1-2. Da li šaj te đa palo e Isuse korakija? Objasnin.

ZAMISLIN so phireja ki jekh opasno planina koja tani ućhardi iveja. Tu hijan ki jekh grupa koja isi la jekh iskusno vodiči. Ði phirela, ov aćhavi palo peste tragija ko iv. Ko jekh trenutko tu više na dikheja le, ama na ćereja panika. Umesto odova, tu hem okola kola phirena tuvaja, kobor god šaj, đana palo olese korakija.

² O lošno sveto ko kova amen živinaja tano sar odija opasno planina. O prava hrišćanija tane sar odola manuša kola phirena ki odija planina. Ama, amen hijam zahvalna so o Jehova dinđa amen jekh najšukar vodiči – pe Ćhave e Isuse Hriste, palo kase korakija amen šaj te đa (1. Petr. 2:21). Premalo jekh biblijaki enciklopedija, o Petar akate koristini o poređenje ando vodiči. Sar so jekh vodiči aćhavi palo peste stope, isto ađahar o Isus aćhavđa palo peste stope ili korakija kola amen šaj te pratina. Akana ka dikha o odgovorija ko trin pućiba: So značini te đa palo e Isusese korakija? Sose valjani te ćera odova? Sar šaj te ćera odova?

3. So značini te đa palo nekase korakija?

³ So značini te đa palo nekase korakija? Ki Biblija o lafija „te phire“ hem „korakija“ odnosinena pe ko odova so jekh manuš ćerela ko po životi (Post. 6:9; Posl. 4:26). O primer kova i osoba mothovi šaj te uporedini pe e korakonencar kola aćhavi palo peste đi phirela. Odolese, te đa palo nekase korakija značini te oponašina oleso primer.

4. So značini te đa palo e Isusese korakija?

 ⁴ Tegani, so značini te đa palo e Isusese korakija? Odova značini te sledina oleso primer. Ko stih kova vodini amen ko akava članko o apostol Petar phenđa so o Isus aćhavđa amenđe šukar primer sose istrajinđa iako hine le pharipa. Ama, isi but avera buća ko kola amen šaj te oponašina e Isuseso primer (1. Petr. 2:18-25). Ćaće, sa so o Isus vaćerđa hem ćerđa đi hine ki phuv, tano šukar primer amenđe.

5. Da li o nesavršena manuša ćaće šaj te oponašinen e Isuseso savršeno primer? Objasnin.

⁵ Sar nesavršena manuša, da li amen ćaće šaj te oponašina e Isuseso primer? Ja, šaj. O Petar phenđa te đa palo e Isusese korakija ko sa. Ama, ov na phenđa so odova valjani savršeno te ćera. Ako daja sa amendar sar nesavršena manuša te sledina e Isusese korakija, tegani mothovaja so šunaja o savet kova dinđa o apostol Jovan: „Živinen sar so o Isus živinđa“ (1. Jov. 2:6).

6-7. Sose šaj te phena so ako đaja palo e Isusese korakija ka ova pana popaše e Jehovaja?

⁶ Ako đaja palo e Isusese korakija, amen ka ova pana popaše e Jehovaja. Sose šaj te phena odova? Sar prvo, o Isus mukhlja amenđe but šukar primer sar šaj amare životoja te ugodina e Jehovase (Jov. 8:29). Odolese, ked đaja palo e Isusese korakija amen ugodinaja e Jehovase. Hem šaj te ova sigurna so amaro nebesko Dad ka ovel paše okolencar kola trudinena pe te oven oleja paše amala (Jak. 4:8).

⁷ Sar dujto, o Isus savršeno oponašinđa pe Dade. Odolese, ov šajinđa te phenel: „Ko dikhlja man, dikhlja hem e Dade“ (Jov. 14:9). Amen šaj te oponašina e Isusese osobine hem o način sar ov ponašinđa pe premalo avera. Na primer, ov mothovđa sažaljenje premalo jekh gubavco, samilost premali jekh romni  koja hine but nabormi hem saosećanje premalo okola kola našalđe nekas. Ked amen oponašinaja e Isusese osobine, amen ađahar oponašinaja e Jehova (Mar. 1:40, 41; 5:25-34; Jov. 11:33-35). So pobuter oponašinaja e Jehova ka ova sa popaše oleja.

8. Objasnin sar odova so đaja palo e Isusese korakija ka pomožini amen te „pobedina“ o sveto.

⁸ Ako đaja palo e Isusese korakija, odova ka pomožini amen te na mukha akava lošno sveto te cidel amen ando Jehova. I rat angleder te merel, o Isus phenđa: „Me pobedinđum o sveto“ (Jov. 16:33). Akale lafencar ov manglja te phenel so na dozvolinđa e manušenge stavija, olenge ciljija hem odova so on ćerđe te utičini upro leste. O Isus niked na bisterđa so ov alo ki phuv te proslavini e Jehovaso anav. Ama, so šaj te phena amendar? Ko akava sveto isi but buća kola šaj te ciden amen ando Jehova. Ako amenđe, sar hem e Isusese, e Jehovasi volja tani ko prvo than, hem amen ka „pobedina“ o sveto (1. Jov. 5:5).

9. So valjani te ćera te šaj te aćhova ko drumo kova legari ko večno životi?

⁹ Ako đaja palo e Isusese korakija, ka dobina večno životi. Ked jekh barvalo terno manuš pućlja e Isuse so valjani te ćerel te šaj zauvek te živini, ov odgovorinđa lese: „Ov mo učeniko“ (Mat. 19:16-21). Disave Jevrejenđe kola na verujinđe soj tano ov o Hrist, o Isus phenđa: „Mekle bakre [...] đana palo mande. Me ka dav len večno đivdipe“ (Jov. 10:24-29). Ði vaćerđa e Nikodimeja, kova hine član ando Sinedrion hem kova manglja te đanel pobuter ando olese sikljoviba, o Isus phenđa so okola kola mothovena „vera ano leste“ ka „ovel len večno đivdipe“ (Jov. 3:16). Amen mothovaja vera ko Isus ađahar so primeninaja odova so ov sikavđa hem oponašinaja odova so ov ćerđa. Ako ćeraja odova, ka aćhova ko drumo kova legari ko večno životi (Mat. 7:14).

10. So valjani te ćera te šaj šukar te upoznajina e Isuse? (Jovan 17:3)

¹⁰ Te bi šaj te đa ko sa palo e Isusese korakija, amen prvo mora šukar te upoznajina le. (Čitin Jovan 17:3.) Odova tano jekh proces kova trajini. Amen mora sa pošukar te upoznajina e Isusese. Odova značini te upoznajina olese osobine, oleso način sar razmislini hem olese merilija. Bizo obzir kobor berš hijam ko ćaćipe, sare mora hem ponodri te trudina amen pošukar te upoznajina e Jehova hem olese Ćhave.

11. Sostar vaćerena o štar jevanđelja?

¹¹ Sebepi so manglja pošukar te upoznajina olese Ćhave, o Jehova dinđa te pisinen pe ko oleso Lafi o štar jevanđelja. Koro lende pisini ando e Isuseso životi hem andi olesi služba. Akala knjige mothovena amenđe so o  Isus phenđa, so ćerđa hem sar razmislinđa. O jevanđelja pomožinena amenđe hor te razmislina ando e Isuseso primer (Jevr. 12:3). Akala štar jevanđelja mothovena amenđe o korakija kola o Isus aćhavđa palo peste. Ði proučinaja o jevanđelja amen sa pošukar upoznajinaja e Isuse hem ađahar šaj te đa ko sa palo olese korakija.

12. So valjani te ćera te šaj pobuter te sikljova ando jevanđelja?

¹² Te šaj te sikljova ando jevanđelja na valjani samo te čitina len. Mora te odvojina vreme temeljno te proučina len hem hor te razmislina olendar. (Uporedin e stihoja ando Isus Navin 1:8, fusnota.) Hajde te dikha duj predlogija kola ka pomožinen amenđe hor te razmislina ando jevanđelja hem te primenina odova so čitinaja koro lende.

13. Sar šaj te ćere tuće slika ki godi đi čitineja o jevanđelja?

¹³ Sar prvo, đi čitineja o jevanđelja ćer tuće slika ki godi. Zamislin so dikheja, šuneja hem osetineja odova so desini pe ko izveštaj. Te šaj te ćere odova, istražin o izveštaj ko publikacije kola dela amen e Jehovasi organizacija. Isto ađahar, istražin o kontekst. Odova značini te čitine ando događaja kola desinđe pe angleder hem palo odova izveštaj kova čitineja. Rode pobuter informacije ando manuša hem ando thana kolendar vaćeri pe othe. O izveštaj kova proučineja uporedin odoleja so olestar pisini ko aver jevanđelje. Disavo puti jekh pisco ando jekh jevanđelje spomini disavo važno detalji kova aver pisco na spomini.

14-15. So šaj te ćera te šaj te primenina odova so sikljiljam ando jevanđelja?

¹⁴ Sar dujto, primenin ko to životi odova so čitinđan ko jevanđelja. (Jov. 13:17). Palo odova so temeljno istražinđan jekh izveštaj ando jevanđelja, puć kokri tut: „Da li isi diso ando izveštaj so šaj te primeninav ko mo životi? Sar šaj akava te koristinav te pomožinav nekase?“ Razmislin andi disavi konkretno  osoba hem palo odova ljubazno hem taktično vaćer olaja odova so sikljiljan.

¹⁵ Akana ka dikha sar šaj te primenina akala duj predlogija. Hajde te razmotrina o izveštaj andi ćorori udovica kola o Isus posmatrinđa ko hram.

16. Vaćer sar zamislineja odova so desini pe ko Marko 12:41.

¹⁶ Ćer tuće slika ki godi ando akava izveštaj. (Čitin Marko 12:41.) Pokušin te zamisline so desini pe. Akana tano 11. nisan 33. berš, nevi era. O Isus ka merel pana nekobor dive. Ov već više ando ekvaš o dive sikavi ko hram. O religiozna vođe protivinena pe olese. Hari angleder, disave olendar pućlje le ko dinđa le autoritet te ćerel odova so ćerela. A avera pućlje le disave pućiba ko kola mislinđe so ov na đanela o odgovor (Mar. 11:27-33; 12:13-34). Akana o Isus đala ko jekh aver deo ando hram. Dikhela o kasice aso prilogija, odolese verovatno tano akana ko deo kova vićini pe dvorište aso romnja. Ov bešela hem dikhela sar o manuša ćhivena o pare ki kasica. Dikhela sar o barvale manuša ćhivena po prilog. Verovatno bešela odobor paše, so šunela o zvuk ando pare đi perena ki kasica.

17. So ćerđa i ćorori udovica kolatar vaćeri pe ko Marko 12:42?

¹⁷ Čitin Marko 12:42. Palo disavo vreme, o Isus zapazini jekha romnja. Oj tani jekh ćorori udovica (Luka 21:2). Olako životi tano but pharo. Verovatno nane la ni dovoljno pare te ćinel pese o buća kola valjanena laće aso životi. Ama, ipak avela đi i kasa hem bizo te privucini averengi pažnja, oj ćhivela duj tikne novčićija kola verovatno jedva šunđona đi perena ki kasa. O Isus đanela so oj ćhivđa duj tikne novčićija, najtikne novčićija kola koristinđe pe ko odova vreme. Odova nane dovoljno te ćinel pe nijekh vrapco, kova hine jekh ando najeftina ćiriklja aso habe.

18. Premalo Marko 12:43, 44, so o Isus phenđa ando prilog kova dinđa i udovica?

¹⁸ Čitin Marko 12:43, 44. O Isus tano but oduševimo odoleja so ćerđa akija udovica. Odolese, vićini pe učenikonen te phenel lenđe odova. Ov phenela: „Akija ćorori udovica ćhivđa pobuter ando sa kola ćhivena pare ki kasica aso prilogija.“ Palo odova, ov phenela: „Sare [posebno o barvale] dinđe ando po viško, a oj ando po ćororipe dinđa sa so hine la aso životi.“ Ked akija verno udovica dinđa o zadnja pare kola hine la odova dive, oj tegani mukhlja po životi ko e Jehovase vasta (Ps. 26:3).

19. Koja važno buti šaj te sikljova ando e Isusese lafija kola phenđa andi ćorori udovica?

¹⁹ Primenin akava izveštaj ko toklo životi. Puć kokri tut: „So šaj te sikljovav ando e Isusese lafija kola phenđa andi akija udovica?“ Razmislin andi udovica. Oj bi sigurno mangela te del pobuter e Jehovase. Ama, oj dinđa e Jehovase sa so hine la, dinđa le poklo najšukar. O Isus đanđa so o prilog kova dinđa i udovica hine but dragoceno anglo olese Dadese jaćha. Ando akava sikljovaja jekh važno buti: O Jehova tano zadovoljno amencar ked daja olese amaro najšukar, a odija tani amari služba celone vileja hem celona dušaja (Mat. 22:37; Kol. 3:23). O Jehova tano bahtalo ked dikhela so amen ćeraja sa so šaj ki služba. Odova načelo odnosini pe ko vreme hem ki snaga kola daja e Jehovase, na primer ked đaja ki služba hem ked učestvujinaja ko sastankija.

20. Sar šaj te primenine o izveštaj kotar i ćorori udovica? Vaćer jekh primer.

²⁰ Sar šaj te primenine odova so sikljiljan ando akava izveštaj? Pokušin te razmisline ando disavo phral ja andi disavi phen kolen  šaj te ohrabrine ađahar so ka phene lenđe so o Jehova cenini olengo trud. Na primer, da li đaneja disave phure phenja koja osetini pe so više nane korisno odolese soj tani nabormi hem so nane la snaga te ćerel ki služba e Jehovase odova so šajinđa angleder. Ja razmislin ando disavo phral kova isi le but pharo nabormipe kova dugo trajini, sebepi kova našti te avel redovno ko sastankija. Pomožin lenđe ađahar so ka phene diso so šaj te ohrabrini len (Ef. 4:29). Vaćer lenđe diso ohrabrujuće so sikljiljan ando izveštaj kotar i ćorori udovica. Tekle ohrabrujuća lafija šaj te podsetini len ko odova soj tano o Jehova zadovoljno amencar ked daja amaro najšukar olese (Posl. 15:23; 1. Sol. 5:11). Ked pohvalineja averen sebepi so dena poklo najšukar e Jehovase, kobor god odova te ovel tikno, tu ađahar đaja palo e Isusese korakija ko sa.

21. So hijan odlučno te ćere?

²¹ Kobor hijam zahvalna so o jevanđelja vaćerena amenđe but buća ando e Isuseso životi! Odolese, amen šaj te oponašina le hem te đa palo olese korakija ko sa. Sose ne bi ko toklo lično ili porodično proučibe istražineja diso pobuter ando jevanđelja? Ako mangeja te pomožini tuće asavko proučibe, tegani đi proučineja ćer tuće slike ki godi hem primenin odova so sikljiljan ko toklo životi. Te šaj te oponašina odova so o Isus ćerđa, amen valjani te šuna odova so ov phenđa. Ko aver članko ka dikha so šaj te sikljova ando e Isusese lafija kola phenđa angleder te merel.