolmej uelis  nikchiuas? ¿Keniuj uelis ika nikinpaleuis oksekin?”. Maj tiknemilikan akoni uelis ika tikpaleuiskej, uan keman tikitaskej ke uelis maj ika netasojtalis tiktapouikan tein timomachtijkej uan kemej amo tikyolkokoskej.

¹⁵ Maj tikitakan keniuj uelis tikchiuaskej nejin ome taman ika tajkuilolmej kampa ika motajtoua siuat akin amo nemiaok inamik uan kipanouaya tatasojtilis, akin Jesús kiitak itech templo.

16. Xikonijto toni ika tajtoua Marcos 12:41.

¹⁶ Maj tiknemilikan ke ompa timoajsij (xikonixtajtolti Marcos 12:41). Timoajsij itech tonal 11 metsti nisán xiuit 33, seki tonalmej achto ke kimiktiskej Jesús. Yejua miak horasya tamachtijtok itech templo. Taixyekananij itech taneltokalis semi kiixnamikinij nejin tonal. Sekin kitajtanianij akoni kimakak tanauatil uan oksekin kitajtanianij seki taman tein ika kitemouaj maj kijto teisa tein uelis ika kiteiluiliskej (Mar. 11:27-33; 12:13-34). Ompa, Jesús youi okseko, xa kampa moixmati kemej patio de las mujeres porin ueli kiita kaxontsitsin kampa kitemakaj tomin. Keman motalia, kinita akin motokiaj kampa yetokej kaxontsitsin. Miakej akin tominpiaj kitaliaj miak tomin. Xa amo semi uejka moajsi porin ueli kikaki keman kipantaliaj.

17. ¿Toni kichiuak siuat akin kipanotoya tatasojtilis akin ika motajtoua itech Marcos 12:42?

¹⁷ (Xikonixtajtolti Marcos 12:42). Tepitsin satepan, Jesús kiita “se siuakaual ten semi pobre” akin amo nemiok inamik (Luc. 21:2). Semi ouij tein kipanotok, uan xa ouij kikisa moixpanoltis. Maski ijkon, motokia kampa yetok se kaxontsin kemej amo kiitaskej uan kipantalia ome tomintsin tein xa nion kakisti. Sayoj ke Jesús kemaj kimati kanachi tomin kipantalij: ome leptones, tomin tein okachi amo kipia ipatiuj. Itech nejon tonalmej amo uelia kikouayaj nion se gorrión ika nejon tomin, se totot tein kikuayaj uan amo patiyoj katka.

18. Kemej kijtoua Marcos 12:43, 44, ¿toni kijtoj Jesús ika tomin tein kitemakak siuat akin amo nemiaok inamik?

¹⁸ (Xikonixtajtolti Marcos 12:43, 44). Jesús semi kimoujkaita tein siuat kichiua. Yejua ika kinnotsa imomachtijkauan uan kiniluia: “Nijin siuakaual pobre kipantalij kachi miak tomin uan ke nochi in tagayot”. Ompa kiniluia: “In tagayot [okachiok akin tominpiayaj] kipantalijke ten kinsobraroayaj uan nijin siuakaual maski amo teyi kipiaya, pero yejua kipantalij nochi nitomin ten niaxka tenika mopaleuiskia”. Keman siuat akin amo nemiaok inamik kipantalij nejon tonal nochi tomin tein kipiaya, kinextij ke takuaujtamatia ke Jiova kiyekpiaskia (Sal. 26:3).

19. ¿Toni techmachtia tein kijtoj Jesús keman kiitak tein kichiuak siuat akin amo nemiaok inamik?

¹⁹ Maj tikchiuakan tein techmachtia. Maj timotajtanikan: “¿Toni techmachtia tein kijtoj Jesús keman kiitak tein kichiuak siuat akin amo nemiaok inamik?”. Maj itech titanemilikan siuat. Yejua xa kiuelitaskia kimakas Jiova okachi ke tein kimakak. Maski ijkon, kichiuak tein uelik uan kimakak Jiova tein okachi kuali. Uan Jesús kimatia ke iTajtsin semi kipatiuitak tein kitemakak. Nejin techmachtia ke Jiova kiyolpaktia maj tikmakakan tein okachi kuali uan maj tiktekitilikan ika nochi toyolo (Mat. 22:37; Col. 3:23). Yejuatsin kiyolpaktia maj tikmakakan nochi tein tiuelij, hasta tiempo uan chikaualis tein tikuij keman tikueyichiuaj, kemej neskayot, keman titanojnotsaj uan keman tiouij nechikolmej.

20. ¿Keniuj uelis tikchiuaskej tein techmachtia ineskayo siuat akin amo nemiaok inamik? Xikonijto se neskayot.

²⁰ ¿Keniuj uelis tikchiuaskej tein techmachtia  ineskayo siuat akin amo nemiaok inamik? Maj inintech titanemilikan tokniuan akin kinyolchikauas komo tikinelnamiktiaj ke Jiova kipatiuita tein kichiuaj. Kemej neskayot, xa tikixmatij se tokniuj siuat akin xiuejya, akin amo kuali momachilia oso kinemilia ke amo tapaleuiaok porin amo semi chikauakok uan yejua ika amo ueli tanojnotsaok kemej achto. Oso xa tikixmatij se tokniuj takat akin motayokoltia porin kipia se kokolis tein ika nemia uan semi kitajyouiltia, uan yejua ika amo ueli youi nochi nechikolmej. Uelis tikinpaleuiskej keman tikiniluiskej seki taman tein kinyolchikauas (Efes. 4:29). Maj tikintapouikan tein techmachtij tajkuilolmej kampa ika motajtoua siuat akin amo nemiaok inamik. Tein tikintapouiskej kinelnamiktis ke Jiova yolpaki keman timochikauaj tikchiuaskej nochi tein tiuelij (Prov. 15:23; 1 Tes. 5:11). Tikchiuaj kemej Jesús keman tikinyolchikauaj oksekin porin kimakaj Jiova tein okachi kuali, maski yejuan kinemiliaj ke amo semi kipia ipatiuj.

21. ¿Toni tikonixtalijtok tikonchiuas?

²¹ Semi tiktasojkamatij maj itech amatajkuilolmej Mateo, Marcos, Lucas uan Juan moijto miak taman tein kichiuak Jesús porin ijkon uelis tikchiuaskej kemej yejua. Kuali yeskia maj peua timomachtikan toselti oso iniuan tochankauan nejin naui amatajkuilolmej. Uelis timomachtiskej miak taman komo tiknemiliaj ke timoajsij itech tein tikixtajtoltijtokej uan komo tikchiuaj. Sayoj ke, amo sayoj moneki tikchiuaskej tein Jesús kichiuak, ta no moneki tikchiuaskej tein techmachtiaj itajtoluan. Itech okse tamachtilis tikitaskej toni uelis techmachtis tein Jesús kijtoj tepitsin achto ke momikiliskia.