1, 2. ¿Tlen techpaleuia ma tikajsikamatikan tlen kijtoua 1 Pedro 2:21? Xikijto se neskayotl.

MA TIKIJTOKAN tipaxialotiuij iuan oksekimej uan tinejnentiuij ik kanin tepeyo. Techyekana ikaj tlen yitlaixmati ompa uan ipan sokitl mota kanin tlajtlaksati. Tinejnentiuij pero satepan ayakmo tikitaj akin techyekana. Pero amo timomojtiaj uan tinejnentiuij ik kanin ye oyajki porque mota ipan sokitl.

² Uelis tikijtoskej akinmej tikchiuaj ken Cristo noijki tinejnentiuij ik kanin oui: nikan tlaltikpak kanin tlayekantok Satanás. Pero Jehová okitlali ma techyekana ikaj tlen tlaixmati: Jesucristo. Moneki tikchiuaskej ken ye “otechititi” (1 Ped. 2:21). Se amochtli kijtoua Pedro okijtotojka Jesús okatka ken se tlayekanki. Ijkon ken ikaj uelis yas ik kanin onejnentia akin tlayekantok, noijki ijkon uelis tikchiuaskej tlen Jesús okichi. Pero ¿tlen okichi? ¿Tleka moneki ijkon tikchiuaskej? ¿Uan ken uelis tikchiuaskej?

3. ¿Tlen kijtosneki ikaj tiktokatiaskej?

³ ¿Tlen kijtosneki ikaj tiktokatiaskej? Ijkuak Biblia kijtoua ikaj nejnemi uan ikxiuan kijtosneki tlen ikaj kichiua itech nochi inemilis (Gén. 6:9; Prov. 4:26). Tlen ikaj kichiua itech inemilis yetoskia ken mota ik kanin nejnemi. Ik non, uelis tikijtoskej tiaskej ik kanin ikaj oyajki, kijtosneki tikchiuaskej tlen okichi.

4. ¿Tlen kijtosneki tiktokatiaskej Jesús?

⁴ ¿Tlen kijtosneki tiktokatiaskej Jesús? Kijtosneki moneki tikchiuaskej ken ye. Texto tlen ika peua nin tlamachtil kijtoua apóstol Pedro okijto Jesús otechititi ken moneki titlaxikoskej ijkuak titlajyouiskej. Pero noijki uelis  tikchiuaskej okseki tlamantli ken okichi Jesús (1 Ped. 2:18-25). Nochi tlen Jesús okichi uan okijto techititia tlen moneki tikchiuaskej.

5. Xikijto tleka uelis tikchiuaskej ken Jesús maski titlajtlakolejkej.

⁵ ¿Uelis tikchiuaskej ken Jesús maski titlajtlakolejkej? Kema. Pedro amo okijto ma tikchiuakan nochi tlen okichi Jesús, ye okijto ma timochijchikauakan. Tla timochijchikauaj tikchiuaskej ken ye, tikchiuaskej tlen okijto apóstol Juan: ‘Tinemiskeh kemi Cristo onenkiʼ (1 Juan 2:6).

6, 7. ¿Ken techpaleuis tla tikchiuaj ken Jesús?

⁶ Okachi kuali timouikaskej iuan Jehová tla tikchiuaj ken Jesús. ¿Tleka? Porque Jesús otechititi ken moneki tikpiaskej tonemilis tlen kiyolpaktis toTajtsin Dios (Juan 8:29). Ik non, tla tikchiuaj ken Jesús, Jehová yolpakis. Uan tikmatokej ye motokis iuan akinmej kinekij iuan mouikaskej (Sant. 4:8).

⁷ Jesús amo keman omotlapololti, nochipa okichi ken iTajtsin. Ik non, okijto: “Akin yonechitak kijtosneki yokitak Notajtsi” (Juan 14:9). Tikchiuaj ken Jehová ijkuak tikpiaj toyelis ken Jesús uan titetlasojtlaj ken ye. Ma tikilnamikikan ye okiknomatki se tlakatl tlen okipiaya lepra, okajsikamatki se siuatl tlen yiuejkika omokokouaya uan noijki okinmiknomatki akinmej oixpoliuik se infamiliar (Mar. 1:40, 41; 5:25-34; Juan 11:33-35). Tla timochijchikauaj tikchiuaskej ken Jehová, okachi iuan timouikaskej.

8. Xikijto tleka tla tikchiuaj ken Jesús, ‘tiktlaniliskeh akin kinawatia nin tlaltíkpaktli’.

⁸ Tla tikchiuaj ken Jesús, amo techyoltilanas tlen kiyekantok Satanás uan nochipa tiktekichiuiliskej Jehová. Saiktlami youak ijkuak Jesús okatka nikan  tlaltikpak, okijto: “Ne yoníktlanki akin kinawatia nin tlaltíkpaktli” (Juan 16:33). Jesús okinekiaya kijtos amo okiyoltilanki tlen onka itech nin tlaltikpak, amo okichi nion omokuayejyeko ken akinmej amo okitekichiuiliayaj Jehová. Nochipa okilnamiktoka tleka ouala nikan tlaltikpak: kiueyichiuas itoka toTajtsin Dios. Uan tejuan, ¿tlen tikchiuaskej? Uelis techtlapololtis miak tlamantli. Pero tla tikchiuaj tlen kineki Jehová ijkon ken okichi Jesús, tejuan noijki ‘tiktlaniliskeh akin kinawatia nin tlaltíkpaktli’ (1 Juan 5:5).

9. ¿Tlen moneki tikchiuaskej tla tiknekij nochipa tinejnentoskej itech ojtli tlen techpaleuis nochipa ma tiyoltokan?

⁹ Tla tikchiuaj ken Jesús, nochipa tiyoltoskej. Ijkuak se telpochtli tlen okipiaya miak tomin okitlajtlani Jesús tlen omonekiaya kichiuas para nochipa yoltoskia, ye okilui: “Xiwiki iwan xinemi nowan” (Mat. 19:16-21, Itlajtol totajtzin Dios [NHY]). Jesús ijkin okinmilui sekimej judíos tlen amo okineltokakej kox ye okatka Cristo: “Noichkawah [...] witseh nonawak. Ne nikchiwa mayolitokah nochipa” (Juan 10:24-29). Se tlakatl tlen omotokayotiaya Nicodemo uan opouiaya itech Sanedrín, okinekiaya kimatis tlen Jesús otlamachtiaya. Jesús okilui akinmej tlaneltokaskiaj, nochipa yoltoskiaj (Juan 3:16). Tikteititiaj titlaneltokaj itech Jesús ijkuak tikchiuaj tlen okijto uan tlen okichi. Tla ijkon tikchiuaskej, nochipa tinejnentoskej itech ojtli tlen techpaleuis nochipa ma tiyoltokan (Mat. 7:14).

10. ¿Tlen moneki tikchiuaskej para kuali tikixmatiskej Jesús? (Juan 17:3).

¹⁰ Tla tiknekij nochipa tikchiuaskej ken Jesús, achto moneki tikixmatiskej (xiktlajtolti Juan 17:3). Moneki nochipa tikixmatiskej Jesús. Moneki timomachtiskej ken iyelis, ken mokuayejyekoua uan tlen kipaktia. Maski yiuejkika noso yikin timomachtijtokej Biblia, tinochtin moneki timochijchikauaskej tikixmatiskej Jehová uan iKone.

11. ¿Tlen techtlapouia naui Evangelios?

¹¹ Jehová sapanoua techtlasojtla uan kineki ma tikixmatikan Jesús, ik non, otlanauati itech iTlajtol ma kijkuilokan naui Evangelios. Ompa techtlapouia tlen okichi Jesús uan ken otetlapoui. Techiluia tlen okijto, tlen okichi uan ken omomachiliaya. Nochi tlen ijkuilitok itech Evangelios techpaleuia ma timokuayejyekokan tlen okichi (Heb. 12:3). Uelis tikijtoskej ompa tikitaj ken onejnenki. Tla timomachtiaj tlen kijtouaj Evangelios, okachi kuali tikixmatiskej Jesús uan tikchiuaskej ken ye.

12. ¿Tlen moneki tikchiuaskej tla tiknekij ma techpaleui tlen kijtouaj Evangelios?

 ¹² Amo san moneki tiktlajtoltiskej naui Evangelios tla tiknekij ma techpaleui tlen ompa kijtoua. Moneki kuali timomachtiskej uan timokuayejyekoskej tlen ompa kijtoua (noijki xikita Josué 1:8). Ma tikitakan ome tlamantli tlen techpaleuis ma timokuayejyekokan tlen kijtouaj Evangelios uan ken uelis tikchiuaskej.

13. ¿Tlen uelis tikchiuaskej ijkuak tikintlajtoltiskej Evangelios?

¹³ Achto, ijkuak tiktlajtoltiaj Evangelios ma timokuayejyekokan ompa tikatej. Ma timokuayejyekokan tikitaj tlen panoua, tikijnekuij tlen onka uan tikmachiliaj tlen kinpanoua sekimej. Techpaleuis tla timomachtiaj amatlajkuilolmej tlen techmaka ialtepe Jehová. Ma tikitakan seki tlamantli para okachi tikajsikamatiskej tlen timomachtijtokej. Ma timomachtikan tlen okinpanok akinmej ompa moijtouaj, ken okatkaj altepemej uan tlen opanok achto uan satepan. Tla tikitaj tlen tiktlajtoltijtokej mouika iuan okse Evangelio, ma tiktlajtoltikan uan ma tikitakan kox ompa kijtoua okseki tlamantli tlen amo kijtoua okse Evangelio.

14, 15. ¿Tlen techpaleuis ma tikchiuakan tlen kijtouaj Evangelios?

¹⁴ Noijki ma tikchiuakan tlen kijtouaj Evangelios (Juan 13:17). Ijkuak kuali yotimomachtijkej tlen kijtouaj Evangelios, ma timotlajtlanikan: “¿Tlen nechmachtia tlen nikan kijtoua? ¿Ken uelis ika nikinpaleuis oksekimej?”. Ma timokuayejyekokan akin uelis tikpaleuiskej. Satepan ma tikitakan keman uelis iuan timotlapouiskej uan ika tlasojtlalistli ma tikiluikan ken techpaleuia tlen otimomachtijkej.

¹⁵ Ma tikitakan ken uelis tikchiuaskej ome tlamantli tlen yotikijtojkej. Timomachtiskej ijkuak Jesús oyajki teokali uan okitak se siuatl tlen amitlaj okipiaya uan oixpoliuik inamik.

16. Xikijto tlen opanok ijkon ken kijtoua Marcos 12:41.

¹⁶ Ma timokuayejyekokan tlen opanok (xiktlajtolti Marcos 12:41). Ma timokuayejyekokan tikitaj tlen opanok. Okatka 11 de nisán xiuitl 33, san opoliuiaya kanaj se semana para kimiktiskej Jesús. Ijkuakon, nochi se tonal otlamachtijtoka ompa teokali. Teopixkej tlen okikokoliayaj san tlen tlamantli okijtouayaj para kiyejyekoskej. Sekimej okiluiayaj tleka okichiuayaj seki tlamantli uan oksekimej okitlajtlaniayaj seki tlamantli “para kitlajtoltlapololtiskeh iwa ijkó weletis kitlajtlakoltiskeh” (Mar. 11:27-33; 12:13-34). Ik non, Jesús oksekan oyajki ompa teokali, xamo oyajki kanin okiluiayaj patio de las mujeres. Ompa uelis kitaskia arcas kanin okitlaliayaj tomin uan okatkaj inakastlan tepamitl. Ompa Jesús omotlali uan okinmitak akinmej okitemakayaj intomin. Akinmej okipiayaj miak tomin okitlaliayaj miak itech arcas. Xamo Jesús amo uejka okatka uan okikakiaya ken otsiliniaya ijkuak ompa okitlaliayaj.

17. ¿Tlen okichi siuatl tlen kijtoua Marcos 12:42?

¹⁷ (Xiktlajtolti Marcos 12:42). Satepan Jesús okitak se siuatl tlen amitlaj okipiaya, se “probe iknosiwatl” (Luc. 21:2). Xamo otlajyouiaya uan amo okipiaya tomin nion para kimokouiliskia tlen ika mopanoltiskia. Maski amitlaj okipiaya, oyajki kanin okatkaj arcas uan xamo yolik okintlali ome tomintsitsintin para amo ma mokaki. Pero Jesús kimati katli tomin ompa okitlali: ome leptones. Ijkuakon, san tepitsin okipiaya ipati non tomin. Ika non amo okajxiliayaj para kikouaskiaj nion se gorrión maski amo patio okatka.

18. Ijkon ken kijtoua Marcos 12:43, 44, ¿ken okitak Jesús tlen okichi siuatl?

¹⁸ (Xiktlajtolti Marcos 12:43, 44). Jesús sapanoua omotlajtlachialti ijkuak okitak tlen okichi non siuatl tlen ayakmo okipiaya inamik. Ik non, okinnotski imachtijkauan uan okinmilui: “Nin probe iknosiwatl, okachi okitemák iwa amo kemi oksikimeh”. Satepan okinyekilui: “Nochteh [okachi akinmej okipiayaj miak tomin] okitemakakeh tlan ayakmó kitekitiltiah, pero nin iknosiuatl, okitemák nochi tlan ika panotoskia”. Ijkuak non siuatl okitemakak nochi tlen okipiaya, okiteititi okineltokaya Jehová kimaluiskia (Sal. 26:3).

19. ¿Tlen techmachtia tlen Jesús okijto itech siuatl tlen oixpoliuik inamik uan amitlaj okipiaya?

¹⁹ Ma tikchiuakan tlen otimomachtijkej. Ma timotlajtlanikan: “¿Tlen nechmachtia tlen Jesús okijto itech siuatl tlen oixpoliuik inamik uan amitlaj okipiaya?”. Ma timokuayejyekokan tlen okichi non siuatl. Xamo okinekiaya okachi kimakas Jehová uan tlen okachi kuali okipiaya. Jesús okimatiaya tlen siuatl okitemakak Jehová sapanoua okipatioitak. Non techmachtia itlaj miak ipati: Jehová kipaktia ma tikmakakan tlen okachi kuali tikpiaj, ma tiktekichiuilikan ika nochi toyolo uan ika nochi tochikaualis (Mat. 22:37; Col. 3:23). Kiyolpaktia ijkuak timochijchikauaj tikchiuaskej tlen tiuelij. Ye kipatioita ijkuak timochijchikauaj titetlapouiskej uan timonechikoskej.

20. ¿Ken uelis tikchiuaskej ken siuatl tlen ayakmo okipiaya inamik? Xikijto se neskayotl.

²⁰ ¿Ken uelis tikchiuaskej ken siuatl tlen ayakmo okipiayaj inamik? Ma timokuayejyekokan  akinmej uelis tikinyolchikauaskej tla tikinmilnamiktiskej Jehová kipaktia tlen yejuan kichiuaj. Ma timokuayejyekokan, ¿tikixmatij se tokni siuatl tlen yikipia miak xiuitl tlen mokokoua uan amo kuali momachilia porque ayakmo kitekichiuilia Jehová ken achto? ¿Noso tikixmatij se tokni tlen sapanoua mokokoua uan amo kuali momachilia porque ayakmo nochipa ueli monechikoua? Uelis tikinyolchikauaskej (Efes. 4:29). Ma tikinmiluikan tlen otechmachti tlen okichi siuatl tlen ayakmo okipiaya inamik. Tlen tikinmiluiskej kinmilnamiktis Jehová yolpaki ijkuak timochijchikauaj tikchiuaskej nochi tlen tiuelij (Prov. 15:23; 1 Tes. 5:11). Ijkuak tikinyolchikauaj tokniuan porque mochijchikauaj kimakaskej Jehová nochi tlen uelij, maski yejuan mokuayejyekouaj san tepitsin kichiuaj, noijki tikchijtokej ken Jesús.

21. ¿Tlen tikneki tikchiuas?

²¹ Timotlasojkamatij porque itech Evangelios ijkuilitok miak tlamantli tlen okichi Jesús porque ijkon tikmatij ken uelis tikchiuaskej ken ye. Techpaleuis tla toselti noso iuan tofamilia timomachtiaj tlen kijtouaj Evangelios. Pero tla tiknekij okachi ma techpaleui, moneki timokuayejyekoskej ken ompa tiyetoskiaj uan tikchiuaskej tlen timomachtiaj. Moneki tikchiuaskej tlen Jesús okichi, pero noijki moneki tikkakiskej tlen okijto. Itech okse tlamachtil tikitaskej tlen techmachtia tlen okijto Jesús ijkuak okitsoponijkej itech kuauitl.